(ສພຊ) – ວັນທີ 18-22 ທັນວາ 2024 ທ່ານ ນາງ ປິ່ງຄໍາ ລາຊະສິມມາ ກໍາມະການສູນກາງພັກ, ຄະນະປະຈໍາສະພາແຫ່ງຊາດ, ປະທານກໍາມາທິການເສດຖະກິດ, ເຕັກໂນໂລຊີ ແລະ ສິ່ງແວດລ້ອມ (ກສຕສ) ພ້ອມດ້ວຍຄະນະ ໄດ້ລົງເຄື່ອນໄຫວເຮັດວຽກຢູ່ແຂວງອັດຕະປື, ເຊກອງ ແລະ ສາລະວັນ ເພື່ອຕິດຕາມກວດກາ ແລະ ເກັບກໍາຂໍ້ມູນກ່ຽວກັບການຂົນສົ່ງແຮ່ທາດ ແລະ ການມີສ່ວນຮ່ວມເຂົ້າໃນການບູລະນະ, ສ້ອມແປງເສັ້ນທາງ ທີ່ເປັນສາເຫດເຮັດໃຫ້ເສັ້ນ ທາງເປ່ເພ ແລະ ການຈັດຕັ້ງປະຕິບັດນິຕິກໍາ ຕິດພັນກັບການຈັດຕັ້ງປະຕິບັດບັນດາໂຄງການເຊົ່າ-ສໍາປະທານທີ່ດິນຂອງລັດ ແລະ ການອອກໃບຕາດິນ ເພື່ອຊອກໃຫ້ເຫັນດ້ານດີທີ່ຄວນເສີມຂະຫຍາຍຊຸກຍູ້ ແລະ ດ້ານອ່ອນຂໍ້ຄົງຄ້າງທີ່ຈະຕ້ອງຊອກວິທີທາງແກ້ໄຂ ແນໃສ່ໃຫ້ພາກສ່ວນກ່ຽວຂ້ອງຈັດຕັ້ງປະຕິບັດຖືກຕ້ອງຕາມກົດໝາຍ, ແຜນພັດທະນາເສດ ຖະກິດ-ສັງຄົມແຕ່ລະໄລຍະ ໂດຍໄດ້ປະຊຸມຮ່ວມກັບທ່ານເຈົ້າແຂວງ, ປະທານ ແລະ ຮອງປະທານສະພາປະຊາຊົນແຂວງ, ບັນດາພະແນກການ ແລະ ພາກສ່ວນທີ່ກ່ຽວຂ້ອງຂອງແຂວງ.

ໃນກອງປະຊຸມ, ທ່ານ ນາງ ປິ່ງຄໍາ ລາຊະສິມມາ ໄດ້ເຈາະຈີ້ມໃຫ້ພາກສ່ວນທີ່ກ່ຽວຂ້ອງລາຍງານເປັນຕົ້ນ: ການຈັດຕັ້ງປະຕິບັດບັນດາໂຄງການເຊົ່າ-ສໍາປະທານທີ່ດິນ ແລະ ການຂຶ້ນທະບຽນອອກໃບຕາດິນໃນທ້ອງຖິ່ນ ໄລຍະຜ່ານມາ; ການອະນຸມັດໂຄງການກໍ່ສ້າງ, ບູລະນະສ້ອມແປງເສັ້ນທາງ ປີ 2024, ການນໍາໃຊ້ງົບປະມານເຂົ້າໃນໂຄງການ; ການຄຸ້ມຄອງນໍ້າໜັກລົດຂົນສົ່ງສິນຄ້າ, ຂົນສົ່ງແຮ່ທາດ ຢູ່ພາຍໃນແຂວງ; ກົນໄກການຄຸ້ມຄອງ, ຕິດຕາມກວດກາ, ການປະຕິບັດມາດຕະການຕໍ່ຜູ້ລະເມີດ; ການຕິດຕາມກວດກາ ແລະ ເກັບກໍາສະພາບເສັ້ນທາງທີ່ເປ່ເພ, ເສຍຫາຍ ຈາກການຂົນສົ່ງແຮ່ທາດ, ເຄື່ອງອຸປະກອນ, ເຄື່ອງຈັກ ທີ່ນໍາມາຮັບໃຊ້ບັນດາໂຄງການລົງທຶນຂະໜາດໃຫຍ່; ການມີສ່ວນຮ່ວມ ແລະ ປະກອບພັນທະເຂົ້າໃນການກໍ່ສ້າງ ແລະ ບູລະນະສ້ອມແປງເສັ້ນທາງທີ່ເປ່ເພຈາກການນໍາໃຊ້ຂອງບັນດາໂຄງການລົງທຶນຂະໜາດໃຫຍ່, ໂຄງການຂຸດຄົ້ນ ແລະ ປຸງແຕ່ງແຮ່ທາດ, ບໍລິສັດຂົນສົ່ງແຮ່ທາດ; ການຈັດຕັ້ງປະຕິບັດກົດໝາຍ, ນິຕິກໍາໃຕ້ກົດໝາຍ ທີ່ຕິດພັນກັບການຈັດຕັ້ງປະຕິບັດວຽກງານການກໍ່ສ້າງ, ບູລະນະສ້ອມແປງເສັ້ນທາງ ແລະ ວຽກງານຂົນສົ່ງ ເປັນຕົ້ນກົດໝາຍວ່າດ້ວຍທາງຫຼວງ, ກົດໝາຍວ່າດ້ວຍການຈັດຊື້-ຈັດຈ້າງດ້ວຍທຶນຂອງລັດ, ກົດໝາຍວ່າດ້ວຍການລົງທຶນຂອງລັດ, ກົດໝາຍວ່າດ້ວຍການຂົນສົ່ງທາງບົກ ແລະ ນິຕິກໍາອື່ນທີ່ກ່ຽວຂ້ອງ. ຈາກນັ້ນ, ຜູ້ເຂົ້າຮ່ວມກໍໄດ້ສົນທະນາແລກປ່ຽນ, ປະກອບຄໍາຄິດຄໍາເຫັນຢ່າງກົງໄປກົງມາ, ແທດເໝາະກັບສະພາບຕົວຈິງ ໃຫ້ເຫັນໄດ້ດ້ານດີ, ດ້ານອ່ອນ, ບັນຫາຄົງຄ້າງ ແລະ ຊອກຫາວິທີແກ້ໄຂ ກ່ຽວກັບການຈັດຕັ້ງປະຕິບັດ ແລະ ການມີສ່ວນຮ່ວມໃນການບູລະນະສ້ອມແປງເສັ້ນທາງເປ່ເພຈາກການຂົນສົ່ງແຮ່ທາດ ເພື່ອເປັນຂໍ້ມູນພື້ນຖານໃນການສັງລວມລາຍງານຕໍ່ກອງປະຊຸມສະໄໝສາມັນຂອງສະພາແຫ່ງຊາດ ແລະ ຄະນະປະຈໍາສະພາແຫ່ງຊາດ.

ນອກຈາກນີ້, ຍັງໄດ້ລົງເຮັດວຽກຢູ່ພາກສະໜາມຂອງບັນດາໂຄງການລົງທຶນຂະໜາດໃຫຍ່ ເປັນຕົ້ນ: ໂຄງການພະລັງງານລົມ (ມອນຊູນ ວິນ ພາວເວີ), ໂຄງການຂຸດຄົ້ນແຮ່ບົກຊິດ ຂອງບໍລິສັດ ລາວບໍລິການ, ບໍລິສັດ ເບີນດາວ ກໍ່ສ້າງຂົວ-ທາງ ແລະ ເຄຫາສະຖານ ຈໍາກັດ ແລະ ລົງຕິດຕາມເສັ້ນທາງຂົນສົ່ງແຮ່ທາດ, ເຄື່ອງອຸປະກອນ, ເຄື່ອງຈັກ ທີ່ນໍາມາຮັບໃຊ້ບັນດາໂຄງການລົງທຶນ ຄື: ເສັ້ນທາງຫຼວງແຫ່ງຊາດ ເລກທີ 16b ອອກໄປຫາດ່ານສາກົນດາກຕະອອກ ແຂວງເຊກອງ, ເສັ້ນທາງຫຼວງແຫ່ງຊາດ ເລກທີ 15 ອອກໄປຫາດ່ານສາກົນລາໄລ ແຂວງສາລະວັນ, ເສັ້ນທາງຫຼວງແຫ່ງຊາດ ເລກທີ 18b ອອກໄປຫາດ່ານສາກົນພູເກືອ ແຂວງອັດຕະປື ໂດຍໄດ້ຮັບຟັງລາຍງານການດໍາເນີນຂອງໂຄງການໂດຍຫຍໍ້ ໃນນັ້ນໄດ້ຍົກໃຫ້ເຫັນການມີສ່ວນຮ່ວມພັດທະນາເຂດບ້ານຕິດກັບໂຄງການ ເປັນຕົ້ນ: ຊ່ວຍດ້ານງົບປະມານບໍລິຫານ, ປະກອບສ່ວນຊ່ວຍເຫຼືອຫຼາຍດ້ານ ເຊິ່ງໃນແຜນປີ 2025 ໂຄງການຍັງຈະໄດ້ສົມທົບກັບພາກສ່ວນທີ່ກ່ຽວຂ້ອງ ສືບຕໍ່ສ້ອມແປງເສັ້ນທາງທີ່ເປ່ເພ.