ຕອນເຊົ້າຂອງວັນພຸດ, ວັນທີ 25 ພຶດສະພາ 2022 ຢູ່ທີ່ຫ້ອງປະຊຸມສະພາປະຊາຊົນແຂວງ ຄະນະປະຈໍາສະ ພາປະຊາຊົນແຂວງອຸດົມໄຊ ໄດ້ເປີດກອງປະຊຸມປະຈໍາເດືອນ ພຶດສະພາ 2022, ໂດຍການເປັນປະທານຂອງທ່ານ ຄໍາດີ ວົງລ້ອມ ຮອງເລຂາຄະນະບໍລິຫານງານພັກແຂວງ, ປະທານ ສພຂ, ມີບັນດາທ່ານໃນຄະນະປະຈໍາ ສພຂ ເຂົ້າຮ່ວມ.

ຈຸດປະສົງຂອງກອງປະຊຸມແມ່ນປະຕິບັດຕາມກົດໝາຍວ່າດ້ວຍສະພາປະຊາຊົນຂັ້ນແຂວງ, ກ່ຽວກັບກອງປະຊຸມປະຈໍາເດືອນ. ທ່ານ ນາງ ວັນສີ ພວງມະໄລ ກຳມະການປະຈໍາ ສພຂ, ເລຂາທິການ ສພຂ ໄດ້ຜ່ານຮ່າງບົດສະຫລຸບການເຄື່ອນໄຫວວຽກງານປະຈໍາເດືອນ ພຶດສະພາ ແລະ ວາງທິດທາງແຜນການ ປະຈໍາເດືອນ ມິຖຸນາ ປີ 2022 ຂອງຄະນະປະຈໍາ ສພຂ. ຫຼັງຈາກນັ້ນ, ກອງປະຊຸມໄດ້ປະກອບຄໍາຄິດຄໍາເຫັນໃສ່ຮ່າງບົດສະຫລຸບການເຄື່ອນໄຫວວຽກງານປະຈໍາເດືອນດັ່ງກ່າວ ຢ່າງກົງໄປກົງມາ.

ພ້ອມດຽວກັນນັ້ນ ຍັງໄດ້ຄົ້ນຄວ້າ, ພິຈາລະນາຮັບຮອງເອົາແຜນການລົງທຶນຂອງລັດ ປະຈໍາປີ 2022 ຂອງແຂວງອຸດົມໄຊ ຕາມໜັງສືສະເໜຂອງທ່ານເຈົ້າແຂວງເລກທີ 413/ອຊ, ລົງວັນທີ 12 ພຶດສະພາ 2022, ຜ່ານຮ່າງ ແຜນດໍາເນີນກອງປະຊຸມສະໄໝສາມັນເທື່ອທີ 3 ຂອງສະພາປະຊາຊົນແຂວງ ຊຸດທີ II, ຜ່ານຮ່າງ ມະຕິຂອງຄະນະປະຈໍາ ສພຂ ວ່າດ້ວຍການແຕ່ງຕັ້ງຄະນະຊີ້ນໍາ ແລະ ອະນຸກໍາມະການຊ່ວຍວຽກກອງປະຊຸມສະໄໝສາມັນເທື່ອທີ 3 ຂອງສະພາປະຊາຊົນແຂວງ ຊຸດທີ II, ປະກອບຄໍາຄິດເຫັນໃສ່ບັນດາເນື້ອໃນຕ່າງໆ, ພ້ອມທັງຄົ້ນຄວ້າພິຈາລະນາຄໍາຮ້ອງທຸກ ແລະ ຫາງສຽງສັງຄົມອີກຈໍານວນໜຶ່ງ.ພາບ-ຂ່າວ: ແສງພອນ ອິນນະລົງ.