(ສພຊ) ກອງປະຊຸມສະຫຼຸບການຕິດຕາມກວດກາການປະເມີນຜົນການຈັດຕັ້ງປະຕິບັດກົດໝາຍຂົງເຂດປ້ອງກັນຄວາມສະຫງົບ 1 ສະບັບ ເພື່ອປັບປຸງເນື້ອໃນກົດໝາຍໃຫ້ມີຄວາມລະອຽດ, ຖືກຕ້ອງ ແລະ ສອດຄ່ອງກັບສະພາບຄວາມເປັນຈິງຂອງກຳລັງປ້ອງກັນຄວາມສະຫງົບໃນປັດຈຸບັນ, ໃນວັນທີ 11 ຕຸລາ 2023 ທີ່ກະຊວງປ້ອງກັນຄວາມສະຫງົບ ໂດຍການເປັນປະທານຂອງທ່ານ ພົນໂທ ສຸວອນ ເລືອງບຸນມີ ກຳມະການສູນກາງພັກ, ຮອງປະທານສະພາແຫ່ງຊາດ; ມີທ່ານ ພົນໂທ ກົງທອງ ພົງວິຈິດ ກຳມະການສູນກາງພັກ, ຮອງລັດຖະມົນຕີກະຊວງປ້ອງກັນຄວາມສະຫງົບ; ມີບັນດາທ່ານກຳມາທິການຂອງສະພາແຫ່ງຊາດ, ຮອງຫົວໜ້າຫ້ອງວ່າການສຳນັກງານປະທານປະເທດ, ສຳນັກງານນາຍົກລັດຖະມົນຕີ, ອົງການກວດກາແຫ່ງລັດ, ຮອງລັດຖະມົນຕີກະຊວງຍຸຕິທຳ, ສະຫະພັນນັກຮົບເກົ່າແຫ່ງຊາດລາວ, ຄະນະສະມາຊິກສະພາແຫ່ງຊາດ, ຄະນະກຳມະການ ປກຊ-ປກສ ຂອງສະພາແຫ່ງຊາດຂັ້ນແຂວງ 17 ແຂວງ ແລະ ພາກສ່ວນທີ່ກ່ຽວຂ້ອງອ້ອມຂ້າງກະຊວງເຂົ້າຮ່ວມ.

ທ່ານ ພົນຕີ ຄຳກິ່ງ ຜຸຍຫຼ້າມະນີວົງ ຮອງລັດຖະມົນກະຊວງປ້ອງກັນຄວາມສະຫງົບ, ຫົວໜ້າຄະນະປະເມີນກົດໝາຍຂອງກະຊວງປ້ອງກັນຄວາມສະຫງົບ ກ່າວວ່າ: ກົດໝາຍວ່າດ້ວຍກຳລັງປ້ອງກັນຄວາມສະຫງົບປະຊາຊົນ ໄດ້ຮັບຮອງໂດຍສະພາແຫ່ງຊາດ ສະບັບເລກທີ 03/ສພຊ, ລົງວັນທີ 2 ກໍລະກົດ 2007 ແລະ ມີການປັບປຸງໜຶ່ງຄັ້ງ ໃນປີ 2017, ສ່ວນສະບັບປັງປຸງປີ 2017 ມີພາກ, ໝວດ ແລະ ມາດຕາ ທີ່ຂຶ້ນກັບ ປະກອບມີ 9 ພາກ, 6 ໝວດ ແລະ 55 ມາດຕາ ເຊິ່ງກົດໝາຍສະບັບນີ້ ໄດ້ກຳນົດທີ່ຕັ້ງ, ພາລະບົດບາດ, ສິດ ແລະ ໜ້າທີ່ຂອງກຳລັງປ້ອງກັນຄວາມສະຫງົບ.

ເພື່ອຕອບສະໜອງໄດ້ຕາມຄວາມຮຽກຮ້ອງຕ້ອງການໃນຕໍ່ໜ້າ, ທີ່ເຫັນວ່າມີຄວາມຈຳເປັນ ຍ້ອນສະພາບການຈັດຕັ້ງປະຕິບັດວຽກງານໃນປັດຈຸບັນຂອງກຳລັງປ້ອງກັນຄວາມສະຫງົບ ແມ່ນມີບາງເນື້ອໃນຄວນປັບປຸງໃຫ້ສອດຄ່ອງກັບສະພາບຄວາມເປັນຈິງ.

ທ່ານ ພົນໂທ ສຸວອນ ເລືອງບຸນມີ ກ່າວວ່າ: ກອງປະຊຸມຕິດຕາມກວດກາການປະເມີນການຈັດຕັ້ງປະຕິບັດກົດໝາຍຂົງເຂດປ້ອງກັນຄວາມສະຫງົບຄັ້ງນີ້ ແມ່ນພ້ອມກັນຄົ້ນຄວ້າປະກອບຄຳເຫັນ 1 ສະບັບ ໃນຂົງເຂດປ້ອງກັນຄວາມສະຫງົບ ຄືກົດໝາຍວ່າດ້ວຍກຳລັງປ້ອງກັນຄວາມສະຫງົບປະຊາຊົນ (ສະບັບປັບປຸງ) ເຊິ່ງເປັນການປະເມີນ ແລະ ຕີລາຄາໃນການຈັດຕັ້ງປະຕິບັດຕົວຈິງ ອາດຈະມີຫຼາຍມາດຕາທີ່ຍັງບໍ່ທັນສອດຄ່ອງກັບສະພາບຄວາມເປັນຈິງ ແລະ ບໍ່ທັນຕອບສະໜອງໄດ້ຕາມຄວາມຮຽກຮ້ອງຕ້ອງການຂອງວຽກງານປ້ອງກັນຄວາມສະຫງົບໃນໄລຍະໃໝ່ ຄືການຈັດຕັ້ງປະຕິບັດຕົວຈິງຍັງບໍ່ທັນເຂັ້ມງວດເດັດຂາດ, ບໍ່ສັກສິດ, ຈຶ່ງໄດ້ດຳເນີນປະເມີນຊອກໃຫ້ເຫັນຂໍ້ສະດວກ, ຜົນສັກສິດ, ຄວາມສອດຄ່ອງຂອງກົດໝາຍ ລວມທັງຂໍ້ຄົງຂ້າງທີ່ມີຄວາມຫຍຸ້ງຍາກ ແລະ ບໍ່ສາມາດຈັດຕັ້ງປະຕິບັດໄດ້ ເພື່ອກ້າວໄປເຖິງການຄົ້ນຄວ້າປັງປຸງໃຫ້ດີຂຶ້ນກວ່າເກົ່າ ແນໃສ່ເຮັດໃຫ້ການຄຸ້ມຄອງຕິດຕາມກວດກາການຈັດຕັ້ງ ແລະ ການເຄື່ອນໄຫວວຽກງານປ້ອງກັນຄວາມສະຫງົບ ດ້ວຍກົດໝາຍໃຫ້ມີຄວາມສັກສິດເຂັ້ມງວດຫຼາຍຂຶ້ນ, ຜົນຂອງການປະເມີນກົດໝາຍໃນຂົງເຂດວຽກງານປ້ອງກັນຄວາມສະຫງົບຄັ້ງນີ້ ຈະນຳເຂົ້າຜ່ານຄຳເຫັນຂອງຄະນະປະຈຳສະພາແຫ່ງຊາດ ກ່ອນຈະນຳເຂົ້າລາຍງານ ເພື່ອຈະໄດ້ພິຈາລະນາໃນກອງປະຊຸມສະໄໝສາມັນ ເທື່ອທີ 6 ຂອງສະພາແຫ່ງຊາດ ຊຸດທີ IX ໃນມໍ່ໆນີ້.