(ສພຊ) ວັນທີ 28 ຕຸລາ 2026, ທ່ານ ວິໄລວັນ ບຸດດາຄໍາ ກຳມະການສູນກາງພັກ, ຮອງຫົວໜ້າຄະນະຈັດຕັ້ງສູນກາງພັກ ພ້ອມດ້ວຍຄະນະ ໄດ້ຕາງໜ້າໃຫ້ຄະນະຈັດຕັ້ງສູນກາງພັກ ນຳເອົາກະຕ່າດອກໄມ້ ແລະ ຄວາມຢ້ຽມຢາມຖາມຂ່າວອັນອົບອຸ່ນ ເຂົ້າຢ້ຽມຂ່ຳນັບ ແລະ ອວຍພອນ ທ່ານ ສອນໄຊ ສີພັນດອນ ກຳມະການກົມການເມືອງສູນກາງພັກ ໃນໂອກາດທີ່ໄດ້ຮັບການເລືອກຕັ້ງ ແລະ ດຳລົງຕຳແໜ່ງເປັນປະທານສະພາແຫ່ງຊາດ ຜູ້ໃໝ່.
ທ່ານ ວິໄລວັນ ບຸດດາຄໍາ ໄດ້ສະແດງຄວາມຊົມເຊີຍຢ່າງຈິງໃຈ ແລະ ຕີລາຄາສູງຕໍ່ຜົນງານການເຄື່ອນໄຫວໃນໜ້າທີ່ວຽກງານການເມືອງອັນສຳຄັນຂອງພັກ-ລັດໃນໄລຍະຜ່ານມາ; ພ້ອມທັງເຊື່ອໝັ້ນຢ່າງຍິ່ງວ່າ ດ້ວຍປະສົບການອັນອຸດົມສົມບູນ ແລະ ບົດຮຽນອັນເລິກເຊິ່ງຂອງທ່ານ ສອນໄຊ ສີພັນດອນ ຈະສືບຕໍ່ນຳພາ-ຊີ້ນຳວຽກງານນິຕິບັນຍັດ, ການຕິດຕາມກວດກາການຈັດຕັ້ງປະຕິບັດລັດຖະທຳມະນູນ ແລະ ກົດໝາຍ ໃຫ້ບັນລຸຜົນສຳເລັດອັນໃໝ່ໃຫຍ່ຫຼວງກວ່າເກົ່າ.
ໂອກາດດຽວກັນນີ້, ທ່ານປະທານສະພາແຫ່ງຊາດ ໄດ້ສະແດງຄວາມຂອບໃຈຢ່າງຈິງໃຈ ຕໍ່ຄວາມຮັກແພງ, ຄວາມຫ່ວງໃຍ ທີ່ຄະນະຈັດຕັ້ງສູນກາງພັກໄດ້ມອບໃຫ້ໃນຄັ້ງນີ້; ພ້ອມທັງເນັ້ນໜັກເຖິງຄວາມສຳຄັນຂອງການປະສານສົມທົບກັນຢ່າງກົມກຽວ ລະຫວ່າງອົງການນິຕິບັນຍັດ ແລະ ອົງການຈັດຕັ້ງພັກ ໃນການສືບຕໍ່ເສີມສ້າງຄວາມເຂັ້ມແຂງໃຫ້ແກ່ລະບົບການເມືອງ ແລະ ລະບອບປະຊາທິປະໄຕປະຊາຊົນ ໃຫ້ກ້າວຂຶ້ນຢ່າງບໍ່ຢຸດຢັ້ງ.
ການພົບປະຄັ້ງນີ້ ໄດ້ດຳເນີນໄປດ້ວຍບັນຍາກາດອັນສະໜິດສະໜົມ, ເຕັມໄປດ້ວຍໄມຕີຈິດມິດຕະພາບ ແລະ ຄວາມເຂົ້າໃຈເຊິ່ງກັນແລະກັນ.
(ອານຸສອນ ພູມມີທອນ)