(ສພຊ) ວັນທີ 2 ທັນວາ 2020 ທ່ານ ນາງ ປານີ ຢາທໍ່ຕູ້ ປະທານສະພາແຫ່ງຊາດ ພ້ອມດ້ວຍຄະນະ ໄດ້ເຂົ້າຮ່ວມພິທີໂຮມຊຸມນຸມສະເຫລີມສະຫລອງວັນສະຖາປະນາ ສປປ ລາວ ຄົບຮອບ 45 ປີ (2 ທັນວາ 1975-2 ທັນວາ 2020) ແລະ ວັນເກີດຂອງປະທານ ໄກສອນ ພົມວິຫານ ຜູ້ນໍາທີ່ແສນເຄົາລົບຮັກຂອງປວງຊົນລາວທັງຊາດ ຮ່ວມກັບບັນດາການນໍາ, ອະດີດການນໍາພັກ-ລັດ, ພະເຖລານຸເຖລະ ພ້ອມດ້ວຍອົງການຈັດຕັ້ງມະຫາຊົນຕ່າງໆ ຈໍານວນ 700 ກວ່າຄົນ ຢູ່ທີ່ຫໍປະຊຸມແຫ່ງຊາດ (ຫລັກ 6) ນະຄອນຫລວງວຽງຈັນ.

ຈຸດປະສົງຂອງການໂຮມຊຸມນຸມໃນຄັ້ງນີ້, ເພື່ອເປັນການສະແດງເຖິງຄວາມເຄົາລົບຮັກ, ຄວາມກະຕັນຍູຮູ້ບຸນຄຸນ, ຄຸນງາມຄວາມດີ ແລະ ຜົນງານອັນຍິ່ງໃຫຍ່ຂອງບັນພະບຸລຸດລາວທີ່ໄດ້ອຸທິດຕົນ ເພື່ອປະເທດຊາດ ແລະ ການປະຕິວັດໃນໄລຍະທີ່ຜ່ານມາ ຈົນສາມາດປົດປ່ອຍປະເທດຊາດໄດ້ຢ່າງສົມບູນ ແລະ ໄດ້ສະຖາປານາເປັນ ສາທາລະນະລັດ ປະຊາທິປະໄຕ ປະຊາຊົນລາວ ຈົນເທົ່າທຸກວັນນີ້.

ໂອກາດດັ່ງກ່າວ, ທ່ານ ບຸນຍັງ ວໍລະຈິດ ເລຂາທິການໃຫຍ່ຄະນະບໍລິຫານງານສູນກາງພັກ, ປະທານປະເທດແຫ່ງ ສປປລາວ ໄດ້ກ່າວສູນທອນພົດ ໂດຍມີເນື້ອໃນບາງຕອນສໍາຄັນວ່າ: ໃນມື້ນີ້ເປັນມື້ທີ່ມີຄວາມໝາຍຄວາມສໍາຄັນຢ່າງຍິ່ງ ພວກເຮົາຮູ້ສຶກອາໄລອາວອນ ແລະ ຄຶດຄະນິງຫາປະທານ ໄກສອນ ພົມວິຫານ ຜູ້ນໍາທີ່ແສນເຄົາລົບຮັກ, ລູກຫລານຜູ້ປະເສີດຂອງປະຊາຊົນລາວ, ຜູ້ນໍາພາກໍ່ຕັ້ງ, ຖະນຸບໍາລຸງກໍ່ສ້າງພັກ ແລະ ນໍາພາລະກິດຕໍ່ສູ້ກູ້ຊາດ, ຜູ້ນໍາພາສ້າງຕັ້ງລະບອບໃໝ່ ລະບອບປະຊາທິປະໄຕ ປະຊາຊົນ ເຊິ່ງໄດ້ຂຽນໄວ້ໃນໜ້າປະຫວັດສາດຍຸກໃໝ່ຂອງຊາດລາວວິລະຊົນ;  ພ້ອມກັນນີ້, ກໍມີຄວາມອາໄລອາວອນ ແລະ ຈົດຈໍາລໍ້າລຶກເຖິງວິລະກໍາອັນລໍ້າເລີດ, ຄຸນງາມຄວາມດີ ແລະ ການເສຍສະຫລະອັນໃຫຍ່ຫລວງຂອງບັນດາຜູ້ນໍາແຕ່ລະຮຸ່ນ, ພະນັກງານນັກຮົບປະຕິວັດ, ຜູ້ຮັກຊາດ ແລະ ປະຊາຊົນລາວບັນດາເຜົ່າ ທີ່ໄດ້ອຸທິດຊີວິດ, ເລືອດເນື້ອ, ເຫື່ອແຮງ, ສະຕິປັນຍາ ແລະ ວັດຖຸຊັບສິນ ເພື່ອພາລະກິດປະຕິວັດຕະຫລອດໄລຍະແຫ່ງການປະຕິວັດຊາດ ປະຊາທິປະໄຕ ກໍຄືພາລະກິດແຫ່ງການປົກປັກຮັກສາ ແລະ ສ້າງສາພັດທະນາປະເທດຊາດ ເພື່ອຄວາມເປັນເອກະລາດແຫ່ງຊາດ ແລະ ຄວາມສົມບູນພູນສຸກຂອງລູກຫລານລາວ.

ກ່ອນໜ້ານີ້ 45 ປີ ພາຍໃຕ້ກະແສຟອງການລຸກຮື້ຂຶ້ນຂອງປະຊາຊົນລາວ ພາຍໃຕ້ການນໍາພາຂອງພັກປະຊາຊົນປະຕິວັດລາວ, ອໍານາດການປົກຄອງເກົ່າທີ່ເປັນລູກສະໝຸນຂອງພວກລ່າເມືອງຂຶ້ນ ແລະ ກົງຈັກຂອງລະບອບສັກດີນາຂາຍຊາດ ໃນລະດັບທ້ອງຖິ່ນຮາກຖານທົ່ວປະເທດໄດ້ຖືກທັບມ້າງ, ອໍານາດການປົກຄອງໃໝ່ຂອງປະຊາຊົນໄດ້ຮັບການຈັດຕັ້ງຂຶ້ນ, ສ້າງສະພາບແວດລ້ອມ ແລະ ເງື່ອນໄຂອັນສຸກງອມ ພັນປີມີເທື່ອໜຶ່ງ ໃຫ້ແກ່ການປົກຄອງຢ່າງສົມບູນມາສູ່ກໍາມືຂອງປະຊາຊົນຜູ້ອອກແຮງງານ; ຈາກນັ້ນ, ພາຍໃຕ້ການນໍາພາໂດຍກົງຂອງສູນກາງພັກ ເຊິ່ງມີປະທານ ໄກສອນ ພົມວິຫານ ເປັນຫົວໜ້າ, ກອງປະຊຸມໃຫຍ່ຜູ້ແທນປະຊາຊົນທົ່ວປະເທດໄດ້ໄຂຂຶ້ນຢ່າງສະຫງ່າຜ່າເຜີຍ ໃນວັນທີ 2 ທັນວາ 1975  ເພື່ອປະກາດລົບລ້າງອໍານາດການປົກຄອງເກົ່າ, ສະຖາປະນາສາທາລະນະລັດ ປະຊາທິປະໄຕ ປະຊາຊົນລາວ ເປີດສັງກາດໃໝ່ແຫ່ງເອກະລາດ ອິດສະຫລະພາບ ແລະ ຄວາມເປັນເຈົ້້າອັນແທ້ຈິງຂອງປະຊາຊົນລາວບັນດາເຜົ່າ ຕິດພັນກັບເສັ້ນທາງກ້າວຂຶ້ນສູ່ຈຸດໝາຍສັງຄົມນິຍົມ. ປະທານ ໄກສອນ ພົມວິຫານ ຜູ້ນໍາທີ່ແສນເຄົາລົບຮັກຂອງປະຊາຊົນລາວໄດ້ຢືນຢັນຕະຫລອດວ່າ: ວັນທີ 2 ທັນວາ ເປັນວັນໄຊຊະນະປະຫວັດການທີ່ມີຄວາມໝາຍຍຸກສະໄໝອັນເລິກເຊິ່ງ, ເປັນໝາກຜົນລວມຍອດແຫ່ງການຕໍ່ສູ້ປະຕິວັດ ທີ່ເຕັມໄປດ້ວຍຄວາມເສຍສະຫລະ, ຄວາມທຸກຍາກລໍາບາກຕະຫລອດຫລາຍສິບປີຂອງປະຊາຊົນພາຍໃຕ້ການນໍາພາຂອງພັກກອມມູນິດອິນດູຈີນໃນເມື່ອກ່ອນ ແລະ ພັກປະຊາຊົນ ປະຕິວັດລາວ ໃນປັດຈຸບັນ, ພວກເຮົາເອກອ້າງ ແລະ ພາກພູມໃຈທີ່ເຫັນວ່າການພັດທະນາພື້ນຖານ-ວັດຖຸເຕັກນິກໄດ້ບັນລຸໝາກຜົນທີ່ສໍາຄັນອັນໃຫຍ່ຫລວງ ເປັນ ຕົ້ນດ້ານພື້ນຖານໂຄງລ່າງເສດຖະກິດ-ສັງຄົມ ທີ່ສ້າງຄວາມອາດສາມາດຕົວຈິງໃຫ້ປະເທດເຮົາເຊື່ອມຈອດກັບບັນດາປະເທດໃກ້ຄຽງ ແລະ ເຊື່ອມໂຍງກັບເສດຖະກິດພາກພື້ນ ແລະ ສາກົນ, ເຊິ່ງສາມາດປົດປ່ອຍປະເທດເຮົາທີ່ເປັນປະເທດບໍ່ມີຊາຍແດນຕິດຈອດກັບທະເລ ກາຍເປັນປະເທດເຊື່ອມຈອດ-ເຊື່ອມໂຍງກັບປະເທດເພື່ອນບ້ານ ແລະ ສາກົນ, ອັນພົ້ນເດັ່ນ ແມ່ນການເຊືື່ອມຈອດເສັ້ນທາງລົດ ແລະ ທາງລົດໄຟ ລະຫວ່າງ ສປປລາວ ກັບປະເທດໃກ້ຄຽງຕາມແລວທາງເສດຖະກິດເໜືອ-ໃຕ້, ຕາເວັນອອກ-ຕາເວັນຕົກ ເຊິ່ງຖືເປັນທ່າແຮງໃນການບໍລິການທາງຜ່ານຢູ່ປະເທດເຮົາ; ພ້ອມນີ້, ພື້ນຖານອຸດສາຫະກໍາພະລັງງານ, ບໍ່ແຮ່, ກະສິກໍາ-ປ່າໄມ້, ວິທະຍາສາດ-ເຕັກນິກ-ເຕັກໂນໂລຊີ ຮັບໃຊ້ການຜະລິດ-ການບໍລິການ ແລະ ບໍລິຫານຄຸ້ມຄອງລັດຕາມທິດຫັນເປັນທັນສະໄໝ ກໍມີໜໍ່ແໜງ ແລະ ໄດ້ຮັບການພັດທະນາພົ້ນເດັ່ນຂຶ້ນ.

ສະຫາຍ ບຸນຍັງ ວໍລະຈິດ ໄດ້ກ່າວຕື່ມວ່າ: ເພື່ອສືບຕໍ່ເສີມຂະຫຍາຍເຂົ້າໃນການປົກປັກຮັກສາ ແລະ ສ້າງສາພັດທະນາປະເທດຊາດ ຈົ່ງພ້ອມກັນຍຶດໝັ້ນແນວທາງປ່ຽນແປງ ໃໝ່ຮອບດ້ານ ແລະ ມີຫລັກການຂອງພັກຢ່າງເດັດດ່ຽວໜຽວແໜ້ນ; ຍຶດໝັ້ນຖືເອົາການພັດທະນາເສດຖະກິດເປັນໃຈກາງ ໂດຍຕິດພັນກັບການພັດທະນາສັງຄົມ, ອະນຸລັກຮັກສາວັດທະນະທໍາອັນດີງາມຂອງຊາດ ແລະ ການປົກປັກຮັກສາສິ່ງແວດລ້ອມຕາມທິດຍືນຍົງ ການຫັນລົງກໍ່ສ້າງຮາກຖານເມືອງ ແລະ ພັດທະນາຊົນນະບົດຮອບດ້ານຢ່າງແຂງແຮງຕໍ່ເນື່ອງ ຕາມເນື້ອໃນ 4 ຄາດໝາຍ ເປັນມາດຖານຍຸດທະສາດຍາວນານ ແນໃສ່ປັບປຸງລະບົບການເມືອງຢູ່ຂັ້ນຮາກຖານໜັກແໜ້ນເຂັ້ມແຂງ, ສຸມໃສ່ແກ້ໄຂຄວາມທຸກຍາກຂອງປະຊາຊົນ, ພ້ອມກັນເພີ່ມທະວີຄວາມສາມັກຄີເປັນປຶກແຜ່ນແໜ້ນໜາ ຂອງທົ່ວປວງຊົນລາວບັນດາເຜົ່າພາຍໃຕ້ການນໍາພາຂອງພັກແຕ່ລະຂັ້ນ; ເຊີດຊູບົດບາດ ແລະ ຄວາມສາມາດນໍາພາຂອງພັກໄປຄຽງຄູ່ກັບການຍົກສູງຄວາມເປັນແບບຢ່າງນໍາໜ້າ ຂອງຖັນແຖວສະມາຊິກພັກ ເດັດດ່ຽວແກ້ໄຂປາກົດການຫຍໍ້ທໍ້ທີ່ເກີດຂຶ້ນຢູ່ໃນການຈັດຕັ້ງຂອງພັກ-ລັດ ກໍຄືຖັນແຖວສະມາຊິກພັກ-ພະນັກງານຢ່າງທັນການ; ແລະ ຍຶດໝັ້ນແນວທາງການຕ່າງປະເທດ ສັນຕິພາບ, ເອກະລາດ, ມິດຕະພາບ ແລະ ການຮ່ວມມືຢ່າງສະເໝີຕົ້ນສະເໝີປາຍ, ເປັນເຈົ້າການ ແລະ ຕັ້ງໜ້າ ເຊື່ອມໂຍງກັບພາກພື້ນ ແລະ ສາກົນ, ເປີດກວ້າງການພົວພັນຮ່ວມມືກັບບັນດາປະເທດໃກ້ຄຽງ ກໍຄືບັນດາປະເທດປະຊາຄົມອາຊຽນ, ປະເທດເພື່ອນມິດໃນໂລກ ແລະ ອົງການຈັດຕັ້ງສາກົນ ພິເສດແມ່ນເສີມຂະຫຍາຍສາຍພົວພັນອັນເປັນມູນເຊື້ອ ແລະ ຄວາມສາມັກຄີຖານສະຫາຍຮ່ວມອຸດົມການສັງຄົມນິຍົມກັບບັນດາປະເທດເພື່ອນມິດຍຸດທະສາດ.

ແຫຼ່ງຂ່າວທີ່ມາ: ສະພາແຫ່ງຊາດ