(ສພຊ) – ກອງປະຊຸມຄະນະປະຈໍາສະພາແຫ່ງຊາດ ສະໄໝວິສາມັນປະຈໍາເດືອນມັງກອນ 2025 ໄດ້ດໍາເນີນໃນວັນທີ 8 ມັງກອນນີ້ ໂດຍການເປັນປະທານຂອງທ່ານ ປອ. ໄຊສົມພອນ ພົມວິຫານ ກໍາມະການກົມການເມືອງສູນກາງພັກ, ປະທານຄະນະປະຈໍາສະພາແຫ່ງຊາດ; ມີບັນດາທ່ານຮອງປະທານຄະນະປະຈໍາສະພາແຫ່ງຊາດ ແລະ ກຳມະການຄະນະປະຈໍາສະພາແຫ່ງຊາດ, ບັນດາທ່ານລັດຖະມົນຕີ ແລະ ຮອງລັດຖະມົນຕີກະຊວງ, ອົງການທີ່ກ່ຽວຂ້ອງ ເຂົ້າຮ່ວມຢ່າງພ້ອມພຽງ.

ກອງປະຊຸມໄດ້ພິຈາລະນາບັນຫາສໍາຄັນພື້ນຖານຂອງປະເທດຊາດ ຕາມຂອບເຂດສິດ ແລະ ໜ້າທີ່ຂອງຄະນະປະຈໍາສະພາແຫ່ງຊາດ ທີ່ໄດ້ກໍານົດໄວ້ໃນລັດຖະທໍາມະນູນ ແລະ ກົດໝາຍ ເປັນຕົ້ນ ບົດລາຍງານຜົນການຄົ້ນຄວ້າໜັງສືສະເໜີຂອງລັດຖະບານ ກ່ຽວກັບການຂໍດັດແກ້ເພີ່ມມູນຄ່າຂອງໂຄງການກໍ່ສ້າງເສັ້ນທາງເບຕົງ ແຕ່ສີແຍກໄຟແດງຕານມີໄຊ-ສາມແຍກສີເກີດ ນະຄອນຫຼວງວຽງຈັນ ທີ່ໄດ້ຮັບຜົນກະທົບຈາກການເໜັງຕີງຂອງອັດຕາແລກປ່ຽນ; ບົດລາຍງານກ່ຽວກັບການກະກຽມຕ້ອນຮັບປະທານສະພາສູງ ແຫ່ງ ລາຊະອານາຈັກກໍາປູເຈຍ; ບົດລາຍງານຜົນການຄົ້ນຄວ້າໜັງສືສະເໜີຂອງລັດຖະບານ ກ່ຽວກັບການຂໍຍົກເວັ້ນການປະຕິບັດບາງມາດຕາຂອງກົດໝາຍ ແລະ ການຂໍຫັນປ່ຽນທີ່ດິນປ່າໄມ້ທຳມະຊາດ ໄປເປັນທີ່ດິນອຸດສາຫະກຳ ເພື່ອຮັບໃຊ້ເຂົ້າໃນໂຄງການເຂື່ອນໄຟຟ້ານໍ້າແທ້ ຢູ່ເຂດບ້ານນໍ້າຄະ ເມືອງແປກ ແລະ ບ້ານຊ້າງ ເມືອງຄໍາ ແຂວງຊຽງຂວາງ ຂອງບໍລິສັດ ໄຟຟ້ານໍ້າແທ້ ຈຳກັດ; ບົດລາຍງານຜົນການຄົ້ນຄວ້າໜັງສືສະເໜີຂອງລັດຖະບານ ກ່ຽວກັບການຂໍຫັນປ່ຽນທີ່ດິນປ່າໄມ້ ໄປເປັນທີ່ດິນປະເພດອື່ນ ເພື່ອຮັບໃຊ້ເຂົ້າໃນໂຄງການຂຸດຄົ້ນ ແລະ ປຸງແຕ່ງແຮ່ທອງ ຢູ່ເຂດບ້ານນໍ້າພ້າວ, ບ້ານແມ່ ແລະ ບ້ານມົກຈານ ເມືອງຮຸນ ແຂວງອຸດົມໄຊ ຂອງບໍລິສັດ ວິງຟາດ ອຸດົມໄຊ ບໍ່ແຮ່ ຈຳກັດ ແລະ ບົດລາຍງານກ່ຽວກັບຮ່າງຂໍ້ຕົກລົງວ່າດ້ວຍການຄຸ້ມຄອງບັນຊີເງິນຝາກເງິນຕາຕ່າງປະເທດ ຢູ່ ສປປລາວ ຂອງທະນາຄານ ແຫ່ງ ສປປລາວ.

(ນາງ ອາລິນ ສຸພິມມະປະດິດ)