ບົດປະກອບຄຳເຫັນຂອງ ກໍາມາທິການແຜນການ,ການເງິນ ແລະ ການກວດສອບ

ສະພາແຫ່ງຊາດ ຕໍ່​ບົດ​ລາຍ​ງານ ຂອງອົງການກວດສອບແຫ່ງລັດ ແລະ ອົງການກວດກາລັດຖະບານ

ທີ່ສະເໜີ ລາຍງານຢູ່ໃນກອງປະຊຸມ​ສະ​ໄໝ​ສາມັນ​ ເທື່ອ​ທີ 4 ຂອງ​ສະພາ​ແຫ່ງ​ຊາດ ຊຸດ ທີ VIII

ຮຽນ: ທ່ານ ປະທານ ຄະນະ​ປະທານ ກອງປະຊຸມ ທີ່ເຄົາລົບ ແລະ ນັບຖືຢ່າງສູງ,

• ທ່ານ ນາຍົກລັດຖະມົນຕີ ແຫ່ງ ສປປ ລາວ ທີ່ເຄົາລົບ ແລະ ນັບຖືຢ່າງສູງ,
• ບັນດາທ່ານຄະນະປະຈຳສະພາແຫ່ງຊາດ, ສະມາຊິກສະພາແຫ່ງຊາດ ທີ່ນັບຖື,
• ບັນດາ​ທ່ານ​ສະມາຊິກ​ລັດຖະບານ, ບັນດາ​ທ່ານ ແຂກຜູ້ມີກຽດ ທີ່ນັບຖື ແລະ ຮັກແພງ.

ຂ້າພະເຈົ້າພາກພູມ​ໃຈ ​ແລະ ​ເປັນ​ກຽດ​ຢ່າງ​ສູງ ທີ່ໄດ້ຮັບອະນຸຍາດຈາກ ທ່ານປະທານກອງ​ປະຊຸມ  ຕາງໜ້າກໍາມາທິການແຜນການ, ການເງິນ ແລະ ການກວດສອບ ປະກອບ​ຄໍາ​ເຫັນຕໍ່ບົດລາຍງານຂອງອົງການກວດສອບແຫ່ງລັດ ແລະ ບົດລາຍງານຂອງອົງການກວດກາລັດຖະບານ.

ຜ່ານການຮັບ​ຟັງການ​ລາຍ​ງານ​ຂອງ ​ທ່ານປະທານ ອົງການ​ກວດ​ສອບ​ແຫ່ງ​ລັດ ແລະ ອົງການກວດກາລັດຖະບານ  ກໍາມາ​ທິການ ເຫັນດີ, ເປັນເອກະພາບ ແລະ ສະແດງຄວາມຊົມເຊີຍທີ່ສອງອົງການໄດ້ມີຄວາມພະຍາຍາມ ແລະ ເອົາໃຈໃສ່ໃນການປະຕິບັດໜ້າທີ່ດ້ວຍຄວາມຮັບຜິດຊອບ ແລະ ມີຜົນສຳເລັດຢ່າງຫຼວງຫຼາຍ. ຂໍອະນຸຍາດປະກອບຄຳເຫັນມີ 3 ພາກ ​​ດັ່ງ​ນີ້:

1. ບົດລາຍງານຂອງອົງການກວດສອບແຫ່ງລັດ

1. ຜົນການກວດສອບ​ບົດ​ສະຫຼຸບ​ຂາດ​ຕົວ ​​ການຈັດຕັ້ງປະຕິບັດແຜນງົບປະມານ​ແຫ່ງ​ລັດ ປະຈຳສົກປີ 2015-2016.
   1. ກ່ຽວກັບການກວດສອບຄືນການຈັດຕັ້ງປະຕິບັດມາດຕະການແນະນຳປັບປຸງຜົນການກວດສອບຕາມມະຕິຂອງສະພາແຫ່ງຊາດ

ອົງການກວດສອບແຫ່ງລັດ ໄດ້ປະສານສົມທົບກັບຫົວໜ່ວຍງົບປະມານທີ່ຖືກກວດສອບ ແກ້ໄຂການລະເມີດຜົນການກວດສອບ ແລະ ເກັບກູ້ເງິນເຂົ້າງົບປະມານ ຕົວຢ່າງໃນສົກປີ 2014-2015 ສາມາດເກັບກູ້ເງິນຄືນເຂົ້າງົບປະມານແຫ່ງລັດໄດ້ພຽງແຕ່ 42,81 ຕື້ກີບ ເທົ່າກັບ 10,47% ຂອງຈຳນວນເງິນທີ່ກວດເຫັນລາຍຮັບເພີ່ມ ຈຳນວນ 408,86 ຕື້ກີບ ແລະ ໄດ້ສ້າງແຜນມອບເຂົ້າງົບປະມານ 0,32 ຕື້ກີບ ຫຼື ເທົ່າກັບ 0,07% ຂອງລາຍຈ່າຍທີ່ກວດເຫັນເພີ່ມຈຳນວນ 406,28 ຕື້ກີບ, ສ່ວນທີ່ເຫຼືອຂອງລາຍຮັບ-ລາຍຈ່າຍ ຈຳນວນ 771,63  ຕື້ກີບຍັງບໍ່ໄດ້ຮັບການແກ້ໄຂ.

ສຳລັບບ້ວງລາຍຈ່າຍລ່ວງໜ້າຄັງເງິນແຫ່ງຊາດ ຈຳນວນ 1.765,31 ຕື້ກີບ ກະຊວງການເງິນ ໄດ້ ແຕ່ງຕັ້ງຄະນະແກ້ໄຂຜົນການກວດສອບ ແລະ ໄດ້ປະສານສົມທົບກັບອົງການກວດສອບແຫ່ງລັດ ເພື່ອສືບຕໍ່ດຳເນີນການແກ້ໄຂ.

ສັງເກດເຫັນວ່າ ການແກ້ໄຂຜົນການກວດສອບດັ່ງກ່າວບໍ່ໄດ້ປະຕິບັດຕາມລາຍການທີ່ກຳນົດໃນມາດຕາ 3 ຂອງມະຕິກອງປະຊຸມສະພາແຫ່ງຊາດ ສະບັບເລກທີ 012/ສພຊ, ລົງວັນທີ 31/10/2016 ແລະ ຍັງເຮັດໄດ້ໜ້ອຍຍ້ອນວ່າ: ການປະສານງານລະຫວ່າງອົງການກວດສອບກັບເປົ້າໝາຍກວດສອບ ຢູ່ຂັ້ນສູນກາງ ແລະ ຂັ້ນທ້ອງຖິ່ນ ຍັງມີຄວາມຫຍຸ້ງຍາກ, ການນຳແຕ່ລະຂັ້ນຍັງບໍ່ທັນໄດ້ເອົາໃຈໃສ່ ຢ່າງເຖິງຖອງ ໃນການປະຕິບັດການແກ້ໄຂຜົນການກວດສອບ ຕາມຂໍ້ແນະນຳຂອງອົງການກວດສອບແຫ່ງລັດ. ການສົ່ງບົດລາຍງານ, ບົດສະຫຼຸບການເງິນໃຫ້ອົງການກວດສອບແຫ່ງລັດ ບໍ່ເປັນປົກະຕິ, ການສະໜອງຂໍ້ມູນ ແລະ ຫຼັກຖານ ໃຫ້ໜ່ວຍງານກວດສອບ ຍັງຊັກຊ້າ ແລະ ການສະຫຼຸບເອກະສານ ຍັງບໍ່ທັນຖືກຕ້ອງ.

1. ການກວດສອບບົດສະຫຼຸບຂາດຕົວງົບປະມານແຫ່ງລັດສົກປີ 2015-2016

ກວດສອບ​ເຫັນລາຍຮັບເພີ່ມ ຈຳນວນ 689,61 ຕື້ກີບ, ທຽບໃສ່ສົກປີ 2014-2015 ຫຼຸດລົງ 15,33%, ກວດສອບເຫັນລາຍຈ່າຍເພີ່ມຈໍານວນ  1.031,81 ຕື້ກີບ ເມື່ອທຽບກັບການກວດສອບ ປີ 2014-2015 ຫຼຸດລົງ 52,49%, ຊຶ່ງເປັນການຢັ້ງຢືນໃຫ້ເຫັນວ່າ ບັນດາຫົວໜ່ວຍງົບປະມານໄດ້ມີການແກ້ໄຂຕາມຄຳແນະນຳການກວດສອບໃຫ້ດີຂຶ້ນເທື່ອລະກ້າວ.

ດ້ານລາຍຮັບ ແລະ ລາຍຈ່າຍຂອງແຜນງົບປະມານສົກປີ 2015-2016  ມີລາຍຮັບທັງໝົດ 22.977,18 ຕື້ກີບ, ລາຍຈ່າຍທັງໝົດ 31.576,92 ຕື້ກີບ, ຂາດດຸນທັງໝົດ ຈໍານວນ 8.599,74 ຕື້ກີບ ເທົ່າກັບ 7,92% ຂອງ GDP ​ຖ້າ​ທຽບ​ໃສ່ຕົວເລກຂາດດູນສະພາແຫ່ງຊາດຮັບຮອງ​ແມ່ນ       6,43% ຂອງ GDP ​ຊຶ່ງຜິດ​ດ່ຽງເພີ່ມຂຶ້ນ 1,49% ຂອງ GDP ເຫັນວ່າ ຕົວເລກຂາດດູນຍັງສູງຖ້າທຽບໃສ່ການຄາດຄະເນຂອງແຜນງົບປະມານ 5 ປີຄັ້ງທີ​ VIII ຊຶ່ງ​ໄດ້ສົ່ງຜົນກະທົບຕໍ່ໜີ້ສິນພາກລັດ ແລະ ສະຖຽນລະພາບທາງດ້ານການເງິນ-ເງິນຕາແຫ່ງລັດ.

ຈາກການລາຍງານຂອງອົງການກວດສອບແຫ່ງລັດ ສະແດງໃຫ້ເຫັນວ່າ ການຈັດຕັ້ງປະຕິບັດແຜນງົບປະມານແຫ່ງລັດ ສົກປີ 2015-2016 ຍັງມີການສືບຕໍ່ການລະເມີດວິໄນແຜນການ-ການເງິນດັ່ງນີ້:

• ການລະເມີດວິໄນແຜນການ: ຕົວຢ່າງສົກປີ 2015-2016 ໄດ້ກວດພົບເຫັນໂຄງການນອກແຜນຈຳນວນ 120 ໂຄງການ ມູນຄ່າ 503,26 ຕື້ກີບ, ໂຄງການທີ່ບໍ່ໄດ້ປະເມີນແຕ່ເອົາເຂົ້າແຜນ ຈຳນວນ 161 ໂຄງການ ມູນຄ່າ 13.101,85 ຕື້ກີບ ນອກຈາກນີ້ກໍ່ຍັງມີໂຄງການບໍ່ມີບົດສຶກສາຄວາມເປັນໄປໄດ້, ບໍ່ມີບົດລາຍງານການສຳຫຼວດອອກແບບ,  ບໍ່ມີບົດວິພາກເສດຖະກິດ-ເຕັກນິກ ແລະ ບົດປະເມີນຜົນຕໍ່ສິ່ງແວດລ້ອມ ແລະ ສັງຄົມ ແຕ່ອອກໃບຢັ້ງຢືນປະເມີນຜົນໂຄງການ ແລະ ໂຄງການບໍ່ໄດ້ຈັດຕັ້ງປະຕິບັດການປະມູນ, ໂຄງການຈັດຕັ້ງປະຕິບັດແລ້ວ ຈຶ່ງອອກໃບຢັ້ງຢືນປະເມີນຜົນ ເປັນໂຄງການສະເໜີໃໝ່ເພື່ອເອົາເຂົ້າແຜນ, ໂຄງການລາຄາຫົວໜ່ວຍກໍ່ສ້າງສູງກວ່າລາຄາກາງ            ເຮັດໃຫ້ມູນຄ່າການກໍ່ສ້າງສູງກວ່າຄວາມເປັນຈິງ ແລະ ໃນເວລາປະຕິບັດການຊຳລະສະສາງກໍ່ຍັງພົບເຫັນການຈ່າຍຊ້ຳຊ້ອນ ແລະ  ຈ່າຍເກີນແຜນ. ບັນຫາທີ່ເກີດຂຶ້ນເຫຼົ່ານີ້ສະແດງເຖິງການບໍ່ປະຕິບັດຕາມມາດຕາ 18, 19 ແລະ 24 ຂອງກົດໝາຍວ່າດ້ວຍການລົງທຶນຂອງລັດ ແລະ ກົດໝາຍອື່ນໆທີ່ກ່ຽວຂ້ອງ.
• ການລະເມີດວິໄນການເງິນ: ຕົວຢ່າງ ສົກປີ 2015-2016 ໄດ້ກວດເຫັນລາຍຮັບເພີ່ມ 689,61 ຕື້ກີບ ໃນທາງປະຕິບັດຕົວຈິງການກວດສອບເຫັນລາຍຮັບເພີ່ມດັ່ງກ່າວ ເປັນພຽງການສະຫຼຸບບັນຊີເທົ່ານັ້ນ, ເນື່ອງຈາກຫົວໜ່ວຍງົບປະມານທີ່ຖືກກວດສອບໄດ້ເອົາໄປຈ່າຍກ່ອນການຮັບຮອງຂອງສະພາແຫ່ງຊາດ ແລະ ບໍ່ຖືກເປົ້າໝາຍຈຳນວນ 207,27 ຕື້ກີບ ສ່ວນທີ່ເຫຼືອຄວນຊອກໃຫ້ເຫັນສາເຫດຂອງການຄຸ້ມຄອງການນຳໃຊ້ເງິນບ້ວງດັ່ງກ່າວ. ນີ້ສະແດງໃຫ້ເຫັນວ່າ: ການບໍ່ລວມສູນງົບປະມານແຫ່ງລັດ ຍັງເຫັນຫຼາຍບັນຫາທີ່ມີລັກສະນະຊໍ້າເຮື້ອ ບໍ່ທັນໄດ້ຮັບການແກ້ໄຂໄດ້ ເປັນຕົ້ນ ການມອບລາຍຮັບວິຊາການ, ກອງທຶນ ແລະ ອື່ນໆ ທີ່ຍັງບໍ່ຄົບຖ້ວນ ແລະ ເອົາລາຍຮັບໄປຈ່າຍກ່ອນ, ການລ່ວງໜ້າຄັງເງິນທີ່ບໍ່ນອນໃນແຜນງົບປະມານປະຈຳປີ ຊຶ່ງບໍ່ສອດຄ່ອງຕາມມາດຕາ 6, ມາດຕາ 8 ແລະ ມາດຕາ 10 ຂອງກົດໝາຍວ່າດ້ວຍງົບປະມານແຫ່ງລັດ.

1. ການເຄື່ອນໄຫວວຽກງານກວດສອບປະຈຳປີ 2017 ແລະ ທິດທາງແຜນການ ເຄື່ອນໄຫວປີ​ 2018.

2.1​ ການເຄື່ອໄຫວປະຈຳປີ 2017

• ດ ໄດ້ເອົາໃຈໃສ່ປະຕິບັດວຽກງານຈຸດສຸມຕາມແຜນການເຄື່ອນໄຫວປະຈຳປີ​ມີຜົນສຳເລັດດັ່ງນີ້:

1. ສຳເລັດການກວດ​ສອບ 119 ເປົ້າໝາຍ ທຽບໃສ່ແຜນການ 90 ເປົ້າໝາຍ ລື່ນແຜນການ 29 ເປົ້າໝາຍ ຫຼື ເທົ່າກັບ 32%.
2. ປັບປຸງ ແລະ ສ້າງຄວາມເຂັ້ມແຂງດ້ານການຈັດຕັ້ງ ແລະ ວິຊາສະເພາະໃຫ້ອົງການກວດສອບປະຈຳພາກ ສາມາດລາຍງານຜົນການກວດສອບ ບົດສະຫຼຸບຂາດຕົວການຈັດຕັ້ງປະຕິບັດງົບປະມານແຫ່ງລັດສົກປີ 2014-2015 ຕໍ່ກອງປະຊຸມສະພາປະຊາຊົນຂັ້ນແຂວງສຳເລັດໃນຂອບເຂດທົ່ວປະເທດ.
3. ເຜີຍແຜ່ແນະນຳກົດໝາຍ ແລະ ນິຕິກຳລຸ່ມກົດໝາຍ ກ່ຽວກັບວຽກງານກວດສອບ,  ໄດ້ປັບປຸງລະບົບກົນໄກປະສານງານວຽກງານການກວດສອບ ແລະ ການກວດກາລັດ ຢູ່ຂັ້ນສູນກາງ ແລະ ປະຈຳພາກ ລວມທັງການຮ່ວມມືກັບສະຖາບັນກວດສອບສາກົນ ສອງຝ່າຍ ແລະ ພາກພື້ນ.

ແຕ່ເຖິງຢ່າງໃດກໍຕາມ ອົງການກວດສອບແຫ່ງລັດ ກໍ່ຍັງມີຂໍ້ຈຳກັດໃນການປະຕິບັດການກວດສອບໃຫ້ຄົບຖ້ວນທຸກປະເພດຂອງການກວດສອບ, ການປະສານງານໃນການສະໜອງຂໍ້ມູນຫຼັກຖານເພື່ອຮັບປະກັນຄຸນນະພາບການກວດສອບຍັງພົບຄວາມຫຍຸ້ງຍາກ, ການປະຕິບັດສິດ ແລະ ໜ້າທີ່ຂອງຕົນໃນການແກ້ໄຂການລະເມີດຕາມທີ່ກຳນົດໄວ້ໃນມາດຕາ 19 ຂອງກົດໝາຍວ່າດ້ວຍການກວດສອບຍັງບໍ່ທັນສາມາດປະຕິບັດຢ່າງກວ້າງຂວາງ ແລະ ເລິກເຊິ່ງ. ນອກຈາກນັ້ນ ງົບປະມານ ແລະ ນັກກວດສອບທີ່ມີປະສົບການຊຳນານງານກໍ່ຍັງຈຳກັດ ແລະ ງົບປະມານບໍ່ສາມາດຕອບສະໜອງຕາມແຜນການທີ່ກຳນົດໄວ້.

2.2 ທິດທາງແຜນການເຄື່ອນໄຫວໃນປີ 2018

ຕໍ່ກັບທິດທາງແຜນການເຄື່ອນໄຫວໃນປີ 2018 ອົງການກວດສອບແຫ່ງລັດ ຂຶ້ນແຜນກວດສອບທັງໝົດ 99 ເປົ້າໝາຍ ເທົ່າກັບ 93,19% ຂອງການຈັດຕັ້ງປະຕິບັດແຜນການເຄື່ອນໄຫວໃນປີຜ່ານມາ. ກໍາມາ​ທິການເຫັນວ່າ ການຄັດຈ້ອນເປົ້າໝາຍກວດສອບເຫັນວ່າ ຮັດກຸມ, ມີຈຸດສຸມກວ່າເກົ່າ ແລະ ທັງເປັນການປະຕິບັດຢ່າງເຂັ້ມງວດຕາມມະຕິສະພາແຫ່ງຊາດສະບັບເລກທີ 012/ສພຊ ລົງວັນທີ 31/10/2016. ກຳມາທິການ ສະເໜີໃຫ້ເອົາໃຈໃສ່ດັ່ງນີ້:

1. ເອົາໃຈໃສ່ຄົ້ນຄວ້າເປົ້າໝາຍກວດສອບໂຄງການທີ່ເປັນບູລິມະສິດທີ່ໄດ້ກຳນົດໃນແຜນພັດທະນາເສດຖະກິດ-ສັງຄົມ, ແຜນງົບປະມານແຫ່ງລັດ ແລະ ແຜນເງິນຕາ ໂດຍສະເພາະ:

• ໂຄງການລະດັບຊາດ,ໂຄງການລົງທຶນຂະໜາດໃຫຍ່;
• ໂຄງການພັດທະນາຊົນນະບົດ ແລະ ແກ້ໄຂຄວາມທຸກຍາກ;
• ໂຄງການເພື່ອບັນລຸເປົ້າໝາຍສະຫັດສະຫວັດເພື່ອການພັດທະນາ (MDGs) ເພື່ອກ້າວໄປສູ່ການພັດທະນາແບບຍືນຍົງ (SDGs) ແລະ ໂຄງການຊ່ວຍເຫຼືອລ້າ ແລະ ກູ້ຢືມ.

1. ເອົາໃຈໃສ່ຊີ້ນຳອົງການກວດສອບປະຈຳພາກເໜືອ, ພາກກາງ ແລະ ພາກໃຕ້ ສະຫຼຸບລາຍງານຜົນການເຄື່ອນໄຫວ ແລະ ຜົນການກວດສອບປະຈຳປີ ບົນພື້ນຖານປະສານສົມທົບກັບອົງການກວດກາລັດປະຈຳຂັ້ນແຂວງ ເພື່ອລາຍງານຄະນະປະຈຳສະພາປະຊາຊົນຂັ້ນແຂວງ ຫຼື ຕໍ່ກອງປະຊຸມສະໄໝສາມັນສະພາປະຊາຊົນຂັ້ນແຂວງ ເພື່ອພິຈາລະນາ ແລະ ຮັບຮອງ.
2. ຍົກສູງຄຸນນະພາບວຽກງານກວດສອບແຫ່ງລັດ ແລະ ສູ້ຊົນໃຫ້ສາມາດດຳເນີນການກວດສອບ ໃຫ້ຄົບຖ້ວນທຸກປະເພດຂອງການກວດສອບ ເຊັ່ນ: ກວດສອບເອກະສານລາຍງານການເງິນ, ກວດສອບຄວາມສອດຄ່ອງທາງດ້ານກົດໝາຍ ແລະ ກວດສອບຜົນການຈັດຕັ້ງປະຕິບັດ ຕາມທີ່ກຳນົດໄວ້ໃນມາດຕາ 5, 6, 21 ແລະ 22 ຂອງກົດໝາຍວ່າດ້ວຍການກວດສອບແຫ່ງລັດ.

1. ກ່ຽວກັບບົດລາຍງານຂອງອົງການກວດກາລັດຖະບານ

1. ຜົນການກວດກາຕາມຜົນການກວດສອບສົກປີ​ 2013-2014.

ອົງການກວດກາລັດຖະບານ ໄດ້ດຳເນີນການກວດກາຫົວໜ່ວຍງົບປະມານທີ່ຖືກກວດສອບເປັນຕົ້ນແມ່ນໂຄງການນອກແຜນ ຈຳນວນ 118 ໂຄງການ ໃນນີ້ໄດ້ສຳເລັດກວດກາລະອຽດ 65 ໂຄງການ ເທົ່າກັບ 55,08% ສ່ວນບັນດາໂຄງການທີ່ຍັງເຫຼືອ ແມ່ນໄດ້ນຳເອົາສັນຍາ ແລະ ເອກະສານທີ່ກ່ຽວຂ້ອງມາສຶກສາຄົ້ນຄວ້າເປັນແຕ່ລະໂຄງການ. ໃນຈຳນວນ 118 ໂຄງການ ປະຕິບັດສຳເລັດ 100% ແລ້ວ 55 ໂຄງການ ສ່ວນທີ່ຍັງເຫຼືອ 63 ໂຄງການ ແມ່ນໄດ້ເອົາເຂົ້າແຜນແລ້ວ 39 ໂຄງການ   ແລະ ຍັງເຫຼືອ 24 ໂຄງການນອກແຜນຍັງບໍ່ທັນສາມາດສຳເລັດໃນການແກ້ໄຂ.

ຜ່ານການກວດກາໄດ້ພົບເຫັນການລະເມີດວິໄນແຜນການ ຕົວຢ່າງ ໃນສົກປີ 2013-2014 ການຊຳລະໂຄງການລົງທຶນຂອງລັດມູນຄ່າ 179,64 ຕື້ກີບ ແຕ່ກະຊວງແຜນການ ແລະ ການລົງທຶນ ຍັງບໍ່ທັນໄດ້ຕັດອອກຈາກສາລະບານງົບປະມານການລົງທຶນຂອງລັດ ແລະ ອີກ 105,98 ຕື້ກີບ ເຈົ້າຂອງໂຄງການຍັງບໍ່ທັນໄດ້ຕັດອອກຈາກມູນຄ່າໂຄງການ.

ສຳລັບການລະເມີດວິໄນການເງິນ ຕົວຢ່າງ ໃນສົກປີ 2013-2014 ຫົວໜ່ວຍງົບປະມານໄດ້ເອົາເງິນໃຫ້ບຸກຄົນ, ນິຕິບຸກຄົນ ແລະ ການຈັດຕັ້ງກູ້ຢືມທີ່ບໍ່ຖືກຕ້ອງຕາມກົດໝາຍ, ເງິນຄ້າງມອບ ແລະ ລາຍຮັບທີ່ກວດເຫັນເພີ່ມ ຈຳນວນ 971,51 ຕື້ກີບ, ໃນນີ້ໄດ້ຊຸກຍູ້ໃຫ້ບັນດາຫົວໜ່ວຍງົບປະມານເກັບກູ້ເງິນຄືນເຂົ້າງົບປະມານໄດ້ແລ້ວ 199,73 ຕື້ກີບ ເທົ່າກັບ 20,55%. ນອກນັ້ນ ບາງອົງການປົກຄອງທ້ອງຖິ່ນກໍ່ໄດ້ປະກອບເອກະສານເພື່ອປະຕິບັດຕາມຂັ້ນຕອນຂະບວນການຍຸຕິທຳ ຈຳ ນວນ 1 ກໍລະນີ.

1. ຜົນການກວດກາຕາມຜົນການກວດສອບສົກປີ 2014-2015.

ອົງການກວດກາລັດຖະບານ ກຳລັງດັດແກ້ຂັ້ນຕອນສືບຕໍ່ກວດກາການລະເມີດວິໄນແຜນການຕາມເອກະສານລະອຽດຂອງກະຊວງແຜນການ ແລະ ການລົງທຶນ ແລະ ຕາມຂໍ້ມູນທີ່ອົງການກວດສອບແຫ່ງລັດມອບໃຫ້. ມາຮອດປີ 2017 ອົງການກວດກາລັດຖະບານກໍ່ໄດ້ສັງລວມໂຄງການນອກແຜນຢູ່ 10 ແຂວງໄດ້ຕື່ມອ່ີກຈຳນວນ 285 ໂຄງການ ມູນຄ່າ 4.483,82 ຕື້ກີບ, ສະຫຼຸບລວມແລ້ວເຫັນວ່າປະຈຸບັນຍັງມີໂຄງການນອກແຜນທີ່ກຳລັງດຳເນີນຢູ່ຈຳນວນ 309 ໂຄງການ ມູນຄ່າ 4.975,88 ຕື້ກີບ.

ການລະເມີດວິໄນການເງິນ ຕາມທີ່ອົງການກວດສອບແຫ່ງລັດໄດ້ມອບໃຫ້ ອົງການການກວດກາລັດຖະບານສືບຕໍ່ກວດກາ ແລະ ໄດ້ພົບເຫັນການຍົກເວັ້ນພາສີ-ອາກອນນຳເຂົ້າ ເຄື່ອງກໍ່ສ້າງ, ພາຫະນະ, ນໍ້າມັນເຊື້ອໄຟ ແລະ ການສົ່ງອອກແຮ່ທາດ ມູນຄ່າ 2.698,49 ຕື້ກີບ ກວດເຫັນເພີ່ມຈາກຕົວເລກທີ່ອົງການກວດສອບແຫ່ງລັດມອບໃຫ້ 2.407,28 ຕື້ກີບ ທີ່ບໍ່ສອດຄ່ອງກົດໝາຍ ແລະ ລະບຽບການ.

ສັງລວມແລ້ວ ການກວດກາຕາມຜົນການກວດສອບໃນ 2 ສົກປີຜ່ານມາ ສ່ອງແສງໃຫ້ເຫັນການລະເມີດກົດໝາຍຂົງເຂດແຜນການ-ການເງິນ ຍັງຄົງເປັນບັນຫາກະທົບເຖິງການຄຸ້ມຄອງເສດຖະກິດ, ການເງິນ ແລະ ເງິນຕາຂອງປະເທດ, ແຕ່ການແກ້ໄຂຕົວຈິງຍັງເຮັດໄດ້ໜ້ອຍ ຍ້ອນວ່າ: ສະຕິເຄົາລົບກົດໝາຍຍັງບໍ່ທັນສູງ, ອຳນາດບໍລິຫານລັດຍັງບໍ່ທັນເດັດຂາດທີ່ຈະແກ້ໄຂປະກົດການຫຍໍ້ທໍ້ທີ່ໄດ້ກວດກາພົບເຫັນຕໍ່ການລະເມີດວິໄນແຜນການ-ການເງິນ; ການແກ້ໄຂສ່ວນໃຫຍ່ຍັງໃຊ້ແຕ່ມາດຕະການທາງດ້ານບໍລິຫານ, ການເຜີຍແຜ່ແນະນຳນິຕິກຳທີ່ໃຊ້ເປັນບ່ອນອີງໃນການແກ້ໄຂຜົນການກວດກາຕໍ່ຜູ້ລະເມີດ ຍັງບໍ່ທັນກວ້າງຂວາງ ແລະ ເປັນເອກະພາບໃນທາງປະຕິບັດ, ການປະສານງານວຽກງານກວດກາລັດ ລະຫວ່າງ ຂະແໜງການທີ່ກ່ຽວຂ້ອງຢູ່ສູນກາງ ແລະ ທ້ອງຖິ່ນ ຍັງພົບຄວາມຫຍຸ້ງຍາກ, ຊັກຊ້າ, ຄວາມຮັບຮູ້ ແລະ ຄວາມເຂົ້າໃຈກ່ຽວກັບວຽກງານກວດກາລັດ ຍັງບໍ່ທັນທົ່ວເຖິງ, ຍັງບໍ່ທັນເອກະພາບ ແລະ ບໍ່ທັນສາມາດບຸກທະລຸ.

1. ທິດທາງແຜນການເຄື່ອນໄຫວກວດກາຕາມຜົນການກວດສອບ.

ການເຄື່ອນໄຫວກວດກາຂອງອົງການກວດກາລັດຖະບານໃນປີ 2017 ໄດ້ສຸມໃສ່ກວດກາລົງເລິກ, ວິເຄາະ ແລະ ໄຈ້ແຍກຕາມຂໍ້ມູນທີ່ອົງການກວດສອບແຫ່ງລັດໄດ້ສະເໜີມາ ເປັນຕົ້ນ ແມ່ນການສືບຕໍ່ກວດກາຕາມຜົນການກວດສອບສົກປີ 2013-2014 ແລະ ສົກປີ 2014-2015 ທີ່ຍັງຄ້າງຄາ ແລະ ກຳລັງສືບຕໍ່ກວດກາຕາມຜົນການກວດສອບສົກປີ 2015-2016 ທີ່ອົງການກວດສອບແຫ່ງລັດຈະມອບໃຫ້ ເພື່ອກວດກາຕາມຜົນການກວດສອບ.

ກຳມາທິການ ເຫັນດີຕໍ່ທິດທາງແຜນການເຄື່ອນໄຫວໃນປີ 2018 ຂອງອົງການກວດກາລັດຖະ ບານ ແລະ ຄວນເອົາໃຈໃສ່ດັ່ງນີ້:

1. ອົງການກວດກາລັດຖະບານເຮັດໜ້າທີ່ມະຫາພາກໃນການອຳນວຍຄວບຄຸມວຽກງານກວດກາລັດຕາມສາຍຕັ້ງຂອງຕົນ, ກວດກາໂຄງການຂະໜາດໃຫຍ່, ມູນຄ່າສູງ, ເຕັກນິກສັບສົນ ແລະ ມີຜົນກະທົບທາງດ້ານສິ່ງແວດລ້ອມ ທຳມະຊາດ ແລະ ສັງຄົມ, ນອກນັ້ນແມ່ນມອບໃຫ້ແຂວງ ແລະ ກະຊວງ-ອົງການເປັນຜູ້ດຳເນີນການກວດກາ ແລະ ແກ້ໄຂ.
2. ເອົາໃຈໃສ່ພັດທະນາບຸກຄະລາກອນພາຍໃນອົງການກວດກາລັດນັບແຕ່ສູນກາງຮອດທ້ອງຖິ່ນໃຫ້ມີຄວາມຮູ້, ຄວາມສາມາດທາງດ້ານວິຊາສະເພາະ ແລະມີຈັນຍາບັນທາງວິຊາການໃນການກວດກາລັດ.
3. ເອົາໃຈໃສ່ປະສານສົມທົບກັບອົງການກວດສອບແຫ່ງລັດໃນການແລກປ່ຽນຂໍ້ມູນ ຫຼັກຖານ ການລະເມີດວິໄນແຜນການ-ການເງິນ ເພື່ອສາມາດດຳເນີນການສືບສວນ-ສອບສວນ ຊອກຫາຜູ້ກະທຳຜິດໄດ້ຢ່າງທັນການ ແລະ ສາມາດຄົ້ນຄ້ວາວິທີແກ້ໄຂຢ່າງຖືກຕ້ອງ ແລະ ສອດຄ່ອງ ຕາມມາດຕາ 23 ຂອງກົດໝາຍ ວ່າດ້ວຍການກວດກາລັດ.

ຮຽນ ທ່ານ ປະທານ, ຄະນະປະທານ, ບັນດາທ່ານທີ່ນັບຖື

1. ວິທີການ, ມາດຕະການ, ຜົນໄດ້ຮັບ ແລະ ຂໍ້ສະເໜີ

ເພື່ອຮັບປະກັນການຈັດ​ຕັ້ງ​ປະຕິບັ​ດທິດທາງແຜນການເຄື່ອນໄຫວວຽກງານ ຂອງອົງການກວດສອບແຫ່ງລັດ ແລະ ອົງການກວດກາລັດຖະບານ ໃນຊຸມປີຕໍ່ໜ້າໃຫ້ໄດ້ຮັບຜົນສຳເລັດຕາມທິດທາງແຜນການທີ່ກຳນົດໄວ້. ກໍາມາ​ທິການ​ ເຫັນດີຕາມວິທີການ ແລະ ມາດຕະການແກ້ໄຂຂອງ 2 ອົງການໄດ້ສະເໜີຕໍ່ກອງປະຊຸມຄັ້ງນີ້. ກໍາ​ມາທິການ​ ສະເໜີ​ ວິທີການ ແລະ ມາດຕະການແກ້ໄຂດັ່ງນີ້:

3.1 ວິທີການ ແລະ ມາດຕະການແກ້ໄຂ

1. ເອົາໃຈໃສ່ສ້າງຄວາມເຂັ້ມແຂງໃຫ້ແກ່ວຽກງານກວດສອບ ແລະ ກວດກາລັດ ເປັນຕົ້ນ ການສ້າງຄວາມອາດສາມາດໃຫ້ແກ່ນັກກວດສອບ ແລະ ນັກກວດກາ ກຳແໜ້ນແນວທາງຂອງພັກ, ນະໂຍບາຍຂອງລັດ, ຍົກສູງທາງດ້ານການເມືອງ ແນວຄິດ, ດ້າານວິຊາສະເພາະ ແລະ ມີຈັນຍາບັນທາງວິຊາການ ຕາມທີ່ກຳນົດໄວ້ໃນມາດຕາ 49 ຂອງກົດໝາຍວ່າດ້ວຍການກວດສອບແຫ່ງລັດ ແລະ ມາດຕາ 60 ຂອງກົດໝາຍວ່າດ້ວຍການກວດກາລັດ.
2. ຜົນການກວດສອບ ແລະ ກວດກາ ຄວນຊີ້ແຈງໃຫ້ເຫັນເຖິງຈຸດອ່ອນ ແລະ ຊ່ອງຫວ່າງຂອງກົດໝາຍ ແລະ ນິຕິກຳລຸ່ມກົດໝາຍທີ່ມີໃນປະຈຸບັນ; ຄວນເພີ່ມທະວີຄົ້ນຄວ້າອອກກົດ  ໝາຍ, ນິຕິກຳລຸ່ມກົດໝາຍຕື່ມ ໂດຍສະເພາະ ມາດຕາ 51 ແລະ ມາດຕາ 53 ​ ຂອງກົດໝາຍວ່າດ້ວຍການກວດສອບແຫ່ງລັດ, ມາດຕາ 40 ຂອງກົດໝາຍວ່າດ້ວຍການຕ້ານການສໍ້ລາດບັງຫຼວງ,  ເພື່ອຮັບປະກັນການປະຕິບັດເນື້ອໃນ ແລະ ຂັ້ນຕອນການກວດສອບ ແລະ ກວດກາ ໃຫ້ໜັກແໜ້ນ, ຮັດກຸມ ແລະ ສອດຄ່ອງກັບຄວາມເປັນຈິງ. ສະໜັບສະໜູນຄວາມພະຍາຍາມຂອງລັດຖະບານທີ່ຈະນຳສະເໜີ 3 ຮ່າງກົດໝາຍຕໍ່ກອງປະຊຸມສະໄໝສາມັນເທື່ອທີ່ 4 ຄື: ກົດໝາຍວ່າດ້ວຍການຄຸ້ມຄອງໜີ້ສິນສາທາລະນະ, ກົດໝາຍວ່າດ້ວຍການຈັດຊື້-ຈັດຈ້າງດ້ວຍທຶນຂອງລັດ ແລະ ກົດໝາຍວ່າດ້ວຍລະບົບການຊຳລະ ຊຶ່ງຈະກາຍເປັນເຄື່ອງມືທີ່ສຳຄັນໃຫ້ແກ່ການຄຸ້ມຄອງວຽກງານແຜນການ, ການເງິນ, ເງິນຕາ ແລະ ໂຄງການລົງທຶນຂອງລັດ ເພື່ອໃຫ້ມີປະສິດທິຜົນ, ຈະສາມາດປະຢັດງົບປະມານ,  ໂປ່ງໃສ ແລະ ກວດສອບໄດ້.
3. ການກຳນົດເປົ້າໝາຍກວດສອບ ແລະ ກວດກາ ຕ້ອງມີຈຸດສຸມໄປຕາມບູລິມະສິດທີ່ກຳນົດໄວ້ໃນແຜນພັດທະນາເສດຖະກິດ-ສັງຄົມ, ແຜນງົບປະມານແຫ່ງລັດ ແລະ ແຜນເງິນຕາ, ຄວນໃຫ້ສົມຄູ່ກັບຄວາມອາດສາມາດຂອງ ພະນັກງານ-ລັດຖະກອນ ແລະ ສອດຄ່ອງກັບສະພາບຄວາມເປັນຈິງໃນການຈັດຕັ້ງປະຕິບັດຕາມມາດຕາ 32 ຂອງກົດໝາຍວ່າດ້ວຍການກວດສອບແຫ່ງລັດ.
4. ເອົາໃຈໃສ່ຫັນເປັນທັນສະໄໝ ໃນຂົງເຂດວຽກງານກວດສອບ ແລະ ກວດກາລັດ ໂດຍເຊື່ອມຕໍ່ເຄື່ອຂ່າຍລະບົບຂໍ້ມູນກັບ ກະຊວງແຜນການ ແລະ ການລົງທຶນ, ກະຊວງການເງິນ, ທະນາຄານແຫ່ງ ສປປ ລາວ, ທະນາຄານທຸລະກິດຂອງລັດ ແລະ ຂົງເຂດອື່ນໆ ທີ່ສ້າງຜົນປະໂຫຍດໃຫ້ແກ່ແຜນພັດທະນາເສດຖະກິດ-ສັງຄົມ, ແຜນງົບປະມານແຫ່ງລັດ, ແຜນເງິນຕາ, ຜົນປະໂຫຍດຂອງຊາດ ແລະ ຂອງປະຊາຊົນ.
5. ທຸກພາກສ່ວນຕ້ອງມີຄວາມຮັບຜິດຊອບ ແລະ ເປັນເຈົ້າການ ເພີ່ມທະວີປະສິດທິພາບ ແລະ ປະສິດທິຜົນໃນການປະຕິບັດວຽກງານກວດສອບ ແລະ ກວດກາລັດ, ຕັດສິນໃຈແກ້ໄຂຜົນການກວດສອບ ແລະ ກວດກາໃຫ້ເຂັ້ມງວດ ແລະ ເດັດຂາດ, ທຸກການກະທຳທີ່ເປັນການລະເມີດກົດໝາຍຕ້ອງໄດ້ຮັບການແກ້ໄຂ ໂດຍການເປັນເຈົ້າການຂອງອົງການກວດສອບແຫ່ງລັດ ແລະ ອົງການກວດກາລັດຖະບານປະຕິບັດຢ່າງເຂັ້ມງວດ ຕາມທີ່ກຳນົດໄວ້ໃນ ມາດຕາ 19 ຂອງກົດໝາຍວ່າດ້ວຍການກວດສອບແຫ່ງລັດ ແລະ ມາດຕາ 23 ຂອງກົດໝາຍວ່າດ້ວຍການກວດກາລັດ, ກົດໝາຍວ່າດ້ວຍການຕ້ານການສໍ້ລາດບັງຫຼວງ ແລະ ປະມວນກົດໝາຍອາຍາ.
6. ເພີ່ມທະວີກົນໄກ ແລະ ການປະສານສົມທົບ ລະຫວ່າງອົງການກວດສອບແຫ່ງລັດ ກັບ ອົງການກວດກາລັດຖະບານ, ສະພາແຫ່ງຊາດ, ສະພາປະຊາຊົນຂັ້ນແຂວງ, ລັດຖະບານ ແລະ ອົງການປົກຄອງທ້ອງຖິ່ນ ໃນການແລກປ່ຽນຄຳຄິດຄຳເຫັນ, ມີວິທີການ ແລະ ມາດຕະການໃນການແກ້ໄຂຜົນການກວດສອບບົດສະຫຼຸບຂາດຕົວງົບປະມານແຫ່ງລັດ ແລະ ຜົນການກວດກາຕາມຜົນການກວດສອບປະຈຳປີ ໃຫ້ແທດເໝາະກັບຄວາມເປັນຈິງ, ມີຄວາມເປັນເອກະພາບ ແລະ ສາມາດແກ້ໄຂໄດ້.
7. ເພີ່ມທະວີການຊີ້ນຳອົງການກວດສອບປະຈຳພາກ ພາກເໜືອ, ພາກກາງ ແລະ ພາກໃຕ້ ບົນພື້ນຖານປະສານສົມທົບ ກັບ ອົງການກວດກາລັດປະຈຳຂັ້ນແຂວງ ເພື່ອລາຍງານຜົນການກວດສອບ ງົບປະມານຂາດຕົວປະຈຳປີຂອງແຂວງ, ນະຄອນຫຼວງ ຕໍ່ສະພາປະຊາຊົນຂັ້ນແຂວງ ຕາມມາດຕາ 37 ຂອງກົດໝາຍວ່າດ້ວຍການກວດສອບແຫ່ງລັດ.
8. ບັນດາອົງການຂັ້ນສູນກາງ ແລະ ທ້ອງຖິ່ນ, ວິສາຫະກິດລັດ ແລະ ທຸກພາກສ່ວນ ຈົ່ງສືບຕໍ່ໃຫ້ການສະໜັບສະໜູນການປະຕິບັດໜ້າທີ່ຂອງ ອົງການກວດສອບແຫ່ງລັດ ແລະ ອົງການກວດກາລັດຖະບານ ປະຕິບັດສິດ ແລະ ໜ້າທີ່ ຕາມທີ່ກຳນົດໄວ້ໃນກົດໝາຍ ວ່າດ້ວຍການກວດສອບແຫ່ງລັດ ແລະ ກົດໝາຍວ່າດ້ວຍການກວດກາລັດ.

3.2​ ຜົນໄດ້ຮັບຈາກການແກ້ໄຂຜົນການກວດສອບ ແລະ ຜົນການກວດກາ.

1. ສາມາດສະກັດກັ້ນ ແລະ ແກ້ໄຂບັນຫາໜີ້ສິນຄຸມເຄືອໃນລະບົບງົບປະມານແຫ່ງລັດ ໃຫ້ຫຼຸດໜ້ອຍຖອຍລົງ, ສາມາດປະຢັດ ແລະ ຂຸດຄົ້ນສ້າງລາຍຮັບເພີ່ມເຕີມເຂົ້າງົບປະມານແຫ່ງລັດ; ຕີຖອຍການລະເມີດວິໄນແຜນການ-ການເງິນ, ຈຳກັດ ແລະ ກ້າວໄປສູ່ການຢຸດຕິໂຄງການລົງທຶນຂອງລັດນອກແຜນງົບປະມານ, ປັບປຸງແຜນການລົງທຶນຂອງລັດໃຫ້ສອດຄ່ອງກັບແຜນພັດທະນາເສດຖະ ກິດ-ສັງຄົມ ແລະ ຄວາມອາດສາມາດຊຳລະຂອງງົບປະມານແຫ່ງລັດ ໃນແຕ່ລະໄລຍະ.
2. ຜ່ານການກວດສອບ ແລະ ກວດກາ ຈະເຮັດໃຫ້ການຄຸ້ມຄອງລະບົບງົບປະມານແຫ່ງລັດ ມີຄວາມເຂັ້ມແຂງ, ຮັບປະກັນຄວາມໂປ່ງໃສ ແລະ ສາມາດກວດສອບໄດ້, ຈະເຮັດການປະຕິບັດມາດຕະການຕໍ່ບຸກຄົນ, ນິຕິບຸກຄົນ, ການຈັດຕັ້ງ ແລະ ຫົວໜ່ວຍງົບປະມານທີ່ລະເມີດກົດໝາຍ ແລະ ລະບຽບການ ໄດ້ຖືກກວດກາຢ່າງເຂັ້ມງວດ ແລະ ເດັດຂາດ, ສ້າງພື້ນຖານໜັກແໜ້ນ ເພື່ອກ້າວໄປສູ່ການຫັນເປັນທັນສະໄໝ ໃນທົ່ວລະບົບການກວດສອບ ແລະ ກວດກາລັດ ທີ່ສາມາດເຊື່ອມໂຍງກັບພາກພື້ນ ແລະ ສາກົນ.
3. ຜ່ານລະບົບການກວດກາຈາກຜົນການກວດສອບເຮັດໃຫ້ການປັັບປຸງລະບົບ ກົງຈັກການຈັດຕັ້ງ ຢູ່ຂັ້ນສູນກາງ ແລະ ທ້ອງຖິ່ນ ໄດ້ຮັບການປັບປຸງ ໃຫ້ມີຄວາມເຂັ້ມແຂງ, ໂປ່ງໃສ ແລະ ກວດສອບໄດ້ທັງເປັນການ ສ້າງບາດກ້າວທີ່ເປັນພື້ນຖານໜັກແໜ້ນ ໄປສູ່ການຄຸ້ມຄອງລັດ ຄຸ້ມຄອງສັງຄົມດ້ວຍກົດໝາຍ.
4. ສ້າງຄວາມເຂັ້ມແຂງ ແລະ ຮັບປະກັນຄວາມສັກສິດໃນການປະຕິບັດກົດໝາຍ ແລະ ນິຕິກຳລຸ່ມກົດໝາຍໃນທຸກຂົງເຂດວຽກງານ, ສ້າງຄວາມເຊື່ອໝັ້ນໃຫ້ສັງຄົມທັງພາຍໃນ ແລະ ຕ່າງປະເທດ ທັງເປັນການແກ້ໄຂບັນຫາຮົ່ວໄຫຼຂອງງົບປະມານແຫ່ງລັດ ແລະ ບັນຫາການສໍ້ລາດບັງຫຼວງໃຫ້ຫຼຸດລົງເທື່ອລະກ້າວ ເພື່ອເປັນການສ້າງບັນຍາກາດໃນການສົ່ງເສີມການລົງທຶນ.

3.3 ຂໍ້ສະເໜີ

ເພື່ອຄວາມເປັນເອກະພາບ ແລະ ບຸກທະລຸ ໃນວຽກງານການກວດສອບ ແລະ ກວດກາລັດ, ກຳມາທິການ ມີຂໍ້ສະເໜີ ດັ່ງນີ້:

1. ສະເໜີລັດຖະບານອອກດຳລັດຂອງນາຍົກລັດຖະມົນຕີ ວ່າດ້ວຍການແກ້ໄຂຜົນການກວດກາຕາມຜົນການກວດສອບ ເພື່ອຜັນຂະຫຍາຍເນື້ອໃນຂອງກົດໝາຍວ່າດ້ວຍການກວດກາລັດ ໃຫ້ເປັນອັນລະອຽດ ແລະ ເອກະພາບໃນການຈັດຕັ້ງປະຕິບັດ; ຊີ້ນຳຂະແໜງການກ່ຽວຂ້ອງ ເປັນເຈົ້າການແກ້ໄຂການລະເມີດວິໄນແຜນການ-ການເງິນໃນຂອບເຂດທີ່ຕົນຮັບຜິດຊອບໃຫ້ຂາດຕົວ ແລະ ໃຫ້ສອດຄ່ອງຕາມກົດໝາຍ ແລະ ລະບຽບການ.
2. ສະເໜີລັດຖະບານອອກດຳລັດ ວ່າດ້ວຍການເປີດເຜີຍຜົນການກວດກາຕາມຜົນການກວດສອບ, ບັນຫາໃດທີ່ໄດ້ກວດກາສຳເລັດຂາດຕົວແລ້ວ ກໍ່ສະເໜີໃຫ້ມີວິທີແຈ້ງຜົນຂອງການກວດກາຕາມຜົນການກວດສອບດັ່ງກ່າວໃຫ້ກະຊວງ-ອົງການ ແລະ ອົງການປົກຄອງທ້ອງຖິ່ນ ທີ່ກ່ຽວ ຂ້ອງ ແລະ ປະຊາຊົນຮັບຊາບ.
3. ສະເໜີລັດຖະບານພິຈາລະນາແຕ່ງຕັ້ງຄະນະກຳມະການລະດັບຊາດ ໂດຍມີທ່ານຮອງນາຍົກລັດຖະມົນຕີ, ປະທານອົງການກວດກາລັດຖະບານ ທັງເປັນຫົວໜ້າອົງການຕ້ານການສໍ້ລາດບັງຫຼວງ ເປັນປະທານ ພ້ອມຄະນະ ເພື່ອຊີ້ນຳຂະແໜງການ ແລະ ທ້ອງຖິ່ນໃນການແກ້ໄຂຜົນການກວດກາຕາມຜົນການກວດສອບໃຫ້ຂາດຕົວ ພ້ອມທັງມີວິທີການ ແລະ ມາດຕະການແກ້ໄຂຢ່າງເປັນລະບົບ ໃນໄລຍະສັ້ນ, ໄລຍະກາງ ແລະ ໄລຍະຍາວ ພ້ອມທັງມີແຜນປະຈຳປີເປັນລະບົບ, ຕໍ່ເນື່ອງ ແລະ ມີກຳນົດໄລຍະເວລາທີ່ຊັດເຈນ.
4. ສະເໜີລັດຖະບານສະຫຼຸບຄືນບັນດາໂຄງການລົງທຶນນອກແຜນ ນັບແຕ່ປີ 2016 ຄືນຫຼັງໃຫ້ຊັດເຈນ ພ້ອມທັງມີວິທີການ ແລະ ມາດຕະການແກ້ໄຂລະອຽດ ເພື່ອລາຍງານຕໍ່ສະພາແຫ່ງຊາດ ພິຈາລະນາອອກມະຕິຕົກລົງແກ້ໄຂ ບັນດາໂຄງການລົງທຶນນອກແຜນ ຢ່າງຂາດຕົວ. ນັບແຕ່ປີ 2017 ເປັນຕົ້ນໄປເດັດຂາດບໍ່ໃຫ້ສ້າງໂຄງການລົງທຶນນອກແຜນ ນອກຈາກໂຄງການກ່ຽວກັບຄວາມໝັ້ນຄົງ, ໂຄງການກ່ຽວກັບຊາຍແດນ, ໂຄງການໄພພິບັດ ແລະ ໂຄງການລົງທຶນຂອງລັດລະດັບຊາດ ຕາມມາດຕາ 17 ຂອງກົດໝາຍວ່າດ້ວຍການລົງທຶນຂອງລັດ.
5.  ສະເໜີລັດຖະບານຊີ້ນໍາ ກະຊວງ-ອົງການ ແລະ ອົງການປົກຄອງທ້ອງຖີ່ນເປັນເຈົ້າການໃນການກວດກາຄວາມຮັບຜິດຊອບຂອງຫົວໜ່ວຍງົບປະມານທີ່ຢູ່ໃນຂັ້ນຄຸ້ມຄອງຂອງຕົນ, ເພີ່ມທະວີການປະສານງານລະຫວ່າງອົງການກວດສອບປະຈຳພາກ ແລະ ອົງການກາລັດປະຈຳຂັ້ນແຂວງ ໃນການແກ້ໄຂການກວດກາຕາມຜົນການກວດສອບ ຢ່າງເຂັ້ມງວດ ແລະ ທັນເວລາ.
6. ສະເໜີຄະນະປະຈຳສະພາແຫ່ງຊາດເພີ່ມທະວີການຊີ້ນຳສະພາປະຊາຊົນຂັ້ນແຂວງ ໃນການກຳນົດເປົ້າໝາຍກວດສອບ, ເອົາໃຈໃສ່ການປະສານງານໃນການແລກປ່ຽນຂໍ້ມູນການກວດສອບ ແລະ ການຕິດຕາມກວດກາການຈັດຕັ້ງປະຕິບັດຂໍ້ແນະນຳປັບປຸງແກ້ໄຂຜົນການກວດສອບຢູ່ໃນເຂດເລືອກຕັ້ງຂອງຕົນ ຢ່າງເຂັ້ມງວດ ແລະ ທັນເວລາ.

ທ້າຍສຸດນີ້ ຂໍອວຍພອນໃຫ້ທ່ານ​ປະທານ, ຄະນະປະທານ, ບັນດາທ່ານສະມາຊິກສະພາແຫ່ງຊາດ, ສະມາຊິກລັດຖະບານ ແລະ ບັ​ນດາ​ທ່ານ​ແຂກ ທີ່​ມີ​ກຽດ ຈົ່ງ​ມີ​ສຸຂະພາບເຂັ້ມແຂງ, ມີ​ຄວາມ​ຜາ​ສຸກ ​ແລະ ສຳເລັດໜ້າທີ່ອັນມີກຽດຂອງບັນດາທ່ານ, ອວຍພອນ​ໃຫ້​ກອງ​ປະຊຸມ​ປະສົບ​ຜົນສຳ​ເລັດ​ຕາມ​ຈຸດປະສົງ​ລະດັບ​ຄາດໝາຍ.

(ຂໍຂອບໃຈ)