ໃນວັນທີ 19 ທັນວາ 2023 ຢູ່ທີ່ຫ້ອງປະຊຸມສະພາປະຊາຊົນແຂວງ ໄດ້ເປີດກອງປະຊຸມຄົບຄະນະຂອງຄະນະກໍາມະການເສດຖະກິດ, ແຜນການ ແລະ ການເງິນ ປະຈໍາປີ 2023 ແລະ ທິດທາງແຜນການປີ 2024 ໂດຍການເປັນປະທານຮ່ວມຂອງທ່ານ ປອ ໄມສີ ວຽງວິໄລ ປະທານຄະນະກໍາມະການເສດຖະກິດ, ແຜນການ ແລະ ການເງິນ ແລະ ທ່ານ ວົງເພັດ ມັງທະພອນ ຮອງປະທານຄະນະກໍາມະການເສດຖະກິດ, ແຜນການ ແລະ ການເງິນ, ຕ່າງໜ້າຈາກຄະນະກໍາມະການຍຸຕິທໍາ ແລະ ປກຊ-ປກສ ແລະ ຄະນະກໍາມະການວັດທະນະທໍາ-ສັງຄົມ ແລະ ບັນດາເຜົ່າ, ມີບັນດາທ່ານສະມາຊິກສະພາປະຊາຊົນແຂວງ ປະຈໍາເຂດເລືອກຕັ້ງ 7 ເມືອງ, ຄະນະເລຂາທິການ, ຕ່າງໜ້າຈາກທະນາແຫ່ງ ສປປລາວ ປະຈໍາພາກເໜືອສາຂາແຂວງຊຽງຂວາງ, ບັນດາທ່ານຫົວໜ້າ-ຮອງຫົວໜ້າພະແນກການ ທີ່ຢູ່ໃນຂົງເຂດເສດຖະກິດ, ຫົວໜ້າ-ຮອງຫົວໜ້າຂະແໜງ ແລະ ພະນັກງານສະພາປະຊາຊົນແຂວງ ເຂົ້າຮ່ວມ.

ເພື່ອເປັນການສະຫຼຸບ ແລະ ທົບທວນການເຄື່ອນໄຫວວຽກງານຂອງຄະນະກໍາມະການເສດຖະກິດ, ແຜນການ ແລະ ການເງິນໃນໄລຍນະ 1 ປີ ຜ່ານມາ ແລະ ພ້ອມທັງເປັນການກະກຽມເນື້ອໃນກອງປະຊຸມສະໄໝສາມັນ ເທື່ອທີ 6 ຂອງສະພາປະຊາຊົນແຂວງ ຊຸດທີ II. ໃນວາລະດໍາເນີນກອງປະຊຸມທ່ານ ວົງເພັດ ມັງທະພອນ ຮອງປະທານຄະນະກໍາມະການເສດຖະກິດ, ແຜນການ ແລະ ການເງິນ ໄດ້ຜ່ານຮ່າງບົດສະຫຼຸບການເຄື່ອນໄຫວວຽກງານ ປະຈໍາປີ 2023  ແລະ ທິດທາງແຜນການປີ 2024 ຂອງຄະນະກໍາມະການເສດຖະກິດ, ແຜນການ ແລະ ການເງິນ ເຊິ່ງໄລຍະຜ່ານມາໄດ້ເອົາໃຈໃສ່​ຊີ້​ນຳ-ນຳ​ພາ ດ້ານ​ການ​ເມືອງ​ແນວ​ຄິດ ໃຫ້​ແກ່ພະ​ນັກ​ງານ​ລັດ​ຖະ​ກອນ​ຢ່າງ​ໃກ້​ສິດ, ປະຕິບັດໜ້າທີ່ວຽກງານຂອງຕົນຕາມ 3 ພາລະບົດ, ສິດ ແລະ ໜ້າທີ່ ເປັນຕົ້ນ: ໄດ້ເຂົ້າຮ່ວມທາບທາມ ແລະ ປະເມີນບັນດາຮ່າງກົດໝາຍທີ່ກ່ຽວຂ້ອງ, ໄດ້ຄົ້ນຄ້ວາ ແລະ ພີຈາລະນາຮັບຮອງເອົາບັນ​ຫາ​ສຳ​ຄັນ​ຕ່າງໆ​ໃນ​ກອງ​ປະ​ຊຸມ​ສະ​ໄໜ​ສາ​ມັນແຕ່ລະຄັ້ງຂອງສະພາປະຊາຊົນແຂວງ, ເປັນເຈົ້າການຄົ້ນຄ້ວາ, ສັງລວມຂໍ້ມູນ ແລະ ຮ່າງເປັນມະຕິຮັບຮອງ ຫຼືນິຕິກຳແນະນຳຂອງສະພາປະຊາຊົນແຂວງ ຕໍ່ການສະເໜີຂອງອົງການປົກຄອງແຂວງ, ລົງຕິດຕາມກວດກາຊຸກຍູ້ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ແຜນງົບປະມານຂອງແຂວງ ຕາມມະຕິຂອງກອງປະຊຸມສະພາປະຊາຊົນແຂວງ, ລົງຕິດຕາມກວດກາບາງບັນຫາທີ່ພົ້ນເດັ່ນຕາມການຕົກລົງຂອງ ຄະນະປະຈຳສະພາປະຊາຊົນແຂວງ ແລະ ທິດທາງແຜນການປີ 2024 ຂອງຄະນະກໍາມະການເສດຖະກິດ, ແຜນການ ແລະ ການເງິນ ຈະສືບຕໍ່ຜັນຂະຫຍາຍແນວທາງຂອງພັກ-ກົດໝາຍຂອງລັດ, ມະຕິ, ຄຳສັ່ງ ແລະ ຕິກຳ, ຍົກສູງພາລະບົດບາດຂອງຄະນະກຳມະການ, ເອົາໃຈໃສ່ປະສານສົມທົບກັບພາກສ່ວນກ່ຽວຂ້ອງໃຫ້ເອົາໃຈໃສ່ຢ່າງຕັ້ງໜ້າ ຕໍ່ໜ້າທີ່ການເມືອງຂອງຕົນ ຮັັບປະກັນໃນການຈັດຕັ້ງປະຕິບັດໜ້າທີ່ວຽກງານ ໃຫ້ບັນລຸຕາມລະດັບຄາດໝາຍທີ່ວາງໄວ້, ປະກອບຄຳເຫັນໃນການສ້າງ ແລະ ປັບປຸງກົດໝາຍໂດຍສະເພາະຂົງເຂດ ເສດຖະກິດ. ນອກນັ້ນຍັງໄດ້ຮັບຟັງການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ແລະ ແຜນການລົງທຶນຂອງລັດ ປະຈໍາປີ 2023 ແລະ ທິດທາງແຜນການປີ 2024, ບົດລາຍງານການຈັດຕັ້ງປະຕິບັດແຜນງົບປະມານແຫ່ງລັດຂອງແຂວງ ປະຈໍາປີ 2023 ແລະ ທິດທາງແຜນການປີ 2024, ບົດລາຍງານແຜນການເຄື່ອນໄຫວວຽກງານກາງສະໄໝ (2021-2025) ແລະ ທິດທາງແຜນການທ້າຍສະໄໝຮອດ 2025, ການຈັດຕັ້ງປະຕິບັດແຜນການປະຈໍາປີ 2023 ແລະ ທິດທາງແຜນການປີ 2024, ບົດລາຍກ່ຽວກັບການປະເມີນຄືນຄໍາສັ່ງເລກທີ 01/ຈຂ, ລົງວັນທີ 3 ກຸມພາ 2022 ວ່າດ້ວຍການຫ້າມຈັບຈ່ອງທີ່ດິນ, ບຸກລຸກ ແລະ ຊື້ຂາຍສິດນໍາໃຊ້ທີ່ດິນບໍ່ຖືກຕ້ອງ ຢູ່ພາຍໃນແຂວງຊຽງຂວາງ, ບົດລາຍງານກ່ຽວກັບການປະເມີນຄືນຄໍາສັ່ງເລກທີ 18/ຈຂ, ລົງວັນທີ 21 ຕຸລາ 2021 ວ່າດ້ວຍການແກ້ໄຂການລັກລອບການຂຸດຄົ້ນ ແລະ ປຸງແຕ່ງແຮ່ຄໍາ ໂດຍບໍ່ຖືກຕ້ອງຢູ່ແຂວງຊຽງຂວາງ, ບົດລາຍງານການຈັດຕັ້ງປະຕິບັດວຽຫກງານການແກ້ໄຂສະພາບການບຸກລຸກຖາງໄມ້ກວມ 70% ຂອງພື້ນທີ່ທົ່ວແຂວງ, ບົດລາຍງານການຈັດຕັ້ງປະຕິບັດປົກປັກຮັກສາ ແລະ ຄຸ້ມຄອງສະພາບເສັ້ນທາງຢູ່ພາຍໃນແຂວງຊຽງຂວາງໃຫ້ມີຄຸນນະພາບ, ບົດລາຍງານການຈັດຕັ້ງປະຕິບັດວຽກງານສ້າງສະພາບແວດລ້ອມເອື້ອຍອໍານວຍຄວາມສວະດວກໃຫ້ແກ່ການດໍຊາເນີນທຸລະກິດການລົງທຶນພາຍໃນ ແລະ ຕ່າງປະເທດ, ບົດລາຍງານຂອງທະນາຄານແຫ່ງ ສປປ ລາວ ປະຈໍາພາກເໜືອ ສາຂາແຂວງຊຽງຂວາງກ່ຽວກັບການຄຸ້ມທະນາຄານທຸລະກິດ, ສະຖາບັນການເງິນຈຸລະພາກ ແລະ ຕີລາຄາສະພາການຄຸ້ມຄອງເງິນຕາຢູ່ແຂວງຊຽງຂວາງ. ໃນທີ່ປະຊຸມບັນດາຜູ້ແທນກອງປະຊຸມໄດ້ປະກອບຄໍາຄິດ, ຄໍາເຫັນໃສ່ຮ່າງບົດສະຫຼຸບຢ່າງກົງໄປກົງມາ ເພື່ອເຮັດໃຫ້ມີຄວາມຄົບຖ້ວນ, ສົມບູນຂຶ້ນຕື່ມອີກ.

ສະພາປະຊາຊົນແຂວງຊຽງຂວາງ

ຂ່າວໂດຍ: ນາງ ສຸກສະຫວັນ ອິນທະແສງ