ໂດຍປະຕິບັດຕາມມະຕິຂອງ ຄະນະປະຈໍາສະພາປະຊາຊົນແຂວງຄໍາມ່ວນ ສະບັບເລກທີ 138/ຄປຈ.ສພຂ, ລົງວັນທີ 7 ທັນວາ 2021. ກອງປະຊຸມສ່ອງແສງລາຍງານປະຈໍາອາທິດທີ 2 ຂອງເດືອນ ພຶດສະພາ 2023 ຂອງຄະນະເລຂາທິການສະພາປະຊາຊົນແຂວງຄໍາມ່ວນ ຊຸດທີ  II, ໄດ້ໄຂຂຶ້ນໃນຕອນເຊົ້າຂອງວັນສຸກ, ວັນທີ 12 ພຶດສະພາ 2023 ຢູ່ທີ່ຫ້ອງປະຊຸມສະພາປະຊາຊົນແຂວງຄໍາມ່ວນ, ໂດຍການເປັນປະທານຂອງ ທ່ານ ສະເຫຼີມສັກ ແກ້ວຈັນທະລາ ຄະນະປະຈໍາສະພາປະຊາຊົນແຂວງ ເລຂາທິການສະພາປະຊາຊົນແຂວງຄໍາມ່ວນ ເຂົ້າຮ່ວມມີ ຮອງຄະນະເລຂາທິການ, ຫົວໜ້າ-ຮອງຫົວໜ້າຂະແໜງ 4 ຂະແໜງ ແລະ ຕະຫຼອດຮອດພະນັກງານວິຊາການຊ່ວຍວຽກທີ່ຂຶ້ນກັບຄະນະເລຂາທິການສະພາປະຊາຊົນແຂວງຄໍາມ່ວນເຂົ້າຮ່ວມທັງໝົດ 22 ທ່ານ, ຍິງ 13 ທ່ານ.

 ທ່ານ ສະເຫຼີກສັກ ແກ້ວຈັນທະລາ ເລຂາທິການສະພາປະຊາຊົນແຂວງຄໍາມ່ວນ ຊຸດທີ II.

ຈຸດປະສົງ: ຂອງກອງປະຊຸມຄັ້ງນີ້ແມ່ນເພື່ອຮັບຟັງການລາຍງານຜົນການເຄື່ອນໄຫວຈັດຕັ້ງປະຕິບັດວຽກງານໃນ 2 ອາທິດທີ່ຜ່ານມາ ຂອງເດືອນ ພຶດສະພາ 2023 ແລະ ທິດທາງແຜນການເຄື່ອນໄຫວວຽກງານໃນອາທິດຕໍ່ໄປຂອງເດືອນ ພຶດສະພາ 2023, ຂອງບັນດາຂະແໜງການທີ່ຂຶ້ນກັບຄະນະເລຂາທິການສະພາປະຊາຊົນແຂວງຄໍາມ່ວນ.

ໃນກອງປະຊຸມ ທ່ານ ສະເຫຼີກສັກ ແກ້ວຈັນທະລາ ປະທານກອງປະຊຸມໄດ້ສະແດງຄວາມຍ້ອງຍໍຊົມເຊີຍໃນການຈັດຕັ້ງປະຕິບັດວຽກງານຜ່ານມາ ແລະ ໄດ້ມີຄໍາເຫັນ-ໃຫ້ທິດຊີ້ນຳເປັນຕົ້ນ: ໃນຄວາມເປັນເອກະພາບຮັບຮອງເອົາບັນດາໜ້າວຽກທີ່ຈະໄດ້ຈັດຕັ້ງປະຕິບັດໃນອາທິດຕໍ່ໄປ, ພ້ອມນັ້ນ ທ່ານ ຍັງໄດ້ເນັ້ນ ບັນດາຂະແໜງການ ຈົ່ງເອົາໃຈໃສ່ສືບຕໍ່ຈັດຕັ້ງປະຕິບັດຕາມພາລະບົດບາດສິດ ແລະ ໜ້າທີວຽກງານວິຊາສະເພາະຕາມການຈັດຕັ້ງມອບໝາຍໃຫ້ສຳເລັດ.

ໂດຍ: ເອື້ອ ມະໂນສິງ