ໃນວັນທີ 16 ສິງຫາ 2022 ນີ້ ສະພາປະຊາຊົນແຂວງ ກັບ ອົງການປົກຄອງແຂວງ ແຂວງຈໍາປາສັກ ໄດ້ເປີດກອງປະຊຸມຮ່ວມກັນຂື້ນຢູ່ທີ່ຂອງຫ້ອງວ່າການປົກແຂວງຈໍາປາສັກ ໂດຍການໃຫ້ກຽດເຂົ້າຮ່ວມເປັນປະທານຮ່ວມຂອງ ທ່ານ ສົມມາດພົງເສມາ ກໍາມະການສູນກາງພັກ ຮອງປະທານສະພາແຫ່ງຊາດ, ທ່ານ ປອ ວິໄລວົງ ບຸດດາຄໍາ ກໍາມະການສູນກາງພັກ ເລຂາພັກແຂວງ ເຈົ້າແຂວງໆຈໍາປາສັກ, ທ່ານ ສາຍທອງ ໄຊຍະວົງ ຮອງເລຂາພັກແຂວງ ປະທານສະພາປະຊາຊົນແຂວງຈໍາປາສັກ.ມີບັນດາທ່ານສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 15, ສະມາຂິກສະພາປະຊາຊົນແຂວງ, ຫົວໜ້າ-ຮອງຫົວໜ້າພະແນກການອ້ອມຂ້າງແຂວງ ຕະຫລອດຮອດພະນັກງານວິຊາການທີ່ກ່ຽວຂ້ອງເຂົ້າຮ່ວມ.

ຈຸດປະສົງໃນການຈັດກອງປະຊຸມຄັ້ງນີ້, ເພື່ອເປັນການປຶກສາຫາລື ໃນກາກະກຽມເນື້ອໃນໃຫ້ແກ່ກອງປະຊຸມສະໄໝສາມັນ ເທື່ອທີ 3 ຂອງສະພາປະຊາຊົນແຂວງຈໍາປາສັກ ຊຸດທີ II ແລະ ວຽກງານທີ່ພົ້ນເດັ່ນຂອງແຂວງ ເຊີ່ງກອງປະຊຸມໄດ້ຮັບຟັງການລາຍງານກ່ຽວກັບການກະກຽມຄວາມພ້ອມຮອບດ້ານໃນການດໍາເນີນກອງປະຊຸມສະໄໝສາມັນເທື່ອທີ 3 ຂອງສະພາປະຊາຊົນແຂວງຈໍາປາສັກ ຊຸດທີ II ຈາກທ່ານ ສົມສີ ມະນີນິນ ຮອງປະທານສະພາປະຊາຊົນແຂວງ; ຮັບຟັງການລາຍງານກ່ຽວກັບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ 6 ເດືອນຕົ້ນປີ ແລະ ທິດທາງແຜນການ 6 ເດືອນທ້າຍປີ 2022 ຈາກ ທ່ານ ປອ ສຸກສະຫວັນ ວິໄລວົງ ຫົວໜ້າພະແນກແຜນການ ແລະ ການລົງທຶນ. ພ້ອມທັງຮັບຟັງການຊີ້ແຈ້ງຕໍ່ຄໍາຊັກຖາມຂອງສະພາປະຊາຊົນແຂວງ ກ່ຽວກັບບັນຫາພົນເດັ່ນທີ່ເກີດຂື້ນຢູ່ແຂວງຈໍາປາສັກ ເຊັ່ນ: ບັນຫາການຄຸ້ມຄອງເງິນຕາ ແລະ ຮ້ານແລກປ່ຽນເງິນຕາ; ການຈັດເກັບລາຍຮັບງົບປະມານຈາກການເຊົ່າສໍາປະທານເນື້ອທີ່ດິນລັດ; ການຄຸ້ມຄອງສິນຄ້າ ແລະ ຄຸ້ມຄອງທຸລະກິດນໍ້າມັນເຊື້ອໄຟ ແລະ ບັນຫາອື່ນໆ. ຈາກບັນດາທ່ານຕາງໜ້າໃຫ້ພະແນກການທີ່ກ່ຽວຂ້ອງ. ຈາກນັ້ນ, ບັນດາທ່ານສະມາຊິກສະພາປະຊາຊົນແຂວງ ແລະ ຜູ້ແທນກອງປະຊຸມໄດ້ປະກອບຄໍາຄິດເຫັນເຈາະຈິ້ມ ຕໍ່ເນື້ອໃນການລາຍງານ ເພື່ອໃຫ້ພາກສ່ວນກ່ຽວຂ້ອງຊີ້ແຈງເພີ່ມເຕີມ ແລະ ສະເໜີມາດຕະການແກ້ໄຂບັນຫາດັ່ງກ່າວໃນຕໍ່ໜ້າ.