(ສພຊ) – ຕອນເຊົ້າວັນທີ 24 ທັນວານີ້ ທີ່ສະພາແຫ່ງຊາດ (ສພຊ) ຄະນະກໍາມະການລະດັບຊາດປັບປຸງລັດຖະທຳມະນູນ ສະບັບປີ 2015 (ຄລຊ) ໄດ້ຈັດກອງປະຊຸມໂດຍການເປັນປະທານຂອງທ່ານ ປອ. ໄຊສົມພອນ ພົມວິຫານ ກຳມະການກົມການເມືອງສູນກາງພັກ, ປະທານສະພາແຫ່ງຊາດ, ປະທານ ຄລຊ ເຊິ່ງມີບັນດາທ່ານໃນຄະນະກຳມະການ ແລະ ອະນຸກຳມະການຕ່າງໆຂອງ ຄລຊ ເຂົ້າຮ່ວມ.

ກອງປະຊຸມໄດ້ຮັບຟັງລາຍງານຜົນການຄົ້ນຄວ້າ ແລະ ປັບປຸງເນື້ອໃນຮ່າງລັດຖະທໍາມະນູນຕາມການປະ ກອບຄໍາເຫັນຂອງສະມາຊິກສະພາແຫ່ງຊາດ ໃນກອງປະຊຸມສະໄໝສາມັນເທື່ອທີ 8 ຂອງ ສພຊ ຊຸດທີ IX ຄັ້ງວັນທີ 29 ພະຈິກ 2024 ເຊິ່ງບັນດາຄຳເຫັນເຫຼົ່ານັ້ນ ຄະນະຮັບຜິດຊອບໄດ້ຈັດກອງປະຊຸມກວດກາ, ຄົ້ນຄວ້າ ແລະ ປັບປຸງເນື້ອໃນດັ່ງກ່າວໃນຄັ້ງວັນທີ 7-8 ທັນວາຜ່ານມາ.

ອະນຸກຳມະການເນື້ອໃນລາຍງານໃຫ້ຊາບວ່າ: ກ່ອນລົງທາບທາມຮ່າງລັດຖະທໍາມະນູນດັ່ງກ່າວນີ້ ຢ່າງເປີດກວ້າງຢູ່ແຕ່ລະອົງການ ແລະ ທ້ອງຖິ່ນ, ຈະນໍາເອົາຮ່າງລັດຖະທໍາມະນູນສະບັບນີ້ ເຂົ້າຂໍທິດຊີ້ນໍາຈາກກອງປະຊຸມກົມການເມືອງສູນກາງພັກ ເພື່ອເປັນທິດທາງໃຫ້ແກ່ການລົງທຽບທາມ; ສໍາລັບກໍານົດເວລາໃນການເປີດກອງປະຊຸມສະໄໝວິສາມັນຂອງ ສພຊ ເພື່ອພິຈາລະນາຮັບຮອງເອົາລັດຖະທໍາມະນູນ, ຄະນະຮັບຜິດຊອບໄດ້ຄົ້ນຄວ້າ ແລະ ສະເໜີຈັດໃນໄລຍະວັນທີ 31 ມີນາ ຫາ 4 ເມສາ 2025.

(ນາງ ກຸກກິກ ບຸດດາໄຊ)