(ສພຊ) – ໃນລະຫວ່າງວັນທີ 23-27 ມີນາ 2024 ຄະນະຜູ້ແທນສະພາແຫ່ງຊາດ ນຳໂດຍທ່ານ ປອ. ນາງ ສູນທອນ ໄຊຍະຈັກ, ຮອງປະທານສະພາແຫ່ງຊາດ ແຫ່ງ ສປປລາວ ໄດ້ເຂົ້າຮ່ວມກອງປະຊຸມໃຫຍ່ສະຫະພັນລັດຖະສະພາສາກົນ (IPU) ຄັ້ງທີ 148 ທີ່ເຈນີວາ, ປະເທດສະວິດເຊີແລນ ເຊິ່ງມີຄະນະຜູ້ແທນຫຼາຍກວ່າ 1.600 ຄົນ ຈາກ 146 ປະ ເທດ ທີ່ເປັນສະມາຊິກ IPU, ອົງການສະຫະປະຊາຊາດ, ຕົວແທນຈາກອົງການລັດຖະສະພາປະຈຳພາກພື້ນຈາກທົ່ວໂລກ ແລະ ອົງການຈັດຕັ້ງສາກົນຕ່າງໆ ເຂົ້າຮ່ວມຢ່າງຫຼວງຫຼາຍ.
ກອງປະຊຸມໃຫຍ່ຄັ້ງນີ້ ໄດ້ດຳເນີນໄປພາຍໃຕ້ຫົວຂໍ້: “ການທູດລັດຖະສະພາ: ສ້າງຂົວສູ່ສັນຕິພາບ ແລະ ຄວາມເຂົ້າອົກເຂົ້າໃຈ”. ນອກຈາກນັ້ນ, ຍັງມີກອງປະຊຸມກຸ່ມ ASEAN+3, ກອງປະຊຸມກຸ່ມອາຊີ-ປາຊິຟິກ, ກອງປະຊຸມຄະນະບໍລິຫານງານ IPU ແລະ ກອງປະຊຸມລະດັບກໍາມາທິການຕ່າງໆຂອງ IPU ທີ່ຈັດຂຶ້ນຄວບຄູ່ກັນໄປ ເຊັ່ນ: ເວທີປາໄສສະມາຊິກລັດຖະສະພາເພດຍິງ IPU; ກອງປະຊຸມກໍາມາທິການວ່າດ້ວຍສັນຕິພາບ ແລະ ຄວາມໝັ້ນຄົງສາກົນ; ກຳ ມາທິການວ່າດ້ວຍການພັດທະນາແບບຍືນຍົງ; ກຳມາທິການວ່າດ້ວຍປະຊາທິປະໄຕ ແລະ ສິດທິມະນຸດ; ກຳມາທິການປະຈຳວ່າດ້ວຍວຽກງານອົງການສະຫະປະຊາຊາດ; ເວທີປຶກສາຫາລືຂອງສະມາຊິກລັດຖະສະພາໜຸ່ມ ແລະ ອື່ນໆ.
ໃນກອງປະຊຸມໃຫຍ່ຄົບຄະນະ, ບັນດາຜູ້ແທນຈາກປະເທດຕ່າງໆ ໄດ້ຂຶ້ນກ່າວປາໄສພາຍໃຕ້ຫົວຂໍ້ຂອງກອງປະ ຊຸມ ເຊິ່ງໄດ້ຍົກໃຫ້ເຫັນເຖິງສິ່ງທ້າທາຍຕ່າງໆທີ່ກຳລັງເກີດຂຶ້ນໃນໂລກ ແລະ ບົດບາດສຳຄັນຂອງການຈັດຕັ້ງປະຕິບັດວຽກງານການທູດລັດຖະສະພາ ໂດຍສະເພາະແມ່ນຕໍ່ກັບການສົ່ງເສີມການແກ້ໄຂບັນຫາຂໍ້ຂັດແຍ້ງ ແລະ ການສົ່ງເສີມສັນຕິພາບໃນໂລກ; ພ້ອມດຽວກັນນັ້ນ, ກອງປະຊຸມຍັງໄດ້ປຶກສາຫາລືກັນກ່ຽວກັບບັນຫາທີ່ຮີບດ່ວນ ເປັນຄວາມກັງວົນຂອງປະຊາຄົມໂລກ ເຊັ່ນ: ວິກິດການດ້ານມະນຸດສະທຳຢູ່ເຂດກາຊາ, ຂໍ້ຂັດແຍ້ງໃນຕາເວັນອອກກາງ, ການກໍ່ການຮ້າຍ, ການເລືອກຕັ້ງໃນສາທາລະນະລັດໂບລິວາຣີ ຂອງເວເນຊູເອລາ ແລະ ການລະເມີດສິດທິມະນຸດຢູ່ປະເທດກົງໂກ.
ໃນກອງປະຊຸມໃຫຍ່ຄັ້ງນີ້, ທ່ານ ປອ. ນາງ ສູນທອນ ໄຊຍະຈັກ ຫົວໜ້າຄະນະຜູ້ແທນລາວ ໄດ້ກ່າວປາໄສໃນກອງປະຊຸມໃຫຍ່ຄົບຄະນະ ໂດຍທ່ານໄດ້ຍົກໃຫ້ເຫັນເຖິງສະພາບການຂອງໂລກໃນປັດຈຸບັນ ທີ່ເປັນໄພຂົ່ມຂູ່ຢ່າງໜັກໜ່ວງຕໍ່ການຮັກສາສັນຕິພາບ ແລະ ການຢູ່ຮ່ວມກັນຢ່າງສັນຕິຂອງມວນມະນຸດ, ໄດ້ຢືນຢັນທັດສະນະຂອງ ສປປລາວ ໃນການກ່າວປະນາມຕໍ່ທຸກຮູບການກໍ່ການຮ້າຍ ແລະ ສະແດງຄວາມໄຫວ້ອາໄລຢ່າງສຸດຊຶ້ງຕໍ່ຜູ້ເສຍຊີວິດ ແລະ ບາດເຈັບໃນເຫດການກໍ່ການຮ້າຍໃນໂຮງລະຄອນໂກຣກັສ, ເມືອງກຼາສະໂນໂກສະເກີ, ສະຫະພັນລັດເຊຍ. ທ່ານຮອງປະທານສະ ພາແຫ່ງຊາດ ຍົກໃຫ້ເຫັນເຖິງການຈັດຕັ້ງປະຕິບັດແນວທາງການຕ່າງປະເທດ ສັນຕິພາບ, ເອກະລາດ, ມິດຕະພາບ ແລະ ການຮ່ວມມື ຢ່າງສະເໝີຕົ້ນສະເໝີປາຍ ຂອງ ສປປລາວ ແລະ ການຈັດຕັ້ງປະຕິບັດວຽກງານການທູດລັດຖະສະພາ ຂອງສະພາແຫ່ງຊາດລາວ ດ້ວຍການສ້າງຄະນະມິດຕະພາບລັດຖະສະພາກັບບັນດາລັດຖະສະພາປະເທດຕ່າງໆ, ການ ເຄື່ອນໄຫວໃນເວທີລັດຖະສະພາພາກພື້ນ ແລະ ສາກົນ ໂດຍສະເພາະໃນທ້າຍປີ 2023 ຜ່ານມາ, ສະພາແຫ່ງຊາດລາວ ໄດ້ຮັບກຽດເປັນເຈົ້າພາບຈັດກອງປະຊຸມສຸດຍອດລັດຖະສະພາ ກຳປູເຈຍ-ລາວ-ຫວຽດນາມ (CLV) ຂຶ້ນເປັນຄັ້ງທຳອິດ ເພື່ອສົ່ງເສີມສັນຕິພາບ, ຄວາມສາມັກຄີ, ການຮ່ວມມືຮອບດ້ານ ເພື່ອກ້າວໄປສູ່ການພັດທະນາແບບຍືນຍົງຢູ່ 3 ປະເທດ ແລະ ໃນປີ 2024 ນີ້, ສປປລາວ ໄດ້ຮັບກຽດເປັນປະທານໝູນວຽນອາຊຽນ ແລະ ສະພາແຫ່ງຊາດລາວ ໄດ້ຮັບກຽດເປັນປະທານກອງປະຊຸມໃຫຍ່ລັດຖະສະພາລະຫວ່າງຊາດອາຊຽນ (AIPA) ຄັ້ງທີ 45. ໃນຕອນທ້າຍ, ທ່ານໄດ້ຮຽກ ຮ້ອງໃຫ້ສະມາຊິກ IPU ເພິ່ມທະວີການປະຕິບັດບົດບາດການທູດລັດຖະສະພາ ທັງໃນຂອບສອງຝ່າຍ ແລະ ຫຼາຍຝ່າຍ ເພື່ອພ້ອມກັນສົ່ງເສີມການແກ້ໄຂບັນດາຂໍ້ຂັດແຍ້ງໂດຍສັນຕິວິທີ ຜ່ານການພົບປະເຈລະຈາ, ປະຕິບັດຕາມຫຼັກການ ແລະ ກົດໝາຍສາກົນ ເພື່ອປະກອບສ່ວນເຂົ້າໃນການສ້າງສັນຕິພາບທີ່ຍືນຍົງ ແລະ ການຢູ່ຮ່ວມກັນຢ່າງສັນຕິຂອງປະຊາຊາດໃນໂລກ.
ພ້ອມດຽວກັນນັ້ນ, ທ່ານຮອງປະທານສະພາແຫ່ງຊາດ ແລະ ຄະນະຜູ້ແທນທ່ານອື່ນໆ ຍັງໄດ້ເຂົ້າຮ່ວມ ແລະ ປະກອບຄຳເຫັນໃນເວທີປຶກສາຫາລືຂອງສະມາຊິກລັດຖະສະພາເພດຍິງ, ມີຄຳເຫັນໃນກອງປະຊຸມກໍາມາທິການວ່າດ້ວຍສັນຕິພາບ ແລະ ຄວາມໝັ້ນຄົງສາກົນ, ກຳມາທິການວ່າດ້ວຍການພັດທະນາແບບຍືນຍົງ. ພິເສດ ຄະນະຜູ້ແທນລາວ ຍັງໄດ້ຮັບກຽດເປັນປະທານກອງປະຊຸມກຸ່ມ ASEAN+3 ດ້ວຍຜົນສຳເລັດຢ່າງຈົບງາມ, ໄດ້ພົບປະ ແລະ ໂອ້ລົມກັບຄະນະຜູ້ແທນຈາກລັດຖະສະພາປະເທດເພື່ອນມິດ, ອົງການລັດຖະສະພາພາກພື້ນ ເຊັ່ນ: ຄະນະຜູ້ແທນ ສສ.ຫວຽດ ນາມ, ກູບາ, ລັດເຊຍ, ມົງໂກນ, ສະວິດເຊີແລນ, ເລຂາທິການໃຫຍ່ AIPA ເພື່ອປຶກສາຫາລືກ່ຽວກັບການພົວພັນຮ່ວມມືໃນຕໍ່ໜ້າ. ນອກຈາກນັ້ນ, ຄະນະຜູ້ແທນສະພາແຫ່ງຊາດ ຍັງໄດ້ຖືໂອກາດເດີນທາງໄປຢ້ຽມຢາມ ແລະ ເຮັດວຽກ ຢູ່ສະ ພາປະຊາຊົນທ້ອງຖິ່ນທີ່ແຂວງກົງຕົງໂວ, ສະວິດເຊີແລນ ເພື່ອແລກປ່ຽນ ແລະ ຖອດຖອນບົດຮຽນກ່ຽວກັບລະບົບກົງ ຈັກການຈັດຕັ້ງ ແລະ ການປະຕິບັດພາລະບົດບາດຂອງສະພາປະຊາຊົນທ້ອງຖິ່ນຂອງສະວິດເຊີແລນ.
ກອງປະຊຸມຄັ້ງນີ້, ໄດ້ດໍາເນີນໄປໃນບັນຍາກາດທີ່ສະພາບການຂອງໂລກມີຄວາມເຄັ່ງຮ້ອນ ແລະ ຮັບຮອງເອົາຫຼາຍມະຕິທີ່ກ່ຽວພັນກັບບັນຫາການເມືອງໂລກ, ມະຕິວ່າດ້ວຍການແກ້ໄຂຜົນກະທົບຕໍ່ສັງຄົມ ແລະ ມະນຸດສະທໍາ ຈາກຜົນກະທົບຂອງລະບົບອາວຸດອັດຕະໂນມັດ ແລະ ປັນຍາປະດິດ ຂອງກໍາມາທິການວ່າດ້ວຍສັນຕິພາບ ແລະ ຄວາມໝັ້ນຄົງສາກົນ ແລະ ມະຕິວ່າດ້ວຍການຮ່ວມມືເພື່ອການດຳເນີນການດ້ານດິນຟ້າອາກາດ: ການສົ່ງເສີມພະລັງງານສີຂຽວທີ່ສາມາດເຂົ້າເຖິງໄດ້ ແລະ ການຮັບປະກັນນະວັດຕະກຳ, ຄວາມຮັບຜິດຊອບ ແລະ ຄວາມສະເໝີພາບ ຂອງກຳມາທິການວ່າດ້ວຍການພັດທະນາແບບຍືນຍົງ. ກອງປະຊຸມໃຫຍ່ IPU ໄດ້ຮັບຮອງເອົາວັນເວລາ ແລະ ສະຖານທີ່ຈັດກອງປະ ຊຸມຄັ້ງທີ 149 ເຊິ່ງຈະຈັດຂຶ້ນໃນລະຫວ່າງວັນທີ 13-17 ຕຸລາ 2024, ທີ່ສໍານັກງານໃຫຍ່ IPU, ເຈນີວາ, ປະເທດສະວິດເຊີແລນ.