(ສພຊ) – ໃນລະຫວ່າງວັນທີ 05-09 ສິງຫາ 2024 ຄະນະຜູ້ແທນສະພາແຫ່ງຊາດ ແຫ່ງ ສປປລາວ ນຳໂດຍ ທ່ານ ປອ. ລີເບີ ລີບົວປາວ ຄະນະປະຈຳສະພາແຫ່ງຊາດ, ປະທານກຳມາທິການແຜນການ, ການເງິນ ແລະ ການກວດສອບ ພ້ອມດ້ວຍຄະນະ ຈຳນວນ 19 ທ່ານ ໄດ້ເດີນທາງໄປທັດສະນະສຶກສາວຽກງານລັດຖະສະພາຢູ່ປະເທດນິວຊີແລນ ເຊິ່ງໄດ້ແລກປ່ຽນບົດຮຽນກ່ຽວກັບຂັ້ນຕອນການບໍລິຫານດ້ານການຄົ້ນຄວ້ານິຕິກຳຂອງລັດຖະສະພານິວຊີແລນ, ຂັ້ນຕອນ ແລະ ວິທີການຈັດຕັ້ງປະຕິບັດຕໍ່ກັບບັນຫາສິ່ງທ້າທາຍຕ່າງໆ.

ການເຄື່ອນໄຫວທັດສະນະສຶກສາຄັ້ງນີ້ ຄະນະຜູ້ແທນສະພາແຫ່ງຊາດລາວ ໄດ້ເຂົ້າຢ້ຽມຂໍ່ານັບທ່ານ ເຈີຣີ ບຣາວລີ (Gerry Brownlee) ປະທານລັດຖະສະພາ; ພົບປະສອງຝ່າຍຮ່ວມກັບຄະນະຜູ້ແທນກະຊວງການຕ່າງປະເທດ ແລະ ການຄ້າ ຂອງປະເທດນິວຊີແລນ; ເຂົ້າຮ່ວມສັງເກດການ ແລະ ແລກປ່ຽນຖອດຖອນບົດຮຽນທີ່ດີຮ່ວມກັບພາກສ່ວນຕ່າງໆຂອງລັດຖະສະພານິວຊີແລນ ເປັນຕົ້ນ: ກຳມາທິການການເງິນ ແລະ ລາຍຈ່າຍ, ກໍາມາທິການພັດທະນາເສດຖະກິດ, ວິທະຍາສາດ ແລະ ນະວັດຕະກໍາ, ກໍາມາທິການຮ້ອງຂໍຄວາມເປັນທໍາ; ການບໍລິການຂໍ້ມູນ-ຂ່າວສານ, ການຄົ້ນຄວ້າ ແລະ ການບໍລິການວຽກງານຫໍສະໝຸດ.

ນອກນັ້ນ, ຄະນະຜູ້ແທນສະພາແຫ່ງຊາດລາວ ຍັງໄດ້ເຂົ້າຮ່ວມກອງປະຊຸມສຳມະນາແລກປ່ຽນບົດຮຽນ ນຳສະ ເໜີໂດຍສາດສະດາຈານ ແລະ ຊ່ຽວຊານມະຫາວິທະຍາໄລວິກຕໍເຣຍແວວລິງຕັນ ກັບວຽກງານລັດຖະສະພາ ໂດຍສະ ເພາະຫົວຂໍ້ກ່ຽວກັບຂະບວນການລັດຖະສະພາ, ການແນະນຳລັດຖະສະພານິວຊີແລນ ແລະ ຂະບວນການສ້າງນະໂຍ ບາຍ, ພາລະບົດບາດຂອງກຸ່ມຄົນທີ່ໄດ້ຮັບຜົນປະໂຫຍດໃນຂະບວນການສ້າງນະໂຍບາຍຂອງນິວຊີແລນ, ຂະບວນການສ້າງນະໂຍບາຍໂດຍອີງຕາມຫຼັກຄວາມເປັນຈິງ, ຂະບວນການຕັດສິນໃຈໂດຍອີງໃສ່ຫຼັກຖານຢູ່ປະເທດນິວຊີແລນ ແລະ ບົດບາດຂອງທະນາຄານສຳຮອງ (NZ Reserve Bank) ຂະບວນການສ້າງນະໂຍບາຍ, ແຜນການປົກຄອງທີ່ດີໄລຍະສັ້ນ ແລະ ໄລຍະຍາວ ແລະ ຫົວຂໍ້ສຳຄັນອື່ນໆ. ຜ່ານການນໍາສະເໜີ, ຮັບຟັງການເຜີຍແຜ່ຫົວຂໍ້ຕ່າງໆຂອງຊ່ຽວຊານ ແລະ ລົງເລິກແລກປ່ຽນປະສົບການ, ຖອດຖອນບົດຮຽນຕົວຈິງ ຮ່ວມກັບກຳມາທິການກ່ຽວຂ້ອງຂອງລັດຖະສະພານິວຊີແລນ ເຮັດໃຫ້ຄະນະຜູ້ແທນລາວໄດ້ຮຽນຮູ້ ແລະ ເຂົ້າໃຈຫຼາຍບັນຫາກ່ຽວຂ້ອງຈາກຜົນໄດ້ຮັບຂອງການສຳມະນາແລກປ່ຽນບົດຮຽນຄັ້ງນີ້ ກາຍເປັນຄວາມຮູ້, ບົດຮຽນທີ່ດີ ແລະ ມີຄຸນຄ່າຢ່າງຫຼວງຫຼາຍສຳລັບຄະນະຜູ້ແທນລາວ ເພື່ອ ນໍາເອົາບົດຮຽນດັ່ງກ່າວໄປຜັນຂະຫຍາຍ ແລະ ປັບໃຊ້ເຂົ້າໃນໜ້າທີ່ວຽກງານຕົວຈິງໃຫ້ເກີດຜົນປະໂຫຍດສູງສຸດ.