(ສພຊ) ເພື່ອສະຫຼຸບຕີລາຄາ, ຖອດຖອນບົດຮຽນ ແລະ ປະກອບຄຳເຫັນໃສ່ຮ່າງບົດສະຫຼຸບການເຄື່ອນໄຫວວຽກງານ ປະຈຳປີ 2022 ແລະ ທິດທາງແຜນການເຄື່ອນໄຫວ ປະຈຳປີ 2023 ຂອງກຳມາທິການບັນດາເຜົ່າ; ເພື່ອເກັບກຳຂໍ້ມູນຈາກຄຳເຫັນຂອງບັນດາທ່ານກຳມະການຂອງກຳມາທິການ ແລະ ຜູ້ເຂົ້າຮ່ວມກອງປະຊຸມ ຕໍ່ສະພາບບັນຫາທີ່ພົ້ນເດັ່ນໃນວຽກງານຊົນເຜົ່າ, ແນວໂຮມ-ສາສະໜາ, ອົງການຈັດຕັ້ງມະຫາຊົນ, ພັດທະນາຊົນນະບົດ ແລະ ແກ້ໄຂຄວາມທຸກຍາກ, ການປົກຄອງທ້ອງຖິ່ນ, 3 ສ້າງ ແລະ ວຽກງານອື່ນທີ່ກ່ຽວຂ້ອງກັບພາລະບົດບາດຂອງກຳມາທິການບັນດາເຜົ່າ ພ້ອມທັງປຶກສາຫາລືທິດທາງແກ້ໄຂໃນຕໍ່ໜ້າ. ໃນວັນທີ 10 ມັງກອນ 2023 ທີ່ຫ້ອງປະຊຸມເຮືອນຮັບແຂກກະຊວງແຮງງານ ແລະ ສະຫວັດດີການສັງຄົມ; ກຳມາທິການບັນດາເຜົ່າ ສະພາແຫ່ງຊາດ ໄດ້ສຳເລັດກອງປະຊຸມຄົບຄະນະ ປະຈຳປີ 2022 ຂອງຕົນ ດ້ວຍຜົນສໍາເລັດອັນຈົບງາມ ໂດຍການປັນປະທານຂອງທ່ານ ຄຳຈັນ ໂສຕາປະເສີດ ປະທານກຳມາທິການບັນດາເຜົ່າ, ເຂົ້າຮ່ວມມີທ່ານ ພົນໂທ ສຸວອນ ເລືອງບຸນມີ ກຳມະການສູນກາງພັກ, ຮອງປະທານສະພາແຫ່ງຊາດ ທັງເປັນຜູ້ຊີ້ນໍາກຳມາທິການບັນດາເຜົ່າ; ມີບັນດາທ່ານຄະນະປະຈຳສະພາແຫ່ງຊາດ, ຮອງປະທານກຳມາທິການ, ຮອງລັດຖະມົນຕີ, ກຳມະການຂອງກຳມາທິການບັນດາເຜົ່າ ພ້ອມດ້ວຍແຂກຖືກເຊີນ ແລະ ພາກສ່ວນທີ່ກ່ຽວຂ້ອງ.

ກອງປະຊຸມ ໄດ້ຮັບຟັງການສະຫຼຸບລາຍງານການເຄື່ອນໄຫວວຽກງານປະຈຳປີ 2022 ແລະ ທິດທາງແຜນການເຄື່ອນໄຫວວຽກງານ ປະຈຳປີ 2023 ຂອງກຳມາທິການບັນດາເຜົ່າ; ບາງເນື້ອໃນກ່ຽວກັບບົດບາດ ແລະ ກົນໄກການປະສານງານຂອງ ກຳມາທິການບັນດາເຜົ່າ ກັບຂະແໜງການ ແລະ ອົງການທີ່ກ່ຽວຂ້ອງ; ບົດປະກອບຄຳເຫັນຂອງກຳມະການ ກຳມາທິການບັນດາເຜົ່າ ເຂດເລືອກຕັ້ງທີ 4 ແຂວງອຸດົມໄຊ, 5 ແຂວງບໍ່ແກ້ວ, 8 ແຂວງຫົວພັນ ແລະ 12 ແຂວງຄໍາມ່ວນ ເຊິ່ງບັນດາທ່ານ ໄດ້ຍົກເອົາບົດຮຽນປະສົບການທີ່ສຳຄັນດ້ານຕ່າງໆຢູ່ທ້ອງຖິ່ນເຂດເລືອກຕັ້ງຂອງຕົນມາແລກປ່ຽນນຳກອງປະຊຸມ, ພ້ອມກັນນັ້ນ ກໍໄດ້ຮັບຟັງບົດປະກອບຄຳເຫັນຂອງກະຊວງ-ອົງການທີ່ກ່ຽວຂ້ອງຢູ່ສູນກາງເຊັ່ນ: ວຽກງານການປົກຄອງທ້ອງຖິ່ນ ຕິດພັນກັບວຽກງານ 3 ສ້າງ, ການຈັດຕັ້ງປະຕິບັດວຽກງານພັດທະນາຊົນນະບົດ ແລະ ແກ້ໄຂຄວາມທຸກຍາກ ໃນປີ 2022, ການປະຕິບັດພາລະບົດບາດໃນການຕິດຕາມ ກວດກາການເຄື່ອນໄຫວວຽກງານຂອງສະພາແຫ່ງຊາດ. ນອກຈາກນີ້, ຜູ້ແທນຍັງໄດ້ປະກອບຄຳເຫັນຕໍ່ຮ່າງມະຕິຂອງກອງປະຊຸມຄົບຄະນະກຳມາທິການບັນດາເຜົ່າ ປະຈຳປີ 2022.

ໃນຕອນທ້າຍ, ກອງປະຊຸມ ໄດ້ຮັບຟັງການໂອ້ລົມ, ໃຫ້ທິດຊີ້ນໍາ ຂອງທ່ານ ພົນໂທ ສຸວອນ ເລືອງບຸນມີ ເຊິ່ງທ່ານໄດ້ຕີລາຄາສູງຕໍ່ບົດສະຫຼຸບຜົນງານການເຄື່ອນໄຫວວຽກງານ ປະຈໍາປີ 2022 ຂອງກໍາມາທິການບັນດາເຜົ່າ, ເຫັນວ່າໃນໄລຍະ 1 ປີຜ່ານມາ ເຖິງວ່າປະເທດເຮົາຈະພົບກັບຄວາມຫຍຸ້ງຍາກຫຼາຍປະການ ແຕ່ກໍາມາທິການບັນດາເຜົ່າ ກໍຄືບັນດາທ່ານກຳມະການຂອງກຳມາທິການ ແລະ ເສນາທິການຢູ່ສູນກາງ ແລະ ທ້ອງຖິ່ນ ກໍມີຄວາມພະຍາຍາມສູງປະຕິບັດໜ້າທີ່ການເມືອງຂອງຕົນສໍາເລັດເປັນຢ່າງດີ ໂດຍສະເພາະແມ່ນການປະຕິບັດໜ້າທີ່ຕິດຕາມກວດກາການຈັດຕັ້ງປະຕິບັດແຜນງານ, ໂຄງການຈຸດສຸມຂອງສູນກາງ ແລະ ທ້ອງຖິ່ນ, ຕິດຕາມກວດກາຜົນກະທົບຕໍ່ຊີວິດການເປັນຢູ່ຂອງປະຊາຊົນ ແລະ ສິ່ງແວດລ້ອມ ຈາກໂຄງການພັດທະນາຕ່າງໆ ແລະ ບາງບັນຫາທີ່ພົ້ນເດັ່ນ ໃນບົດລາຍງານຂອງເຂດເລືອກຕັ້ງ ທີ 4 ແຂວງອຸດົມໄຊ, 5 ແຂວງບໍ່ແກ້ວ, 8 ແຂວງຫົວພັນ ແລະ 12 ແຂວງຄໍາມ່ວນ. ພ້ອມທັງປະສານສົມທົບກັບກໍາມາທິການຕ່າງໆຂອງສະພາແຫ່ງຊາດ, ກະຊວງ-ອົງການ ແລະ ທ້ອງຖິ່ນ ໃນການເຄື່ອນໄຫວວຽກງານວິຊາສະເພາະຂອງຕົນມີຜົນສໍາເລັດດີພໍສົມຄວນ. ພ້ອມນັ້ນ, ທ່ານຮອງປະທານສະພາແຫ່ງຊາດ ໄດ້ເນັ້ນບາງບັນຫາເພື່ອຮັບປະກັນໃຫ້ການເຄື່ອນໄຫວວຽກງານໃນຕໍ່ໜ້າມີປະສິດທິພາບ ແລະ ປະສິດທິຜົນດີຂຶ້ນກວ່າເກົ່າ

ເປັນຕົ້ນ: ເພີ່ມຄວາມເອົາໃຈໃສ່ວຽກງານໂຄສະນາ-ສຶກສາອົບຮົມປະຊາຊົນຕາມແນວທາງຂອງພັກ, ລັດຖະທໍາມະນູນ, ກົດໝາຍ ແລະ ນິຕິກຳໃຕ້ກົດໝາຍ ເພື່ອຮັກສາໄດ້ມູນເຊື້ອຄວາມສາມັກຄີປອງດອງພາຍໃນຊາດ; ສາມາດປະຕິບັດສິດ ແລະ ໜ້າທີ່ຂອງສະມາຊິກສະພາແຫ່ງຊາດ ກໍຄືພາລະບົດບາດຂອງກໍາມາທິການບັນດາເຜົ່າ ເປັນຕົ້ນແມ່ນການຕິດຕາມກວດກາ ແລະ ຊຸກຍູ້ການຈັດຕັ້ງປະຕິບັດລັດຖະທຳມະນູນ, ກົດໝາຍໃນຂົງເຂດວຽກງານຊົນເຜົ່າ, ສາສະໜາ, ແນວລາວສ້າງຊາດ, ອົງການຈັດຕັ້ງມະຫາຊົນ, ກອງທຶນຫຼຸດຜ່ອນຄວາມທຸກຍາກ, ການປົກຄອງທ້ອງຖິ່ນ, ການຈັດສັນພູມລຳເນົາ ແລະ ອາຊີບຄົງທີ່, ການສ້າງບ້ານພັດທະນາ, ວຽກງານ 3 ສ້າງ, ໂຄງການລົງທຶນທີ່ສ້າງຜົນກະທົບຕໍ່ຊີວິດການເປັນຢູ່ ແລະ ສິ່ງແວດລ້ອມ; ການຕິດຕາມກວດກາໂຄງການທີ່ມີຜົນກະທົບຕໍ່ຊີວິດການເປັນຢູ່ຂອງປະຊາຊົນ ແລະ ສິ່ງແວດລ້ອມ ຈາກການສະເໜີຂອງພໍ່ແມ່ປະຊາຊົນ, ຈາກສາຍດ່ວນຂອງສະພາແຫ່ງຊາດ, ຈາກຫາງສຽງຂອງສັງຄົມ, ຈາກການລາຍງານ ແລະ ສະເໜີຂອງອົງການຈັດຕັ້ງ. ຜ່ານມາ ກຳມາທິການບັນດາເຜົ່າ ຮ່ວມກັບກຳມາທິການອື່ນ ໄດ້ສົມທົບກັບຄະນະສະມາຊິກສະພາແຫ່ງຊາດປະຈຳເຂດເລືອກຕັ້ງ, ສະພາປະຊາຊົນແຂວງ ໄດ້ລົງຕິດຕາມກວດກາ ແລະ ເຫັນຜົນກະທົບຕົວຈິງຕໍ່ປະຊາຊົນ ແລະ ສິ່ງແວດລ້ອມແທ້, ແຕ່ຂອດຂອງການແກ້ໄຂຂອງພາກສ່ວນກ່ຽວຂ້ອງ ນັບທັງທ້ອງຖິ່ນ ແລະ ສູນກາງ ແມ່ນຊັກຊ້າ ແລະ ບໍ່ດີເທົ່າທີ່ຄວນ. ຕໍ່ການແກ້ໄຂຜົນຂອງການຕິດຕາມກວດກາປາກົດການຫຍໍ້ທໍ້ດ້ານຕ່າງໆນີ້ ປະທານສະພາແຫ່ງຊາດ ແມ່ນເນັ້ນແລ້ວເນັ້ນອີກ ທຸກຄຳສະເໜີຂອງປະຊາຊົນ ຕ້ອງໄດ້ຮັບການແກ້ໄຂ ແລະ ຕ້ອງແຈ້ງຜົນຂອງການແກ້ໄຂດັ່ງກ່າວ ໃຫ້ປະຊາຊົນຮັບຊາບ ແລະ ຕ້ອງເພີ່ມທະວີຄວາມໃກ້ສິດຕິດແທດໃນການແກ້ໄຂຕໍ່ຊີວິດການເປັນຢູ່ຂອງປະຊາຊົນ ຕົ້ນຕໍແມ່ນໃຫ້ເຂົາເຈົ້າເຂົ້າໃຈຈຸດປະສົງຂອງການພັດທະນາ ແລະ ມີສ່ວນຮ່ວມຢ່າງຕັ້ງໜ້າ ໂດຍສະເພາະແມ່ນຜູ້ຕ້ອງໄດ້ຍົກຍ້າຍໄປຢູ່ບ້ານຈັດສັນ ໃຫ້ສອດຄ່ອງຕາມເນື້ອໃນດຳລັດ 384/ນຍ ໂດຍໃຫ້ຊີວິດຂອງປະຊາຊົນດີຂຶ້ນກວ່າເກົ່າ ຫຼື ເທົ່າເກົ່າ; ຍົກສູງຄຸນນະພາບກົນໄກປະສານງານ ແລະ ການສ່ອງແສງລາຍງານສະພາບທີ່ພົ້ນເດັ່ນໃນແຕ່ລະໄລຍະຕ້ອງວ່ອງໄວ ແລະ ທັນການ.