ກອງປະຊຸມສະໄໝສາມັນເທື່ອທີ 7 ສະພາປະຊາຊົນແຂວງຈໍາປາສັກ ຊຸດທີ II ໄດ້ດໍາເນີນ ແລະ ອັດລົງດ້ວຍຜົນສໍາເລັດຢ່າງຈົບງາມ ໃນລະຫວ່າງວັນທີ 25-26 ກໍລະກົດ 2024ທີ່ຜ່ານມາ ຢູ່ທີ່ຫໍປະຊຸມໃຫຍ່ຂອງແຂວງຈໍາປາສັກ (ສະໂມສອນ ຫຼັກ 4 ) ໂດຍພາຍໃຕ້ການເປັນປະທານຂອງ ທ່ານ ສາຍທອງ ໄຊຍະວົງ ຮອງເລຂາພັກແຂວງ ປະທານສະພາປະຊາຊົນແຂວງຈໍາປາສັກ ແລະການໃຫ້ກຽດເຂົ້າຮ່ວມຂອງ ທ່ານ ສົມມາດ ພົລເສນາ ກຳມະການສູນກາງພັກ ຮອງປະທານຄະນະປະຈໍາສະພາແຫ່ງຊາດ, ທ່ານ ອາລຸນໄຊ ສູນນະລາດ ກຳມະການສູນກາງພັກ ເລຂາພັກແຂວງ ເຈົ້າແຂວງຈຳປາສັກ ມີບັນດາທ່ານການນໍາພັກ – ລັດຂອງແຂວງ, ອະດີດການນໍາຂັ້ນສູງຂອງແຂວງ, ແນວລາວສ້າງຊາດ, ອົງການຈັດຕັ້ງມະຫາຊົນ, ພ້ອມດ້ວຍບັນດາທ່ານສະມາຊິກ ສະພາແຫ່ງຊາດ ປະຈຳເຂດເລືອກຕັ້ງ 15, ສະມາຊິກສະພາປະຊາຊົນແຂວງປະຈໍາເຂດເລືອກຕັ້ງ 9 ເມືອງ, 1 ນະຄອນ ຂອງແຂວງຈໍາປາສັກ ບັນດາທ່ານການນໍາພະແນກການ, ອົງການລັດທຽບເທົ່າຂັ້ນແຂວງ ເຈົ້າເມືອງ, ເຈົ້ານະຄອນ, ຜູ້ຕາງໜ້າຈາກພາກສ່ວນຕ່າງໆ ແລະ ນັກຮຽນ - ນັກສຶກສາ ເຂົ້າຮ່ວມ.
ຕະຫຼອດໄລຍະຂອງການດຳເນີນກອງປະຊຸມສະໄໝສາມັນເທື່ອທີ 7 ຂອງສະພາປະຊາຊົນແຂວງຈໍາປາສັກ ຊຸດທີ II ໄດ້ຄົ້ນຄວ້າພິຈາລະນາ ຫຼາຍບັນຫາສໍາຄັນຄື: ກອງປະຊຸມ ໄດ້ຮັບຟັງການລາຍງານໂດຍສັງເຂບຂອງອົງການປົກຄອງແຂວງກ່ຽວກັບການຈັດຕັ້ງປະຕິບັດແຜນພັດທະນາເສດຖະກິດ – ສັງຄົມ, ແຜນງົບປະມານແຫ່ງລັດ ຕິດພັນກັບການຈັດຕັ້ງປະຕິບັດ 2 ວາລະຂອງແຂວງຕາມເນື້ອໃນວາລະແຫ່ງຊາດໃນໄລຍະ 6 ເດືອນຕົ້ນປີ ແລະ ແຜນພັດທະນາເສດຖະກິດ – ສັງຄົມ, ແຜນງົບປະມານແຫ່ງລັດ 6 ເດືອນທ້າຍປີ 2024 ຂອງແຂວງຈໍາປາສັກ ຈາກ ທ່ານ ອາລຸນໄຊ ສູນນະລາດ ກຳມະການສູນກາງພັກ ເລຂາພັກແຂວງ ເຈົ້າແຂວງຈຳປາສັກ. ຈາກນັ້ນ, ທ່ານ ແກ້ວລັດຕະນະ ສີຫາວົງ ຮອງປະທານສະພາປະຊາຊົນແຂວງ ໄດ້ຕາງໜ້າຄະນະປະຈໍາສະພາປະຊາຊົນແຂວງ ປະກອບຄໍາເຫັນຕໍ່ບົດລາຍງານການຈັດຕັ້ງປະຕິບັດແຜນພັດທະນາເສດຖະກິດ – ສັງຄົມ, ແຜນງົບປະມານແຫ່ງລັດ ຕິດພັນກັບການຈັດຕັ້ງປະຕິບັດ 2 ວາລະຂອງແຂວງຕາມເນື້ອໃນວາລະແຫ່ງຊາດ, ກອງປະຊຸມໄດ້ຮັບຟັງລາຍງານກ່ຽວກັບວຽກງານການຈັດຕັ້ງປະຕິບັດບັນດາຄາດໝາຍວຽກງານພັດທະນາຊົນນະບົດ ແລະ ແກ້ໄຂຄວາມທຸກຍາກໄລຍະຜ່ານມາ ແລະ ທິດທາງແຜນການໃນຕໍ່ໜ້າ; ບົດລາຍງານກ່ຽວກັບການຈັດຕັ້ງປະຕິບັດວາລະຂອງແຂວງວ່າດ້ວຍການແກ້ໄຂຄວາມຫຍຸ້ງຍາກ ຕໍ່ການພັດທະນາການທ່ອງທ່ຽວແຕ່ປີ 2024 – 2025. ຮັບຟັງບົດລາຍງານກ່ຽວກັບການຈັດຕັ້ງປະຕິບັດແຜນການເຄື່ອນໄຫວວຽກງານ ແຕ່ກອງປະຊຸມສະໄໝສາມັນເທື່ອທີ 6 ຫາກອງປະຊຸມສະໄໝສາມັນເທື່ອທີ 7 ແລະ ແຜນການເຄື່ອນໄຫວຮອດກອງປະຊຸມສະໄໝສາມັນເທື່ອທີ 8 ຂອງສະພາປະຊາຊົນແຂວງ; ບົດລາຍງານຜົນການຕິດຕາມກວດກາກ່ຽວກັບການອອກໃບຕາດິນທົ່ວແຂວງຈໍາປາສັກ. ຕໍ່ກັບເນື້ອໃນດັ່ງກ່າວ, ປະທານກອງປະຊຸມ ໄດ້ມີຄໍາເຫັນເຈາະຈີ້ມ ເພື່ອໃຫ້ເປັນທິດໃຫ້ແກ່ບັນດາທ່ານສະມາຊິກສະພາປະຊາຊົນແຂວງ ໄດ້ປະກອບຄໍາເຫັນ ແລະ ຊັກຖາມເພີ່ມເຕີມຕໍ່ອົງການປົກຄອງແຂວງຈໍາປາສັກ ສາມາດສັງລວມໄດ້ຫຼາຍບັນຫາພົ້ນເດັ່ນທີ່ເກີດຂື້ນໃນແຕ່ລະທ້ອງຖິ່ນພາຍໃນແຂວງຈໍາປາສັກ
ຕໍ່ກັບຂໍຊັກຖາມຂອງຂອງບັນດາທ່ານສະມາຊິກສະພາປະຊາຊົນແຂວງຈໍາປາສັກ ໄດ້ຮັບການຂື້ນຊີ້ແຈງອະທິບາຍ ຈາກບັນດາທ່ານສະມາຊິກຂອງອົງການປົກຄອງແຂວງ-ການນໍາພະແນກການທີ່ກ່ຽວຂ້ອງຢ່າງກົງໄປກົງມາບົນພື້ນຖານພາລະບົດບາດ, ສິດ ແລະໜ້າທີ່ຄວາມຮັບຜິດຊອບຂອງພະແນກການ-ກົມກອງ ແລະອົງການທຽບເທົ່າຂັ້ນແຂວງທີ່ກ່ຽວຂ້ອງ.
ກອງປະຊຸມສະໄໝສາມັນເທື່ອທີ 7 ຂອງສະພາປະຊາຊົນແຂວງຊຸດທີ II ໄດ້ຮັບຮອງເອົາເປັນມະຕິກອງປະຊຸມຂອງພວກເຮົາ ທັງໝົດ 6 ສະບັບ ຄື:
(1)ມະຕິກອງປະຊຸມສະພາປະຊາຊົນແຂວງ ວ່າດ້ວຍການຮັບຮອງເອົາບົດລາຍງານຂອງອົງການປົກຄອງແຂວງ ກ່ຽວກັບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ 06 ເດືອນຕົ້ນປີ ແລະ ແຜນການ 06 ເດືອນທ້າຍປີ 2024 ຂອງແຂວງຈໍາປາສັກ;
(2)ມະຕິກອງປະຊຸມສະພາປະຊາຊົນແຂວງ ວ່າດ້ວຍການຮັບຮອງເອົາບົດລາຍງານຂອງອົງການປົກຄອງແຂວງ ກ່ຽວກັບການຈັດຕັ້ງປະຕິບັດແຜນງົບປະມານແຫ່ງລັດ 06 ເດືອນຕົ້ນປີ ແລະ ແຜນການ 06 ເດືອນທ້າຍປີ 2024 ຂອງແຂວງຈຳປາສັກ;
(3)ມະຕິກອງປະຊຸມສະພາປະຊາຊົນແຂວງ ວ່າດ້ວຍການຮັບຮອງເອົາບົດລາຍງານການເຄື່ອນໄຫວວຽກງານແຕ່ກອງປະຊຸມສະໄໝສາມັນເທື່ອທີ 6 ຫາກອງປະຊຸມສະໄໝສາມັນເທື່ອທີ 7 ແລະ ແຜນການຮອດກອງປະຊຸມສະໄໝສາມັນເທື່ອທີ 8 ຂອງສະພາປະຊາຊົນແຂວງ;
(4)ມະຕິກອງປະຊຸມສະພາປະຊາຊົນແຂວງ ວ່າດ້ວຍການຮັບຮອງເອົາວາລະຂອງແຂວງວ່າດ້ວຍການແກ້ໄຂຄວາມຫຍຸ້ງຍາກຕໍ່ການພັດທະນາການທ່ອງທ່ຽວປີ 2024-2025;
(5)ມະຕິກອງປະຊຸມສະພາປະຊາຊົນແຂວງ ວ່າດ້ວຍການຮັບຮອງເອົາບົດລາຍງານການຈັດຕັ້ງປະຕິບັດບັນດາຄາດໝາຍວຽກງານພັດທະນາຊົນນະບົດ ແລະ ແກ້ໄຂຄວາມທຸກຍາກໄລຍະຜ່ານມາ ແລະ ທິດທາງແຜນການໃນຕໍ່ໜ້າ ຢູ່ແຂວງຈໍາປາສັກ;
(6)ມະຕິກອງປະຊຸມສະພາປະຊາຊົນແຂວງ ວ່າດ້ວຍການຮັບຮອງເອົາຜົນການຕິດຕາມກວດກາກ່ຽວກັບການອອກໃບຕາດິນທົ່ວແຂວງຈໍາປາສັກ.
ການອອກມະຕິກອງປະຊຸມຄັ້ງນີ້ ຈະເປັນນິຕິກຳພື້ນຖານ ເພື່ອໃຫ້ອົງການປົກຄອງແຂວງ ສືບ ຕໍ່ນຳພາ-ຊີ້ນຳ ບັນດາຂະແໜງການ ພ້ອມທັງປຸກລະດົມ ປະຊາຊົນລາວບັນດາເຜົ່າ ສູ້ຊົນຜ່ານຜ່າຂໍ້ຫຍຸ້ງຍາກ ທາງດ້ານເສດຖະກິດ-ການເງິນ, ສືບຕໍ່ຈັດຕັ້ງປະຕິບັດ ບັນດານະໂຍບາຍ, ມາດຕະການ ທາງດ້ານເສດຖະກິດ-ສັງຄົມ ໃຫ້ມີປະສິດທິຜົນ ເພື່ອແກ້ໄຂສິ່ງອຸດຕັນ ໃນການຄຸ້ມຄອງ ແລະ ບໍລິຫານລັດ ໃນຂະແໜງການຕ່າງໆ ໃຫ້ມີຄວາມໂລ່ງລ່ຽນ ຕາມກົດໝາຍກຳນົດໄວ້. ສະນັ້ນ, ກອງປະຊຸມຮຽກຮ້ອງມາຍັງອົງການປົກຄອງແຂວງ, ອົງການທີ່ກ່ຽວຂ້ອງ ພ້ອມດ້ວຍປະຊາຊົນຊາວແຂວງຈຳປາສັກ ຈົ່ງເປັນເຈົ້າການໃນການຈັດຕັ້ງປະຕິບັດມະຕິກອງປະຊຸມສະໄໝສາມັນໃນຄັ້ງນີ້ ໃຫ້ໄດ້ຮັບຜົນສຳເລັດ; ຮຽກຮ້ອງມາຍັງຄະນະປະຈຳສະພາສະພາປະຊາຊົນແຂວງ, ຄະນະກຳມະການ, ຄະນະເລຂາທິການ, ສະມາຊິກສະພາແຫ່ງຊາດ ປະຈຳເຂດເລືອກຕັ້ງທີ 15, ສະມະຊິກສະພາປະຊາຊົນແຂວງ ເອົາໃຈໃສ່ຕິດຕາມກວດກາການຈັດຕັ້ງປະຕິບັດບັນດາມະຕິ ທີ່ໄດ້ຮັບຮອງເອົາໃນກອງປະຊຸມຄັ້ງນີ້ ຕາມຂອບເຂດສິດ, ໜ້າທີ່ ຊຶ່ງໄດ້ກຳນົດໄວ້ໃນກົດໝາຍ.
ຜົນສຳເລັດຂອງກອງປະຊຸມໃນຄັ້ງນີ້ ແມ່ນໝາກຜົນອັນລວມຍອດຕໍ່ການເສີມຂະຫຍາຍສະຕິປັນຍາລວມໝູ່, ການປະສານສົມທົບຢ່າງກົມກຽວ ແຕ່ຫົວທີ ລະຫວ່າງ ສະພາປະຊາຊົນແຂວງ ກັບ ອົງການປົກຄອງແຂວງ, ລະຫວ່າງ ບັນດາຄະນະກຳມະການຂອງສະພາປະຊາຊົນແຂວງ ກັບບັນດາພະແນກການ, ອົງການທີ່ກ່ຽວຂ້ອງຂອງແຂວງ ທີ່ໄດ້ສຸມສະຕິປັນຍາ, ເຊີດຊູຄວາມຮັບຜິດຊອບໃນການຄົ້ນຄວ້າ ແລະ ນຳສະເໜີຜ່ານໃນກອງປະຊຸມຄັ້ງນີ້; ການປະກອບຄຳຄິດເຫັນຕໍ່ບັນດາເນື້ອໃນທີ່ນຳມາພິຈາລະນາ ແລະ ຮັບຮອງເອົາ ໃນກອງປະຊຸມຄັ້ງນີ້ກໍມີລັກສະນະສ້າງສັນ, ມີເຫດຜົນ, ມີເນື້ອໃນເລິກເຊິ່ງ.
***ພາບ-ຂ່າວ: ສົມວິຈິດ ໄຊມົນຕີ ***