ຕອນເຊົ້າຂອງວັນທີ 25 ເມສາ 2024 ຢູ່ທີ່ສະໂມສອນເມືອງແບງ, ສະພາປະຊາຊົນແຂວງ ໄດ້ຈັດກອງປະຊຸມສຳມະນາ ທັກສະການເປັນຜູ້ນຳ ແລະ ພາວະຄວາມເປັນຜູ້ນຳ ໃຫ້ແກ່ສະມາຊິກສະພາປະຊາຊົນແຂວງ, ໂດຍການເປັນປະທານຂອງທ່ານ ຄໍາດີ ວົງລ້ອມ ຮອງເລຂາພັກແຂວງ ປະທານສະພາປະຊາຊົນແຂວງ, ມີສະຫາຍ ຄໍາເຜີຍ ງອນວັນຄໍາ ກໍາມະການປະຈໍາພັກແຂວງ ຮອງປະທານສະພາປະຊາຊົນແຂວງ, ມີນັກວິທະຍາກອນຈາກສະພາແຫ່ງຊາດ, ມະຫາວິທະຍາໄລແຫ່ງ, ສະມາຊິກສະພາແຫ່ງຊາດ ປະຈໍາເຂດເລືອກຕັ້ງ, ສະມາຊິກສະພາປະຊາຊົນແຂວງ ປະຈໍາເຂດເລືອກຕັ້ງ 7 ເມືອງ, ຄະນະເລຂາທິການ, ຫົວໜ້າຂະແໜງ ແລະ ພະນັກງານວິຊາການຂະແໜງກ່ຽວຂ້ອງພາຍໃນສະພາປະຊາຊົນແຂວງ ເຂົ້າຮ່ວມຢ່າງພ້ອມພຽງ.
ກອງປະຊຸມແມ່ນຈະໄດ້ຮັບຟັງການສະເໜີບົດ ລະບອບການປົກຄອງ ແລະ ການບໍລິຫານລັດຢູ່ ສປປ ລາວ; ການຍົກສູງປະສິດທິພາບ, ກົນໄກການບໍລິຫານອົງການ; ການພັດທະນາທັກສະການເປັນຜູ້ບໍລິຫານ ຫຼື ຜູ້ນຳ; ບົດຮຽນການແນະນຳການໃຫ້ຄຳປຶກສາຫາ ລືກັບປະຊາຊົນຕໍ່ຜູ້ມີສິດເລືອກຕັ້ງ ຂອງສະມາຊິກສະ ພາແຫ່ງຊາດ ແລະ ສະມາຊິກສະພາປະຊາຊົນຂັ້ນແຂວງ; ຈັນຍາບັນຂອງສະມາຊິກສະພາແຫ່ງຊາດ ແລະ ສະມາຊິກສະພາປະຊາຊົນຂັ້ນແຂວງ.
ປະທານໄດ້ມີຄໍາເຫັນກ່າວເປີດກອງປະຊຸມ ແລະ ທ່ານໄດ້ຮຽກຮ້ອງມາຍັງບັນດາທ່ານ ຈົ່ງສຸ່ມທຸກສະຕິປັນຍາຂອງທ່ານ ເຂົ້າໃນການຄົ້ນຄວ້າ, ເຊື່ອມຊຶມ ແລະ ສົນທະນາແລກປ່ຽນຄວາມຄິດເຫັນໃນແຕ່ລະຫົວຂໍ້ຮ່ວມກັນໃຫ້ເປັນຂະບວນຟົດຟື້ນ ແລະ ສ້າງສັນ, ຮັບປະກັນການ ສົ່ງ ແລະ ຮັບຄວາມຮູ້ຢ່າງທົ່ວເຖິ່ງ ເພື່ອນໍາໄປມູນໃຊ້ເຂົ້າໃນການຈັດຕັ້ງປະຕິບັດໜ້າທີ່ຂອງຕົນໃນແຕ່ລະໄລຍະ.
ກອງປະຊຸມດັ່ງກ່າວຈະດໍາເນີນເປັນເວລາ 2 ວັນຈຶ່ງຈະສໍາເລັດ.
ກອງປະຊຸມຄັ້ງນີ້ ໄດ້ຮັບການສະໜັບສະໜູນຊ່ວຍເຫຼືອທາງດ້ານງົບປະມານຈາກໂຄງການສ້າງຄວາມເຂັ້ມແຂງໃຫ້ແກ່ສະພາແຫ່ງຊາດ ແລະ ສະພາປະຊາຊົນແຂວງ ຫຼື ສະເຕັບສ໌ (STEPs).ພາບ/ຂ່າວ: ສະພາປະຊາຊົນແຂວງ.