ໃນລະຫວ່າງວັນທີ 07-10 ກັນຍາ 2023, ທ່ານ ປອ. ໄຊສົມພອນ ພົມວິຫານ, ກໍາມະການກົມການເມືອງສູນກາງພັກ, ປະທານສະພາແຫ່ງຊາດ ແຫ່ງ ສປປ ລາວ ພ້ອມດ້ວຍຄະນະຜູ້ແທນຂັ້ນສູງ ຂອງສະພາແຫ່ງຊາດ ແຫ່ງ ສປປ ລາວ ໄດ້ຢ້ຽມຢາມປະເທດ ມົງໂກລີ ຢ່າງເປັນທາງການ ຕາມການ ເຊື້ອເຊີນ ຂອງ ທ່ານ ກອມບໍຈາວ ຊັງຕັງຊາທາຣ໌, ປະທານສະພາຄູຣານໃຫຍ່ ແຫ່ງ ມົງໂກລີ ທັງເປັນການຢ້ຽມຢາມ ປະເທດ ມົງໂກລີ ຄັ້ງທໍາອິດ ໃນນາມປະທານສະພາແຫ່ງຊາດລາວ ຊຸດທີ IX.

ການຢ້ຽມຢາມຄັ້ງນີ້ ເປັນການເສີມຂະຫຍາຍ ສາຍພົວພັນມິດຕະພາບອັນເປັນມູນເຊື້ອ ແລະ ການຮ່ວມມືທີ່ດີ ລະຫວ່າງ ສອງອົງການນິຕິບັນຍັດ ກໍ່ຄື ປະຊາຊົນສອງຊາດ ສປປ ລາວ ແລະ ມົງໂກລີ, ພ້ອມທັງເປັນໂອກາດດີ ໃນການແລກປ່ຽນບົດຮຽນ ແລະ ຊຸກຍູ້, ສົ່ງເສີມການຮ່ວມມືເຊິ່ງກັນ ແລະ ກັນໃນຂົງເຂດ ນິຕິບັນຍັດ, ການຄ້າ, ການລົງທຶນ, ການທ່ອງທ່ຽວ ແລະ ອື່ນໆ.

ໃນຕອນເຊົ້າຂອງວັນທີ 08 ກັນຍາ 2023 ພາຍຫລັງທີ່ຄະນະຜູ້ແທນຂັ້ນສູງຂອງສະພາແຫ່ງຊາດລາວ ໄດ້ເຂົ້າຮ່ວມພິທີຕ້ອນຮັບທາງການ ທີ່ຈັດຂຶ້ນຢ່າງສົມກຽດ ຢູ່ທຳນຽບແຫ່ງລັດ ໂດຍໄດຮັບການຕ້ອນຮັບຈາກ ທ່ານປະທານສະພາຄູຣານໃຫຍ່ ແລະ ການນຳຂັ້ນສູງ ຂອງສະພາຄູຣານໃຫຍ່ ແຫ່ງ ມົງໂກລີ; ທ່ານປະທານສະພາແຫ່ງຊາດລາວ ແລະ ທ່ານປະທານສະພາຄູຣານໃຫຍ່ມົງໂກລີ ໄດ້ດໍາເນີນການພົບປະສອງຝ່າຍຢ່າງເປັນທາງການ, ສອງຝ່າຍ ໄດ້ຮ່ວມກັນຕີລາຄາຄືນ ການພົວພັນ ແລະການຮ່ວມມື ລະຫວ່າງ ສອງປະເທດ ກໍ່ຄື ລະຫວ່າງ ສອງອົງການນິຕິບັນຍັດ ລາວ-ມົງໂກລີ ໃນໄລຍະຜ່ານມາ ແລະ ປຶກສາຫາລືທິດທາງແຜນການພົວພັນຮ່ວມມືໃນຕໍ່ໜ້າ ເປັນຕົ້ນແມ່ນ ການສືບຕໍ່ແລກປ່ຽນ ຄະນະຜູ້ແທນຂັ້ນຕ່າງໆຮ່ວມກັນ, ແລກປ່ຽນບົດຮຽນ, ຂໍ້ມູນ-ຂ່າວສານ ກ່ຽວກັບການປະຕິບັດພາລະບົດບາດ ຂອງອົງການນິຕິບັນຍັດ ແລະ ໃນຫົວຂໍ້ຕ່າງໆ ທີ່ຝ່າຍສອງຝ່າຍ ມີຄວາມສົນໃຈ, ຊຸກຍູ້ ແລະ ສົ່ງເສີມການຈັດຕັ້ງປະຕິບັດບັນດາສັນຍາ, ສົນທິສັນຍາ ແລະ ຂໍ້ຕົກລົງຕ່າງໆ ທີ່ສອງລັດຖະບານ ຂອງສອງປະເທດ ໄດ້ລົງນາມຮ່ວມກັນ ທາງດ້ານເສດຖະກິດ, ການຄ້າ-ການລົງທຶນ, ການທ່ອງທ່ຽວ ແລະ ອື່ນໆໃຫ້ປະກົດຜົນເປັນຈິງ, ຊຸກຍູ້ໃຫ້ ສອງປະເທດ ເພີ່ມທະວີການຮ່ວມມືດ້ານການຄົມມະນາຄົມ-ຂົນສົ່ງ ແລະ ດ້ານການຄ້າ-ການລົງທຶນ ໃຫ້ເປັນຮູບປະທຳຫຼາຍຂຶ້ນ, ການຮ່ວມມື ສະໜັບ ສະໜູນ ເຊິ່ງກັນ ແລະ ກັນ ໃນເວທີລັດຖະສະພາພາກພື້ນ ແລະ ສາກົນ. ພາຍຫຼັງການພົບປະ, ສອງປະທານສະພາແຫ່ງຊາດ ກໍ່ໄດ້ຮ່ວມກັນລົງນາມ ໃນບົດບັນທຶກຄວາມເຂົ້າໃຈ ວ່າດ້ວຍການຮ່ວມມື ລະຫວ່າງ ສະພາແຫ່ງຊາດລາວ ແລະ ສະພາຄູຣານໃຫຍ່ມົງໂກລີ ເປັນນິຕິກໍາທີ່ເປັນບ່ອນອີງ ໃຫ້ແກ່ການພົວພັນຮ່ວມມື ລະຫວ່າງ ສອງອົງການນິຕິບັນຍັດໃນຕໍ່ໜ້າ.

​ໃນໂອກາດຢ້ຽມຢາມຄັ້ງນີ້, ທ່ານປະທານສະພາແຫ່ງຊາດລາວ, ໄດ້ປະກາດສະໜັບສະໜູນເຟີນີເຈີໄມ້ ຈຳນວນ 50 ຊຸດ ໃຫ້ແກ່ສະພາຄູຣານໃຫຍ່ ແຫ່ງ ມົງໂກລີ ໃນນາມ ສປປ ລາວ ແລະ ປະຊາຊົນລາວບັນດາເຜົ່າ ເພື່ອນໍາໄປຕິດຕັ້ງໃສ່ຫ້ອງປະຊຸມ ຂອງຕົນ ເພື່ອຮອງຮັບຈໍານວນສະມາຊິກສະພາຄູຣານໃຫຍ່ ທີ່ຈະເພີ່ມຂຶ້ນ ໃນປີ 2024.

ໃນໄລຍະຢ້ຽມຢາມຢູ່ ປະເທດມົງໂກລີ, ຄະນະຜູ້ແທນຂັ້ນສູງ ຂອງສະພາແຫ່ງຊາດລາວ ໄດ້ເຂົ້າຢ້ຽມ ຂໍ່ານັບ ປະທານາທິບໍດີ ແຫ່ງ ມົງໂກລີ ໃນການພົບປະ, ສອງຝ່າຍ ໄດ້ແຈ້ງສະພາບການພົ້ນເດັ່ນ ຂອງສອງປະເທດ ພ້ອມທັງຕີລາຄາການພົວພັນຮ່ວມມື ໃນໄລຍະຜ່ານມາ ແລະ ປຶກສາຫາລືທິດທາງແຜນການພົວພັນຮ່ວມມືໃນຕໍ່ໜ້າຮ່ວມກັນ. ທ່ານປະທານສະພາແຫ່ງຊາດລາວ ໄດ້ລາຍງານຜົນການພົບປະກັບ ທ່ານປະທານສະພາຄູຣານໃຫຍ່ມົງໂກລີ ແລະ ເຊັນບົດບັນທຶກການຮ່ວມມືສອງຝ່າຍ. ທ່ານປະທານາທິບໍດີ ມົງໂກລີ ໄດ້ຕີລາຄາສູງຕໍ່ການພົວພັນຮ່ວມມື ລະຫວ່າງ ສອງອົງການນິນິບັນຍັດ ແລະ ພ້ອມທີ່ຈະໃຫ້ການສະໜັບສະໜູນ.

ໃນໂອກາດການມາຢ້ຽມຢາມດັ່ງກ່າວ, ຄະນະຜູ້ແທນຂັ້ນສູງ ຂອງສະພາແຫ່ງຊາດລາວ ຍັງໄດ້ ເຄື່ອນໄຫວ ຢ້ຽມຊົມ ພິພິທະພັນແຫ່ງຊາດ ຈິງກິສຄານ, ຢ້ຽມຢາມບໍລິສັດຜະລິດຜ້າພົມ ອູລານບາຕໍ ຈຳກັດ, ຢ້ຽມຢາມບໍລິສັດຜະລິດຂົນແບ້ອ່ອນ ໂກບີ ແລະ ຢ້ຽມຊົມ ງານບຸນມະໂຫລານນາດຳ ຢູ່ ນະຄອນຫຼວງ ອູລານບາຕໍ ອີກດ້ວຍ.