(ສພຊ) ກອງປະຊຸມເຝິກອົບຮົມສ້າງຄວາມເຂັ້ມແຂງ ຍົກລະດັບໃຫ້ພະນັກງານ-ລັດຖະກອນຂອງກຳມາທິການວັດທະນະທຳ-ສັງຄົມ ປະຈຳປີ 2022 ຊຸດທີ 3 ໄດ້ຈັດຂຶ້ນໃນວັນທີ 9 ມີນາ 2023 ທີ່ຫ້ອງປະຊຸມເຮືອນພັກກະຊວງແຮງງານ ແລະ ສະຫວັດດີການສັງຄົມ ໂດຍການເປັນປະທານຂອງທ່ານ ນາງ ທຸມມາລີ ວົງພະຈັນ ປະທານກຳມາທິການວັດທະນະທຳ-ສັງຄົມ, ມີທ່ານ ບຸນລ້ອມ ແກ້ວບົວໂຮມ ຮອງປະທານກຳມາທິການ, ມີຫົວໜ້າ-ຮອງຫົວໜ້າກົມ ແລະ ພະນັກງານວິຊາການພາຍໃນກຳມາທິການເຂົ້າຮ່ວມຢ່າງພ້ອມພຽງ.

ໃນກອງປະຊຸມ ຜູ້ເຂົ້າຮ່ວມ ໄດ້ຮັບຟັງ ແລະ ຮຽນຮູ້ກ່ຽວກັບ ມາລະຍາດ-ພິທີການ ເຊິ່ງສະເໜີໂດຍວິທະຍາກອນທີ່ມາຈາກກົມພິທີການທູດ ກະຊວງການຕ່າງປະເທດ; ການຄົ້ນຄວ້າວິທະຍາສາດ, ບັນຫາ, ການຄັດເລືອກ ແລະ ການຈັດບຸລິມະສິດຂອງບັນຫາສຳລັບຄົ້ນຄວ້າ ເຊິ່ງສະເໜີໂດຍວິທະຍາກອນທີ່ມາຈາກສະຖາບັນສາທາລະນະສຸກສາດ ແລະ ການເເພດເຂດຮ້ອນ. ຈາກນັ້ນ, ບັນດາສຳມະນາກອນ ໄດ້ແບ່ງກຸ່ມເຝິກປະຕິບັດ, ສົນທະນາແລກປ່ຽນນຳກັນດ້ວຍບັນຍາກາດທີ່ຟົດຟື້ນ ແລະ ເຕັມໄປດ້ວຍຄວາມຮູ້.

ຈຸດປະສົງຂອງການເຝິກອົບຮົມຄັ້ງນີ້ ກໍເພື່ອຍົກສູງລະດັບຄວາມຮັບຮູ້ການເມືອງ-ແນວຄິດ, ຄວາມຮັບຜິດຊອບການເມືອງໃຫ້ແກ່ພະນັກງານ-ລັດຖະກອນ ພາຍໃນກຳມາທິການໃຫ້ສູງຂຶ້ນກວ່າເກົ່າ; ສ້າງຄວາມຮັບຮູ້ເຂົ້າໃຈທີ່ເປັນເອກະພາບ ແລະ ຖືກຕ້ອງຕໍ່ພາລະບົດບາດ, ສິດໜ້າທີ່ຂອງກຳມາທິການ; ສ້າງຄວາມເຂັ້ມແຂງກ່ຽວກັບວຽກງານເສນາທິການຄົ້ນຄວ້າ, ວິເຄາະ, ວິໄຈ ແລະ ສັງລວມບັນຫາ, ການຂຽນເອກະສານ, ບົດປະເພດຕ່າງໆໃຫ້ແກ່ກຳມາທິການ, ສະມາຊິກສະພາແຫ່ງຊາດທີ່ເປັນກຳມະການຂອງກຳມາທິການ, ຄະນະປະຈຳສະພາແຫ່ງຊາດ ໃຫ້ມີປະສິດທິພາບ ແລະ ປະສິດທິຜົນ.