(ສພຊ) – ລະຫວ່າງວັນທີ 04-09 ກໍລະກົດຜ່ານມາ, ທ່ານ ປອ. ຄໍາແສນ ສີສະວົງ ສະມາຊິກສະພາແຫ່ງຊາດປະຈຳເຂດເລືອກຕັ້ງທີ 9 ແຂວງຊຽງຂວາງ, ຄະນະສະມັດຊາລັດຖະສະພາປະເທດທີ່ໃຊ້ພາສາຝຣັ່ງ, ກໍາມະການສູນກາງແນວລາວສ້າງຊາດ, ຄະນະກໍາມາທິການພົວພັນເຊື້ອຊາດລາວໃນຕ່າງປະເທດ ພ້ອມດ້ວຍຄະນະຊາວໜຸ່ມສະພາແຫ່ງຊາດລາວ ໄດ້ສຳເລັດການເຂົ້າຮ່ວມກອງປະຊຸມໃຫຍ່ສະມັດຊາລັດຖະສະພາປະເທດທີ່ໃຊ້ພາສາຝຣັ່ງ (APF) ຄັ້ງທີ 49 ແລະ ກອງປະຊຸມໃຫຍ່ຄັ້ງທີ 10 ສະມັດຊາລັດຖະສະພາຊາວໜຸ່ມທີ່ໃຊ້ພາສາຝຣັ່ງ ທີ່ມົງເທຣອານ, ປະເທດການາດາ ເຊິ່ງມີຄະ ນະຜູ້ແທນຈາກປະເທດທີ່ໃຊ້ພາສາຝຣັ່ງ 49 ປະເທດ ພ້ອມດ້ວຍຕົວແທນຈາກອົງການຝຣັ່ງໂກໂຟນີສາກົນ (OIF), ຄະ ນະເລຂາທິການໃຫຍ່ສະມັດຊາລັດຖະສະພາປະເທດທີ່ໃຊ້ພາສາຝຣັ່ງ, ອົງການມະຫາວິທະຍາໄລທີ່ໃຊ້ພາສາຝຣັ່ງ (AUF), ອົງການອາຫານ ແລະ ການກະເສດ ແຫ່ງສະຫະປະຊາຊາດ (FAO) ລວມທັງໝົດ 510 ທ່ານ ເຂົ້າຮ່ວມ.
ກອງປະຊຸມໃຫຍ່ຂອງ APF ຄັ້ງນີ້ ດໍາເນີນພາຍໃຕ້ຫົວຂໍ້ “ເຄື່ອງປັນຍາປະດິດ ແລະ ລັດຖະສະພາ” ແລະ ກອງປະຊຸມໃຫຍ່ຊາວໜຸ່ມ APF ກໍໄດ້ດໍາເນີນພາຍໃຕ້ 4 ຫົວຂໍ້ຕົ້ນຕໍຄື: “ການຕໍ່ສູ້ກັບຄວາມວຸ້ນວາຍໃນກຸ່ມໄວໜຸ່ມ”, “ການສົ່ງເສີມການນໍາໃຊ້ພາສາຝຣັ່ງຢ່າງເປັນທາງການ ແລະ ຄວາມນິຍົມໃນສະຕະວັດທີ XXI”, “ການຕິດຕາມກວດກາການ ເຄື່ອນໄຫວຂອງຜູ້ທີ່ມີອິດທິພົນໃນໄວໜຸ່ມ” ແລະ “ການຊຸກຍູ້ໄວໜຸ່ມເຄື່ອນໄຫວໃນຊີວິດຈິງ ຫຼາຍກວ່າການນໍາໃຊ້ສັງ ຄົມອອນລາຍ”. ພ້ອມດຽວກັນ, ກໍຍັງມີກອງປະຊຸມຄະນະບໍລິຫານງານ, ກໍາມາທິການປະຈໍາຕ່າງໆຂອງ APF ເປັນຕົ້ນ: ກອງປະຊຸມກໍາມາທິການການເມືອງ; ກໍາມາທິການການສຶກສາ, ການສື່ສານ ແລະ ວຽກງານວັດທະນະທໍາ; ກໍາມາທິການວຽກງານລັດຖະສະພາ ແລະ ກໍາມາທິການວຽກງານເສດຖະກິດ, ສັງຄົມ ແລະ ສິ່ງແວດລ້ອມ; ກອງປະຊຸມເຄືອຂ່າຍລັດ ຖະສະພາເພດຍິງ; ກອງປະຊຸມເຄືອຂ່າຍລັດຖະສະພາໜຸ່ມ ແລະ ກອງປະຊຸມປິ່ນອ້ອມອື່ນໆທີ່ດໍາເນີນຄວບຄູ່ກັນໄປ.
ກອງປະຊຸມໃຫຍ່ APF ໄດ້ຮັບຟັງລາຍງານສະພາບການໃນບັນດາປະເທດທີ່ໃຊ້ພາສາຝຣັ່ງຈາກຜູ້ຕາງໜ້າຂອງແຕ່ລະພາກພື້ນ, ພິຈາລະນາຮັບຮອງເອົາຂອບແຜນຍຸດທະສາດ APF ປີ 2025-2030, ຮັບຮອງເອົາການປັບປຸງທຳມະ ນູນຂອງ APF, ຮັບຟັງການຮັບຮອງ​ທັດສະນະຂອງ APF ໃນ​ກອງ​ປະຊຸມ​ສຸດ​ຍອດຄັ້ງ​ທີ 19 ຂອງອົງການຝຣັ່ງໂກໂຟນີສາກົນ ພາຍໃຕ້​ຫົວ​ຂໍ້​: “ປັບປຸງ​ການ​ຍ້າຍຖິ່ນຖານ​ຂອງ​ພົນລະ​ເມືອງ​ໃນບັນດາປະເທດທີ່ໃຊ້ພາສາຝຣັ່ງ ​ເພື່ອ​ຊຸກຍູ້​ການ​ສ້າງ ສາ, ນະ​ວັດຕະກຳ ​ແລະ ການ​ປະກອບ​ການ”, ບົດລາຍງານການເຄື່ອນໄຫວງົບປະມານທີ່ສະຫຼຸບບັນຊີລາຍຈ່າຍສໍາລັບປີການເງິນໃນປີ 2023 ແລະ ການປັບປຸງລາຍຈ່າຍໃນປີ 2024, ກວດກາຮ່າງ ແລະ ຮັບຮອງມະຕິຂອງ 4 ກຳມາທິການ ແລະ ເຄືອຂ່າຍປະຈໍາຂອງ APF ແລະ ຮັບຟັງຂໍ້ຕົກລົງຮ່ວມມືຂອງບັນດາຄູ່ຮ່ວມພັດທະນາຂອງ APF; ນອກຈາກນີ້, ຍັງໄດ້ຮ່ວມກັນປຶກສາ​ຫາລື ແລະ ແລກປ່ຽນຄຳຄິດຄຳເຫັນກ່ຽວກັບຫຼາຍ​ບັນຫາ​ສຳຄັນທີ່ເປັນສິ່ງທ້າທາຍ ແລະ ຄວາມກັງ ວົນຮ່ວມກັນໃນແຕ່ລະພາກພື້ນ ໂດຍສະເພາະແມ່ນໃນບັນດາປະເທດຝຣັ່ງໂກໂຟນ.
ໃນການເຂົ້າຮ່ວມກອງປະຊຸມຄັ້ງນີ້, ຄະນະຜູ້ແທນສະພາແຫ່ງຊາດລາວ ໄດ້ສະເໜີບົດປະກອບຄໍາເຫັນກ່ຽວກັບສະພາບການພາກພື້ນ ແລະ ສາກົນ, ສະພາບການພັດທະນາເສດຖະກິດ-ສັງຄົມໃນ ສປປລາວ, ການຮ່ວມມືລະຫວ່າງ ສປປລາວ ກັບ ອົງການຝຣັ່ງໂກໂຟນີສາກົນ ແລະ ອົງການສະມັດຊາລັດຖະສະພາປະເທດທີ່ໃຊ້ພາສາຝຣັ່ງ ໃນການເພີ່ມທະວີການຮ່ວມມືດ້ານການສຶກສາ, ກະສິກໍາ, ສາທາລະນະສຸກ, ການທ່ອງທ່ຽວ, ການແລກປ່ຽນວັດທະນະທຳ, ການສົ່ງ ເສີມການຮຽນ-ການສອນພາສາຝຣັ່ງ ແລະ ອື່ນໆ ເພື່ອ​ເສີມ​ຂະຫຍາຍ​ບົດບາດ​ຂອງ APF ແລະ OIF ​ໃຫ້ສູງເດັ່ນຂຶ້ນໃນ​ພາກ​ພື້ນ ​ແລະ ສາກົນ; ພ້ອມກັນນີ້, ຄະນະຜູ້ແທນຊາວໜຸ່ມ ຍັງໄດ້ເຂົ້າຮ່ວມກ່າວບົດຄວາມພາຍໃຕ້ຫົວຂໍ້ “ຄວາມຫຼາກຫຼາຍທາງດ້ານເຊື້ອຊາດຂອງການມີສ່ວນຮ່ວມໃນການສົ່ງເສີມການນໍາໃຊ້ພາສາຝຣັ່ງ” ແລະ ເຂົ້າຮ່ວມໂຕ້ວາທີລະຫວ່າງຄະນະຜູ້ແທນບັນດາປະເທດຝຣັ່ງໂກໂຟນ ໂດຍໄດ້ປະກອບຄໍາເຫັນໃນຖານະຝ່າຍສະເໜີ ແລະ ຝ່າຍທີ່ເຫັນຕ່າງ ເຊິ່ງໄດ້ ດໍາເນີນພາຍໃຕ້ 3 ຫົວຂໍ້ສໍາຄັນ: “ພົນລະເມືອງທຸກຄົນຄວນໄດ້ຮັບຜົນປະໂຫຍດຈາກລາຍຮັບສາກົນ”, “ການຄັດເລືອກເຂົ້າເປັນທະຫານເພື່ອຮັບໃຊ້ຊາດ ຄວນກໍານົດເປັນການບັງຄັບ” ແລະ “ການສ້າງຄວາມດີ ແມ່ນການສ້າງພາບລວງຕາ”.
ໃນຕອນທ້າຍຂອງກອງປະຊຸມ ໄດ້ຮັບຮອງເອົາວັນເວລາ ແລະ ສະຖານທີ່ການເປັນເຈົ້າພາບຈັດກອງປະຊຸມໃຫຍ່ APF ຄັ້ງຕໍ່ໄປ ເຊິ່ງຈະມີຂຶ້ນໃນເດືອນກໍລະກົດ 2025 ທີ່ນະຄອນຫຼວງປາຣີ, ປະເທດຝຣັ່ງ.