ກອງປະຊຸມປະຈໍາປີ 2023 ຂອງຄະນະສະມາຊິກສະພາແຫ່ງຊາດປະຈໍາເຂດເລືອກຕັ້ງແຂວງຫລວງນໍ້າທາ ໄດ້ໄຂຂຶ້ນຢ່າງເປັນທາງການໃນຕອນເຊົ້າວັນທີ 9 ມັງກອນ 2024 ພາຍໃຕ້ການເປັນປະທານຂອງທ່ານ ຄໍາຟອງ ອິນມານີ ຮອງເລຂາພັກແຂວງ ປະທານສະພາປະຊາຊົນແຂວງ ຫລວງນ້ຳທາ ໃຫ້ກຽດເຂົ້າຮ່ວມຂອງທ່ານ ພົນຈັດຕະວາ ປະລິນຍາເອກ ວັນທອນ ສຸລິສັກ ຮອງຫົວໜ້າກົມໃຫຍ່ສັນຕິບານກະຊວງປ້ອງກັນຄວາມສະຫງົບ ສະມາຊິກສະພາແຫ່ງຊາດປະຈຳເຂດເລືອກຕັ້ງທີ3, ມີຄະນະປະຈຳພັກແຂວງ ຮອງເຈົ້າແຂວງ, ມີສະມາຊິກສະພາແຫ່ງຊາດປະຈຳເຂດເລືອກຕັ້ງ, ອາດີດສະມາຊິກສະພາແຫ່ງຊາດປະຈຳເຂດເລືອກຕັ້ງ, ສະມາຊິກສະພາປະຊາຊົນແຂວງ, ຫົວໜ້າ, ຮອງຫົວໜ້າພະແນກການຂອງແຂວງ ພ້ອມດ້ວຍພະນັກງານວິຊາການທີ່ກ່ຽວຂ້ອງເຂົ້າຮ່ວມ 50 ກວ່າທ່ານ,
ກອງປະຊຸມໄດ້ຮັບຟັງຮ່າງບົດສະຫລຸບການເຄື່ອນໄຫວວຽກງານປະຈຳປີ 2023 ແລະ ທິດທາງແຜນການປະຈຳປີ 2024 ຂອງຄະນະສະມາຊິກສະພາແຫ່ງຊາດ ປະຈຳເຂດເລືອກຕັ້ງທີ3ແຂວງຫລວງນ້ຳທາ ເຊິ່ງໄລຍະ 1 ປີຜ່ານມາ ຄະນະສະມາຊິກສະພາແຫ່ງຊາດ ປະຈໍາເຂດເລືອກຕັ້ງ ໄດ້ເອົາໃຈໃສ່ຈັດຕັ້ງປະຕິບັດຕາມ 3 ພາລະບົດບາດຄື; ດ້ານນິຕິກໍາ, ດ້ານຕົກລົງບັນຫາສໍາຄັນຂອງທ້ອງຖິ່ນ ແລະ ດ້ານຕິດຕາມກວດກາ ເຫັນວ່າມີຜົນສໍາຫລາຍດ້ານ ແລະໄດ້ເຂົ້າຮ່ວມໃນການສ້າງ ແລະ ປັບປຸງກົດໝາຍໄດ້ທັງໝົດ 18 ສະບັບ ໃນນີ້ ກົດໝາຍສ້າງໃໝ່ 6 ສະບັບ, ກົດໝາຍປັບປຸງ 12 ສະບັບ, ໄດ້ຈັດຕັ້ງກອງປະຊຸມປະເມີນກົດໝາຍ ຂົງເຂດສະພາ ແລະ ຕິດຕາມກວດການປະເມີນກົດໝາຍຂົງເຂດຍຸຕິທໍາ ແລະ ປກຊ-ປກສ ລວມທັງໝົດ 11 ສະບັບ; ໄດ້ເຂົ້າຮ່ວມກັບສະພາປະຊາຊົນແຂວງ ພິຈາລະນາຮັບຮອງເອົາຂໍ້ຕົກລົງ ຂອງເຈົ້າແຂວງໂດຍຜ່ານກອງປະຊຸມສະໄໝວິສາມັນເທື່ອທີ 3 ແລະ ກອງປະຊຸມສະໄໝສາມັນເທື່ອທີ 4-5 ຂອງສະພາປະຊາຊົນແຂວງ ຈໍາຈວນ 4 ສະບັບ; ຊຶ່ງຜ່ານການຕິດຕາມກວດກາຊຸກຍູ້ນັ້ນໄລຍະຜ່ານມານັ້ນ ໄດ້ເຮັດໃຫ້ການເຄື່ອນໄຫວຂອງຂະແໜງການໃນທ້ອງຖິ່ນ ມີອັນໄດ້ຮັບການປັບປຸງ, ມີສະຕິເຄົາລົບ ແລະ ປະຕິບັດລະບຽບກົດໝາຍດີຂຶ້ນກ່ວາເກົ່າ ພ້ອມດຽວກັນ ຜູ້ແທນເຂົ້າຮ່ວມກອງປະຊຸມຍັງໄດ້ແລກປ່ຽນປະກອບຄຳຄິດເຫັນໃສ່ຮ່າງບົດສະຫລຸບຢ່າງມີຈຸດສຸມ ເພື່ອເຮັດໃຫ້ວຽກງານຂອງສະມາຊິກສະພາແຫ່ງຊາດປະຈຳເຂດເລືອກຕັ້ງ ໃນຕໍ່ໜ້າໃຫ້ມີຄຸນນະພາບ ແລະ ສາມາດຈັດຕັ້ງປະຕິບັດຕາມແຜນການໃຫ້ໄດ້ຮັບຜົນສຳເລັດຫລາຍຂຶ້ນກວ່າເກົ່າ.
ໂດຍ; ວັນນີ ແຝງບົວວັນ
