ໃນວັນທີ 7 ມິຖຸນາ 2024 ຢູ່ທີ່ຫ້ອງປະຊຸມສະພາປະຊາຊົນແຂວງ ໄດ້ເປີດກອງປະຊຸມຮ່ວມລະຫວ່າງ ສະພາປະຊາຊົນແຂວງ ແລະ ອົງການປົກຄອງແຂວງ ເພື່ອປຶກສາຫາລື, ເອກະພາບກັນກ່ຽວກັບຫົວຂໍ້ເນື້ອໃນ ທີ່ຈະນໍາເຂົ້າໃນກອງປະຊຸມສະໄໝສາມັນ ເທື່ອທີ 7 ຂອງສະພາປະຊາຊົນແຂວງ ຊຸດທີ II ໂດຍການເປັນປະທານຮ່ວມຂອງທ່ານ ວຽງໄຊ ສີວິໄລ ກໍາມະການພັກແຂວງ ຮອງປະທານສະພາປະຊາຊົນແຂວງ ແລະ ທ່ານ ສີວິໄລ ແສງຈະເລີນ ກໍາມະການພັກແຂວງຮອງເຈົ້າແຂວງໆຊຽງຂວາງ, ມີບັນດາທ່ານຄະນະປະຈໍາສະພາປະຊາຊົນແຂວງ, ປະທານ-ຮອງປະທານຄະນະກໍາມະການສະພາປະຊາຊົນແຂວງ, ຫົວໜ້າ-ຮອງຫົວໜ້າບັນດາພະແນກການ, ກົມກອງອ້ອມຂ້າງແຂວງ ແລະ ຫົວໜ້າ-ຮອງຫົວໜ້າຂະແໜງຈາກຫ້ອງວ່າການແຂວງ ແລະ ສະພາປະຊາຊົນແຂວງເຂົ້າຮ່ວມ.
ເພື່ອເປັນການຄົ້ນຄວ້າບັນດາຫົວຂໍ້ເນື້ອໃນທີ່ຈະນໍາເຂົ້າໃນກອງປະຊຸມສະໄໝສາມັນ ເທື່ອທີ 7 ຂອງສະພາປະຊາຊົນແຂວງ ຊຸດທີ II ບັນດາຜູ້ແທນກອງປະຊຸມໄດ້ເຫັນດີເປັນພາບກັນກໍານົດຫົວຂໍ້ເນື້ອໃນດັ່ງນີ້:ບົດລາຍງານຂອງທ່ານເຈົ້າແຂວງ ກ່ຽວກັບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ປະຈຳ 6 ເດືອນຕົ້ນປີ 2024 ແລະ ທິດທາງແຜນການ 6 ເດືອນທ້າຍປີ 2024, ຕິດພັນກັບ 2 ວາລະແຫ່ງຊາດ, ບົດລາຍງານຂອງພະແນກແຜນການ ແລະ ການລົງທຶນ ກ່ຽວກັບການຈັດຕັ້ງປະຕິບັດແຜນການລົງທຶນແຫ່ງລັດຂອງແຂວງ ໄລຍະ 6 ເດືອນຕົ້ນປີ ແລະ ທິດທາງແຜນການ 6 ເດືອນທ້າຍປີ ແລະ ການຄຸ້ມຄອງ ການລົງທຶນພາກເອກະຊົນ ພາຍໃນ ແລະ ຕ່າງປະເທດ ໄລຍະ 6 ເດືອນຕົ້ນປີ 2024, ບົດລາຍງານ ກ່ຽວກັບ ການຈັດຕັ້ງປະຕິບັດແຜນງົບປະມານຂອງແຂວງ ໄລຍະ 6 ເດືອນຕົ້ນປີ 2024 ແລະ ທິດທາງແຜນການ 6 ເດືອນທ້າຍປີ 2024, ບົດລາຍງານ ຂອງພະແນກຍຸຕິທຳກ່ຽວກັບ ຂອດການປະສານງານກັບພາກສ່ວນຕ່າງໆທີ່ກ່ຽວຂ້ອງ ໃນການໂຄສະນາເຜີຍແຜ່ກົດໝາຍ ເພື່ອເຮັດໃຫ້ການປະຕິບັດຄຳຕັດສິນຂອງສານ ມີຄວາມສະດວກວ່ອງໄວ ແລະ ທັນຕາມກຳນົດເວລາ, ບົດລາຍງານຂອງ ປກສ ແຂວງ ກ່ຽວກັບການຄຸ້ມຄອງສຳມະໂນຄົວ, ບັດປະຈຳຕົວ ແລະ ການອອກປ້າຍເຮືອນ ພາຍໃນແຂວງ, ບົດລາຍງານ ຂອງພະແນກສຶກສາທິການ ແລະ ກິລາແຂວງ ກ່ຽວກັບ ສະພາບການຄຸ້ມຄອງປົກປັກຮັກສາ ແລະ ນຳໃຊ້ບັນດາພື້ນຖານໂຄງລ່າງ ກິລາປະເພດຕ່າງໆ ຫຼັງຈາກສຳເລັດງານມະຫາກຳກິລາແຫ່ງຊາດຄັ້ງທີ 11 ທີ່ແຂວງຊຽງຂວາງເປັນເຈົ້າພາບ, ບົດລາຍງານ ຂອງພະແນກແຮງງານ ແລະ ສະຫວັດດີການສັງຄົມແຂວງ ກ່ຽວກັບ ການຈັດຕັ້ງປະຕິບັດຂໍ້ຕົກລົງ ຂອງທ່ານເຈົ້າແຂວງ ສະບັບເລກທີ 310/ຊຂ, ລົງວັນທີ 13 ພຶດສະພາ 2022 ວ່າດ້ວຍການປ້ອງກັນ, ຄຸ້ມຄອງ ແລະ ແກ້ໄຂໄພພິບັດ, ບົດລາຍງານຂອງພະແນກໂຍທາທິການ ແລະ ຂົນສົ່ງແຂວງ ກ່ຽວກັບ ສະພາບການຄຸ້ມຄອງ, ການປົກປັກຮັກສາ ແລະ ການຕິດຕາມຊຸກຍູ້, ສ້ອມແປງເສັ້ນທາງຫຼວງແຫ່ງຊາດ, ທາງຫຼວງທ້ອງຖິ່ນ ແລະ ເສັ້ນທາງພາຍໃນແຂວງ, ບົດລາຍງານຂອງ ສ່ວຍສາອາກອນປະຈຳແຂວງ ກ່ຽວກັບ ການເກັບລາຍຮັບອາກອນຈາກໂຄງການສຳຫຼວດ ແລະ ຂຸດຄົ້ນແຮ່ຢູ່ແຂວງຊຽງຂວາງ, ບົດລາຍງານ ຂອງພະແນກກະສິກຳ ແລະ ປ່າໄມ້ແຂວງ ກ່ຽວກັບ ແຜນການຈັດຕັ້ງປະຕິບັດຄຳສັ່ງເລກທີ 11/ນຍ ວ່າດ້ວຍການເພີ່ມທະວີຄວາມເຂັ້ມງວດ ໃນການຄຸ້ມຄອງ, ປົກປັກຮັກສາ, ພັດທະນາ ແລະ ນຳໃຊ້ປ່າໄມ້, ທີ່ດິນປ່າໄມ້, ຕ້ານ ແລະ ສະກັດກັ້ນ ການບຸກລຸກທຳລາຍປ່າໄມ້, ທີ່ດິນປ່າໄມ້ ແລະ ໄຟໄໝ້ລາມປ່າ; ການຕິດຕາມກວດກາ, ການຄຸ້ມຄອງການນໍາໃຊ້ສານເຄມີ ເຂົ້າໃນການຜະລິດກະສິກຳ, ບົດລາຍງານ ຂອງພະແນກຊັບພະຍາກອນ ທຳມະຊາດ ແລະ ສິ່ງແວດລ້ອມແຂວງ ກ່ຽວກັບ ການແກ້ໄຂຜົນກະທົບ ຈາກການນຳໃຊ້ສານເຄມີເຂົ້າໃນໂຄງການລົງທຶນດ້ານແຮ່ທາດ, ບົດລາຍງານ ຂອງພະແນກອຸດສາຫະກຳ ແລະ ການຄ້າແຂວງ ກ່ຽວກັບ ການຕິດຕາມກວດກາ, ການຄູ້ມຄອງ, ການນຳເຂົ້າສານເຄມີ ແລະ ບົດລາຍງານ ການເຄື່ອນໄຫວວຽກງານ ຂອງສະພາປະຊາຊົນແຂວງ ໄລຍະ 6 ເດືອນຕົ້ນປີ 2024 ແລະ ທິດທາງແຜນການ 6 ເດືອນທ້າຍປີ 2024. ກອງປະຊຸມສະໄໝສາມັນ ເທື່ອທີ 7 ຂອງສະພາປະຊາຊົນແຂວງ ຊຸດທີ II ຄາດຄະເນຈະໄຂຂຶ້ນໃນທ້າຍເດືອນ ກໍລະກົດ 2024.
ສະພາປະຊາຊົນແຂວງຊຽງຂວາງ
ຂ່າວໂດຍ: ນາງ ສຸກສະຫວັນ ອິນທະແສງ