ຕອນແລງວັນທີ 29 ພະຈິກ 2022 ຄະນະກໍາມະການວັດທະນາທໍາ-ສັງຄົມ ແລະ ບັນດາເຜົ່າຂອງສະພາປະຊາຊົນແຂວງຫລວງນ້ຳທາ ໄດ້ຈັດພິທີເຊັນບົດບັນທຶກຮ່ວມ ວ່າດ້ວຍການປະສານງານ ລະຫວ່າງ  ຄະນະກຳມະການວັດທະນາທຳ-ສັງຄົມ ແລະ ບັນດາເຜົ່າ ກັບ ບັນດາພະແນກການທີ່ກ່ຽວຂ້ອງຂອງແຂວງ ຂຶ້ນທີ່ຫ້ອງປະຊຸມສະພາປະຊາຊົນແຂວງ ພາຍໃຕ້ການເປັນປະທານຂອງທ່ານ  ນາງ ເກສອນ ແສງຍະວົງ ສະມາຊິກສະພາແຫ່ງຊາດປະຈຳເຂດເລືອກຕັ້ງ ປະທານຄະນະກຳມະການວັດທະນາທຳ-ສັງຄົມ ແລະ ບັນດາເຜົ່າ ໃຫ້ກຽດເຂົ້າຮ່ວມຂອງທ່ານ ນາງ ອຸ່ນຫລ້າ ອ້ຽງລໍລາດ ກຳມະການພັກແຂວງ ຮອງປະທານສະພາປະຊາຊົນແຂວງ ຜູ້ຊີ້ນຳວຽກງານຂົງເຂດວັດທະນາທຳ-ສັງຄົມ ແລະ ບັນດາເຜົ່າ, ມີສະມາຊິກສະພາປະຊາຊົນແຂວງ, ຫົວໜ້າ, ຮອງຫົວໜ້າພະແນກການທີ່ກ່ຽວຂ້ອງຂອງແຂວງ, ຫົວໜ້າ, ຮອງຫົວໜ້າຂະແໜງ ພ້ອມດ້ວຍພະນັກງານວິຊາການເຂົ້າຮ່ວມຢ່າງພ້ອມພຽງ.

ໃນພິທີໄດ້ຮັບຟັງຂໍ້ຕົກລົງ ຂອງຄະນະປະຈຳສະພາປະຊາຊົນແຂວງ ວ່າດ້ວຍການອານຸມັດເປີດພິທີເຊັນບົດບັນທຶກຮ່ວມ ວ່າດ້ວຍການປະສານງານ ກັບ ບັນດາພະແນກການທີ່ກ່ຽວຂ້ອງຂອງແຂວງ ເລກທີ 86/ຄລຂ.ສພຂ ,ລົງວັນທີ 28 ພະຈິກ 2022 ແລະ ຮ່າງບົດບັນທຶກຮ່ວມ ວ່າດ້ວຍການປະສານງານ ລະຫວ່າງ ຄະນະກໍາມະການວັດທະນາທຳ-ສັງຄົມ ແລະ ບັນດາເຜົ່າ ກັບ ພະແນກສຶກສາ ແລະ ກິລາ, ພະແນກສາທາລະນະສຸກ, ພະແນກຖະແຫລງຂ່າວ, ວັດທະນາທຳ ແລະ ທ່ອງທ່ຽວ, ພະແນກແຮງງານ ແລະ ສະຫວັດດີການສັງຄົມ ແລະ ອົງການກາແດງແຂວງຫລວງນ້ຳທາ ມີທັງໝົດ 12 ມາດຕາ; ຮ່າງບົດບັນທຶກຮ່ວມ ວ່າດ້ວຍ ພົວພັນ ແລະ ການປະສານງານລະຫວ່າງຄະນະກຳມະການວັດທະນາທຳ-ສັງຄົມ ແລະ ບັນດາເຜົ່າ ກັບອົງການແນວລາວສ້າງຊາດ, ບັນດາອົງການຈັດຕັ້ງມະຫາຊົນ, ພະແນກພາຍໃນ ແລະ ພະແນກກະສິກຳ ແລະ ປ່າໄມ້ແຂວງ ( ວຽກງານພັດທະນາຊົນນະບົດ ແລະ ແກ້ໄຂຄວາມທຸກາກ ) ທັງໝົດ 12 ມາດຕາ. ແລະ ຄະນະກໍາມະການວັດທະນາທໍາ-ສັງຄົມ ແລະ ບັນດາເຜົ່າ ກັບ ບັນດາພະແນກການທີ່ກ່ຽວຂ້ອງຂອງແຂວງ ໄດ້ຮ່ວມເຊັນບົດບັນທຶກຢ່າງເປັນທາງການ.

ທັງນີ້ ເພື່ອຮັບປະກັນໃຫ້ແກ່ການປະສານງານ ລະຫວ່າງ ຄະນະກຳມະການວັດທະນາທຳ-ສັງຄົມ ແລະ ບັນດາເຜົ່າ ກັບ ບັນດາພະແນການທີ່ກ່ຽວຂ້ອງຂອງແຂວງ ເຂົ້າສູ່ລະບຽບຫລັກການ ທັງຮັບປະກັນປະສິດທິຜົນ ໃນການປະຕິບັດພາລະບົດບາດ, ສິດ ແລະ ໝ້າທີ່ຂອງຕົນຕອນທ້າຍພິທີ ຍັງໄດ້ຮັບຟັງຄຳເຫັນໂອ້ລົມຂອງທ່ານ ນາງ ອຸ່ນຫລ້າ ອ້ຽງລໍລາດ ກຳມະການພັກແຂວງ ຮອງປະທານສະພາປະຊາຊົນແຂວງ ຜູ້ຊີ້ນຳວຽກງານຂົງເຂດວັດທະນາທຳ-ສັງຄົມ ແລະ ບັນດາເຜົ່າ ກ່ອນອື່ນທ່ານໄດ້ເຫັນດີເປັນເອກະພາບຕໍ່ບົດບັນທຶກຮ່ວມທັງ 2 ສະບັບ ແມ່ນມີຄວາມໝາຍສໍາຄັນຫລາຍ ເພາະເປັນຂອດການປະສານງານຂອງຄະນະກຳມະການ ກັບ ພະແນການຂອງແຂວງ ໂອກາດນີ້ ໄດ້ເນັ້ນໜັກໃຫ້ຄະນະກຳມະການ ແລະ ບັນດາພະແນກການ ໃນການຈັດຕັ້ງປະຕິບັດວຽກງານຕ້ອງປະຕິບັດຕາມກົດໝາຍ, ລະບຽບການຂອງແຕ່ລະພາກສ່ວນໃຫ້ເຂັ້ມງວດ, ການເຄື່ອນໄຫວວຽກງານຕ້ອງເຄື່ອນໄຫວຕາມສິດ, ໜ້າທີ່ຂອງຕົນ, ການພົວພັນປະສານງານຕ້ອງປະຕິບັດຕາມບົດບັນທຶກສະບັບນີ້ ແລະ ຕ້ອງມີແຜນຄົ້ນຄວ້າ, ສ້າງນິຕິກຳໃຕ້ກົດໝາຍທີ່ຈຳເປັນໃນຂົງເຂດຂອງຕົນໃຫ້ໄດ້ຕາມຄາດໝາຍ ພ້ອມທັງ ຮຽກຮ້ອງໃຫ້ບັນດາພະແນກການທີ່ກ່ຽວຂ້ອງຂອງແຂວງນຳເອົາເນື້ອໃນຈິດໃຈພິທີໃນມື້ນີ້ລົງຜັນຂະຫຍາຍໃນຂົງເຂດຂອງຕົນ ພ້ອມກັນຈັດຕັ້ງປະຕິບັດວຽກງານໃຫ້ສຳເລັດເປັນກ້າວໆ.

ໂດຍ ວັນນີ ແຝງບົວວັນ