(ສພຊ) – ກອງປະຊຸມຄົບຄະນະຂອງກຳມາທິການເສດຖະກິດ, ເຕັກໂນໂລຊີ ແລະ ສິ່ງແວດລ້ອມ (ກສຕສ) ປະຈຳປີ 2024 ໄດ້ຈັດຂຶ້ນເມື່ອວັນທີ 25-26 ຕຸລາຜ່ານມາ ທີ່ສະພາແຫ່ງຊາດ (ສພຊ) ໂດຍການເປັນປະທານຂອງທ່ານ ນາງ ປິ່ງຄຳ ລາຊະສິມມາ ຄະນະປະຈຳສະພາແຫ່ງຊາດ, ປະທານກໍາມາທິການເສດຖະກິດ, ເຕັກໂນໂລຊີ ແລະ ສິ່ງແວດລ້ອມ; ມີທ່ານ ສົມມາດ ພົລເສນາ ຮອງປະ ທານສະພາແຫ່ງຊາດ, ບັນດາທ່ານປະທານ-ຮອງປະທານກໍາມາທິການພາຍໃນ ສພຊ, ລັດຖະມົນຕີ-ຮອງລັດຖະ ມົນຕີຈາກ 6 ກະຊວງທີ່ກ່ຽວຂ້ອງ, ສະມາຊິກສະພາແຫ່ງ ຊາດທີ່ເປັນກໍາມະການຂອງ ກສຕສ, ທີ່ປຶກສາຂອງ ກສຕສ, ຫົວໜ້າກົມ-ຮອງຫົວໜ້າກົມ ແລະ ພະນັກງານຈາກພາກສ່ວນທີ່ກ່ຽວ ຂ້ອງ ເຂົ້າຮ່ວມຢ່າງພ້ອມພຽງ.
ທ່ານ ນາງ ປິ່ງຄໍາ ລາຊະສິມມາ ໄດ້ກ່າວວ່າ: ກອງປະຊຸມຄັ້ງນີ້ ມີຈຸດປະສົງເພື່ອພ້ອມກັນຄົ້ນຄວ້າ, ປຶກສາຫາລື ແລະ ແລກປ່ຽນທັດສະນະຮ່ວມກັນຂອງກຳມະການທີ່ສັງກັດໃນກຳມາທິການ ກ່ຽວ ກັບບັນຫາທີ່ພົ້ນເດັ່ນເກີດ ຂຶ້ນໃນສັງຄົມ ທີ່ຕິດພັນກັບວຽກງານຂົງເຂດເສດຖະກິດ, ຫົວຂໍ້ ແລະ ເນື້ອໃນທີ່ຈະເຂົ້າຜ່ານກອງປະຊຸມສະໄໝສາມັນເທື່ອທີ 8 ຂອງສະພາແຫ່ງຊາດຊຸດທີ IX ທີ່ຈະຈັດຂຶ້ນໃນກາງເດືອນພະຈິກນີ້. ຫົວຂໍ້ສຳຄັນທີ່ຈະຍົກຂຶ້ນມາລາຍງານ ແລະ ປຶກສາຫາລືຮ່ວມກັນໃນກອງປະຊຸມຄັ້ງນີ້ມີ: 1) ສະຫຼຸບການເຄື່ອນໄຫວວຽກງານປະຈຳປີ 2024 ແລະ ທິດທາງແຜນການ ເຄື່ອນໄຫວປະຈໍາປີ 2025 ຂອງກຳມາທິການເສດຖະກິດ, ເຕັກໂນໂລຊີ ແລະ ສິ່ງແວດ ລ້ອມ; 2) ປະກອບຄໍາເຫັນເພີ່ມຕື່ມຕໍ່ຮ່າງກົດໝາຍວ່າດ້ວຍທີ່ຢູ່ອາໄສ (ສະບັບສ້າງໃໝ່); 3) ລາຍງານຜົນການຕິດຕາມກວດກາການຈັດຕັ້ງປະຕິບັດກົດໝາຍ ແລະ ນິຕິກໍາໃຕ້ກົດໝາຍ ກ່ຽວກັບການເຮັດທົດລອງຊັບສິນດິຈິຕອນ ແລະ ການທົດລອງດຳເນີນການຊື້-ຂາຍເງິນຄຣິບໂຕ ຢູ່ ສປປລາວ; 4) ລາຍງານສະພາບການຂຸດຄົ້ນບໍ່ແຮ່ໃນຂອບເຂດທົ່ວປະເທດ ແລະ ການແບ່ງຂັ້ນຄຸ້ມຄອງລະຫວ່າງກະຊວງ ແລະ ຂະແໜງການກ່ຽວຂ້ອງຢູ່ທ້ອງຖິ່ນ ກ່ຽວກັບວຽກງານແຮ່ທາດ; 5) ລາຍງານສະພາບການຈັດຕັ້ງປະຕິບັດວຽກງານການຂຶ້ນທະບຽນອອກໃບຕາດິນ, ການຂຶ້ນທະບຽນອອກໃບຕາດິນກະສິກຳ ແລະ ດິນປຸກສ້າງທີ່ນອນໃນ 3 ປະເພດປ່າ ໃຫ້ກັບປະຊາຊົນ ແລະ ການແບ່ງຂັ້ນຄຸ້ມຄອງລະຫວ່າງກະຊວງ ແລະ ຂະແໜງການກ່ຽວ ຂ້ອງຢູ່ທ້ອງຖິ່ນ ກ່ຽວກັບວຽກງານທີ່ດິນ; 6) ລາຍງານກ່ຽວກັບຮ່າງຍຸດທະສາດການຄຸ້ມຄອງ ແລະ ພັດທະນາທີ່ດິນກະສິກໍາ ຮອດປີ 2030 ແລະ ວິໄສທັດຮອດປີ 2040; 7) ຜ່ານຮ່າງມະຕິກອງປະຊຸມຄົບຄະນະຂອງກໍາມາທິການເສດຖະກິດ, ເຕັກໂນໂລຊີ ແລະ ສິ່ງ ແວດລ້ອມ ປະຈໍາປີ 2024 ແລະ ວຽກງານອື່ນທີ່ປິ່ນອ້ອມ.
ບັນດາທ່ານທີ່ເຂົ້າຮ່ວມ ໄດ້ສຸມສະຕິປັນຍາຄົ້ນຄວ້າ, ສົນທະນາປຶກສາຫາລື, ປະກອບຄວາມເຫັນຢ່າງກົງໄປກົງມາ ໂດຍທຽບໃສ່ພຶດຕິກຳຕົວຈິງທີ່ເກີດຂຶ້ນໃນທ້ອງຖິ່ນ ແລະ ຂະແໜງການຂອງຕົນ ເຮັດໃຫ້ຫົວຂໍ້ໃນກອງປະຊຸມຄັ້ງນີ້ ມີເນື້ອໃນຄົບຖ້ວນ, ສົມບູນ ສາມາດນຳໄປຄົ້ນຄວ້າພິຈາລະນາ ແລະ ຮັບຮອງເອົາໃນກອງປະຊຸມສະໄໝສາມັນເທື່ອທີ 8 ຂອງ ສພຊ ຊຸດທີ IX.
ໂອກາດດັ່ງກ່າວ, ທ່ານ ສົມມາດ ພົລເສນາ ໄດ້ສະແດງຄວາມຍ້ອງຍໍຊົມເຊີຍຕໍ່ຜົນສຳເລັດທີ່ກໍາມາທິການເສດ ຖະກິດ, ເຕັກໂນໂລຊີ ແລະ ສິ່ງແວດລ້ອມ ຍາດມາໄດ້ໃນໜຶ່ງປີຜ່ານມາ ພ້ອມທັງມີຄໍາເຫັນໂອ້ລົມຕໍ່ກອງປະຊຸມ ໂດຍມີບາງທັດສະນະດັ່ງນີ້: ທາບທາມຄຳຄິດຄໍາເຫັນຈາກປະຊາຊົນ ແລະ ຜູ້ປະກອບການ ຕໍ່ຮ່າງກົດໝາຍ ໃຫ້ກວ້າງຂວາງ ແລະ ເຂົ້າສູ່ລວງເລິກກວ່າເກົ່າ ເພື່ອໃຫ້ສັງຄົມມີຄວາມເຂົ້າໃຈເປັນເອກະພາບໃນການຈັດຕັ້ງປະຕິບັດ ແລະ ກ້າວໄປສູ່ການຄຸ້ມຄອງລັດ, ຄຸ້ມເສດຖະກິດ-ສັງຄົມດ້ວຍກົດໝາຍ ໃຫ້ເປັນຮູບປະທຳຫຼາຍຂຶ້ນກວ່າເກົ່າ. ເອົາໃຈໃສ່ປະສານສົມທົບ, ເຂົ້າຮ່ວມແຕ່ຫົວທີກັບຂະແໜງການ ແລະ ກຳມາທິການທີ່ກ່ຽວຂ້ອງ ຄົ້ນຄວ້າ, ກວດກາບັນດາບົດລາຍງານຕ່າງໆ ທີ່ຂະແໜງການລາຍງານ ໂດຍລົງເລິກການຄົ້ນຄວ້າວິເຄາະວິໄຈແຕ່ລະບັນຫາໃຫ້ມີຄວາມລະອຽດຖີ່ຖ້ວນ ພ້ອມທັງກຳນົດນະໂຍບາຍ, ວິທີການ ແລະ ມາດຕະການແກ້ໄຂຢ່າງເໝາະສົມ ເພື່ອສະເໜີໃຫ້ລັດຖະບານນຳໄປຄົ້ນຄວ້າພິຈາລະນາ ແລະ ຈັດຕັ້ງປະຕິບັດ. ເອົາ ໃຈໃສ່ວຽກງານຕິດຕາມກວດກາຕາມມະຕິກອງປະຊຸມສະພາແຫ່ງຊາດ, ມະຕິຂອງຄະນະປະຈໍາສະພາແຫ່ງຊາດ, ຕິດຕາມກວດກາຕາມແຜນຂອງກຳມາທິການຢ່າງປົກກະຕິ ໂດຍສະເພາະການຕິດຕາມກວດກາ ແລະ ຊຸກຍູ້ການຈັດ ຕັ້ງປະຕິບັດມະຕິຂອງຄະນະປະຈຳສະພາແຫ່ງຊາດ. ກໍານົດຫົວຂໍ້ສ້າງຄວາມເຂັ້ມແຂງດ້ານວິຊາການ ໃຫ້ແກ່ກໍາມະການ, ວິຊາການຂອງກໍາມາທິການ ແລະ ເສນາທິການຊ່ວຍວຽກຄະນະກຳມະການເສດຖະກິດ, ແຜນການ ແລະ ການເງິນ ສະພາປະຊາຊົນຂັ້ນແຂວງ ແລະ ມີການຢ້ຽມຢາມພົບປະສອງຝ່າຍກັບກຳມາທິການຂອງສະພາແຫ່ງຊາດປະເທດເພື່ອນມິດ ແລະ ສາກົນ; ຈັດກອງປະຊຸມສຳມະນາ, ທັດສະນະສຶກສາ ແລະ ເຂົ້າຮ່ວມກອງປະຊຸມວິຊາການ ທັງພາຍໃນ ແລະ ຕ່າງປະເທດ ເພື່ອຍາດເອົາບົດຮຽນ, ປະສົບການ ແລະ ນໍາໄປໝູນໃຊ້ເຂົ້າໃນການຈັດຕັ້ງປະຕິບັດວຽກງານຕົວຈິງໃຫ້ຖືກຕ້ອງ, ສອດຄ່ອງ ຮັບປະກັນເຮັດໃຫ້ການເຄື່ອນໄຫວວຽກງານຂອງກຳມາທິການ ມີຄຸນນະພາບຫຼາຍຍິ່ງໆຂຶ້ນໄປເລື້ອຍໆ.
(ສອນສັກ ວັນວິໄຊ)