ໃນວັນທີ 28 ມັງກອນ 2025, ກຳມາທິການບັນດາເຜົ່າ ສະພາແຫ່ງຊາດ ນຳໂດຍ ທ່ານ ຄຳຈັນ ໂສຕາປະເສີດ, ກຳມະການຄະນະປະຈຳ ສະພາແຫ່ງຊາດ, ປະທານກຳມາທິການບັນດາເຜົ່າ ພ້ອມດ້ວຍຄະນະ ໄດ້ລົງເຄື່ອນໄຫວຕິດຕາມກວດກາ ແລະ ເກັບກຳຂໍ້ມູນ ກ່ຽວກັບການຈັດຕັ້ງປະຕິບັດຄາດໝາຍວຽກງານພັດທະນາຊົນນະບົດ ແລະ ແກ້ໄຂຄວາມທຸກຍາກ ຕາມມະຕິສະພາແຫ່ງຊາດ ສະບັບເລກທີ 134/ສພຊ, ລົງວັນທີ 01 ກໍລະກົດ 2024 ຢູ່ທີ່ເມືອງສັງທອງ, ນະຄອນຫຼວງວຽງຈັນ. ໂດຍມີທ່ານ ປະທານຄະນະກຳມະການ ວັດທະນະທຳ-ສັງຄົມ ແລະ ບັນດາເຜົ່າ ສະພາປະຊາຊົນ ນະຄອນຫຼວງ, ສະມາຊິກສະພາແຫ່ງຊາດ ທີ່ສັງກັດກຳມາທິການບັນດາເຜົ່າ, ບັນດາທ່ານ ສະມາຊິກສະພາປະຊາຊົນ ປະຈຳເຂດເລືອກຕັ້ງເມືອງ, ພະແນກກະສິກຳ ນະຄອນຫຼວງ, ທ່ານຮອງເຈົ້າເມືອງ, ການນຳຂອງເມືອງ, ບັນດາກົມ ແລະ ພະແນກການກ່ຽວຂ້ອງຂອງສະພາແຫ່ງຊາດ, ບັນດາຫ້ອງການອ້ອມຂ້າງເມືອງ, ອົງການປົກຄອງບ້ານ ແລະ ວິຊາການກ່ຽວຂ້ອງ ຈໍານວນໜຶ່ງເຂົ້າຮ່ວມ.
ກອງປະຊຸມໄດ້ຮັບຟັງການສະຫຼຸບລາຍງານໂດຍຫຍໍ້ ຈາກພະແນກກະສິກຳ ແລະ ປ່າໄມ້ ນະຄອນຫຼວງ, ຮອງເຈົ້າເມືອງ ແລະ ຫ້ອງການກະສິກຳ ແລະ ປ່າໄມ້ເມືອງສັງທອງ ກ່ຽວກັບຂໍ້ມູນຜົນງານ, ຂໍ້ສະດວກ, ຂໍ້ຫຍຸ້ງຍາກ ແລະ ຄວາມຄືບໜ້າ ໃນການຈັດຕັ້ງປະຕິບັດວຽກງານຕົວຈິງ ຂອງຄາດໝາຍການສ້າງບ້ານໃຫຍ່ກາຍເປັນຕົວເມືອງນ້ອຍໃນຊົນນະ ບົດ ຂອງບ້ານໃຫຍ່ນາຈະເລີນ, ການຂະຫຍາຍກອງທຶນພັດທະນາຂັ້ນບ້ານ ແລະ ການນຳໃຊ້ຊົນລະປະທານ ເຂົ້າໃນການເພີ່ມພູນການຜະລິດ ຂອງປະຊາຊົນ ແລະ ຂໍ້ສະດວກຂໍ້ຫຍຸ້ງຍາກ, ບົດຮຽນຖອດຖອນໄດ້ ແລະ ທິດທາງແກ້ໄຂ ຕໍ່ຂອດການປະສານງານ ລະຫວ່າງສູນກາງ ແລະ ທ້ອງຖິ່ນຕໍ່ກັບວຽກງານດັ່ງກ່າວ. ພາຍຫຼັງທີ່ຮັບຟັງການລາຍງານແລ້ວ, ບັນດາທ່ານທີ່ເຂົ້າຮ່ວມ ກໍ່ໄດ້ປະກອບຄຳຄິດຄຳເຫັນ ຕໍ່ການຈັດຕັ້ງປະຕິບັດວຽກງານພັດທະນາຊົນນະບົດ ຕາມຂອບເຂດຄວາມຮັບຜິດຊອບຂອງຕົນ, ເຊິ່ງໃນຕອນທ້າຍ ທ່ານ ຄໍາຈັນ ໂສຕາປະເສີດ ກໍ່ຍັງໄດ້ມີຄໍາເຫັນແລກປ່ຽນ ບາງບັນຫາສຳຄັນຕໍ່ທີ່ປະຊຸມ ເພື່ອໃຫ້ພາກ ສ່ວນກ່ຽວຂ້ອງນຳໄປຜັນຂະຫຍາຍເຂົ້າສູ່ການຈັດຕັ້ງປະຕິບັດວຽກງານຕົວຈິງຂອງຕົນ.
ນອກຈາກນີ້, ໃນຄາບບ່າຍຂອງວັນດຽວກັັນ ຄະນະດັ່ງກ່າວ ໄດ້ລົງພົບປະກັບ ອົງການປົກຄອງບ້ານ ແລະ ປະຊາຊົນບ້ານ ໄຮ່ເໜືອ ເພື່ອເກັບກຳຂໍ້ມູນ ກ່ຽວກັບວຽກງານກອງທຶນພັດທະນາຂັ້ນບ້ານ, ພ້ອມທັງລົງຕິດຕາມພື້ນທີ່ຕົວຈິງ ກ່ຽວກັບສະພາບການກໍ່ສ້າງ ອ່າງເກັບນໍ້າຫ້ວຍເຕັນ ບ້ານນາສາວນາງ ແລະ ຄວາມສາມາດໃນການສະໜອງນໍ້າ ໃຫ້ແກ່ການຜະລິດກະສິກຳຂອງປະຊາຊົນ.