ວັນທີ 9 ມັງກອນ 2025 ທີ່ສະພາປະຊາຊົນແຂວງຄຳມ່ວນ ໜ່ວຍພັກສະພາປະຊາຊົນແຂວງຄໍາມ່ວນ ໄດ້ດຳເນີນກອງປະຊຸມປະເມີນຜົນການກໍ່ສ້າງໜ່ວຍພັກ ປອດໃສ, ເຂັ້ມແຂງ, ໜັກແໜ້ນ ປະຈຳປິ 2024 ໂດຍການເປັນປະທານຂອງ ສະຫາຍ ຄຳສຸກ ວັນທະວົງສາ ເລຂາໜ່ວຍພັກສະພາປະຊາຊົນແຂວງຄຳມ່ວນ ເປັນກຽດເຂົ້າຮ່ວມຂອງ ສະຫາຍ ບຸນມີ ພິມມະສອນ ຮອງເລຂາພັກແຂວງ ປະທານສະພາປະຊາຊົນແຂວງຄຳມ່ວນ, ສະຫາຍ ນາງ ບັງອອນ ໄຊຍະສິດ ກຳມະການປະຈຳພັກແຂວງ ຮອງປະທານສະພາປະຊາຊົນຂັ້ນແຂວງ, ສະຫາຍ ບົວພັນ ແສງຈັນ ກຳມະການພັກແຂວງ ຮອງປະທານສະພາປະຊາຊົນຂັ້ນແຂວງ, ມີບັນດາທ່ານ ຄະນະຈັດຕັ້ງແຂວງ, ຄະນະກວດກາພັກ-ລັດແຂວງ, ຄະນະໜ່ວຍພັກ, ສະມາຊິກພັກ ເຂົ້າຮ່ວມ.

ການປະເມີນຜົນການສ້າງໜ່ວຍພັກ ປອດໃສ ເຂັ້ມແຂງ ໜັກແໜ້ນ ຂອງໜ່ວຍພັກສະພາປະຊາຊົນແຂວງຄຳມ່ວນ ໃນຄັ້ງນີ້ສະແດງໃຫ້ເຫັນເຖິງການເຄື່ອນໄຫວທີ່ມີທິດທາງແຜນການຖືກຕ້ອງ ແລະ ໄປຕາມແນວທາງນະໂຍບາຍຂອງພັກ, ເພື່ອຍົກສູງຄຸນນະພາບຂອງໜ່ວຍພັກ ແລະ ສະມາຊິກພັກໃຫ້ມີການຫັນປ່ຽນແປງຢ່າງຕັ້ງໜ້າດ້ວຍບາດກ້າວບຸກທະລຸສາມາດເປັນແກນນໍາທີ່ເຂັ້ມແຂງໃນລະບົບການເມືອງ, ທັງເປັນການເພີ່ມທະວີບົດບາດ, ຄວາມສາມາດໃນການນຳພາ-ຊີ້ນຳ ຕໍ່ກັບວຽກງານທີ່ຕົນຮັບຜິດຊອບໃຫ້ມີບາດກ້າວອັນໃໝ່ ແລະ ມີຄວາມເຊື່ອໝັ້ນຕໍ່ການນຳພາຂອງພັກ-ລັດ ໂດຍປະຕິບັດຕາມຫຼັກການລວມສູນປະຊາທິປະໄຕ, ນຳພາເປັນໝູ່ຄະນະ, ມີການຄົ້ນຄວ້າ ປຶກສາຫາລື ແລະ ແບ່ງຄວາມຮັບຜິດຊອບຢ່າງຈະແຈ້ງ, ມີການກວດກາປະເມີນຜົນໃນແຕ່ລະໄລຍະຢ່າງເປັນປົກກະຕິ, ຍົກສູງຄຸນທາດທາງດ້ານການເມືອງ, ຄຸນສົມບັດສິນທຳປະຕິວັດ, ຄວາມຮູ້-ຄວາມສາມາດ, ແບບແຜນວິທີນຳພາ-ວິທີເຮັດວຽກໃຫ້ມີປະສິດທິພາບ ແລະ ປະສິດທິຜົນສູງ. ກອງປະຊຸມຍັງໄດ້ຮັບຟັງການຜ່ານບົດສະຫຼຸບການສ້າງໜ່ວຍພັກປອດໃສ ເຂັ້ມແຂງ ໜັກແໜ້ນ ປະຈຳປີ 2024 ແລະ ທິດທາງແຜນການ ປີ 2025, ການຜ່ານໃບສຳຫຼວດຂອງບຸກຄົນໃນຄະນະໜ່ວຍພັກ ແລະ ບຸກຄົນສະມາຊິກພັກ, ຕີລາຄາຈຸດດີ-ຈຸດອ່ອນ ແລະ ຂໍ້ຄົງຄ້າງໃນໄລຍະຜ່ານມາ ພ້ອມທັງໄດ້ປະກອບຄຳຄິດຄຳເຫັນ ກໍ່ສ້າງຊ່ວຍເຫຼືອເຊິ່ງກັນ ແລະ ກັນຢ່າງເປັນຂະບວນຟົດຟື້ນ ມີລັກສະນະສ້າງສັນ ແລະ ກົງໄປກົງມາ ເຂັ້ມງວດຕາມລະບຽບການຂອງພັກ ເຊິ່ງສະແດງເຖິງຄວາມຮັບຜິດຊອບຕໍ່ໜ້າທີ່ການເມືອງໃນລະດັບສູງ ເປັນເຈົ້າການຮັບຜິດຊອບຮ່ວມກັນ ເພື່ອຜົນປະໂຫຍດລວມຂອງພັກ.

ພ້ອມນີ້, ກອງປະຊຸມກໍ່ຍັງໄດ້ລົງຄະແນນສຽງ ໂດຍການໃຫ້ຄະແນນສະມາຊິກພັກ ຕາມ 5 ເນື້ອໃນມາດຖານເງື່ອນໄຂຂອງພັກ.