ວັນທີ 30 ພະຈິກ 2022 ນີ້, ທີ່ຫ້ອງປະຊຸມສະພາປະຊາຊົນ ແຂວງຫົວພັນ ຄະນະປະຈຳສະພາປະຊາຊົນແຂວງຫົວພັນ ຈັດກອງປະຊຸມຮ່ວມກັບ ອົງການປົກຄອງແຂວງ ແລະ ອົງການຕຸລາການ ພາຍໃຕ້ການເປັນປະທານຮ່ວມ ຂອງທ່ານ ພອນສຸກ ອິນທະວົງ ຄະນະປະຈຳພັກແຂວງ, ຮອງເຈົ້າແຂວງ ແຂວງຫົວພັນ ແລະ ທ່ານ ສົມສັກ ດອນຈານິດ ກຳມະການພັກແຂວງ ຮອງປະທານສະພາປະຊາຊົນ ແຂວງຫົວພັນ ມີບັນດາທ່ານ ຄະນະປະຈຳສະພາປະຊາຊົນແຂວງ, ສະມາຊິກສະພາແຫ່ງຊາດປະຈຳເຂດເລືອກຕັ້ງທີ 8, ສະມາຊິກສະພາປະຊາຊົນແຂວງ, ຄະນະເລຂາທິການ ສພຂ, ຫົວໜ້າ, ຮອງຫົວໜ້າພະແນກການອ້ອມຂ້າງແຂວງ, ກອງບັນຊາການປ້ອງກັນຄວາມສະຫງົບແຂວງ, ອົງການໄອຍະການປະຊາຊົນແຂວງ, ສານປະຊາຊົນແຂວງ ແລະ ວິຊາການ ຈາກຂະແໜງການທີ່ກ່ຽວຂ້ອງຂອງແຂວງເຂົ້າຮ່ວມ.

             ກອງປະຊຸມ, ໄດ້ຮັບຟັງ ການຜ່ານຮ່າງບົດລາຍງານ ຂອງອົງການປົກຄອງແຂວງ ແລະ ອົງການຕຸລາການ ກ່ຽວກັບການຈັດຕັ້ງປະຕິບັດ ແຜນພັດທະນາເສດຖະກິດ-ສັງຄົມ, ແຜນງົບປະມານ ປະຈຳປີ 2022 ແລະ ທິດທາງ ປະຈຳປີ 2023 ຂອງແຂວງຫົວພັນ; ຮ່າງບົດລາຍງານຜົນຂອງການກວດກາ ປະຈຳປີ 2022 ແລະ ທິດທາງແຜນການ ປະຈຳປີ 2023 ຂອງອົງການກວດກາລັດແຂວງ; ຮ່າງບົດລາຍງານການຈັດຕັ້ງປະຕິບັດວຽກງານ ປະຈຳປີ 2022 ແລະ ທິດທາງແຜນການ ປະຈໍາປີ 2023 ຂອງ ອົງການໄອຍະການປະຊາຊົນ ແລະ ສານປະຊາຊົນແຂວງ; ຈາກນັ້ນ, ຜູ້ເຂົ້າຮ່ວມກອງປະຊຸມ ກໍໄດ້ພ້ອມກັນຄົ້ນຄວ້າ ປະກອບຄຳຄິດຄຳເຫັນ ຢ່າງກົງໄປກົງມາ ຕໍ່ກັບບັນດາຮ່າງບົດລາຍງານດັ່ງກ່າວ ເພື່ອໃຫ້ມີເນື້ອໃນລະອຽດຄົບຖ້ວນ, ສົມບູນ ແລະ ເພື່ອເປັນຂໍ້ມູນໃຫ້ ຄະນະສະມາຊິກສະພາແຫ່ງຊາດ ປະຈຳເຂດເລືອກຕັ້ງທີ 8 ແຂວງຫົວພັນ ນໍາໄປຄົ້ນຄ້ວາປະກອບຄໍາຄິດເຫັນ ຢູ່ໃນກອງປະຊຸມສະໄໝສາມັນ ເທື່ອທີ 4 ຂອງສະພາແຫ່ງຊາດ ທີ່ຈະໄດ້ໄຂຂຶ້ນໃນມໍ່ໆນີ້ ແລະ ຈະໄດ້ນໍາເຂົ້າຜ່ານ ຢູ່ໃນກອງປະຊຸມສະໄໝສາມັນ ເທື່ອທີ 4 ຂອງສະພາປະຊາຊົນ ແຂວງຫົວພັນ ຕື່ມອີກ.

           ຕອນທ້າຍ, ຄະນະປະທານກອງປະຊຸມ ໄດ້ມີຄຳເຫັນຊີ້ນຳ ກ່ອນອື່ນທ່ານໄດ້ສະແດງຄວາມຍ້ອງຍໍຊົມເຊີຍຕໍ່ ອົງການປົກຄອງແຂວງ ແລະ ອົງການຕຸລາການ ທີ່ໄດ້ເອົາໃຈໃສ່ສະຫຼຸບຕີລາຄາວຽກງານໃນຄວາມຮັບຜິດຊອບຂອງຕົນ ໃນໄລຍະໜຶ່ງປີຜ່ານມາ ເຊິ່ງສະແດງອອກ ໃນຮ່າງບົດລາຍງານ ເຫັນວ່າມີຫລາຍອັນພົ້ນເດັ່ນ, ແຕ່ກໍຕ້ອງໄດ້ເອົາໃຈໃສ່ສູ້ຊົນຕື່ມ ໂດຍສະເພາະ ແມ່ນການຈັດເກັບລາຍຮັບເຂົ້າງົບປະມານໃນທ້າຍປີ 2022 ໃຫ້ບັນລຸຕາມແຜນການວາງໄວ້, ພ້ອມນີ້ ທ່ານຍັງໄດ້ເໜັ້ນໜັກຕື່ມ ດ້ານກົນໄກການປະສານງານ ລະຫວ່າງ ສະພາປະຊາຊົນແຂວງ ກັບ ອົງການປົກຄອງແຂວງ, ອົງການຕຸລາການ ແລະ ຂະແໜງການກ່ຽວຂ້ອງ ໃຫ້ມີຄວາມເປັນເອກະພາບ, ຄ່ອງຕົວ ແລະ ທັນຕາມກຳນົດເວລາທີ່ກົດໝາຍກຳນົດ.