ເພື່ອສະຫຼຸບຕີລາຄາຄືນຜົນການຈັດຕັ້ງປະຕິບັດວຽກງານຮອບດ້ານຂອງຄະນະກໍາມະການເສດຖະກິດ,ແຜນການ ແລະ ການເງີນ ປະຈຳປີ 2022 ແລະ ວາງທິດທາງແຜນການ ປະຈໍາປີ 2023 ໂດຍສະເພາະແມ່ນວຽກງານຕິດຕາມກວດກາການຈັດ ຕັ້ງປະຕິບັດລັດຖະທຳມະນູນ ແລະ ກົດໝາຍ, ມະຕິຂອງສະພາປະຊາຊົນຂັ້ນແຂວງ ໃນຂົງເຂດເສດຖະກິດແຜນການ ແລະ ການເງີນ ເຂົ້າໃນການພັດທະນາເສດຖະກິດ-ສັງຄົມ.
ໃນວັນທີ 19 ມັງກອນ 2023 ນີ້. ທີ່ຫ້ອງປະຊຸມ ສະພາປະຊາຊົນແຂວງ (ສພຂ) ໄດ້ຈັດກອງປະຊຸມຄົບຄະນະປະຈໍາປີ 2022 ຂອງຄະນະກໍາມະການເສດຖະກິດ,ແຜນການ ແລະ ການເງີນ (ຄສຜງ) ສພຂ. ໂດຍການເປັນປະທານຂອງທ່ານ ສຸກສໍາລານ ໄຊຍະແສງ ຮອງປະທານ ສພຂ ປະທານ ຄສຜງ ເຂົ້າຮ່ວມມີທ່ານ ນາງ ພອນມະນີ ຂຽນໄຊຍະວົງ ຮອງປະທານ ສພຂ, ມີບັນດາທ່ານ ຄສຜງ, ຄະນະກໍາມະການ, ສະມາຊິກສະພາປະຊາຊົນແຂວງ, ຫົວໜ້າພະແນກ-ຮອງພະແນກການ ໃນຂົງເຂດເສດຖະກິດແຜນການ ແລະ ການເງີນ ແລະ ແຂກຖືກເຊີນຈໍານວນໜຶ່ງ
ທ່ານ ສຸກສໍາລານ ໄຊຍະແສງ ໄດ້ມີຄໍາເຫັນກ່າວເປີດກອງປະຊຸມວ່າ: ກອງປະຊຸມຄົບຄະນະ ຂອງຄະນະກຳມະການເສດຖະກິດ, ແຜນການ ແລະ ການເງິນ ຄັ້ງນີ້ ຈະໄດ້ດຳເນີນໄປເປັນເວລາ 2 ວັນ, ກອງປະຊຸມຈະໄດ້ ຮັບຟັງການສະຫຼຸບຕີລາຄາ ການເຄື່ອນໄຫວວຽກງານປະຈຳປີ 2022 ແລະ ທິດທາງ ປີ 2023 ຂອງຄະນະກຳມະການເສດຖະກິດ ແຜນການ ແລະ ການເງິນ; ການລາຍງານກ່ຽວກັບການຈັດຕັ້ງປະຕິບັດແຜນພັດທະນາເສດຖະກິດສັງຄົມ ປະຈຳປີ 2022 ແລະ ທິດທາງແຜນການປີ 2023; ການລາຍງານກ່ຽວກັບການຈັດຕັ້ງປະຕິບັດແຜນງົບປະມານຂອງແຂວງ ປະຈຳປີ 2022 ແລະ ທິດທາງແຜນການ ປີ 2023; ການລາຍງານກ່ຽວກັບການຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ ປະຈຳປີ 2022 ແລະ ທິດທາງ ປີ 2023; ການຊີ້້ແຈ້ງຂອງພະແນກກະສິກຳ ແລະ ປ່າໄມ້ແຂວງ; ການຊີ້້ແຈ້ງຂອງພະແນກພະລັງງານ ແລະ ບໍ່ແຮ່ແຂວງ; ການຊີ້້ແຈ້ງຂອງພະແນກໂຍທາທິການ ແລະ ຂົນສົ່ງແຂວງ. ແລະ ຈະໄດ້ພ້ອມກັນແລກປຽ່ນທັດສະນະ, ປຶກສາຫາລືຮ່ວມກັນ ແລະ ເອກະພາບກັນ ກ່ຽວກັບບັນຫາທີ່ພົ້ນເດັ່ນເກີດຂຶ້ນຢູ່ໃນສັງຄົມ ທີ່ຕິດພັນກັບວຽກງານໃນຂົງເສດຖະກິດ, ແຜນການ ແລະ ການເງິນ ກ່ອນທີ່ຈະເຂົ້າພິຈາລະນາຮັບຮອງໃນກອງປະຊຸມສະໄໝສາມັນເທື່ອທີ 4 ຂອງສະພາປະຊາຊົນແຂວງ ຊຸດທີ II, ສະນັ້ນ ເພື່ອຮັບປະກັນທາງດ້ານເນື້ອໃນ ແລະ ເວລານັ້ນ ຈຶ່ງຮຽກຮ້ອງໃຫ້ບັນດາທ່ານກຳມະການ ແລະ ຜູ້ແທນທີ່ເຂົ້າຮ່ວມກອງປະຊຸມຄັ້ງນີ້ ຈົ່ງໄດ້ສຸມສະຕິປັນຍາ ຄວາມຮູ້ ຄວາມສາມາດ ແລະ ນຳໃຊ້ເວລາທີ່ຈຳກັດ ເພື່ອຄົ້ນຄວ້າ, ສົນທະນາປຶກສາຫາລື, ປະກອບຄວາມເຫັນຢ່າງກົງໄປກົງມາ ໂດຍທຽບໃສ່ພຶດຕິກຳຕົວຈິງທີ່ເກີດຂຶ້ນໃນທ້ອງຖິ່ນ ແລະ ຂະແໜງຂອງທ່ານເພື່ອເຮັດໃຫ້ຫົວຂໍ້ ແລະ ເນື້ອໃນທີ່ເອົາເຂົ້າມາຄົ້ນຄວ້າ ປຶກສາຫາລືກັນໃນກອງປະຊຸມຄັ້ງນີ້ ໃຫ້ມີເນື້ອໃນທີ່ຄົບຖ້ວນ, ສົມບູນສາມາດຮັບຮອງເອົາ ແລະ ຈັດຕັ້ງປະຕິບັດໄດ້ໃຫ້ເກີດຜົນຕົວຈິງ.
ພາບຂ່າວ:ວິນັດ