(ສພຊ) ລະຫວ່າງວັນທີ 8-9 ກຸມພາ 2023 ທີ່ແຂວງເຊກອງ ກໍາມາທິການຍຸຕິທໍາ ສະພາແຫ່ງຊາດ ໄດ້ຈັດກອງປະຊຸມສໍາມະນາຍົກສູງຂີດຄວາມສາມາດໃນການຕິດຕາມກວດກາວຽກງານຍຸຕິທໍາ ໂດຍການເປັນປະທານຮ່ວມລະຫວ່າງທ່ານ ຄໍາແພງ ວິລະພັນ ປະທານກໍາມາທິການຍຸຕິທໍາສະພາແຫ່ງຊາດ ແລະ ທ່ານ ດົງເພັດ ພະຍົນ ປະທານສະພາປະຊາຊົນແຂວງເຊກອງ, ມີທ່ານເລຂາທິການສະພາປະຊາຊົນແຂວງເຊກອງ, ບັນດາທ່ານສະມາຊິກສະພາແຫ່ງຊາດ, ສະມາຊິກສະພາປະຊາຊົນແຂວງ ສັງກັດກຳມາທິການຍຸຕິທຳ ຈາກ 7 ແຂວງຄື: ບໍລິຄໍາໄຊ, ຄໍາມ່ວນ, ສະຫວັນນະເຂດ, ສາລະວັນ, ຈໍາປາສັກ, ເຊກອງ ແລະ ອັດຕະປື) ແລະ ແຂກຖືກເຊີນເຂົ້າຮ່ວມ ເຊິ່ງກອງປະຊຸມຄັ້ງນີ້ ໄດ້ຮັບການສະໜັບສະໜູນທຶນຈາກ ໂຄງການຊ່ວຍເຫຼື່ອ ຂອງ ມູນນິທິເວສມິນສະເຕີ (WFD).

ທັງນີ້ ເພື່ອເຮັດໃຫ້ການຕິດຕາມກວດກາວຽກງານໃນຂົງເຂດຍຸຕິທໍາ ໄດ້ຮັບການຈັດຕັ້ງປະຕິບັດຢ່າງມີໝາກຜົນ ຈຶ່ງມີຄວາມຈຳເປັນເພີ່ມທະວີ ແລະ ຍົກສູງຄຸນນະພາບຂອງ ສະມາຊິກສະພາແຫ່ງຊາດ ທີ່ສັງກັດກຳມາທິການຍຸຕິທຳ ໃຫ້ຮັບຮູ້, ເຂົ້າໃຈ ແລະ ສາມາດປະຕິບັດພາລະບົດບາດຕິດຕາມກວດກາ ຕາມຂອບເຂດສິດ ແລະ ໜ້າທີ່ຂອງຕົນ ໄດ້ເປັນຢ່າງດີ; ຍົກສູງຂີດຄວາມສາມາດຂອງພະນັກງານ-ລັດຖະກອນ ຂອງກໍາມາທິການຍຸຕິທໍາ ແລະ ຄະນະກຳມະການຍຸຕິທໍາ ແລະ ປກຊ-ປກສ ສະພາປະຊາຊົນຂັ້ນແຂວງ ແລະ ການຄົ້ນຄວ້າ, ເກັບກຳຂໍ້ມູນ, ວິເຄາະວິໄຈ ແລະ ສະໜອງຂໍ້ມູນກ່ຽວກັບການຕິດຕາມກວດກາວຽກງານຍຸຕິທຳ ໃຫ້ແກ່ຄະນະກຳມາທິການຍຸຕິທຳ ສະພາແຫ່ງຊາດ ແລະ ຄະນະກໍາມະການຍຸຕິທໍາ ແລະ ປກຊ-ປກສ ໃນການປະກອບຄຳເຫັນ, ຊັກຖາມໃນທີ່ປະຊຸມ ໃນຖານະທີ່ເປັນຕົວແທນແຫ່ງສິດ ແລະ ຜົນປະໂຫຍດຂອງປະຊາຊົນ ໃນການຕິດຕາມກວດກາມີຜົນສັກສິດຍິ່ງຂຶ້ນ.

ກອງປະຊຸມ ໄດ້ຮັບຟັງການສະເໜີບົດການຕິດຕາມກວດກາຂອງສະພາແຫ່ງຊາດ ແລະ ການຕິດຕາມກວດກາວຽກງານຍຸຕິທຳ, ການສະເໜີບົດການຄົ້ນຄວ້າການແຕ່ງຕັ້ງ, ຍົກຍ້າຍ ຫຼື ປົດຕຳແໜ່ງບຸກຄະລາກອນຂອງສານປະຊາຊົນ; ຈາກນັ້ນ ຜູ້ເຂົ້າຮ່ວມ ໄດ້ພ້ອມກັນປະກອບຄຳຄິດຄຳເຫັນຢ່າງສ້າງສັນ, ມີຈຸດສຸມ ແລະ ກົງໄປກົງມາ; ກອງປະຊຸມ ຍັງໄດ້ແລກປ່ຽນບົດຮຽນ ແລະ ປະສົບການຂອງບາງເຂດເລືອກຕັ້ງ ໃນການຈັດຕັ້ງປະຕິບັດວຽກງານຕິດຕາມກວດກາຂອງຄະນະກຳມະການຍຸຕິທຳ, ປກຊ-ປກສ ສະພາປະຊາຊົນຂັ້ນແຂວງ ແລະ ແລກປ່ຽນບົດຮຽນການຕິດຕາມກວດກາໂດຍຜ່ານຄຳຮ້ອງຂໍຄວາມເປັນທຳ.

ໃນພິທີເປີດກອງປະຊຸມ, ທ່ານ ຄຳແພງ ວິລະພັນ ໄດ້ມີຄຳເຫັນຕໍ່ກອງປະຊຸມວ່າ: ກອງປະຊຸມສຳມະນາຍົກສູງຂີດຄວາມສາມາດ ໃນການຕິດຕາມກວດກາວຽກງານຍຸຕິທຳຄັ້ງນີ້ ມີຄວາມໝາຍສຳຄັນເປັນຢ່າງຍິ່ງ ບັນດາເນື້ອໃນທີ່ນຳມາພິຈາລະນາໃນກອງປະຊຸມຄັ້ງນີ້ ເຫັນວ່າມີຄວາມໝາຍສຳຄັນ ເຖິງວ່າຈະມີເວລາຈຳກັດ; ສະນັ້ນ ເພື່ອເຮັດໃຫ້ບັນດາເນື້ອໃນຂອງກອງປະຊຸມໄດ້ຮັບພິຈາລະນາ, ຄົ້ນຄວ້າຢ່າງເລິກເຊິ່ງ ຮຽກຮ້ອງມາຍັງບັນດາທ່ານຄະນະນຳ, ສະມາຊິກສະພາແຫ່ງຊາດ, ສະມາຊິກສະພາປະຊາຊົນແຂວງ, ຜູ້ແທນກອງປະຊຸມ ຈົ່ງນໍາໃຊ້ສິດປະຊາທິປະໄຕ ແລະ ເຊີດຊູຄວາມຮັບຜິດຊອບການເມືອງຂອງຕົນ ຕໍ່ກັບບັນດາເນື້ອໃນທີ່ນຳມາພິຈາລະນາໃນກອງປະຊຸມໃນຄັ້ງນີ້ ຢ່າງກົງໄປກົງມາ, ມີເຫດມີຜົນ ເພື່ອເຮັດໃຫ້ບັນດາເນື້ອໃນຕ່າງໆນັ້ນ ສາມາດຮັບຮອງເອົາ ແລະ ນຳໄປຈັດຕັ້ງຜັນຂະຫຍາຍ ໃນການຈັດຕັ້ງປະຕິບັດໜ້າທີ່ວຽກງານໃນຕໍ່ໜ້າ ໃຫ້ມີຜົນສຳເລັດຫຼາຍຂຶ້ນກວ່າເກົ່າ.

(ພາບ ແລະ ຂ່າວ: ສອນສັກ ວັນວິໄຊ)