ວັນທີ 03 ພະຈິກ 2023 ນີ້, ກໍາມະບານຮາກຖານ ສະພາປະຊາຊົນ ແຂວງຫົວພັນ ໄດ້ຈັດກອງປະຊຸມປະເມີນຜົນການຈັດຕັ້ງປະຕິບັດ ເນື້ອໃນຂໍ້ແຂ່ງຂັນ 5 ເປັນເຈົ້າ ປະຈໍາປີ 2023 ຂື້ນ ຢູ່ທີ່ ຫ້ອງປະຊຸມ ສະພາປະຊາຊົນແຂວງ.

             ໂດຍການເປັນປະທານ ຂອງສະຫາຍ ສຸກມີໄຊ ສິງບຸນເຮືອງ ຄະນະບໍລິຫານງານສະຫະພັນກຳມະບານແຂວງ, ປະທານກຳມະບານຮາກຖານ ສະພາປະຊາຊົນແຂວງ ເປັນກຽດເຂົ້າຮ່ວມ ຂອງ ສະຫາຍ ແທງ ວິໄລພອນ ຄະນະໜ່ວຍພັກ ສະພາປະຊາຊົນແຂວງ ພ້ອມດ້ວຍ ບັນດາສະມາຊິກກຳມະບານພາຍໃນຮາກຖານສະພາປະຊາຊົນແຂວງເຂົ້າຮ່ວມ.

ໃນວາລະດຳເນີນກອງປະຊຸມ ໄດ້ເຊື່ອມຊຶມເນື້ອໃນ 5 ເປັນເຈົ້າ ແລະ ຜ່ານຮ່າງບົດສະຫຼຸບການຈັດຕັ້ງປະຕິບັດເນື້ອໃນຂໍ້ແຂ່ງຂັນ 5 ເປັນເຈົ້າ ປະຈຳປີ 2023 ແລະ ທິດທາງແຜນການ ປີ 2024 ຂອງກໍາມະບານຮາກຖານສະພາປະຊາຊົນແຂວງ ຈາກສະຫາຍ ນ. ສີພຸດ ພຸດທະວົງ ຮອງປະທານກໍາມະບານຮາກຖານ ເຊິ່ງໄດ້ຍົກໃຫ້ເຫັນດ້ານດີຜົນງານ ແລະ ດ້ານອ່ອນຂໍ້ຄົງຄ້າງ, ຈາກນັ້ນ                        ບັນດາສະຫາຍສະມາຊິກໄດ້ພ້ອມກັນປະກອບຄໍາຄິດເຫັນໃສ່ຮ່າງບົດສະຫຼຸບ ເພື່ອໃຫ້ມີເນື້ອໃນຄົບຖ້ວນສົມບູນ ແລະ ສາມາດຈັດຕັ້ງປະຕິບັດໄດ້, ພ້ອມກັນນີ້ ສະມາຊິກກຳມະບານທຸກສະຫາຍ ໄດ້ຜ່ານໃບປະເມີນສະມາຊິກກຳມະບານ 5 ເປັນເຈົ້າ ຂອງຕົນເອງ ພ້ອມທັງ ໃຫ້ຄະແນນຕົນເອງ ແລະ ໝູ່ຄະນະ ຖຶກຕ້ອງຕາມກົດລະບຽບ ຂອງກຳມະບານລາວວາງອອກ; ພາຍໃນກຳມະບານຮາກຖານສະພາປະຊາຊົນແຂວງ ມີສະມາຊິກກຳມະບານ ທັງໝົດ 51 ສະຫາຍ, ຍິງ 19 ສະຫາຍ ໃນນີ້ປະເມີນຕົວຈິງ ມີ 48 ສະຫາຍ, ຍິງ 19 ສະຫາຍ, ຜ່ານການປະເມີນຕີລາຄາໃຫ້ຄະແນນຕົວຈີງ ແມ່ນສາມາດບັນລຸຕາມຄາດໝາຍວາງໄວ້ ສະເລ່ຍຜົນການປະເມີນຈັດຢູ່ໃນລະດັບ 85% ຂື້ນໄປ, ສ່ວນປະເພດ ກາງ, ອ່ອນ ແມ່ນບໍ່ມີ, ອີງຕາມມາດຖານ ແລະ ເງື່ອນໄຂ ເຫັນວ່າສາມາດສະເໜີໃຫ້ຂັ້ນເທີງພິຈາລະນາຮັບຮອງເອົາ ກຳມະບານຮາກຖານສະພາປະຊາຊົນແຂວງຫົວພັນ ເປັນ ກຳມະບານຮາກຖານ 5 ເປັນເຈົ້າ ປະຈຳປີ 2023;

                ຕອນທ້າຍກອງປະຊຸມ ໄດ້ຮັບຟັງການໂອ້ລົມ ຂອງສະຫາຍ ແທງ ວິໄລພອນ ຄະນະໜ່ວຍພັກ ສະພາປະຊາຊົນແຂວງ ກ່ອນອື່ນສະຫາຍໄດ້ຍ້ອງຍໍຊົມເຊີຍຕໍ່ຜົນງານການເຄື່ອນໄຫວວຽກງານກໍາມະບານຮາກຖານ ໃນໄລຍະ 1 ປີຜ່ານມາ. ພ້ອມນີ້ ສະຫາຍຍັງໄດ້ເນັ້ນໜັກໃຫ້ຄະນະກຳມະບານຮາກຖານ ເອົາໃຈໃສ່ສຶກສາອົບຮົມການເມືອງແນວຄິດໃຫ້ເປັນລະບົບຕໍ່ເນື່ອງ ດ້ວຍຫຼາຍຮູບການ, ເພື່ອປັບປຸງແບບແຜນ ການນຳພາ-ຊີ້ນຳ ແລະ ຮຽກຮ້ອງໃຫ້ສະມາຊິກກຳມະບານ ທີ່ເປັນພະນັກງານຫຼັກແຫຼ່ງ ນຳພາ-ຄຸ້ມຄອງ ຢູ່ແຕ່ລະຂະແໜງ ຕ້ອງເປັນແບບຢ່າງທີ່ດີເພື່ອໃຫ້ຜູ້ອື່ນໄດ້ຮຽນຮູ້ນຳ ຄືດັ່ງຄຳເວົ້າທີ່ວ່າ“ຄວາມເປັນແບບຢ່າງທີ່ດີ ແມ່ນການນຳພາທີ່ດີ” ທຸກສະຫາຍ ຕ້ອງໄດ້ເອົາໃຈໃສ່ປະຕິບັດຕາມຫຼັກການ, ລະບຽບການ ຂອງກຳມະບານລາວວາງອອກຢ່າງເຂັ້ມງວດ, ຮັກສາມູນເຊື້ອຄວາມສາມັກຄີ, ຍົກສູງຄວາມຮູ້, ຄວາມສາມາດ, ກຳແໜ້ນແນວທາງນະໂຍບາຍຂອງພັກ, ລະບຽບກົດໝາຍຂອງລັດ, ລະບຽບຂອງກຳມະບານລາວວາງອອກ ປະຕິບັດຕາມຫຼັກການລວມສູນປະຊາທິປະໄຕ, ແບ່ງວຽກໃຫ້ບຸກຄົນຮັບຜິດຊອບ ຢ່າງຈະແຈ້ງ, ເປັນເຈົ້າການຈັດຕັ້ງປະຕິບັດເນື້ອໃນ 5 ເປັນເຈົ້າ ແລະ ຈັດຕັ້ງປະຕິບັດທິດທາງແຜນການ ຂອງກໍາມະບານຮາກຖານ ວາງອອກໃຫ້ມີຜົນສຳເລັດຕາມຈຸດປະສົງ ແລະ ແຜນການວາງໄວ້.

ພາບ ແລະ ຂ່າວ: ສພຂ ຫົວພັນ