ຕອນບ່າຍ ວັນທີ 22 ມັງກອນ 2025 ນີ້, ສະພາປະຊາຊົນແຂວງ ສາລະວັນ ໄດ້ຈັດກອງປະຊຸມ ສະຫຼຸບຕີລາຄາ ແລະ ຖອດຖອນບົດຮຽນກ່ຽວກັບການກະກຽມ ແລະ ດຳເນີນກອງປະຊຸມສະໄໝສາມັນ ເທື່ອທີ 8 ຂອງສະພາປະຊາຊົນ ແຂວງສາລະວັນ ຊຸດທີ II; ໂດຍການເປັນປະທານ ຂອງທ່ານ ສົມພອນ ແສງສຸລິຈັນ ເລຂາທິການ ສະພາປະຊາຊົນແຂວງ ເຂົ້າຮ່ວມມີບັນດາທ່ານ ຄະນະກຳມະການ, ຄະນະເລຂາທິການ, ສະມາຊິກສະພາປະຊາຊົນແຂວງ ປະຈໍາເຂດເລືອກຕັ້ງເມືອງ (ເຂົ້າຜ່ານລະບົບວີດີໂອທາງໄກ), ຫົວໜ້າ-ຮອງຫົວໜ້າຂະແໜງການພາຍໃນສະພາປະຊາຊົນແຂວງ ເຂົ້າຮ່ວມ;

ກອງປະຊຸມ ໄດ້ຮັບຟັງການຜ່ານຮ່າງບົດສະຫຼຸບຖອດຖອນບົດຮຽນການກະກຽມ ແລະ ດຳເນີນກອງປະຊຸມສະໄໝສາມັນ ເທື່ອທີ 8 ຂອງສະພາປະຊາຊົນ ແຂວງສາລະວັນ ຊຸດທີ II ແລະ ກອງປະຊຸມ ປະຈໍາປີ 2024 ແລະ ທິດທາງແຜນການ ປີ 2025 ຂອງຄະນະສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 14 ຈາກທ່ານ ບຸນໂຮມ ບົວວິໄລ ຮອງເລຂາທິການ ສະພາປະຊາຊົນແຂວງ ເຊິ່ງຍົກໃຫ້ເຫັນ ດ້ານດີຜົນງານ, ດ້ານອ່ອນ ແລະ ຂໍ້ຄົງຄ້າງ ເປັນຕົ້ນ: ດ້ານການກະກຽມເນື້ອໃນກອງປະຊຸມ, ດ້ານເວລາການປະກອບຄໍາຂອງສະມາຊິກສະພາປະຊາຊົນແຂວງ, ບໍລິຫານ-ພິທີການ ແລະ ວຽກງານປິ່ນອ້ອມອື່ນໆ…ຈາກນັ້ນ, ຜູ້ເຂົ້າຮ່ວມກອງປະຊຸມ ໄດ້ມີຄໍາຄິດເຫັນ, ແລກປ່ຽນບົດຮຽນເຊິ່ງກັນ ແລະ ກັນ ຢ່າງກົງໄປກົງມາ ເພື່ອນຳເອົາບັນດາເນື້ອໃນຈິດໃຈກອງປະຊຸມ ຖອດຖອນເປັນບົດຮຽນຜ່ານການຈັດຕັ້ງປະຕິບັດຕົວຈິງ ນຳໄປປັບປຸງຈັດຕັ້ງປະຕິບັດວຽກງານ ໃນກອງປະຊຸມສະໄໝສາມັນ ເທື່ອຕໍ່ໄປໃຫ້ມີຜົນສຳເລັດດີຂື້ນເລື້ອຍໆ;
ຕອນທ້າຍ ປະທານກອງປະຊຸມ ໄດ້ມີຄຳເຫັນໂອ້ລົມ ກ່ອນອື່ນທ່ານໄດ້ສະແດງຄວາມຍ້ອງຍໍຊົມເຊີຍຕໍ່ພະນັກງານ-ລັດຖະກອນ ພາຍໃນສະພາປະຊາຊົນແຂວງ ທີ່ໄດ້ພ້ອມກັນເອົາໃຈໃສ່ປະຕິບັດໜ້າທີ່ຂອງຕົນດ້ວຍຄວາມຮັບຜິດຊອບສູງ ແລະ ມີຜົນສຳເລັດໜ້າວຽກຕ່າງໆ ຕາມການມອບໝາຍໃນການກະກຽມ ແລະ ດຳເນີນກອງປະຊຸມສະໄໝສາມັນ ເທື່ອທີ 8 ຂອງສະພາປະຊາຊົນ ແຂວງສາລະວັນ ຊຸດທີ II ມີຜົນສຳເລັດອັນຈົບງາມ; ພ້ອມນັ້ນ, ທ່ານຍັງໄດ້ເນັ້ນໜັກໃຫ້ພະນັກງານທັງໝົດ ຈົ່ງສືບຕໍ່ເສີມຂະຫຍາຍດ້ານດີຜົນງານ, ປັບປຸງແກ້ໄຂບັນຫາ ທີ່ຍັງຄົງຄ້າງ ເປັນຕົ້ນ: ເພີ່ມທະວີຄວາມເປັນເຈົ້າການໃນການກະກຽມເນື້ອໃນກອງປະຊຸມ, ຂະແໜງການທີ່ກ່ຽວຂ້ອງໃຫ້ມີຄວາມຄ່ອງຕົວ, ວ່ອງໄວ ແລະ ທັນກຳນົດເວລາ ເພື່ອເປັນບົດຮຽນໃຫ້ແກ່ການດຳເນີນກອງປະຊຸມຄັ້ງຕໍ່ໄປ ໃຫ້ຮັບປະກັນທາງດ້ານເນື້ອໃນ, ບໍລິຫານ-ພິທີການ ທີ່ມີຄຸນນະພາບດີຂື້ນກວ່າເກົ່າ;

ພາບ-ຂ່າວ ດີລໍາພົນ ພົມມະຈັນ