(ສພຊ) – ຕອນແລງວັນທີ 21 ຕຸລາຜ່ານມາ ທີ່ຫໍປະຊຸມແຫ່ງຊາດ, ທ່ານ ປອ. ໄຊສົມພອນ ພົມວິຫານ ປະທານສະພາແຫ່ງຊາດ ແລະ ປະທານໄອປາຄັ້ງທີ 45 ໄດ້ຖະ ແຫຼງຂ່າວຕໍ່ສື່ມວນຊົນທັງພາຍໃນ ແລະ ຕ່າງປະເທດ ກ່ຽວກັບຜົນສຳເລັດຂອງການເປັນເຈົ້າພາບກອງປະຊຸມສະມັດຊາໃຫຍ່ລັດຖະສະພາລະຫວ່າງຊາດອາຊຽນ ຫຼື ໄອປາ (AIPA) ຄັ້ງທີ 45 ໃຫ້ທົ່ວສັງຄົມໄດ້ຮັບຊາບວ່າ: ກອງປະຊຸມໄອປາ-45 ໄດ້ຈັດຂຶ້ນຢ່າງເປັນທາງການໃນລະຫວ່າງວັນທີ 17-23 ຕຸລາ 2024 ພາຍໃຕ້ຫົວຂໍ້ “ບົດບາດຂອງລັດ ຖະສະພາ ໃນການຊຸກຍູ້ການເຊື່ອມຈອດ ແລະ ການເຕີບໂຕແບບກວມລວມຂອງອາຊຽນ” ໂດຍການເປັນປະທານຂອງປະທານສະພາແຫ່ງຊາດ ແຫ່ງ ສປປລາວ, ກອງປະຊຸມໄດ້ຮັບກຽດຢ່າງສູງທີ່ທ່ານ ທອງລຸນ ສີສຸລິດ ປະທານປະເທດ ແຫ່ງ ສປປລາວ ເຂົ້າຮ່ວມ ແລະ ກ່າວສູນທອນພົດຕໍ່ພິທີເປີດ.
ກອງປະຊຸມຄັ້ງນີ້ ມີຄະນະຜູ້ແທນນຳໂດຍບັນດາປະທານຈາກລັດຖະສະພາສະມາຊິກໄອປາ 8 ປະເທດ ອິນໂດເນເຊຍບໍ່ໄດ້ສົ່ງຄະນະຜູ້ແທນເຂົ້າ ເນື່ອງຈາກມີການກະກຽມເລືອກຕັ້ງພາຍໃນ, ສ່ວນປະເທດມຽນມາ ແມ່ນຍັງບໍ່ທັນມີສະ ພາແຫ່ງຊາດ ຈຶ່ງໄດ້ສົ່ງແຕ່ຜູ້ຕາງໜ້າເຂົ້າຮ່ວມ; ລັດຖະສະພາສັງເກດການ 15 ປະເທດ, ແຂກເຈົ້າພາບ 3 ປະເທດ, ຄູ່ຮ່ວມພັດທະນາໄອປາ 8 ພາກສ່ວນ, ເລຂາທິການໃຫຍ່ອາຊຽນ, ເລຂາທິການໃຫຍ່ໄອປາ, ທູຕານຸທູດ ປະຈຳ ສປປ ລາວ ແລະ ຄະນະຜູ້ແທນ ສປປລາວ ເຈົ້າພາບ ລວມປະມານ 600 ທ່ານ ເຂົ້າຮ່ວມ.
ໃນວາລະດຳເນີນກອງປະຊຸມສະມັດຊາໃຫຍ່ໄອປາ-45 ໃນຄັ້ງນີ້ ໄດ້ມີກອງປະຊຸມຕ່າງໆທັງໝົດ 11 ກອງປະ ຊຸມ ດັ່ງນີ້: 1. ກອງປະຊຸມຄະນະບໍລິຫານງານໄອປາ, 2. ກອງປະຊຸມກຳມາທິການການເມືອງ, 3. ກອງປະຊຸມກຳມາທິການເສດຖະກິດ, 4. ກອງປະຊຸມກຳມາທິການວຽກງານສັງຄົມ, 5. ກອງປະຊຸມກຳມາທິການວຽກງານຈັດຕັ້ງພາຍໃນ, 6. ກອງປະຊຸມກຳມາທິການສະມາຊິກສະພາເພດຍິງ, 7. ກອງປະຊຸມສະມາຊິກລັດຖະສະພາໜຸ່ມໄອປາ, 8. ກອງປະ ຊຸມກຳມາທິການຖະແຫຼງການຮ່ວມ, 9. ກອງປະຊຸມພົບປະລະ ຫວ່າງກອງເລຂາໄອປາ ແລະ ກອງເລຂາອາຊຽນ, 10. ກອງປະຊຸມພົບປະກັບລັດຖະສະພາສັງເກດການ, 11. ກອງປະຊຸມເວທີຜູ້ນຳການເມືອງເພດຍິງ. ໃນກອງປະຊຸມສະມັດຊາໃຫຍ່ໄອປາ-45, ບັນດາທ່ານປະທານລັດຖະສະພາ ແລະ ຫົວໜ້າຄະນະຜູ້ແທນແຕ່ລະປະເທດ ໄດ້ກ່າວປາໄສພາຍໃຕ້ຂອບຫົວຂໍ້ກອງປະຊຸມ ໂດຍຍົກໃຫ້ເຫັນສະພາບການຂອງໂລກ, ພາກພື້ນ ເຊິ່ງມີທັງກາລະໂອກາດ ແລະ ສິ່ງທ້າທາຍ, ພ້ອມກັນນີ້ ກໍໄດ້ຢໍ້າຄືນຄວາມໝາຍໝັ້ນຂອງຜູ້ນຳລັດຖະສະພາສະມາຊິກໄອປາທີ່ຈະຕ້ອງເພີ່ມທະວີບົດບາດລັດຖະສະ ພາ ໃນການຊຸກຍູ້ການເຊື່ອມຈອດ ແລະ ການເຕີບໂຕແບບກວມລວມຂອງອາຊຽນ; ນອກ ຈາກນີ້, ໃນກອງປະຊຸມກຳມາທິການປະຈຳຕ່າງໆຂອງໄອປາ ກໍໄດ້ລົງເລິກຄົ້ນຄວ້າປຶກສາຫາລື, ພິຈາລະນາ ແລະ ຮັບຮອງເອົາຮ່າງມະຕິທັງໝົດ 37 ສະບັບ ໃນນີ້ ຂົງເຂດວຽກງານການເມືອງ 4 ສະບັບ, ຂົງເຂດວຽກງານເສດຖະກິດ 8 ສະບັບ, ຂົງເຂດວຽກງານສັງຄົມ 5 ສະບັບ, ວຽກງານເພດຍິງ 2 ສະບັບ, ວຽກງານຊາວໜຸ່ມ 3 ສະບັບ ແລະ ວຽກງານຈັດຕັ້ງພາຍໃນໄອປາ 15 ສະບັບ ແລະໃນຕອນທ້າຍຂອງກອງປະຊຸມ, ບັນດາຫົວໜ້າຄະນະຜູ້ ແທນສະມາຊິກລັດຖະສະພາໄອປາ ໄດ້ລົງນາມໃສ່ຖະແຫຼງການຮ່ວມກອງປະຊຸມສະມັດຊາໃຫຍ່ໄອປາ-45.
ກອງປະຊຸມສະມັດຊາໃຫຍ່ໄອປາຄັ້ງນີ້ ຍັງໄດ້ພິຈາລະນາຮັບຮອງເອົາປະເທດມາເລ ເຊຍ ເປັນເຈົ້າພາບຈັດກອງປະຊຸມສະມັດຊາໃຫຍ່ໄອປາຄັ້ງຕໍ່ໄປໃນປີ 2025.
ທ່ານ ປອ. ໄຊສົມພອນ ພົມວິຫານ ໄດ້ຕາງໜ້າໃຫ້ສະພາແຫ່ງຊາດ ແຫ່ງ ສປປລາວ ແລະ ປະທານໄອປາຄັ້ງທີ 45 ສະແດງຄວາມຂອບໃຈທ່ານປະທານປະເທດ ແຫ່ງ ສປປລາວ ທີ່ໃຫ້ກຽດເຂົ້າຮ່ວມ ແລະ ກ່າວສູນທອນພົດຕໍ່ພິທີເປີດກອງປະຊຸມ; ສະແດງຄວາມຂອບໃຈບັນດາຄະນະຜູ້ແທນຈາກປະເທດສະມາຊິກອາຊຽນ, ບັນດາປະເທດສັງເກດການ, ແຂກປະເທດເຈົ້າພາບ, ຄູ່ຮ່ວມພັດທະນາຂອງໄອປາ, ເລຂາທິການໃຫຍ່ອາຊຽນ, ເລຂາທິການໃຫຍ່ໄອປາ, ທູຕານຸທູດ ແລະ ຜູ້ຕາງໜ້າອົງການຈັດຕັ້ງສາກົນ ປະຈຳ ສປປລາວ ແລະ ບັນດາຜູ້ແທນທັງໝົດ ທີ່ໄດ້ເຂົ້າຮ່ວມກອງປະຊຸມຢ່າງຕັ້ງໜ້າ ແລະ ປະກອບສ່ວນຢ່າງສຳຄັນ ເຮັດໃຫ້ກອງປະຊຸມຄັ້ງນີ້ ມີຜົນສຳເລັດຢ່າງຈົບງາມ. ຂອບໃຈ ແລະ ຊົມ ເຊີຍຄະນະຮັບຜິດຊອບກະກຽມກອງປະຊຸມ ທີ່ໄດ້ເອົາໃຈໃສ່ປະກອບສ່ວນຢ່າງຫ້າວຫັນ, ມີຄວາມຮັບຜິດຊອບສູງໃນການກະກຽມ ແລະ ຕະຫຼອດໄລຍະການດໍາເນີນກອງປະຊຸມຄັ້ງນີ້ ຈົນມີຜົນສໍາເລັດຕາມຈຸດປະສົງ ແລະ ລະດັບຄາດໝາຍທີ່ວາງໄວ້; ສະແດງຄວາມຂອບໃຈ ແລະ ຊົມເຊີຍຢ່າງຈິງໃຈຕໍ່ສື່ມວນຊົນທຸກພາກສ່ວນທັງພາຍໃນ ແລະ ຕ່າງປະເທດ ທີ່ໄດ້ຕິດຕາມຢ່າງໃກ້ຊິດ ເພື່ອເກັບກຳຂ່າວ ແລະ ເຜີຍແຜ່ຢ່າງທັນການ ກ່ຽວກັບການດຳເນີນກອງປະຊຸມໃນຄັ້ງນີ້ ໃຫ້ແກ່ສັງຄົມໄດ້ຮັບຊາບຢ່າງທົ່ວເຖິງ. ພິເສດ, ໄດ້ສະແດງຄວາມຂອບ ໃຈປະຊາຊົນລາວບັນດາເຜົ່າ ເວົ້າລວມ, ໂດຍສະເພາະນະຄອນຫຼວງວຽງຈັນ ທີ່ໄດ້ຕ້ອນຮັບ ແຂກບ້ານເມືອງດ້ວຍບັນຍາກາດທີ່ອົບອຸ່ນ ແລະ ສຳຄັນແມ່ນການຮັກສາຄວາມປອດໄພ, ອຳນວຍຄວາມສະດວກຂອງເຈົ້າໜ້າທີ່ກອງກຳລັງຕ່າງໆ ທີ່ໄດ້ເປັນເຈົ້າການຮັກສາຄວາມເປັນລະບຽບຮຽບຮ້ອຍ ແລະ ເຮັດໃຫ້ກອງປະຊຸມໄດ້ຮັບຜົນສຳເລັດຢ່າງຈົບງາມ.
(ນາງ ອາລິນ ສຸພິມມະປະດິດ)