(ສພຊ) ວັນທີ 9 ກໍລະກົດຜ່ານມາ, ທີ່ສະພາແຫ່ງຊາດ ໄດ້ຈັດກອງປະຊຸມຮ່ວມ ລະຫວ່າງຄະນະປະຈຳສະພາແຫ່ງຊາດ ແລະ ປະທານຄະນະປະຈຳສະພາປະຊາຊົນຂັ້້ນແຂວງ ທົ່ວປະເທດ ໂດຍການເປັນປະທານຂອງທ່ານ ປອ. ໄຊສົມພອນ ພົມວິຫານ ປະທານຄະນະປະຈຳສະພາແຫ່ງຊາດ; ເຂົ້າຮ່ວມມີບັນດາທ່ານຮອງປະທານຄະນະປະຈໍາສະພາແຫ່ງຊາດ, ກໍາມະການຄະນະປະຈໍາສະພາແຫ່ງຊາດ, ບັນດາທ່ານປະທານຄະນະປະຈໍາສະພາປະຊາຊົນຂັ້ນແຂວງ, ບັນດາທ່ານຮອງປະທານກໍາມາທິການ, ຄະນະເລຂາທິການສະພາແຫ່ງຊາດ, ຫົວໜ້າສະຖາບັນຄົ້ນຄວ້ານິຕິກໍາສະພາແຫ່ງຊາດ, ສະພາປະຊາຊົນຂັ້ນແຂວງ, ຄະນະກົມ, ຄະນະສູນ ແລະ ພະນັກງານ-ລັດຖະກອນທີ່ກ່ຽວຂ້ອງເຂົ້າຮ່ວມ.

 

 

          ຈຸດປະສົງກໍເພື່ອສະຫຼຸບຕີລາຄາການນຳພາ-ຊີ້ນຳ ຂອງຄະນະປະຈຳສະພາແຫ່ງຊາດ ຕໍ່ການເຄື່ອນໄຫວວຽກງານ ຂອງຄະນະສະມາຊິກສະພາແຫ່ງຊາດປະຈຳເຂດເລືອກຕັ້ງ ແລະ ການພົວພັນປະສານງານ ລະຫວ່າງຄະນະປະຈຳສະພາແຫ່ງຊາດ ກັບສະພາປະຊາຊົນຂັ້ນແຂວງ ເພື່ອຮັບປະກັນການຈັດຕັ້ງປະຕິບັດພາລະບົດບາດຂອງສະພາແຫ່ງຊາດ ແລະ ສະພາປະຊາຊົນຂັ້ນແຂວງ; ປຶກສາຫາລື, ຮັບຟັງຄຳຄິດເຫັນ ກໍຄືຂໍ້ສະເໜີຕ່າງໆ ຂອງຄະນະສະມາຊິກສະພາແຫ່ງຊາດ ປະຈຳເຂດເລືອກຕັ້ງ ແລະ ຄະນະປະຈຳສະພາປະຊາຊົນຂັ້ນແຂວງ ເພື່ອສ້າງຄວາມເປັນເອກະພາບໃນການຈັດຕັ້ງປະຕິບັດວຽກງານປະສານງານ ເຊິ່ງກັນ ແລະ ກັນ; ກອງປະຊຸມຍັງໄດ້ຮັບຟັງການຜ່ານບົດສະຫຼຸບກ່ຽວກັບການນຳພາ-ຊີ້ນຳ ຂອງຄະນະປະຈຳສະພາແຫ່ງຊາດ ຕໍ່ການເຄື່ອນໄຫວວຽກງານຂອງຄະນະສະມາຊິກສະພາແຫ່ງຊາດ ປະຈຳເຂດເລືອກຕັ້ງ ແລະ ການພົວພັນປະສານງານກັບຄະນະປະຈຳສະພາປະຊາຊົນຂັ້ນແຂວງ ໃນໄລຍະແຕ່ກອງປະຊຸມຄັ້ງປະຖົມມະລືກ ເຖິງກອງປະຊຸມສະໄໝສາມັນເທື່ອທີ 3 ແລະ ທິດທາງແຕ່ນີ້ ຫາກອງປະຊຸມສະໄໝສາມັນເທື່ອທີ 5 ຂອງສະພາແຫ່ງຊາດ ຊຸດທີ IX; ຮັບຟັງການລາຍງານກ່ຽວກັບການຈັດຕັ້ງປະຕິບັດການເຄື່ອນໄຫວວຽກງານຂອງຄະນະສະມາຊິກສະພາແຫ່ງຊາດ ປະຈຳເຂດເລືອກຕັ້ງ ແລະ ສະພາປະຊາຊົນຂັ້ນແຂວງຈຳນວນໜຶ່ງ.

           ​ ໂອກາດດັ່ງກ່າວ ທ່ານ ປອ. ໄຊສົມພອນ ພົມວິຫານ ໄດ້ມີຄຳເຫັນໂອ້ລົມຕໍ່ກອງປະຊຸມວ່າ: ສະພາແຫ່ງຊາດ ແລະ ສະພາປະຊາຊົນຂັ້ນແຂວງ ເຖິງບໍ່ແມ່ນສາຍຕັ້ງກັນ ແຕ່ໄດ້ກໍານົດໃນກົດໝາຍວ່າດ້ວຍສະພາແຫ່ງຊາດ ມາດຕາ 86 ແລະ ມີມະຕິຂອງຄະນະປະຈໍາສະພາແຫ່ງຊາດ ກ່ຽວກັບການພົວພັນປະສານງານ ຄື:

1) ການສ້າງ, ປັບປຸງ ກົດໝາຍ ແລະ ນິຕິກໍາ;

2) ການຕິດຕາມກວດກາ ການຈັດຕັ້ງປະຕິບັດລັດຖະທໍາມະນູນ, ກົດໝາຍ ແລະ ມະຕິກອງປະຊຸມສະພາແຫ່ງຊາດ;

3) ການຕົກລົງບັນຫາສໍາຄັນທີ່ຕິດພັນກັບທ້ອງຖິ່ນ;

4) ການສ້າງຄວາມເຂັ້ມແຂງໃຫ້ສະມາຊິກສະພາປະຊາຊົນຂັ້ນແຂວງ ແລະ ພະນັກງານວິຊາການ ຂອງສະພາປະຊາຊົນຂັ້ນແຂວງ;

5) ການກະກຽມການເລືອກຕັ້ງສະມາຊິກສະພາແຫ່ງຊາດ ແລະ ສະມາຊິກສະພາປະຊາຊົນຂັ້ນແຂວງ.

ທ່ານຍັງມີຄໍາເຫັນເນັ້ນຕື່ມວ່າ: ໃນນາມຕາງໜ້າຄະນະປະຈໍາສະພາແຫ່ງຊາດ ຂໍໃຫ້ປະທານຄະນະສະມາຊິກສະພາແຫ່ງຊາດ ປະຈໍາເຂດເລືອກຕັ້ງ ກໍຄືປະທານສະພາປະຊາຊົນຂັ້ນແຂວງ, ບັນດາກໍາມາທິການ ແລະ ກົງຈັກເສນາທິການ ຈົ່ງໄດ້ນໍາເອົາເນື້ອໃນຂອງກອງປະຊຸມຄັ້ງນີ້ໄປຄົ້ນຄວ້າ, ຜັນຂະຫຍາຍເຂົ້າສູ່ວຽກງານຕົວຈິງຂອງຕົນ ເພື່ອເຮັດໃຫ້ການປະຕິບັດໜ້າທີ່ວຽກງານມີບາດກ້າວໃໝ່ດີຂຶ້ນເລື້ອຍໆ.

(ພາບ ແລະ ຂ່າວ: ອານຸສອນ ພູມມີທອນ)