(ສພຊ) – ກອງປະຊຸມເຝິກອົບຮົມການເປັນວິທະຍາກອນໃຫ້ແກ່ບັນດາກົງຈັກການຈັດຕັ້ງຂອງສະພາແຫ່ງຊາດ(ສພຊ) ໄດ້ຈັດຂຶ້ນໃນລະຫວ່າງວັນທີ 16-17 ກໍລະກົດ 2024 ທີ່ເມືອງວັງວຽງ ແຂວງວຽງຈັນ ໂດຍການເປັນປະທານຂອງທ່ານ ສຈ. ປອ. ຈະເລີນ ເຍຍປາວເຮີ ຮອງປະທານສະພາແຫ່ງຊາດ; ເຂົ້າຮ່ວມມີບັນດາທ່ານປະທານ ແລະ ຮອງປະທານກຳມາທິການ, ຮອງເລຂາທິການ ແລະ ຄະນະສະຖາບັນຄົ້ນຄວ້ານິຕິກຳສະພາແຫ່ງຊາດ ພ້ອມດ້ວຍພາກສ່ວນທີ່ກ່ຽວຂ້ອງ.
ທັງນີ້ ກໍເພື່ອຜັນຂະຫຍາຍ ແລະ ຈັດຕັ້ງປະຕິບັດແຜນດຳເນີນງານຂອງຄະນະປະຈຳສະພາແຫ່ງຊາດ ໄລຍະ 5 ປີ 2021-2025 ໂດຍສະເພາະການສ້າງຄວາມເຂັ້ມແຂງໃຫ້ແກ່ສະມາຊິກສະພາແຫ່ງຊາດ (ສສຊ), ສະມາຊິກສະພາປະ ຊາຊົນຂັ້ນແຂວງ (ສສຂ) ແລະ ພະນັກງານທີ່ເປັນເສນາທິການ ໃຫ້ມີປະສິດທິຜົນ ແນໃສ່ຍົກສູງການປະຕິບັດພາລະບົດ ບາດ, ສິດ ແລະ ໜ້າທີ່ຂອງບັນດາກຳມາທິການ, ຄະນະເລຂາທິການ, ສະຖາບັນຄົ້ນຄວ້ານິຕິກຳ ແລະ ສະພາປະຊາຊົນຂັ້ນແຂວງ (ສພຂ) ຕາມທີ່ໄດ້ກຳນົດໄວ້ໃນລັດຖະທຳມະນູນ, ກົດໝາຍ ແລະ ແຜນການເຄື່ອນໄຫວຂອງແຕ່ລະພາກ ສ່ວນ; ເພື່ອພັດທະນາວິທະຍາກອນຂອງ ສພຊ ແລະ ສພຂ ໃຫ້ມີຄວາມເປັນເອກະພາບ, ລວມສູນ ແລະ ລົງເລິກສະ ເພາະດ້ານ ທັງຮັບປະກັນດ້ານເນື້ອໃນຫົວຂໍ້, ຫຼັກສູດ, ຄູ່ມືການສອນ ຢ່າງມີຈຸດສຸມ, ຍົກສູງປະສິດທິພາບ ແລະ ປະສິດ ທິຜົນໃນການສະເໜີອະທິບາຍເນື້ອໃນບົດຮຽນ ແລະ ການຄົ້ນຄວ້າເອກະສານ ໃຫ້ ສສຊ, ສສຂ ດີຂຶ້ນກວ່າເກົ່າ.
ທ່ານ ສຈ. ປອ. ຈະເລີນ ເຍຍປາວເຮີ ໄດ້ມີຄຳເຫັນກ່າວເປີດວ່າ: ຈຸດປະສົງຕົ້ນຕໍຂອງກອງປະຊຸມຄັ້ງນີ້ ເພື່ອບຳ ລຸງຍົກລະດັບການເປັນວິທະຍາກອນໃຫ້ແກ່ພະນັກງານນຳພາ-ຄຸ້ມຄອງຂັ້ນສູງຂອງສະພາແຫ່ງຊາດ; ໃນໄລຍະທີ່ຜ່ານມາ ບັນດາທ່ານກໍລ້ວນແຕ່ໄດ້ຮໍ່າຮຽນ, ເຝິກອົບຮົມ ແລະ ເຄີຍປະຕິບັດພາລະບົດບາດເປັນວິທະຍາກອນມາແລ້ວ, ແຕ່ການເຝິກອົບຮົມເທື່ອນີ້ ກໍເພື່ອຖ່າຍທອດໃຫ້ແກ່ພະນັກງານຂັ້ນລຸ່ມ ແລະ ຜູ້ສືບທອດ ເພື່ອສ້າງຄວາມເຂັ້ມແຂງໃຫ້ແກ່ການເປັນວິທະຍາກອນໃນວຽກງານສຳຄັນຕ່າງໆຂອງສະພາແຫ່ງຊາດ ໃນປັດຈຸບັນ ແລະ ຕໍ່ໜ້າ.
ຜູ້ເຂົ້າຮ່ວມເຝິກອົບຮົມ ໄດ້ຮັບຟັງ ແລະ ແລກປ່ຽນຄວາມເຫັນຕໍ່ເນື້ອໃນສໍາຄັນຄື: ບົດບາດ ແລະ ຫຼັກການເວົ້າຂອງວິທະຍາກອນ ສະເໜີໂດຍທ່ານ ນາງ ບຸນເພັງ ມູນໂພໄຊ ອະດີດລັດຖະມົນຕີປະຈໍາສຳນັກງານນາຍົກລັດຖະມົນຕີ, ການສ້າງຄວາມເຊື່ອໝັ້ນສຳລັບວິທະຍາກອນ ແລະ ປາຖະກະຖາ ສະເໜີໂດຍທ່ານ ສີພຸກ ວົງພັກດີ ອະດີດຮອງລັດຖະ ມົນຕີກະຊວງພາຍໃນ, ຄວາມຮູ້ພື້ນຖານການເປັນວິທະຍາກອນຂອງສະພາແຫ່ງຊາດ ສະເໜີໂດຍທ່ານ ສຸບັນ ສະວະບຸດ ປະທານກຳມາທິການວຽກງານສະມາຊິກສະພາແຫ່ງຊາດ.
ການເຝິກອົບຮົມຄັ້ງນີ້ ໄດ້ຮັບການສະໜັບສະໜູນຊ່ວຍເຫຼືອທາງດ້ານງົບປະມານຈາກມູນນິທິອາຊີ (The Asia Foundation) ໂດຍຜ່ານກອງເລຂາຄຸ້ມຄອງແຫຼ່ງທຶນຊ່ວຍເຫຼືອລ້າໃຫ້ແກ່ສະພາແຫ່ງຊາດ ແລະ ທຶນສົມທົບຈາກຄະນະເລຂາທິການສະພາແຫ່ງຊາດ.
(ຂ່າວ ແລະ ພາບ: ນາງ ກຸກກິກ ບຸດດາໄຊ)