(ສພຊ) ລະຫວ່າງວັນທີ 5-6 ຕຸລາ 2023 ທີ່ຫ້ອງປະຊຸມຂອງເຮືອນພັກກະຊວງແຮງງານ, ກໍາມາທິການວັດທະນະທໍາ-ສັງຄົມ ສະພາແຫ່ງຊາດ ໄດ້ຈັດກອງປະຊຸມຄົບຄະນະ ປະຈຳປີ 2023 ໂດຍການເປັນປະທານຂອງທ່ານ ນາງ ທຸມມາລີ ວົງພະຈັນ ຄະນະປະຈຳສະພາແຫ່ງຊາດ, ປະທານກຳມາທິການວັດທະນະທຳ-ສັງຄົມ; ເຂົ້າຮ່ວມມີທ່ານ ຄຳໃບ ດຳລັດ ຮອງປະທານສະພາແຫ່ງຊາດ, ຜູ້ຊີ້ນຳກຳມາທິການວັດທະນະທຳ-ສັງຄົມ; ມີບັນດາທ່ານລັດຖະມົນຕີ, ຮອງລັດຖະມົນຕີ ຈາກກະຊວງສຶກສາທິການ ແລະ ກິລາ, ກະຊວງສາທາລະນະສຸກ, ກະຊວງແຮງງານ ແລະ ສະຫວັດດີການສັງຄົມ, ກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ, ປະທານອົງການກາແດງລາວ, ທ່ານຮອງປະທານກຳມາທິການພາຍໃນສະພາແຫ່ງຊາດ, ບັນດາທ່ານສະມາຊິກສະພາແຫ່ງຊາດ ທີ່ເປັນກໍາມະການຂອງກຳມາທິການວັດທະນະທຳ-ສັງຄົມ ຈາກ 18 ເຂດເລືອກຕັ້ງ, ວິທະຍາກອນຈາກອົງການ UNICEF ພ້ອມດ້ວຍພາກສ່ວນທີ່ກ່ຽວຂ້ອງ ທັງໝົດ 50 ທ່ານ ຍິງ 18 ທ່ານ.

ກອງປະຊຸມ, ໄດ້ສະຫຼຸບຕີລາຄາການເຄື່ອນໄຫວວຽກງານກາງສະໄໝ ແລະ ທິດທາງແຜນການເຄື່ອນໄຫວວຽກງານທ້າຍສະໄໝ ຂອງກຳມາທິການວັດທະນະທຳ-ສັງຄົມ (2021-2025) ແລະ ບົດສະຫຼຸບຕີລາຄາການເຄື່ອນໄຫວວຽກງານປະຈຳປີ 2023 ແລະ ທິດທາງແຜນການເຄື່ອນໄຫວ ປີ 2024 ຂອງກຳມາທິການວັດທະນະທຳ-ສັງຄົມ; ຈາກນັ້ນ, ບັນດາທ່ານລັດຖະມົນຕີ, ຮອງລັດຖະມົນຕີ ກໍໄດ້ຜັດປ່ຽນກັນລາຍງານໂດຍສັງເຂບກ່ຽວກັບການຈັດຕັ້ງປະຕິບັດບັນດາຄາດໝາຍໃນຂົງເຂດວັດທະນະທໍາ-ສັງຄົມໃນໄລຍະຜ່ານມາ ເຊິ່ງລວມມີ 45 ຄາດໝາຍ ແລະ ກໍານົດທິດທາງແຜນການໃນທ້າຍສະໄໝ ກໍຄືວຽກງານຈຸດສຸມໃນປີ 2024 ຂອງຂະແໜງການຕົນ ແລະ ບັນດາທ່ານສະມາຊິກສະພາແຫ່ງຊາດ ນັບແຕ່ເຂດເລືອກຕັ້ງທີ 1-18 ໄດ້ປະກອບຄຳເຫັນຕໍ່ບົດສະຫຼຸບຕີລາຄາການເຄື່ອນໄຫວວຽກງານກາງສະໄໝ ແລະ ທິດທາງແຜນການເຄື່ອນໄຫວວຽກງານທ້າຍສະໄໝ ຂອງກຳມາທິການວັດທະນະທຳ-ສັງຄົມ (2021-2025), ບົດສະຫຼຸບຕີລາຄາການເຄື່ອນໄຫວວຽກງານປະຈຳປີ 2023 ແລະ ທິດທາງແຜນການເຄື່ອນໄຫວ ປີ 2024 ຂອງກຳມາທິການວັດທະນະທຳ-ສັງຄົມ ກໍຄືແລກປ່ຽນຄໍາເຫັນຕໍ່ການຈັດຕັ້ງປະຕິບັດບັນດາຄາດໝາຍ ແລະ ແຜນວຽກຈຸດສຸມໃນຕໍ່ໜ້າຂອງຂະແໜງການສຶກສາທິການ ແລະ ກິລາ, ສາທາລະນະສຸກ, ແຮງງານ ແລະ ສະຫວັດດີການສັງຄົມ, ຖະແຫຼງຂ່າວ, ວັດທະນະທຳ ແລະ ທ່ອງທ່ຽວ, ອົງການກາແດງລາວ ຢ່າງມີບັນຍາກາດຟົດຟື້ນ, ມີເຫດມີຜົນ, ກົງໄປກົງມາ ເພື່ອຮ່ວມກັນຊອກຫາວິທີແກ້ໄຂຂໍ້ຄົງຄ້າງ ແລະ ສິ່ງທ້າທາຍຕ່າງໆ ເພື່ອເຮັດໃຫ້ແຜນການທີ່ວາງໄວ້ບັນລຸຜົນຕາມລະດັບຄາດໝາຍ. ກອງປະຊຸມຄັ້ງນີ້ ຍັງໄດ້ປະສານສົມທົບການສ້າງຄວາມເຂັ້ມແຂງໃຫ້ສະມາຊິກສະພາແຫ່ງຊາດ ທີ່ເປັນກໍາມະການຂອງກໍາມາທິການ ໄດ້ຮຽນຮູ້ເພີ່ມເຕີມກ່ຽວກັບບົດຮຽນ ປະສົບການຂອງສາກົນ ໃນການລົງທຶນເພື່ອການສຶກສາທີ່ມີຄຸນນະພາບ, ສະພາບໂພຊະນາການ ຢູ່ ສປປລາວ ແລະ ຄວາມຈໍາເປັນໃນການແກ້ໄຂບັນຫາດັ່ງກ່າວ, ບົດຮຽນສາກົນກ່ຽວກັບການສະໜອງເງິນອຸດໜູນ ເພື່ອຫຼຸດຜ່ອນຜົນກະທົບຈາກເຫດການທີ່ເກີດຂຶ້ນກະທັນຫັນໃສ່ຄົວເຮືອນ ຈາກຊ່ຽວຊານປົກຄອງສັງຄົມຂອງອົງການ UNICEF ປະຈຳພາກພື້ນອາຊີ-ປາຊີຟິກ ແລະ ປະຈໍາລາວ.

ກອງປະຊຸມຄັ້ງນີ້ ຍັງໄດ້ຮັບຟັງການໂອ້ລົມຈາກທ່ານ ຄຳໃບ ດຳລັດ ເຊິ່ງທ່ານໄດ້ສະແດງຄວາມຍ້ອງຍໍຊົມເຊີຍ ແລະ ຕີລາຄາສູງ ຕໍ່ກໍາມາທິການວັດທະນະທໍາ-ສັງຄົມ ກໍຄືບັນດາທ່ານສະມາຊິກສະພາແຫ່ງຊາດ ທີ່ເປັນກໍາມະການຂອງກໍາມາທິການ ທີ່ໄດ້ເອົາໃຈໃສ່, ມີຄວາມພະຍາຍາມສູງ ໃນການນໍາພາ-ຊີ້ນຳການເຄື່ອນໄຫວປະຕິບັດວຽກງານໃນໄລຍະເຄິ່ງສະໄໝທີ່ຜ່ານມາ (2021-2023) ກໍຄືການເຄື່ອນໄຫວເກືອບ 1 ປີຜ່ານມາ ເຊິ່ງສາມາດປະຕິບັດໜ້າທີ່ການເມືອງຂອງຕົນສຳເລັດເປັນຢ່າງດີ; ພ້ອມນັ້ນ, ທ່ານຍັງໄດ້ເນັ້ນໃຫ້ກຳມາທິການວັດທະນະທໍາ-ສັງຄົມ ເອົາໃຈໃສ່ 8 ຂໍ້ ດັ່ງນີ້:

1. ຍົົກສູງການປະຕິບັດສິດ ແລະ ໜ້າທີ່ ຂອງສະມາຊິກສະພາແຫ່ງຊາດ ໂດຍສະເພາະການຈັດຕັ້ງປະຕິບັດແນວທາງນະໂຍບາຍ, ລັດຖະທໍາມະນູນ, ກົດໝາຍ, ມະຕິຂອງກອງປະຊຸມສະພາແຫ່ງຊາດ, ມະຕິຂອງຄະນະປະຈໍາສະພາແຫ່ງຊາດ, ແຜນພັດທະນາເສດຖະກິດ-ສັງຄົມ, ແຜນງົບປະມານແຫ່ງລັດ ໃຫ້ມີປະສິດທິພາບ ແລະ ປະສິດທິຜົນ; ເອົາໃຈໃສ່ໃນການເຂົ້າຮ່ວມກອງປະຊຸມສະພາແຫ່ງຊາດ, ກອງປະຊຸມຄົບຄະນະກໍາມາທິການຢ່າງເປັນປົກກະຕິ; ໃກ້ສິດຕິດແທດ, ພົບປະ-ຮັບຕ້ອນປະຊາຊົນ, ເກັບກໍາ ແລະ ນໍາເອົາຄໍາຄິດຄໍາເຫັນ ແລະ ຄໍາສະເໜີຂອງປະຊາຊົນ ເພື່ອສະເໜີຕໍ່ສະພາແຫ່ງຊາດ, ສະພາປະຊາຊົນຂັ້ນແຂວງ ແລະ ພາກສ່ວນອື່ນທີ່ກ່ຽວຂ້ອງ ພິຈາລະນາ, ແກ້ໄຂ ທັງຕິດຕາມຜົນຂອງການແກ້ໄຂ, ລວມທັງມີການສະຫຼຸບລາຍງານການເຄື່ອນໄຫວວຽກງານໃນເຂດເລືອກຕັ້ງຂອງຕົນ ໃຫ້ກຳມາທິການວັດທະນະທໍາ-ສັງຄົມ ຢ່າງເປັນປົກກະຕິ, ຕໍ່ເນື່ອງ ແລະ ທັນກຳນົດເວລາ;

2. ການປະຕິບັດບົດບາດດ້ານນິຕິບັນຍັດ: ໃຫ້ເອົາໃຈໃສ່ເຂົ້າຮ່ວມ, ປະສານສົມທົບພາກສ່ວນກ່ຽວຂ້ອງໃນການສ້າງ ແລະ ປັບປຸງກົດໝາຍ ໃຫ້ສໍາເລັດຕາມແຜນການ, ຮັບປະກັນເນື້ອໃນຄົບຖ້ວນ, ຈະແຈ້ງ ແລະ ຮັດກຸມ, ສອດຄ່ອງກັບສະພາບຄວາມເປັນຈິງ ແລະ ສາມາດເຊື່ອມໂຍງກັບພາກພື້ນ ແລະ ສາກົນ (ໂດຍສະເພາະກອງປະຊຸມສະໄໝສາມັນ ເທື່ອທີ 6 ຂອງສະພາແຫ່ງຊາດ ຊຸດທີ IX ທີ່ຈະມາເຖິງນີ້ ມີກົດໝາຍ 2 ສະບັບ ໃນຂົງເຂດວັດທະນະທໍາ-ສັງຄົມ);

3. ການປະຕິບັດພາລະບົດບາດ ດ້ານການຕົກລົງບັນຫາສໍາຄັນພື້ນຖານຂອງປະເທດຊາດ: ຕ້ອງເອົາໃຈໃສ່ ຄົ້ນຄວ້າ, ວິເຄາະ, ວິໄຈ ແລະ ຕີລາຄາ, ປະເມີນຜົນການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມແຫ່ງຊາດ ແລະ ແຜນງົບປະມານແຫ່ງລັດ ຂົງເຂດວັດທະນະທຳ-ສັງຄົມຢ່າງຖືກຕ້ອງ ແລະ ຈະແຈ້ງ, ອີງໃສ່ແນວທາງນະໂຍບາຍຂອງພັກ ແລະ ກົດໝາຍຂອງລັດ, ຍຸດທະສາດຂອງການພັດທະນາປະເທດ ໃນແຕ່ລະໄລຍະ, ສອດຄ່ອງກັບລະບຽບຫຼັກການຂອງພາກພື້ນ ແລະ ສາກົນ;

4. ການປະຕິບັດບົດບາດດ້ານການຕິດຕາມກວດກາ: ໃຫ້ເພີ່ມທະວີຄວາມເອົາໃຈໃສ່ຕິດຕາມກວດກາວຽກງານຂົງເຂດວັດທະນະທໍາ-ສັງຄົມໃຫ້ຫຼາຍຂຶ້ນ ໂດຍສະເພາະຕິດຕາມກວດກາຕາມມະຕິກອງປະຊຸມສະພາແຫ່ງຊາດ ທີ່ໄດ້ຮັບຮອງໄປແລ້ວນັ້ນ, ເປັນຕົ້ນ: ຂະແໜງແຮງງານ-ສະຫວັດດີການສັງຄົມ ເຫັນວ່າມີຜົນກະທົບດ້ານສັງຄົມບໍ່ໜ້ອຍ: ການເຄື່ອນຍ້າຍແຮງງານອອກນອກປະເທດເພີ່ມສູງຂຶ້ນ, ບັນຫາການຈັດຫາງານ; ການປະກັນສຸຂະພາບ-ປະກັນສັງຄົມ ແລະ ການປະຕິບັດນະໂຍບາຍຕໍ່ຜູ້ມີຄຸນງາມຄວາມດີຕໍ່ປະເທດຊາດ; ສະພາບການຮຽນ-ການສອນ ເຫັນວ່າຫຼຸດລົງ, ພ້ອມທັງຕິດຕາມກວດກາບັນຫາອື່ນທີ່ພົ້ນເດັ່ນ ແລະ ເຄັງຮ້ອນ ຮັບປະກັນຜົນປະໂຫຍດລວມຂອງຊາດ ແລະ ປົກປ້ອງສິດຜົນປະໂຫຍດຂອງປະຊາຊົນ;

5. ຮີບຮ້ອນປັບປຸງກົນໄກການພົວພັນປະສານງານ ລະຫວ່າງ ກຳມາທິການ ກັບ ບັນດາກະຊວງ-ອົງການທີ່ກ່ຽວຂ້ອງ, ລະຫວ່າງກຳມາທິການ ກັບ ກຳມະການຂອງກໍາມາທິການຢູ່ບັນດາເຂດເລືອກຕັ້ງຕ່າງໆ ໂດຍຜ່ານການປະຊຸມຮ່ວມ, ສະຫຼຸບ-ຖອດຖອນບົດຮຽນການເຄື່ອນໄຫວວຽກງານ ຢ່າງເປັນປົກກະຕິ ຮັບປະກັນໃຫ້ມີຄວາມກົມກຽວ, ວ່ອງໄວ ແລະ ມີຄຸນນະພາບຂຶ້ນກວ່າເກົ່າ.

6. ກໍາມາທິການ ສືບຕໍ່ເອົາໃຈໃສ່ເພີ່ມທະວີວຽກງານການສ້າງຄວາມເຂັ້ມແຂງ ເປັນຕົ້ນແມ່ນການເຝິກອົບຮົມໃຫ້ ສະມາຊິກສະພາແຫ່ງຊາດ ທີ່ເປັນກໍາມະການຂອງກໍາມາທິການ ຕະຫຼອດຮອດພະນັກງານທີ່ເປັນເສນາທິການຂົງເຂດວັດທະນະທໍາ-ສັງຄົມ ເພື່ອຍົກລະດັບຄວາມຮູ້-ຄວາມສາມາດ ໃຫ້ມີຄວາມເລິກເຊິ່ງ, ເຂັ້ມແຂງ ຂຶ້ນເປັນກ້າວໆ;

7. ເອົາໃຈໃສ່ປະສານສົມທົບໃນການເຄື່ອນໄຫວວຽກງານການຕ່າງປະເທດ, ປະກອບສ່ວນໃນການປະຕິບັດແນວທາງການຕ່າງປະເທດຂອງພັກ ກໍຄືຂອງສະພາແຫ່ງຊາດ ເພື່ອແລກປ່ຽນບົດຮຽນ ເຊິ່ງກັນ ແລະ ກັນ ກັບບັນດາລັດຖະສະພາໃນລະດັບພາກພື້ນ ແລະ ສາກົນ ເຊິ່ງໃນປີ 2024 ນີ້ ລາວເຮົາຈະເປັນເຈົ້າພາບຈັດກອງປະຊຸມໄອປາ ຄັ້ງທີ 45, ໃນນັ້ນ ຂົງເຂດວັດທະນະທຳ-ສັງຄົມ ແມ່ນຈະມີກອງປະຊຸມໄອປາ ແລະ ກອງປະຊຸມກ່ຽວກັບບັນຫາສັງຄົມ. ສະນັ້ນ, ຈຶ່ງຮຽກຮ້ອງບັນດາທ່ານ ຈົ່ງພ້ອມກັນຄົ້ນຄວ້າ, ກະກຽມເນື້ອໃນດ້ານຕ່າງໆ ຢ່າງຮອບດ້ານ ຮັບປະກັນດ້ານເນື້ອໃນໃຫ້ຄົບຖ້ວນ, ມີປະສິດທິພາບ ແລະ ປະສິດທິຜົນ;

8. ໃນເງື່ອນໄຂທີ່ພວກເຮົາມີຄວາມຫຍຸ້ງຍາກດ້ານເສດຖະກິດ-ການເງິນ: ເງິນເຟີ້-ຄ່າຄອງຊີບແພງ ກະທົບຕໍ່ຊີວິດການເປັນຢູ່ຂອງປະຊາຊົນບັນດາເຜົ່າ, ຕໍ່ພະນັກງານ-ລັດຖະກອນ. ສະນັ້ນ, ສະເໜີໃຫ້ສະມາຊິກສະພາແຫ່ງຊາດ ທີ່ເປັນກໍາມະການຂອງກໍາມາທິການວັດທະນະທໍາ-ສັງຄົມ ເປັນຈົ້າການປຸກລະດົມການເມືອງ-ແນວຄິດ ຂອງພະນັກງານ-ລັດຖະກອນ ໃຫ້ມີຄວາມອຸ່ນອຽນທຸ່ນທ່ຽງ, ອົດທົນຜ່ານຜ່າຄວາມຫຍຸ້ງຍາກ, ເປັນເຈົ້າຕົນເອງ ແລະ ສ້າງຄວາມເຂັ້ມແຂງດ້ວຍຕົນເອງ.

(ພາບ ແລະ ຂ່າວ: ນາງ ສຸພາວັນ ຫອມສະນິດ)