ໃນລະຫວ່າງວັນທີ 18-19 ພຶດສະພາ 2023 ທີ່ເມືອງນາກາຍ ແຂວງຄໍາມ່ວນ ສະພາປະຊາຊົນແຂວງຄໍາມ່ວນ ໄດ້ຈັດກອງປະຊຸມຝຶກອົບຮົມກ່ຽວກັບການເກັບກຳຂໍ້ມູນ, ຄົ້ນຄວ້າກະກຽມ ແລະ ປະກອບຄໍາເຫັນທີ່ປະຊຸມສະພາປະຊາຊົນຂັ້ນແຂວງ, ການບໍລິຫານຫ້ອງການ, ການຈັດກອງປະຊຸມທີ່ມີປະສິດທິພາບ ໃຫ້ແກ່ ສະມາຊິກສະພາປະຊາຊົນແຂວງຄໍາມ່ວນ ຊຸດທີ II ແລະ ເສນາທິການຊ່ວຍວຽກ ຂອງສະພາປະຊາຊົນແຂວງຄໍາມ່ວນ ໂດຍການເປັນປະທານຂອງ ບຸນມີ ພິມມະສອນ ປະທານສະພາປະຊາຊົນແຂວງຄໍາມ່ວນ, ເປັນກຽດເຂົ້າຮ່ວມ ແລະ ເປັນນັກວິທະຍາກອນມີ ທ່ານ ສຸບັນ ສະວະບຸດ ກຳມະການຄະນະປະຈໍາສະພາແຫ່ງຊາດ ປະທານກຳມາທິການວຽກງານສະມາຊິກສະພາແຫ່ງຊາດ, ບັນດາທ່ານຄະນະປະຈໍາສະພາປະຊາຊົນແຂວງ, ສະມາຊິກສະພາປະຊາຊົນແຂວງປະຈໍາເຂດເລືອກຕັ້ງ 10 ຕົວເມືອງ, ນັກວິທະຍາກອນຈາກກະຊວງພາຍໃນ ແລະ ພະນັກງານເສນາທິການຊ່ວຍວຽກ ຂອງສະພາປະຊາຊົນແຂວງຄໍາມ່ວນເຂົ້າຮ່ວມທັງໝົດ 106 ທ່ານ, ຍິງ 43 ທ່ານ.
ທ່ານ ບຸນມີ ພິມມະສອນ ໄດ້ກ່າວເປີດຝືກອົບຮົມຄັ້ງນີ້ວ່າ: ກອງປະຊຸມຝືກອົບຮົມຈະດຳເນີນເປັນເວລາ 2 ວັນ,ຈະໄດ້ພ້ອມກັນໄດ້ຮຽນຮູ້ການນຳສະເໜີກ່ຽວກັບຫົວຂໍ້ບົດຮຽນສຳຄັນ ດັ່ງນີ້: ຄວາມຮູ້ພື້ນຖານ ກ່ຽວກັບການເກັບກຳຂໍ້ມູນທີ່ສຳຄັນຕ່າງໆ, ວິທີການຄົ້ນຄວ້າ ແລະ ການປະກອບຄໍາເຫັນທີ່ດີ ໃນກອງປະຊຸມສະພາປະຊາຊົນຂັ້ນແຂວງ, ບົດຮຽນກ່ຽວກັບການບໍລິຫານຫ້ອງການທີ່ດີ ແລະ ບົດຮຽນກ່ຽວກັບການຈັດກອງປະຊຸມທີ່ມີປະສິດທິພາບ, ຈາກນັ້ນຜູ້ແທນ ແລະ ຜູ້ເຂົ້າຮ່ວມກອງປະຊຸມກໍ່ໄດ້ຈັດແບ່ງຈຸ ເພື່ອຄົ້ນຄວ້າສົນທະນາແລກປ່ຽນ, ປະກອບຄໍາເຫັນ ແລະ ແຕ່ລະຈຸໄດ້ຝຶກຫັດເຮັດບົດປະກອບຄໍາເຫັນກ່ຽວກັບວຽກງານກອງທຶນປະກັນສຸຂະພາບ, ສະພາບອັດຕາແລກປ່ຽນ ແລະ ເງິນເຟີ້, ສ້າງວິຊາຊີບ ແລະ ພັດທະນາສີມືແຮງານ, ວຽກງານຂອງສານ ແລະ ໄອຍະການ ໃຫ້ມີເນື້ອໃນທີ່ໝັກແໜ້ນ, ພ້ອມກັນຍົກສູງຄວາມຮັບຜິດຊອບໂດຍສຸມໃສ່ການຕັ້ງຄໍາຖາມສົນທະນາແລກປ່ຽນໃນແຕ່ລະຫົວຂໍ້ ອັນໄດ້ເຮັດໃຫ້ເຂົ້າສູ່ລວງເລິກ ແລະ ມີໝາກຜົນຫຼາຍຂຶ້ນ.
ຕອນທ້າຍຂອງກອງປະຊຸມຝຶກອົບຮົມໃນຄັ້ງນີ້ ທ່ານ ບຸນມີ ພິມມະສອນ ປະທານສະພາປະຊາຊົນແຂວງຄໍາມ່ວນ ໄດ້ມີຄໍາເຫັນສະຫຼຸບເນື້ອໃນວ່າ ກອງປະຊຸມຝຶກອົບຮົມ ຄັ້ງນີ້ເຖິງວ່າຈະດຳເນີນພຽງແຕ່ 2 ວັນກໍຕາມແຕ່ເຊື້ອໝັ້ນວ່າບັນດາທ່ານຜູ້ແທນ ແລະ ເສນາທິການຂອງສະພາປະຊາຊົນແຂວງຄໍາມ່ວນ ທີ່ເຂົ້າຮ່ວມກອງປະຊຸມຍົກສູງຂີດຄວາມສາມາດຄັ້ງນີ້ຈະນຳເອົາເນື້ອໃນບົດຮຽນ ແລະ ທັກສະຄັ້ງນີ້ນຳໄປຈັດຕັ້ງປະຕິບັດໜ້າທີ່ວຽກງານຕາມພາລະບົດບາດຂອງຕົນ ໃຫ້ມີປະສິດທິພາບ ແລະ ປະສິດທິຜົນສູງຂຶ້ນກ່ວາເກົ່າ.
ໃນໂອກາດດຽວກັນ ທ່ານ ຍັງໄດ້ສະແດງຄວາມຊົມເຊີຍ ແລະ ຂອບໃຈຕໍ່ຜູ້ໃຫ້ທຶນຈັດກອງປະຊຸມຝຶກອົບຮົມໃນເທື່ອນີ້ ເຊິ່ງໄດ້ຮັບການສະໜັບສະໜູນໂດຍ: ຈາກມູນນິທິເອເຊຍ ( The Asia Foundation ).
ໂດຍ: ເອື້ອ ມະໂນສິງ