ຕອນເຊົ້າ, ວັນທີ 8 ພຶດສະພາ 2023 ທີ່ຫ້ອງປະຊຸມສະພາປະຊາຊົນແຂວງ ໄດ້ຈັດກອງປະຊຸມປືກສາຫາລືກ່ຽວກັບການສັງລວມ ບົດລາຍງານຜົນການທາບທາມຄໍາເຫັນໃສ່ຮ່າງກົດໝາຍ ຈໍານວນ 11 ສະບັບ ໂດຍການເປັນປະທານຂອງທ່ານ ທອງສີ ເສົາສຸລິພົມ ປະທານຄະນະປະຈໍາສະພາປະຊາຊົນແຂວງ, ມີປະທານ, ຮອງປະທານຄະນະກໍາມະການສະພາປະຊາຊົນແຂວງ, ເລຂາ, ຮອງເລຂາທິການສະພາປະຊາຊົນແຂວງ, ຄະນະຮັບຜິດຊອບ ແລະ ວິຊາການພາຍໃນສະພາປະຊາຊົນແຂວງເຂົ້າຮ່ວມ.

ຈຸດປະສົງຂອງກອງປະຊຸມຄັ້ງນີ້ ເພື່ອຮັບຟັງການລາຍງານ ແລະ ສ້າງຄວາມເປັນເອກະພາບ ການສັງລວມຜົນຂອງການທາບທາມ ຄໍາເຫັນໃສ່ ຮ່າງກົດໝາຍ ຈໍານວນ 11 ສະບັບ ຈາກບັນດາທ່ານ ສະມາຊິກສະພາແຫ່ງຊາດ ປະຈໍາເຂດເລືອກຕັ້ງ 2 ແຂວງຜົ້ງສາລີ, ສະມາຊິກສະພາປະຊາຊົນແຂວງ, ພະແນກການ, ອົງການລັດ, ບັນດາຫົວໜ່ວຍສະຖາບັນການເງິນ ແລະ ພາກສ່ວນທີ່ກ່ຽວຂ້ອງ ໃນຄັ້ງວັນທີ 28 ເມສາ 2023 ທີ່ຜ່ານມາ. ທັງນີ້ກໍເພື່ອຮັບປະກັນໃຫ້ທາງໂຄງສ້າງ ແລະ ບັນດາເນື້ອໃນມີຄວາມຮັດກຸມ, ສອດຄອງສະພາບການພັດທະນາເສດຖະກິດ-ສັງຄົມໃນປະຈຸບັນ; ເພື່ອເປັນຂໍ້ມູນໃຫ້ແກ່ການກະກຽມກອງປະຊຸມສະໄໝສາມັນ ເທື່ອທີ 5 ຂອງສະພາປະແຫ່ງຊາດ ຊຸດທີ IX.

ທີ່ກອງປະຊຸມໄດ້ຮັບຟັງທ່ານ ຄໍາພັນ ຄຸນສົມບັດ ຮອງປະທານຄະນະກໍາມະການຍຸຕິທໍາ ແລະ ປກຊ-ປກສ ຂຶ້ນຜ່ານຮ່າງບົດລາຍງານຜົນການສັງລວມ ການທາບທາມຄໍາເຫັນໃສ່ຮ່າງກົດໝາຍ ຈໍານວນ 11 ສະບັບ; ຈາກນັ້ນ, ປະທານກອງປະຊຸມໄດ້ເຈາະຈີ້ມຄືນຜົນຂອງການທາບທາມທີ່ເຫັນວ່າຍັງບໍ່ໂລ່ງລຽນ ແລະ ຍັງບໍ່ທັນມີຄວາມເປັນກະພາບ. ພ້ອມກັນນັ້ນ, ຜູ້ແທນກອງປະຊຸມກໍໄດ້ຜັດປ່ຽນປະກອບຄໍາເຫັນຢ່າງກົງໄປກົງໄປມາ.

ຕອນທ້າຍຂອງກອງປະຊຸມ ທ່ານ ທອງສີ ເສົາສຸລິພົມ ໄດ້ສັງລວມຄືນຜົນຂອງກອງປະຊຸມ ເປັນຕົ້ນ: ການປະກອບຄໍາເຫັນເພີ່ມຕື່ມຈາກວິຊາການກ່ຽວຂ້ອງຂອງສະພາປະຊາຊົນແຂວງ; ໂຄງສ້າງ ແລະ ເນື້ອໃນຂອງບັນດາຮ່າງກົດໝາຍ ຈໍານວນ 11 ສະບັບ ແລະ ການຮ່າງບົດລາຍງານການທາບທາມຄໍາເຫັນໃສ່ຮ່າງກົດໝາຍ ຈໍານວນ 11 ສະບັບ ເພື່ອລາຍງານຕໍ່ສະພາແຫ່ງຊາດ; ເຊິ່ງທ່ານໄດ້ເນັ້ນໜັກໃຫ້ບັນດາຄະນະກໍາມະການ ສະພາປະຊາຊົນແຂວງ ເອົາໃຈໃສ່ໃນການປັບປຸງຮ່າງບົດລາຍງານການທາບທາມຄໍາເຫັນໃສ່ຮ່າງກົດໝາຍ ຈໍານວນ 11 ສະບັບ ໃຫ້ສາມາດຍົກໃຫ້ເຫັນເຖິງເຈດຈໍານົງຂອງປະຊາຊົນບັນດາເຜົ່າ ແລະ ພະແນກການ, ອົງການ. ແນໃສ່ໃຫ້ບັນດາເນື້ອໃນຮ່າງກົດໝາຍດັ່ງກ່າວພາວະວິໄສ, ສາມາດປົກປ້ອງສິດຜົນປະໂຫຍດລວມຂອງປະຊາຊົນບັນດາເຜົ່າ ແລະ ສາມາດຮັບຮອງໃນກອງປະຊຸມສະໄໝສາມັນ ເທື່ອທີ 5 ຂອງສະພາປະແຫ່ງຊາດ ຊຸດທີ IX.

ພາບ-ຂ່າວ: ນາງ ສຸກສົມພອນ ແກ້ວແສງພະຈັນ