(ສພຊ) ເພື່ອປະຕິບັດພາລະບົດບາດ, ສິດ ແລະ ໜ້າທີ່ຕາມທີ່ໄດ້ກຳນົດໄວ້ໃນມະຕິ ຂອງຄະນະປະຈຳສະພາແຫ່ງຊາດ ແລະ ການເຄື່ອນໄຫວຂອງກຳມາທິການວຽກງານສະມາຊິກສະພາແຫ່ງຊາດ; ເພື່ອສະຫຼຸບຕີລາຄາການຈັດຕັ້ງປະຕິ ບັດແຜນການເຄື່ອນໄຫວວຽກງານ ປະຈຳປີ 2022 ແລະ ວາງທິດທາງແຜນການເຄື່ອນໄຫວວຽກງານ ປະຈຳປີ 2023 ຂອງກໍາມາທິການວຽກງານສະມາຊິກສະພາແຫ່ງຊາດ; ເພື່ອເຜີຍແຜ່ນິຕິກຳທີ່ສຳຄັນຈຳນວນໜຶ່ງຂອງຄະນະປະຈຳສະພາແຫ່ງຊາດ, ປຶກສາຫາລື ແລະ ຖອດຖອນບົດຮຽນວຽກງານອື່ນທີ່ຢູ່ໃນຄວາມຮັບຜິດຊອບຂອງກຳມາທິການ. ລະຫວ່າງວັນທີ 16-17 ມັງກອນ 2023 ທີ່ສະພາແຫ່ງຊາດ ກໍາມາທິການວຽກງານສະມາຊິກສະພາແຫ່ງຊາດ ໄດ້ເປີດກອງປະຊຸມຄົບຄະນະ ປະຈໍາປີ 2022 ຂອງຕົນຂຶ້ນ ເຊິ່ງໄດ້ດໍາເນີນເປັນເວລາໜຶ່ງວັນເຄິ່ງ ດ້ວຍບັນຍາກາດຟົດຟື້ນ ແລະ ມີຜົນສໍາເລັດຢ່າງຈົບງາມ ໂດຍການເປັນປະທານຂອງທ່ານ ສຸບັນ ສະວະບຸດ ປະທານກໍາມາທິການວຽກງານສະມາຊິກສະພາແຫ່ງຊາດ, ເຂົ້າຮ່ວມມີທ່ານ ຄໍາໃບ ດໍາລັດ ຮອງປະທານສະພາແຫ່ງຊາດ, ຜູ້ຊີ້ນໍາວຽກງານ ກໍາມາທິການວຽກງານສະມາຊິກສະພາແຫ່ງຊາດ, ມີທ່ານເລຂາທິການສະພາແຫ່ງຊາດ, ບັນດາທ່ານຮອງປະທານກຳມາທິການ, ກໍາມະການຂອງກໍາມາທິການວຽກງານສະມາຊິກສະພາແຫ່ງຊາດ ພ້ອມດ້ວຍພາກສ່ວນທີ່ກ່ຽວຂ້ອງ ແລະ ແຂກຖືກເຊີນ.
ໃນພິທີ, ທ່ານ ຄໍາໃບ ດໍາລັດ ໄດ້ມີຄຳເຫັນເພື່ອຮັບປະກັນການເຄື່ອນໄຫວວຽກງານຂອງກຳມາທິການ ແລະ ສະ ເໜີໃຫ້ເພີ່ມທະວີຄວາມເອົາໃຈໃສ່ໃນບາງວຽກຕົ້ນຕໍ ດັ່ງນີ້: ວຽກງານກົງຈັກການຈັດຕັ້ງ: ເອົາໃຈໃສ່ຄົ້ນຄວ້າໂຄງປະ ກອບກົງຈັກ ແລະ ບຸກຄະລາກອນຂອງສະພາແຫ່ງຊາດ ແລະ ສະພາປະຊາຊົນຂັ້ນແຂວງ ໂດຍປຽບທຽບກັບການຈັດຕັ້ງປະຕິບັດວຽກງານຕົວຈິງ ເພື່ອປັບປຸງໃນຕໍ່ໜ້າ; ການຄຸ້ມຄອງວຽກງານສະມາຊິກສະພາ: ເອົາໃຈໃສ່ຕິດຕາມ, ກວດກາຕໍ່ການເຄື່ອນໄຫວຂອງສະມາຊິກສະພາແຫ່ງຊາດ, ປະສານສົມທົບກັບຄະນະປະຈຳສະພາປະຊາຊົນຂັ້ນແຂວງ ຄຸ້ມຄອງການ ເຄື່ອນໄຫວຂອງສະມາຊິກສະພາປະຊາຊົນຂັ້ນແຂວງ ໃຫ້ສະມາຊິກສະພາແຫ່ງຊາດ ແລະ ສະມາຊິກສະພາປະຊາຊົນຂັ້ນແຂວງ ມີຄວາມໜັກແໜ້ນທາງດ້ານຄຸນທາດການເມືອງ, ບໍ່ສວຍໃຊ້ເວທີສະພາ ມີຄຳເຫັນທີ່ຂັດກັບແນວທາງ ເຮັດໃຫ້ຄົນບໍ່ດີນຳໄປເປັນບ່ອນອີງໂຈມຕີ, ແບ່ງແຍກຄວາມສາມັກຄີພາຍໃນຂອງປະຊາຊົນບັນດາເຜົ່າ. ພ້ອມນັ້ນ, ກໍເອົາໃຈໃສ່ເກັບກຳຊີວະປະຫວັດ, ຂໍ້ມູນຕ່າງໆ, ຜົນງານການປະຕິບັດສິດ ແລະ ໜ້າທີ່ຂອງສະມາຊິກສະພາແຫ່ງຊາດ, ສືບຕໍ່ຄົ້ນຄວ້ານະໂຍບາຍຕ່າງໆ ຕໍ່ສະມາຊິກສະພາແຫ່ງຊາດ ແລະ ສະມາຊິກສະພາປະຊາຊົນຂັ້ນແຂວງ ບົນພື້ນຖານລະບຽບກົດໝາຍ, ຫຼັກການລວມ ແລະ ສອດຄ່ອງຕາມຄວາມເປັນຈິງ; ວຽກງານການປະເມີນ: ເອົາໃຈໃສ່ກະກຽມນິຕິກຳ ແລະ ເອກະສານຂໍ້ມູນຕ່າງໆ ໂດຍສະເພາະນິຕິກຳທີ່ພົວພັນກັບສິດ ແລະ ໜ້າທີ່ຂອງບຸກຄະລາກອນດັ່ງກ່າວ, ການເກັບກຳຜົນງານການ ເຄື່ອນໄຫວໃນແຕ່ລະໄລຍະໃຫ້ຈະແຈ້ງ, ຢູ່ທ້ອງຖິ່ນ ກໍຕ້ອງເບິ່ງການເຄື່ອນໄຫວຂອງກົງຈັກກ່ຽວຂ້ອງ. ພ້ອມນີ້ ກໍເອົາໃຈ ໃສ່ວຽກງານການປະເມີນຕໍ່ຜູ້ມາລາຍງານ, ຊີ້ແຈງ ແລະ ຕອບຄຳຊັກຖາມ ໃນກອງປະຊຸມຂອງສະພາແຫ່ງຊາດ ຊຸດທີ IX ໃຫ້ມີຄວາມຖືກຕ້ອງ;
ວຽກງານເລືອກຕັ້ງ: ເອົາໃຈໃສ່ຄົ້ນຄວ້າໂຄງປະກອບ ແລະ ບຸກຄະລາກອນຂອງສະພາຊຸດປັດຈຸບັນ ເພື່ອໃຫ້ເຫັນບັນຫາຄວນຈະປັບປຸງໃນຊຸດຕໍ່ໄປ ແລະ ສ້າງປື້ມຄູ່ມືຮັບໃຊ້ການເລືອກຕັ້ງສະມາຊິກສະພາແຫ່ງຊາດ ແລະ ສະມາຊິກສະພາປະຊາຊົນຂັ້ນແຂວງ ເພື່ອເປັນບ່ອນອີງໃຫ້ແກ່ການກະກຽມ ແລະ ດໍາເນີນການເລືອກຕັ້ງ ໃຫ້ມີປະສິດທິຜົນ ແລະ ຄົ້ນຄວ້າແຕ່ຫົວທີໂຄງປະກອບບຸກຄະລາກອນ ຂອງຜູ້ຈະອອກສະໝັກຮັບເລືອກຕັ້ງເປັນສະມາຊິກສະພາແຫ່ງຊາດ ຊຸດທີ X ແລະ ສະມາຊິກສະພາປະຊາຊົນຂັ້ນແຂວງ ຊຸດທີ III, ຄົ້ນຄວ້າ, ປັບປຸງກົດໝາຍວ່າດ້ວຍສະພາປະຊາຊົນຂັ້ນແຂວງ ແລະ ກົດໝາຍວ່າດ້ວຍການເລືອກຕັ້ງສະມາຊິກສະພາແຫ່ງຊາດ ແລະ ສະພາປະຊາຊົນຂັ້ນແຂວງ; ສືບຕໍ່ເອົາ ໃຈໃສ່ເພີ່ມທະວີວຽກງານການສ້າງຄວາມເຂັ້ມແຂງ ເປັນຕົ້ນ: ການເຝິກອົບຮົມໃຫ້ແກ່ສະມາຊິກສະພາ ແລະ ເສນາທິການຂອງກຳມາທິການ ເພື່ອຍົກລະດັບຄວາມຮູ້ຄວາມສາມາດໃຫ້ມີຄວາມເລິກເຊິ່ງ ເພື່ອໃຫ້ເຂັ້ມແຂງຂຶ້ນເປັນກ້າວໆ; ສືບຕໍ່ຄົ້ນຄວ້າສ້າງ ແລະ ປັບປຸງນິຕິກຳ ຕາມຄວາມຮັບຜິດຊອບຂອງກຳມາທິການ ປະສານສົມທົບໃນການເຄື່ອນໄຫວວຽກງານການຕ່າງປະເທດ ເພື່ອປະກອບສ່ວນໃນການປະຕິບັດແນວທາງການຕ່າງປະເທດຂອງພັກ ກໍຄືສະພາແຫ່ງຊາດ ແລະ ແລກປ່ຽນບົດຮຽນ ເຊິ່ງກັນ ແລະ ກັນ ກັບບັນດາລັດຖະສະພາໃນລະດັບພາກພື້ນ ແລະ ສາກົນ ໂດຍສະເພາະກັບ ສສ.ຫວຽດນາມ ກ່ຽວກັບວຽກງານບຸກຄະລາກອນ; ສະເໜີໃຫ້ບັນດາທ່ານທີ່ເປັນກໍາມະການຂອງກຳມາທິການວຽກງານສະມາຊິກສະພາແຫ່ງຊາດ ທັງສູນກາງ ແລະ ທ້ອງຖິ່ນ ເອົາໃຈໃສ່ລົງເລິກບັນດາວຽກງານໃນຂົງເຂດຄວາມຮັບຜິດ ຊອບຂອງຕົນ ແລະ ຂອງກຳມາທິການວຽກງານສະມາຊິກສະພາແຫ່ງຊາດ ເພື່ອກຳໄດ້ບັນຫາ, ພ້ອມນັ້ນ ກໍໃຫ້ເອົາໃຈໃສ່ໃນລະບົບສ່ອງແສງລາຍງານໃຫ້ກຳມາທິການແຕ່ລະເດືອນຕາມວຽກງານຕົວຈິງ; ເສນາທິການ ເປັນເຈົ້າການ ແລະ ມີຄວາມຮັບຜິດຊອບສູງໃນການຊ່ວຍກຳມາທິການ ຄົ້ນຄວ້າ, ວາງແຜນ, ສະຫຼຸບຕີລາຄາດ້ານຕ່າງໆ.
