ຄະນະສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 17 ແຂວງອັດຕະປື, ໄດ້ຈັດກອງປະຊຸມປະຈໍາປີ 2024 ຂື້ນໃນວັນທີ 22 ມັງກອນ 2025 ທີ່ຫ້ອງປະຊຸມສະພາປະຊາຊົນແຂວງ ໂດຍການເປັນປະທານຂອງ ທ່ານ ນາງ ມີນາພອນ ໄຊສົມພູ ປະທານຄະນະສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 17, ປະທານສະພາປະຊາຊົນແຂວງ. ເຂົ້າຮ່ວມມີບັນດາທ່ານ ຄະນະສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 17, ສະມາຊິກສະພາປະຊາຊົນແຂວງ, ພະແນກການ ແລະ ອົງການທຽບເທົ່າພະແນກອ້ອມຂ້າງແຂວງ ພ້ອມແຂກທີ່ຖືກເຊີນເຂົ້າຮ່ວມ.
ໂອກາດນີ້ ທ່ານ ນາງ ມີນາພອນ ໄຊສົມພູ ໄດ້ມີຄຳເຫັນກ່າວໄຂກອງປະຊຸມ ວ່າ: ກອງປະຊຸມໃນຄັ້ງນີ້ ຈະໄດ້ຮັບຟັງການຜ່ານຮ່າງບົດສະຫຼູບຕິລາຄາຄືນ ກ່ຽວກັບການຈັດຕັ້ງປະຕິບັດວຽກງານ ປະຈໍາປີ 2024 ແລະ ວາງທິດທາງແຜນການປີ 2025 ຄະນະສະມາຊິກສະພາແຫ່ງຊາດ ປະຈຳເຂດເລືອກຕັ້ງທີ 17 ແລະ ຄົ້ນຄວ້າປືກສາຫາລືວຽກງານສໍາຄັນຈໍານວນໜຶ່ງ ຂອງຄະນະສະມາຊິກສະພາແຫ່ງຊາດ ປະຈຳເຂດເລືອກຕັ້ງ ຕາມຄວາມຮັບຜິດຊອບ ສ່ອງແສງໃຫ້ເຫັນ ໄດ້ຄວາມສໍາຄັນ, ຄວາມຈໍາເປັນ, ຜົນງານ, ດ້ານດີ ແລະ ຂໍ້ຄົງຄ້າງ ເພື່ອໃຫ້ສອດຄ່ອງກັບສະພາບຈຸດພິເສດຕົວຈິງ
ພ້ອມນີ້, ທ່ານ ນາງ ພອນມະນີ ຂຽນໄຊຍະວົງ ຮອງປະທານຄະນະສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 17, ຮອງປະທານສະພາປະຊາຊົນແຂວງ ຂື້ນຜ່ານຮ່າງບົດສະຫລຸບການຈັດຕັ້ງປະຕິບັດ ວຽກງານປະຈຳປີ 2024, ເຊິ່ງໄລຍະຜ່ານມາມີຜົນສໍາເລັດຫຼາຍດ້ານ ເປັນຕົ້ນ: ໄດ້ເອົາໃຈໃສ່ຄົ້ນຄວ້າ ເຊື່ອມຊຶມບັນດາເອກະສານສໍາຄັນຕ່າງໆ, ບັນດາກົດໝາຍ, ນິຕິກໍາ, ຄໍາສັ່ງ, ຄໍາແນະນໍາ ກໍ່ຄືມະຕິຂອງຄະນະປະຈໍາສະພາແຫ່ງຊາດ ວ່າດ້ວຍການຈັດຕັ້ງ ແລະ ການເຄື່ອນໄຫວຂອງຄະນະສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ17, ເປັນເຈົ້າການຄົ້ນຄວ້າ, ຮໍ່າຮຽນກຳແໜ້ນ ສິດ ແລະ ໜ້າທີ່ ດ້ວຍຄວາມຮັບຜິດຊອບສູງ, ເຂົ້າຮ່ວມຄົ້ນຄວ້າປະກອບຄຳຄິດ, ຄຳເຫັນ, ພິຈາລະນາ ແລະ ຮັບຮອງເອົາການສ້າງ ແລະ ປັບປຸງກົດໝາຍ ຮ່ວມກັບຄະນະສະມາຊິກສະພາແຫ່ງຊາດ ໃນທົ່ວປະເທດ ທີ່ໄດ້ສະເໜີຕໍ່ກອງປະຊຸມສະໄໝສາມັນ ເທື່ອທີ 7 ແລະ ເທື່ອທີ 8 ຂອງສະພາແຫ່ງຊາດ ຊຸດທີ IX ມີກົດໝາຍ 22 ສະບັບ: ກົດໝາຍສ້າງໃໝ່ 04 ສະບັບ ແລະ ກົດໝາຍປັບປຸງ 18 ສະບັບ, ທາບທາມຄຳເຫັນໃສ່ຮ່າງກົດໝາຍທີ່ສະພາແຫ່ງຊາດແນະນຳ ກໍ່ຄືພາກສ່ວນກ່ຽວຂ້ອງໄດ້ສົ່ງໃຫ້ໄດ້ທັງໝົດ 03 ຄັ້ງ ມີກົດໝາຍທັງໝົດ 13 ສະບັບ, ປະກອບຄໍາເຫັນ, ຄົ້ນຄ້ວາພິຈາລະນາຮັບຮອງບັນຫາສໍາຄັນພື້ນຖານຂອງຊາດ ຕາມສິດ, ໜ້າທີ່ ແລະ ພາລະບົດ ບາດຂອງຕົນ ມີທັງໝົດ 23 ຫົວຂໍ້ໃຫຍ່ ແລະ ຮັບຮອງອອກເປັນມະຕິກອງປະຊຸມສະພາແຫ່ງຊາດ ຈໍານວນ 42 ສະບັບ, ເຂົ້າຮ່ວມເຄື່ອນໄຫວຕິດຕາມກວດກາ ການຈັດຕັ້ງປະຕິບັດລັດຖະທໍາມະນູນ, ກົດໝາຍ, ມະຕິຂອງສະພາແຫ່ງຊາດ ໄດ້ທັງໝົດ 10 ຄັ້ງ, ພົວພັນປະສານສົມທົບກັບ ສະພາປະຊາຊົນແຂວງ ເພື່ອຄົ້ນຄວ້າເນື້ອໃນ ຄຳສະເໜີ ຂອງປະຊາຊົນ ໄດ້ສະເໜີຜ່ານໂທລະສັບສາຍດ່ວນ ແລະ ນຳສົ່ງ ພ້ອມທັງຊຸກຍູ້ໃຫ້ພາກສ່ວນກ່ຽວຂ້ອງແກ້ໄຂແຕ່ລະບັນຫາ ເພື່ອລາຍງານໃຫ້ສະພາແຫ່ງຊາດ ທັນຕາມເວລາ ມີ 17 ບັນຫາ, ປະສານສົມທົບ ກັບພາກສ່ວນທີ່ກ່ຽວຂ້ອງທັງສູນກາງ ແລະ ພາຍໃນທ້ອງຖິ່ນ ໃນການ ຄົ້ນຄວ້າປະກອບຄຳເຫັນ ຕໍ່ຄຳຮ້ອງຂໍຄວາມເປັນທຳຂອງປະຊາຊົນ ທັງໝົດ 15 ເລື່ອງ, ລົງພົບປະຜູ້ມີສິດເລືອກຕັ້ງ ທັງໝົດ 57 ຈຸດ ມີຜູ້ເຂົ້າຮ່ວມທັງໝົດ 5,775 ຄົນ, ເຄື່ອນໄຫວຢ້ຽມຢາມຖອດຖອນບົດຮຽນແຂວງໃກ້ຄຽງ ແລະ ຕ້ອນຮັບຄະນະຜູ້ແທນຂັ້ນສູງຈາກປະເທດ ສສ ຫວຽດນາມ ແລະ ບັນດາປະເທດເພື່ອນບ້ານໄດ້ທັງໝົດ 05 ຄັ້ງ.
ຈາກນັ້ນ, ຜູ້ເຂົ້າຮ່ວມກອງປະຊຸມ ໄດ້ແລກປ່ຽນປະກອບຄຳເຫັນໃສ່ຮ່າງບົດສະຫຼຸບຢ່າງກົງໄປກົງມາມີຈຸດສຸມ ບົນພື້ນຖານແນວທາງນະໂຍບາຍຂອງພັກ ລະບຽບກົດໝາຍຂອງລັດ ແລະ ສະພາບຄວາມເປັນຈິງຂອງທ້ອງຖີ່ນ ເພື່ອເຮັດໃຫ້ເນື້ອໃນມີຄົບຖ້ວນສົມບູນ ແລະ ສອດຄ່ອງກັບການຈັດຕັ້ງປະຕິບັດໜ້າທີວຽກງານຂອງຄະນະສະມາຊິກສະພາແຫ່ງຊາດປະຈໍາເຂດເລືອກຕັ້ງ ໃຫ້ມີຄຸນນະພາບ ແລະ ສາມາດຈັດຕັ້ງປະຕິບັດຕາມພາລະບົດ ໃຫ້ໄດ້ຮັບຜົນສໍາເລັດຫຼາຍຂຶ້ນກວ່າເກົ່າ.
(ວິນັດ ສີສຸລາດ)