​(ສພຊ) ເພື່ອຮັບປະກັນ​ການປະຕິບັດໜ້າທີ່ເປັນເສນາທິການທາງດ້ານວຽກງານສ້າງ ແລະ ປັບປຸງກົດໝາຍ ໃຫ້ແກ່ກຳມາທິການກົດໝາຍ ໄດ້ດຳເນີນໄປຢ່າງມີຄຸນນະພາບ, ປະສິດທິພາບ, ປະສິດທິຜົນ ຈຶ່ງມີຄວາມຈໍາເປັນຕ້ອງໄດ້ຍົກລະ ດັບໃຫ້ແກ່ພະນັກງານ-ລັດຖະກອນ ໄດ້ມີຄວາມຮູ້, ຄວາມສາມາດ ແລະ ກຳໄດ້ວຽກງານການສ້າງ ແລະ ປັບປຸງກົດໝາຍ ແລະ ວຽກງານອື່ນທີ່ປິ່ນອ້ອມ. ລະຫວ່າງ 11-12 ມັງກອນ 2024 ທີ່ສະພາແຫ່ງຊາດ (ສພຊ) ໄດ້ມີກອງປະຊຸມສຳມະນາຍົກລະດັບຄວາມຮູ້ກ່ຽວກັບວຽກສ້າງ ແລະ ປັບປຸງກົດໝາຍ ໃຫ້ແກ່ພະນັກງານ-ລັດຖະກອນພາຍໃນ ສພຊ ໂດຍການເປັນປະທານຂອງທ່ານ ປອ. ພູທອນ ວໍລະເພັດ ຮອງປະທານກຳມາທິການກົດໝາຍ; ມີບັນດາທ່ານຄະນະກົມ, ຄະນະພະແນກ, ອະດີດຫົວໜ້າກົມກົດໝາຍ, ວິທະຍາກອນຮັບເຊີນຈາກກະຊວງພາຍໃນ ແລະ ພະນັກງານ-ລັດຖະກອນ ທີ່ຮັບຜິດ ຊອບວຽກງານສ້າງ ແລະ ປັບປຸງກົດໝາຍ ຂອງບັນດາກຳມາທິການ, ຄະນະເລຂາທິການສະພາແຫ່ງຊາດ ແລະ ສະຖາບັນຄົ້ນຄວ້ານິຕິກໍາ ເຂົ້າຮ່ວມ.
​ ທ່ານ ປອ. ພູທອນ ວໍລະເພັດ ໄດ້ມີຄຳເຫັນຕໍ່ກອງປະຊຸມວ່າ: ບັນດາຫົວຂໍ້ທີ່ນຳມາສໍາມະນາໃນຄັ້ງນີ້ ແມ່ນມີຄວາມຈໍາເປັນ, ສໍາຄັນ ແລະ ຕິດພັນໂດຍກົງກັບວຽກງານວິຊາສະເພາະ ແລະ ການປະຕິບັດວຽກງານຕົວຈິງ ທີ່ຕິດພັນກັບການປະຕິບັດພາລະບົດບາດ, ສິດ ແລະ ໜ້າທີ່ກົມວິຊາການຂອງກໍາມາທິການທີ່ກ່ຽວຂ້ອງທີ່ຮັບຜິດຊອບຕິດຕາມກວດກາບັນດາກະຊວງ, ອົງການ ແລະ ກົມທີ່ເປັນໃຈກາງໃນການປະສານງານລວມ ກໍຄືກົມກົດໝາຍຂອງກໍາມາທິການກົດໝາຍ; ໃນໄລຍະຜ່ານມາ ການຄົ້ນຄວ້າ, ກະກຽມດ້ານເນື້ອໃນຕ່າງໆຂອງກົດໝາຍທີ່ຕົນຮັບຜິດຊອບ ແລະ ວຽກງານປິ່ນອ້ອມ ອື່ນໆກ່ຽວກັບການສ້າງ ແລະ ປັບປຸງກົດໝາຍ ຖ້າບັນດາທ່ານເຫັນວ່າມີຈຸດໃດທີ່ຍັງບໍ່ຄ່ອງຕົວ, ຍັງບໍ່ເຂົ້າໃຈໃນຂອດການ ຈັດຕັ້ງປະຕິບັດ ໃຫ້ສະເໜີແລກປ່ຽນນຳກັນຕື່ມ. ສະນັ້ນ, ເພື່ອຮັບປະກັນໃຫ້ກອງປະຊຸມໄດ້ຮັບຜົນສໍາເລັດຕາມຈຸດປະສົງ ແລະ ຄາດໝາຍ, ຮຽກຮ້ອງມາຍັງບັນດາທ່ານຍົກສູງຄວາມຮັບຜິດຊອບໃນການຮັບຟັງການສະເໜີບົດຮຽນຂອງວິທະຍາ ກອນ, ຄົ້ນຄວ້າ ແລະ ປະກອບຄໍາເຫັນແລກປ່ຽນບົດຮຽນຮ່ວມກັນ ເພື່ອເຮັດໃຫ້ການຈັດຕັ້ງປະຕິບັດວຽກງານການສ້າງ ແລະ ປັບປຸງກົດໝາຍໃນຕໍ່ໜ້າ ລວມທັງການພົວພັນ, ປະສານງານດ້ານຕ່າງໆ ໃຫ້ມີຄວາມຄ່ອງຕົວຫຼາຍຂຶ້ນ.
​ ໃນກອງປະຊຸມ, ບັນດາຜູ້ເຂົ້າຮ່ວມໄດ້ຮັບຟັງການສະເໜີ 4 ຫົວຂໍ້ຄື: ການເປັນເສນາທິການໃນການລາຍງານ ແລະ ການສະໜອງຂໍ້ມູນກ່ຽວກັບການສ້າງ ແລະ ປັບປຸງກົດໝາຍ, ເຕັກນິກຂອງການຄົ້ນຄວ້າຮ່າງ​ກົດໝາຍ ກ່ອນ​ນໍາເຂົ້າພິຈາລະນາໃນກອງປະຊຸມສະໄໝສາມັນຂອງສະພາແຫ່ງຊາດ, ຄວາມສຳຄັນຂອງແຜນການສ້າງ ແລະ ປັບປຸງກົດ ໝາຍ, ເຕັກນິກການຮ່າງເອກະສານທາງລັດຖະການ; ຈາກນັ້ນ, ບັນດາຜູ້ເຂົ້າຮ່ວມໄດ້ສົນທະນາແລກປ່ຽນຄຳຄິດຄຳເຫັນ ແລະ ໄດ້ຈັດເປັນກຸ່ມ ເພື່ອຄົ້ນຄວ້າ, ວິເຄາະ, ວິໄຈ ຕໍ່ຫົວຂໍ້ຕ່າງໆທີ່ທາງກອງປະຊຸມໄດ້ຍົກຂຶ້ນມາ.
(ພາບ: ອານຸສອນ ພູມີທອນ, ຂ່າວ: ນາງ ສຸພາວັນ ຫອມສະນິດ)