(ສພຊ) ປະຕິບັດຕາມກົດໝາຍວ່າດ້ວຍສະພາແຫ່ງຊາດ ມາດຕາ 67 ກ່ຽວກັບກອງປະຊຸມຄະນະປະຈໍາສະພາແຫ່ງຊາດ, ໃນລະຫວ່າງວັນທີ 3 ມັງກອນ 2023 ຄະນະປະຈໍາສະພາແຫ່ງຊາດ ໄດ້ດໍາເນີນກອງປະຊຸມສະໄໝວິສາມັນປະຈໍາເດືອນມັງກອນ 2023 ຂອງຕົນຂຶ້ນຢູ່ທີ່ຫ້ອງປະຊຸມຄະນະປະຈໍາສະພາແຫ່ງຊາດ ໂດຍການເປັນປະທານຂອງທ່ານ ປອ. ໄຊສົມພອນ ພົມວິຫານ ກໍາມະການກົມການເມືອງສູນກາງພັກ, ປະທານຄະນະປະຈໍາສະພາແຫ່ງຊາດ, ເຂົ້າຮ່ວມກອງປະຊຸມດັ່ງກ່າວ ມີບັນດາທ່ານ ຮອງປະທານຄະນະປະຈໍາສະພາແຫ່ງຊາດ, ກຳມະການຄະນະປະຈໍາສະພາແຫ່ງຊາດ ແລະ ພາກສ່ວນທີ່ກ່ຽວຂ້ອງ.
ກອງປະຊຸມຄະນະປະຈໍາສະພາແຫ່ງຊາດ ປະຈໍາເດືອນມັງກອນ 2023 ໄດ້ຮັບຟັງການລາຍງານການສະຫຼຸບຕີລາຄາຜົນສຳເລັດກອງປະຊຸມສະໄໝສາມັນເທື່ອທີ 4 ຂອງສະພາແຫ່ງຊາດ ຊຸດທີ IX, ລາຍງານການກະກຽມໃຫ້ແກ່ກອງປະຊຸມລັດຖະສະພາ 3 ປະເທດ ກຳປູເຈຍ-ລາວ-ຫວຽດນາມ (CLV), ລາຍງານແຜນການຮຽບຮຽງກົດໝາຍ ຈຳນວນ 12 ສະບັບ ທີ່ຜ່ານການພິຈາລະນາຮັບຮອງເອົາໃນກອງປະຊຸມສະໄໝສາມັນເທື່ອທີ 4 ຂອງສະພາແຫ່ງຊາດ ຊຸດທີ IX, ລາຍງານການກະກຽມແຜນການຈັດຕັ້ງທາບທາມຮ່າງກົດໝາຍ ຈຳນວນ 13 ສະບັບ ທີ່ຈະນຳເຂົ້າພິຈາລະນາຮັບຮອງໃນກອງປະຊຸມສະໄໝສາມັນເທື່ອທີ 5 ຂອງສະພາແຫ່ງຊາດ ຊຸດທີ IX ຢູ່ບັນດາເຂດເລືອກຕັ້ງທົ່ວປະເທດ ແລະ ວຽກງານອື່ນໆຈຳນວນໜຶ່ງ ຈາກຄະນະເລຂາທິການສະພາແຫ່ງຊາດ, ກຳມາທິການວຽກງານສະມາຊິກສະພາແຫ່ງຊາດ, ກຳມາທິການການຕ່າງປະເທດ ແລະ ກຳມາທິການກົດໝາຍ. ພ້ອມນັ້ນ, ບັນດາທ່ານທີ່ເຂົ້າຮ່ວມ ຍັງໄດ້ຄົ້ນຄວ້າ ແລະ ພິຈາລະນາປະກອບຄຳຄິດຄຳເຫັນ ຢ່າງກົງໄປກົງມາ ເຮັດໃຫ້ບົດລາຍງານຕ່າງໆມີເນື້ອໃນຄົບຖ້ວນຍິ່ງຂຶ້ນ.
