ໃນຕອນເຊົ້າ,ວັນທີ 21 ກັນຍາ 2023 ທີ່ຫ້ອງປະຊຸມສະພາປະຊາຊົນແຂວງໆສະຫັວນນະເຂດ ໄດ້ຈັດກອງປະຊຸມຮ່ວມລະຫວ່າງ ກໍາມາທິການແຜນການ,ການເງີນ ແລະ ການກວດສອບ ສະພາແຫ່ງຊາດ ກັບ ສະພາປະຊາຊົນແຂວງ ໂດຍການໃຫ້ກຽດເປັນປະທານຮ່ວມລະຫວ່າງ ທ່ານ ປອ. ລີເບີ ລີບົວປາວ ກໍາມະການສູນກາງພັກ, ຄະນະປະຈຳສະພາແຫ່ງຊາດ, ປະທານກໍາມາທິການແຜນການ,ການເງີນ ແລະ ການກວດສອບ ສະພາແຫ່ງຊາດ, ທ່ານ ກົງແກ້ວ ມີວໍລະຈັກ ຮອງເລຂາພັກແຂວງ, ປະທານຄະນະສະມາຊິກສະພາແຫ່ງຊາດ ປະຈຳເຂດເລືອກຕັ້ງທີ 13, ປະທານສະພາປະຊາຊົນແຂວງ.

ມີບັນດາທ່ານຄະນະປະຈໍາສະພາປະຊາຊົນແຂວງ, ສະມາຊິກສະພາແຫ່ງຊາດປະຈໍາເຂດເລືອກຕັ້ງ, ຄະນະກໍາມະການເສດຖະກິດແຜນການ ແລະ ການເງີນ; ພະແນກແຜນການ ແລະການລົງທືນແຂວງ; ພະແນການເງີນແຂວງ; ພະແນກໂຍທາທິການ ແລະ ຂົນສົ່ງແຂວງ; ພະແນກກະສິກຳ ແລະ ປ່າໄມ້ແຂວງ; ທະນາຄານກາງປະຈຳແຂວງສະຫວັນນະເຂດ; ຮອງເລຂາທິການ ແລະ ວີຊາການທີ່ກ່ຽວຂ້ອງເຂົ້າຮ່ວມ.

ຈຸດປະສົງຂອງການລົງມາເຄື່ອນໄຫວໃນຄັ້ງນີ້ ກໍເພື່ອຕິດຕາມກວດກາ ແລະ ຊຸກຍູ້ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ແຜນງົບປະມານແຫ່ງລັດ, ວາລະແຫ່ງຊາດກ່ຽວກັບການແກ້ໄຂຄວາມຫຍຸ້ງຍາກດ້ານເສດຖະກິດ-ການເງີນ, ການແກ້ໄຂຜົນການກວດສອບ ແລະ ກວດກາ, ການຈັດຕັ້ງປະຕິບັດບາງໂຄງການລົງທືນຂອງລັດຢູ່ແຂວງສະຫັວນນະເຂດ ເພື່ອເປັນຂໍ້ມູນລາຍງານຕໍ່ກອງປະຊຸມຄະນະປະຈຳສະພາແຫ່ງຊາດ ແລະ ເປັນການກະກຽມປະກອບຄຳເຫັນຕໍ່ບົດລາຍງານ ຂອງລັດຖະບານ ກ່ຽວກັບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ແຫ່ງຊາດ ແລະ ແຜນງົບປະມານແຫ່ງລັດ ຕໍ່ກອງປະຊຸມສະໄໝສາມັນເທື່ອທີ 06 ຂອງສະພາແຫ່ງຊາດ ຊຸດທີ IXອີກດ້ວຍ.

ຊຶ່ງກອງປະຊຸມ ໄດ້ຮັບຟັງລາຍງານກ່ຽວກັບຜົນການຕິດຕາມກວດກາການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ແຜນງົບປະມານ ແລະ ການແກ້ໄຂຜົນການກວດສອບ ໂດຍທ່ານ ສະແຫວງ ນັນທະວົງ ກຳມະການຄະນະປະຈຳ ສພຂ, ປະທານຄະນະກຳມະການເສດຖະກິດ-ແຜນການ ແລະ ການເງີນ, ພ້ອມທັງຮັບຟັງການລາຍງານ  ແລະ ແລກປ່ຽນຄໍຄິດ-ຄໍາເຫັນ ຢ່າງກົງໄປກົງມາ ຈາກບັນດາພະແນກການທີ່ກ່ຽວຂ້ອງ ເປັນຕົ້ນ:ພະແນກແຜນການ ແລະການລົງທືນແຂວງ; ພະແນການເງີນແຂວງ; ພະແນກໂຍທາທິການ ແລະ ຂົນສົ່ງແຂວງ; ພະແນກກະສິກຳ ແລະ ປ່າໄມ້ແຂວງ; ທະນາຄານກາງປະຈຳແຂວງສະຫວັນນະເຂດ  ກ່ຽວກັບສະພາບການຈັດຕັ້ງປະຕິບັດວຽກງານໃນໄລຍະຜ່ານມາທີ່ສະແດງໃຫ້ເຫັນເຖິງຜົນສໍາເລັດ, ຂໍ້ສະດວກ, ຂໍ້ຫຍຸ້ງຍາກ, ສາເຫດ, ວີທີການ, ສິ່ງທ້າທາຍ ແລະ ມາດຕະການແກ້ໄຂ ຕໍ່ກັບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ແລະ ແຜນງົບປະມານ ຕິດພັນກັບການຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂຄວາມຫຍຸ້ງຍາກດ້ານເສດຖະກິດ-ການເງີນ, ຈໍານວນການຈັດສັນທຶນໃຫ້ແກ່ໂຄງການລົງທຶນຂອງລັດ ປະຈໍາປີ 2023 ພາຍໃນແຂວງ, ການແກ້ໄຂໜີ້ສີ້ນຂອງໂຄງການລົງທຶນຂອງລັດ ໂດຍສະເພາະໜີ້ສີ້ນໂຄງການສໍາເລັດແລ້ວ 100% ແລະ ໜີ້ສີ້ນໂຄງການສືບຕໍ່, ການສົ່ງເສີມການລົງທຶນເອກະຊົນພາຍໃນ ແລະ ຕ່າງປະເທດ ໂດຍສະເພາະການປະຕິບັດວຽກງານຈຸດສຸມຂອງວາລະແຫ່ງຊາດ

ໃນການສົ່ງເສີມການລົງທຶນ ເພື່ອຜະລິດທົດແທນການນໍາເຂົ້າ ແລະ ເປັນສີນຄ້າສົ່ງອອກ, ການແບ່ງຂັ້ນຄຸ້ມຄອງໃນການຈັດເກັບລາຍຮັບ ລະຫວ່າງສູນກາງ ແລະ ທ້ອງຖີ່ນ, ການດໍາເນີນແບ່ງຂັ້ນຄຸ້ມຄອງຂໍ້ມູນຖານລາຍຮັບ, ການແບ່ງຂັ້ນຄຸ້ມຄອງຫົວໜ່ວຍທຸລະກິດ, ການຈັດຕັ້ງປະຕິບັດມາດຕະການປະຢັດ ແລະ ຕ້ານການຟຸມເຟືອຍ ດໍາລັດເລກທີ 205/ລບ ແລະ ເລກທີ 599/ລບ, ການຈັດຕັ້ງປະຕິບັດການຫັນເປັນທັນສະໄໝການເກັບລາຍຮັບ-ລາຍຈ່າຍ, ການເກັບກູ້ລາຍຮັບຈາກຜົນການກວດສອບ-ກວດກາ, ສະພາບການເງີນເຟີ້, ການເຜີຍແຜ່ ແລະ ການຈັດຕັ້ງປະຕິບັດກົດໝາຍ ວ່າດ້ວຍການຄຸ້ມຄອງເງີນຕາຕ່າງປະເທດ   ເພື່ອຮັບປະກັນການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ແລະ ແຜນງົບປະມານແຫ່ງລັດ ເພີ່ມທະວີການຄຸ້ມຄອງການລົງທຶນຂອງລັດໃຫ້ມີປະສິດທິພາບ ແລະ ປະສິດທິຜົນ ແນໃສ່ປະກອບສ່ວນເຂົ້າໃນການປະຕິບັດວາລະແຫ່ງຊາດ ກ່ຽວກັບການແກ້ໄຂຂໍ້ຫຍຸ້ງຍາກດ້ານເສດຖະກິດ-ການເງິນ ໃຫ້ບັນລຸຕາມແຜນ ກໍຄືການປະຕິບັດແຜນພັດທະນາເສດຖະກິດ-ສັງຄົມ.

ໃນຕອນທ້າຍຂອງກອງຊຸມ ທ່ານ ປອ ລີເບີ ລີບົວປາວ ຍັງໄດ້ຍ້ອງຍໍຊົມເຊີຍມາຍັງສະພາປະຊາຊົນແຂວງ ແລະ ບັນດາພະແນກການຕ່າງໆທີ່ກ່ຽວຂ້ອງ  ທີ່ໄດ້ເອົາໃຈໃສ່ຈັດຕັ້ງປະຕິບັດໜ້າທີ່ວຽກງານຕົນໄດ້ຮັບຜົນສຳເລັດເປັນກ້າວໆມາ ແລະ ຈະເປັນຂໍ້ມູນພື້ນຖານສໍາຄັນທີ່ຈະນໍາໄປຄົ້ນຄວ້າລາຍງານຕໍ່ຄະນະປະຈໍາສະພາແຫ່ງຊາດ ແລະ ຈົ່ງພ້ອມກັນສືບຕໍ່ເອົາໃຈໃສ່ຊຸກຍູ້ສົ່ງເສີມການຈັດຕັ້ງປະຕິບັດວຽກງານ ກໍຄືແຜນພັດທະນາເສດຖະກິດ-ສັງຄົມ, ແຜນງົບປະມານແຫ່ງລັດ ຄຽງຄູ່ກັບການຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂຄວາມຫຍຸ້ງຍາກດ້ານເສດຖະກິດ-ການເງີນໃຫ້ປະສົບຜົນສໍາເລັດຕາມຄາດໝາຍທີ່ວາງໄວ້.

ພາບ-ຂ່າວ: ນາງຄອນສະຫວັນ ເມກສະຫວັນ