(ສພຊ) ເພື່ອຕິດຕາມກວດກາ ແລະ ຊຸກຍູ້ ການປະເມີນການຈັດຕັ້ງປະຕິບັດກົດໝາຍຂົງເຂດຍຸຕິທໍາ ຈໍານວນ 4 ສະບັບຄື: ກົດໝາຍວ່າດ້ວຍສານປະຊາຊົນ, ກົດໝາຍວ່າດ້ວຍອົງການໄອຍະການປະຊາຊົນ, ກົດໝາຍວ່າດ້ວຍການດໍາເນີນຄະດີແພ່ງ ແລະ ກົດໝາຍວ່າດ້ວຍການດໍາເນີນຄະດີອາຍາ; ລົງເກັບກໍາຂໍ້ມູນ, ຮັບຟັງຄໍາຄິດຄໍາເຫັນຂອງການນໍາທ້ອງຖິ່ນ ແລະ ຄໍາເຫັນຂອງປະຊາຊົນຕໍ່ບັນຫາທີ່ພົ້ນເດັ່ນໃນຂົງເຂດຍຸຕິທໍາ ໂດຍສະເພາະບັນຫາທີ່ກ່ຽວຂ້ອງກັບຄໍາຮ້ອງຂໍຄວາມເປັນທໍາຂອງປະຊາຊົນ; ສະຫຼຸບຕີລາຄາການຈັດຕັ້ງປະຕິບັດ 4 ກົດໝາຍ ເພື່ອລາຍງານຕໍ່ກອງປະຊຸມສະໄໝສາມັນເທື່ອທີ 4 ຂອງສະພາແຫ່ງຊາດ ຊຸດທີ IX ພິຈາລະນາ ແລະ ຮັບຮອງ; ສະຫຼຸບຖອດຖອນບົດຮຽນ ໃຫ້ແກ່ການຕິດຕາມກວດກາການປະເມີນການຈັດຕັ້ງປະຕິບັດກົດໝາຍ ຂົງເຂດຕ່າງໆໃນຕໍ່ໜ້າ ແລະ ທົດລອງນໍາໃຊ້ຮ່າງຄູ່ມືການຕິດຕາມກວດກາການປະເມີນການຈັດຕັ້ງປະຕິບັດກົດໝາຍ; ໃນວັນທີ 31 ຕຸລາ 2022 ທີ່ຫ້ອງປະຊຸມຂອງເມືອງວັງວຽງ ແຂວງວຽງຈັນ, ກຳມາທິການຍຸຕິທຳ ສະພາແຫ່ງຊາດ ໄດ້ຈັດກອງປະຊຸມການຈັດຕັ້ງປະຕິບັດນໍາໃຊ້ປຶ້ມຄູ່ມື ໃນການຕິດຕາມກວດກາການປະເມີນການຈັດຕັ້ງປະຕິບັດກົດໝາຍ (ຂົງເຂດຍຸຕິທໍາ 4 ສະບັບ) ໂດຍການເປັນປະທານຂອງທ່ານ ສຈ. ປອ. ຈະເລີນ ເຍຍປາວເຮີ ຮອງປະທານສະພາແຫ່ງຊາດ, ຜູ້ຊີ້ນຳວຽກງານຂົງເຂດຍຸຕິທໍາ; ມີປະທານ-ຮອງປະທານກຳມາທິການຍຸຕິທຳ, ຮອງປະທານກຳມາທິການກົດໝາຍ, ຮອງປະທານກຳມາທິການປ້ອງກັນຊາດ-ປ້ອງກັນຄວາມສະຫງົບ; ຮອງຫົວໜ້າອົງການໄອຍະການປະຊາຊົນສູງສຸດ, ຮອງປະທານສານປະຊາຊົນສູງສຸດ, ຮອງປະທານສານປະຊາຊົນພາກກາງ, ຮອງປະທານສານທະຫານຂັ້ນສູງ; ຕາງໜ້າຈາກກະຊວງຍຸຕິທຳ, ອົງການກວດກາລັດ, ຫ້ອງວ່າການສຳນັກງານປະທານປະເທດ, ຫ້ອງວ່າການສຳນັກງານນາຍົກລັດຖະມົນຕີ, ອົງການໄອຍະການປະຊາຊົນພາກກາງ; ຄະນະກົມ, ຄະນະພະແນກ ພ້ອມດ້ວຍພະນັກງານ-ວິຊາການທີ່ກ່ຽວຂ້ອງເຂົ້າຮ່ວມ.
ກອງປະຊຸມ ໄດ້ຮັບຟັງການສະເໜີບົດລາຍງານຂອງສານປະຊາຊົນສູງສຸດ ກ່ຽວກັບຜົນການປະເມີນກົດໝາຍວ່າດ້ວຍສານປະຊາຊົນ ແລະ ກົດໝາຍວ່າດ້ວຍການດໍາເນີນຄະດີແພ່ງ ຈາກທ່ານ ບູນຂວາງ ທະວີສັກ ຮອງປະທານສານປະຊາຊົນສູງສຸດ; ບົດລາຍງານ ຂອງອົງການໄອຍະການປະຊາຊົນສູງສຸດ ກ່ຽວກັບຜົນການປະເມີນກົດໝາຍວ່າດ້ວຍອົງການໄອຍະການປະຊາຊົນ ແລະ ກົດໝາຍວ່າດ້ວຍການດໍາເນີນຄະດີອາຍາ ຈາກທ່ານ ຄຳເພັດ ສົມວໍລະຈິດ ຮອງຫົວໜ້າອົງການໄອຍະການປະຊາຊົນສູງສຸດ; ຈາກນັ້ນ, ປະທານກອງປະຊຸມ ໄດ້ມີຄຳຖາມເຈາະຈີ້ມ ເພື່ອໃຫ້ຜູ້ເຂົ້າຮ່ວມກອງປະຊຸມໄດ້ປະກອບຄຳຄິດຄຳເຫັນໃສ່ບັນດາບົດລາຍງານດັ່ງກ່າວ; ພ້ອມນັ້ນ, ກອງປະຊຸມ ໄດ້ຮັບຟັງການຊີ້ແຈງຈາກພາກສ່ວນທີ່ກ່ຽວຂ້ອງຕື່ມອີກ.
ໂອກາດນີ້, ທ່ານ ສຈ. ປອ. ຈະເລີນ ເຍຍປາວເຮີ ໄດ້ມີຄຳເຫັນກ່າວເປີດກອງປະຊຸມວ່າ: ເພື່ອຕິດຕາມກວດກາ ແລະ ຊຸກຍູ້ ການປະເມີນການຈັດຕັ້ງປະຕິບັດກົດໝາຍຂົງເຂດຍຸຕິທຳ 4 ສະບັບ ໂດຍສະເພາະແມ່ນກົດໝາຍວ່າດ້ວຍສານປະຊາຊົນ; ກົດໝາຍວ່າດ້ວຍອົງການໄອຍະການປະຊາຊົນ; ກົດໝາຍວ່າດ້ວຍການດໍາເນີນຄະດີແພ່ງ ແລະ ກົດໝາຍວ່າດ້ວຍການດໍາເນີນຄະດີອາຍາ ທັງເປັນການເກັບກຳຂໍ້ມູນ, ຟັງຄໍາຄິດຄໍາເຫັນ ຕໍ່ບັນຫາທີ່ພົ້ນເດັ່ນໃນຂົງເຂດຍຸຕິທຳ ເປັນຕົ້ນບັນຫາທີ່ກ່ຽວຂ້ອງກັບຄຳຮ້ອງຂໍຄວາມເປັນທຳຂອງປະຊາຊົນ; ພ້ອມກັນນີ້, ກໍເພື່ອເປັນການສະຫຼຸບຕີລາຄາ, ດ້ານດີ, ຂໍ້ຄົງຄ້າງ, ຖອດຖອນບົດຮຽນ ກ່ຽວກັບການຈັດຕັ້ງປະຕິບັດກົດໝາຍຂົງເຂດຍຸຕິທຳ 4 ສະບັບດັ່ງກ່າວ ເພື່ອເປັນຂໍ້ມູນລາຍງານຕໍ່ກອງປະຊຸມສະໄໝສາມັນເທື່ອທີ 4 ຂອງສະພາແຫ່ງຊາດ ຊຸດທີ IX ທີ່ຈະໄຂຂຶ້ນໃນທ້າຍປີ 2022 ນີ້ ແລະ ທົດລອງນຳໃຊ້ຮ່າງຄູ່ມືການຕິດຕາມກວດກາ ການປະເມີນການຈັດຕັ້ງປະຕິບັດກົດໝາຍ ເຊິ່ງບັນດາເອກະສານທີ່ກອງປະຊຸມໄດ້ຍົກຂຶ້ນມານຳສະເໜີຄັ້ງນີ້ ເຫັນວ່າເປັນເອກະສານທີ່ສຳຄັນ ແລະ ຕ້ອງໄດ້ຮີບຮ້ອນສຸມໃສ່ຄົ້ນຄວ້າ, ປະກອບຄຳຄິດຄຳເຫັນ ແລ້ວລາຍງານຂໍທິດຊີ້ນຳຈາກຄະນະປະຈຳສະພາແຫ່ງຊາດ ພິຈາລະນາ ເພື່ອນຳມາເປັນບ່ອນອີງໃນການຕິດຕາມ ກວດກາ ການປະເມີນການຈັດຕັ້ງປະຕິບັດບັນດາກົດໝາຍອື່ນ ໃນແຕ່ລະຂົງເຂດໃນຕໍ່ໜ້າ ທັງເປັນຂໍ້ມູນສຳຄັນໃຫ້ແກ່ການກະກຽມບົດປະກອບຄຳເຫັນຂອງຄະນະປະຈຳສະພາແຫ່ງຊາດ ຕໍ່ກອງປະຊຸມສະໄໝສາມັນເທື່ອທີ 4 ຂອງສະພາແຫ່ງຊາດ ຊຸດທີ IX ກ່ຽວກັບວຽກງານດັ່ງກ່າວ; ພ້ອມນັ້ນ, ທ່ານຍັງໄດ້ຮຽກຮ້ອງໃຫ້ບັນດາທ່ານທີ່ເຂົ້າຮ່ວມກອງປະຊຸມ ຈົ່ງຍົກສູງຄວາມຮັບຜິດຊອບຂອງຕົນ ຕັ້ງໃຈຮັບຟັງ ແລະ ສຸມທຸກສະຕິປັນຍາ ເພື່ອຄົ້ນຄວ້າປະກອບຄຳເຫັນຢ່າງກົງໄປກົງມາເຂົາໃສ່ເນື້ອໃນຕ່າງໆ ທີ່ກ່າວມາຂ້າງເທິງນັ້ນ ເພື່ອປັບປຸງເຮັດໃຫ້ມີເນື້ອໃນສົມບູນ, ຄົບຖ້ວນ, ສອດຄ່ອງກັບສະພາບຕົວຈິງ ແລະ ພາວະວິໄສ.
ກອງປະຊຸມ, ໄດ້ຮັບການສະໜັບສະໜູນດ້ານງົບປະມານຈາກມູນນິທິເວສມິນສະເຕີ ເພື່ອປະຊາທິປະໄຕ (WFD) ແລະ ງົບປະມານສົມທົບຈາກຄະນະເລຂາທິການສະພາແຫ່ງຊາດ.
