(ສພຊ) ເພື່ອສະຫຼຸບຕີລາຄາການຈັດຕັ້ງປະຕິບັດແຜນການເຄື່ອນໄຫວວຽກງານປະຈໍາປີ 2023 ແລະ ວາງທິດທາງແຜນການເຄື່ອນໄຫວວຽກງານປະຈຳປີ 2024 ຂອງກຳມາທິການວຽກງານສະມາຊິກສະພາແຫ່ງຊາດ ແລະ ເພື່ອປຶກສາຫາລືບາງຮ່າງນິຕິກຳຂອງຄະນະປະຈໍາສະພາແຫ່ງຊາດ ແລະ ວຽກງານອື່ນທີ່ຢູ່ໃນຄວາມຮັບຜິດຊອບຂອງກຳມາທິການ; ກອງປະຊຸມຄົບຄະນະກຳມາທິການວຽກງານສະມາຊິກສະພາແຫ່ງຊາດ ປະຈຳປີ 2023 ໄດ້ຈັດຂຶ້ນໃນຕອນບ່າຍຂອງວັນທີ 22 ທັນວາຜ່ານມາ ຢູ່ຫໍສະພາແຫ່ງຊາດ; ໂດຍການເປັນປະທານຮ່ວມຂອງທ່ານ ຄຳໃບ ດຳລັດ ຮອງປະທານສະພາແຫ່ງຊາດ, ຜູ້ຊີ້ນຳກຳມາທິການວຽກງານສະມາຊິກສະພາແຫ່ງຊາດ ແລະ ທ່ານ ສຸບັນ ສະວະບຸດ ປະທານກຳມາທິການວຽກງານສະມາຊິກສະພາແຫ່ງຊາດ; ເຂົ້າຮ່ວມມີບັນດາທ່ານຄະນະປະຈຳສະພາແຫ່ງຊາດ, ຮອງປະທານກຳມາທິການພາຍໃນສະພາແຫ່ງຊາດ, ບັນດາທ່ານກຳມະການໃນກຳມາທິການວຽກງານສະມາຊິກສະພາແຫ່ງຊາດ ຈາກ 18 ເຂດເລືອກຕັ້ງ, ຄະນະກົມ ແລະ ຄະນະພະແນກ ພ້ອມດ້ວຍພະນັກງານວິຊາການທີ່ກ່ຽວຂ້ອງ.
​ ໃນພິທີເປີດ, ທ່ານ ສຸບັນ ສະວະບຸດ ໄດ້ກ່າວວ່າ: ມື້ນີ້, ກຳມາທິການວຽກງານສະມາຊິກສະພາແຫ່ງຊາດ ໄດ້ດຳ ເນີນກອງປະຊຸມປະຈຳປີຂອງຕົນ ເພື່ອສະຫຼຸບຕີລາຄາຄືນການປະຕິບັດວຽກງານກາງສະໄໝ ແລະ ປະຈໍາປີ 2023 ພ້ອມນີ້ ກໍວາງທິດທາງແຜນການເຄື່ອນໄຫວວຽກງານປະຈໍາປີ 2024 ແລະ ແຜນການທ້າຍສະໄໝ 5 ປີ ຂອງກຳມາທິການ. ຜ່ານການເຄື່ອນໄຫວວຽກງານຂອງກຳມາທິການໃນໄລຍະກາງສະໄໝ ແລະ ໜຶ່ງປີຜ່ານມານັ້ນ ມີທັງຂໍ້ສະດວກ, ຂໍ້ຫຍຸ້ງຍາກ ແຕ່ຍ້ອນການຊີ້ນໍາຢ່າງໃກ້ຊິດຂອງຄະນະປະຈຳສະພາແຫ່ງຊາດ, ຄວາມເປັນເຈົ້າການຂອງກຳມາທິການ, ກຳມະການຂອງກຳມາທິການ, ພາກສ່ວນອື່ນທີ່ກ່ຽວຂ້ອງ ແລະ ຄວາມຮັບຜິດຊອບຂອງກົງຈັກເສນາທິການ ຈຶ່ງເຮັດໃຫ້ວຽກງານຂອງກຳມາທິການມີຜົນສໍາເລັດໃນຫຼາຍດ້ານ ເປັນຕົ້ນ: ການດໍາເນີນການປະເມີນການຈັດຕັ້ງປະຕິກົດໝາຍ 4 ສະບັບ ໃນຂົງເຂດສະພາແຫ່ງຊາດ; ການດໍາເນີນການປະເມີນຄວາມໄວ້ວາງໃຈຕໍ່ບຸກຄະລາກອນທີ່ສະພາແຫ່ງຊາດເລືອກຕັ້ງ ແລະ ຮັບຮອງເອົາການແຕ່ງຕັ້ງ ຢູ່ໃນກອງ ປະຊຸມສະໄໝສາມັນເທື່ອທີ 6 ທີ່ຜ່ານມາ; ການເກັບກຳຂໍ້ມູນສະພາບການເຄື່ອນໄຫວວຽກງານກາງ ສະໄໝ ຂອງຄະນະສະມາຊິກສະພາແຫ່ງຊາດ ປະຈຳເຂດເລືອກຕັ້ງ ແລະ ສະພາປະຊາຊົນຂັ້ນແຂວງ, ພ້ອມທັງການກະກຽມ ແລະ ດຳເນີນກອງປະຊຸມກາງສະໄໝ ຂອງສະພາແຫ່ງຊາດ ຊຸດທີ IX ແລະ ສະພາປະຊາຊົນຂັ້ນແຂວງ ຊຸດທີ II ທີ່ຫາກໍສໍາເລັດນີ້. ເຖິງຢ່າງໃດກໍຕາມ ໃນໜຶ່ງປີຜ່ານມາ ກໍຍັງມີຂໍ້ຄົງຄ້າງຈໍານວນໜຶ່ງທີ່ຈະໄດ້ເອົາໃຈໃສ່ສືບຕໍ່ແກ້ໄຂ ເປັນຕົ້ນ: ດ້ານໂຄງປະກອບກົງຈັກການຈັດຕັ້ງຂອງສະພາປະຊາຊົນຂັ້ນແຂວງ ຍັງບໍ່ທັນມີຄວາມເປັນເອກະພາບໃນການຈັດຕັ້ງປະຕິບັດ, ນິຕິກຳຈຳນວນໜຶ່ງທີ່ຢູ່ໃນຄວາມຮັບຜິດຊອບຂອງກຳມາທິການຍັງບໍ່ທັນສຳເລັດ, ການເຝິກອົບຮົມໃຫ້ແກ່ເສນາທິການ ແລະ ການປັບປຸງແບບແຜນວິທີເຮັດວຽກ ໂດຍສະເພາະກົນໄກການປະສານງານເຫຼົ່ານີ້ເປັນຕົ້ນ.
ກອງປະຊຸມ ໄດ້ຮັບຟັງການສະເໜີບົດລາຍງານການຈັດຕັ້ງປະຕິບັດວຽກງານກາງສະໄໝຂອງແຜນການ 5 ປີ (2021-2025) ແລະ ທິດທາງທ້າຍສະໄໝຮອດປີ 2025 ຂອງກໍາມາທິການວຽກງານສະມາຊິກສະພາແຫ່ງຊາດ ຈາກທ່ານ ຄຳສິງ ໄຊສົມແພງ ຮອງປະທານກຳມາທິການວຽກງານສະມາຊິກສະພາແຫ່ງຊາດ; ຈາກນັ້ນ, ປະທານກອງປະຊຸມ ໄດ້ມີຄຳເຫັນເຈາະຈີ້ມ ແລະ ບັນດາຜູ້ແທນກອງປະຊຸມໄດ້ສຸມໃສ່ຄົ້ນຄວ້າ, ສົນທະນາແລກປ່ຽນຄຳຄິດຄຳເຫັນເຊິ່ງກັນ ແລະກັນ ຕໍ່ບົດລາຍງານດັ່ງກ່າວຢ່າງເປັນເຈົ້າການ ແລະ ກົງໄປກົງມາ.
ໃນຕອນທ້າຍຂອງກອງປະຊຸມ, ທ່ານ ຄຳໃບ ດຳລັດ ໄດ້ມີຄຳເຫັນໂອ້ລົມ ເຊິ່ງທ່ານໄດ້ກ່າວວ່າ: ກໍາມາທິການວຽກງານສະມາຊິກສະພາແຫ່ງຊາດ ແມ່ນກົງຈັກການຈັດຕັ້ງໜຶ່ງຂອງສະພາແຫ່ງຊາດ ມີພາລະບົດບາດເປັນເສນາທິການໃຫ້ແກ່ສະພາແຫ່ງຊາດ ແລະ ຄະນະປະຈຳສະພາແຫ່ງຊາດ ໃນວຽກງານອັນຕົ້ນຕໍພາຍໃນລະບົບສະພາ ເປັນຕົ້ນ: ວຽກງານກົງຈັກການຈັດຕັ້ງ; ການຄຸ້ມຄອງສະມາຊິກສະພາ; ການປະເມີນຜົນຂອງສະມາຊິກສະພາແຫ່ງຊາດ ຕໍ່ການປະຕິບັດໜ້າທີ່ຂອງບຸກຄະລາກອນທີ່ສະພາແຫ່ງຊາດເລືອກຕັ້ງ ແລະ ຮັບຮອງເອົາການແຕ່ງຕັ້ງ ແລະ ວຽກງານການເລືອກຕັ້ງສະ ມາຊິກສະພາແຫ່ງຊາດ ແລະ ສະມາຊິກສະພາປະຊາຊົນຂັ້ນແຂວງ; ສະແດງຄວາມຍ້ອງຍໍຊົມເຊີຍ ແລະ ຕີລາຄາສູງຕໍ່ກຳ ມາທິການວຽກງານສະມາຊິກສະພາແຫ່ງຊາດ ກໍຄືບັນດາທ່ານສະມາຊິກສະພາແຫ່ງຊາດ ທີ່ເປັນກໍາມະການຂອງກຳມາທິການທີ່ໄດ້ມີຄວາມເອົາໃຈໃສ່, ມີຄວາມພະຍາຍາມສູງໃນການນໍາພາເຄື່ອນໄຫວປະຕິບັດວຽກງານໃນຕະຫຼອດໄລຍະ 1 ປີຜ່ານມາ ເຊິ່ງສາມາດປະຕິບັດໜ້າທີ່ການເມືອງຂອງຕົນສຳເລັດເປັນຢ່າງດີ ດັ່ງທີ່ກຳມາທິການໄດ້ສະຫຼຸບຕີລາຄາມານັ້ນ. ເຖິງຢ່າງໃດກໍຕາມ, ຖ້າທຽບໃສ່ຄວາມຮຽກຮ້ອງຕ້ອງການຂອງໜ້າທີ່ການເມືອງໃນໄລຍະໃໝ່ນີ້, ກຳມາທິການກໍຍັງມີບາງດ້ານຄວນເອົາໃຈໃສ່ຕື່ມ ເປັນຕົ້ນແມ່ນ: ແບບແຜນວິທີເຮັດວຽກລະຫວ່າງກຳມາທິການ ກັບກຳມະການຂອງຕົນ, ການຄຸ້ມຄອງສະມາຊິກສະພາແຫ່ງຊາດ, ການມີສ່ວນຮ່ວມໃນການສ້າງແຜນກຳນົດພະນັກງານນຳພາ-ຄຸ້ມຄອງ ເປັນຕົ້ນ: ບຸກຄະລາກອນຂອງສະພາແຫ່ງຊາດ ແລະ ສະພາປະຊາຊົນຂັ້ນແຂວງໃນຊຸດຕໍ່ໄປ; ພ້ອມນັ້ນ, ທ່ານຮອງປະທານສະພາແຫ່ງຊາດ ຍັງໄດ້ສະເໜີໃຫ້ບັນດາທ່ານທີ່ເປັນກໍາມະການຂອງກຳມາທິການວຽກງານສະມາຊິກສະພາແຫ່ງຊາດ ທັງສູນກາງ ແລະ ທ້ອງຖິ່ນ ເອົາໃຈໃສ່ລົງເລິກບັນດາວຽກງານໃນຂົງເຂດຄວາມຮັບຜິດຊອບຂອງຕົນ ແລະ ຂອງກຳມາທິການວຽກງານສະມາຊິກສະພາແຫ່ງຊາດ ເພື່ອແກ້ໄດ້ບັນຫາ; ພ້ອມນັ້ນ, ກໍເອົາໃຈໃສ່ໃນລະບົບສ່ອງແສງລາຍງານໃຫ້ກຳມາທິການແຕ່ລະເດືອນຕາມວຽກງານຕົວຈິງ; ກົງຈັກເສນາທິການເພີ່ມທະວີຄວາມເປັນເຈົ້າການ ແລະ ຍົກສູງຄວາມຮັບຜິດ ຊອບໃນການຊ່ວຍກຳມາທິການຄົ້ນຄວ້າ, ວາງແຜນ, ສະຫຼຸບຕີລາຄາດ້ານຕ່າງໆ ສິ່ງສໍາຄັນຕ້ອງເພີ່ມທະວີຄວາມສາມັກຄີພາຍໃນໃຫ້ແໜ້ນແຟ້ນ ແລະ ເປັນເອກະພາບກັນ.
(ພາບ ແລະ ຂ່າວ: ນາງ ສຸພາວັນ ຫອມສະນິດ)