ໃນຕອນເຊົ້າຂອງວັນທີ 03 ມີນາ 2022 ນີ້ ທີ່ຫ້ອງການບ້ານ ສີບຸນເຮືອງ ເມືອງ ພີນ ແຂວງສະຫວັນນະເຂດ ໄດ້ມີພິທີມອບເຄື່ອງກະຈາຍສຽງ(ປາກເລີ້), ລໍ້ຊ່ວຍຄົນພິການ, ຊຸດຄອມພີວເຕີ ແລະ ເຄື່ອງນຸ່ງຮຸ່ມ, ເຊິ່ງມອບໂດຍທ່ານ ທ່ານ ສະແຫວງ ນັນທະວົງ, ຄະນະປະຈໍາສະພາປະຊາຊົນແຂວງ, ປະທານຄະນະກໍາມະການເສດຖະກິດ ແຜນການ ແລະ ການເງິນ, ທັງເປັນສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 13; ໂດຍການຕ້ອນຮັບຈາກທ່ານ ສາລີ ວິນລາວັນ ກໍາມະການພັກເມືອງ ເຈົ້າເມືອງໆ ພີນ ເຂົ້າຮ່ວມມີທ່ານ ຮອງເຈົ້າເມືອງ, ບັນດາທ່ານ ສະມາຊິກສະພາປະຊາຊົນແຂວງ ປະຈໍາເຂດເລືອກຕັ້ງເມືອງ ພີນ, ອໍານາດການປົກຄອງບ້ານ ສີບຸນເຮືອງ ແລະ ພໍ່ແມ່ປະຊາຊົນເຂົ້າຮ່ວມຢ່າງພ້ອມພຽງ.
ເຊິ່ງອຸປະກອນທີ່ນໍາໄປມອບໃນຄັ້ງນີ້ແມ່ນໄດ້ຮັບການອຸປະຖໍາຈາກພາກສ່ວນດັ່ງນີ້: ທ່ານ ບຸນລ້ວນ ລີໄຊຍະລາດ ຫົວໜ້າພະແນກພະລັງງານ ແລະ ບໍ່ແຮ່ແຂວງ, ທ່ານ ຫົວໜ້າພະແນກສາທາລະນະສຸກແຂວງ ພ້ອມຄະນະ, ທ່ານ ປອ ສຸລາພອນ ອິນທະວົງ ສະມາຊິກສະພາແຫ່ງຊາດ ຊຸດທີ IX ປະຈໍາເຂດເລືອກຕັ້ງທີ 13 ຮອງຫົວໜ້າກົມປູກຝັງ ກະຊວງກະສິກໍາ ພ້ອມຄອບຄົວ ແລະ ບັນດາພະນັກງານ-ລັດຖະກອນ ພາຍໃນຄະນະກໍາມະການເສດຖະກິດ ແຜນການ ແລະ ການເງິນ ສະພາປະຊາຊົນແຂວງ, ເຊິ່ງອຸປະກອນທີ່ນໍາໄປມອບປະກອບມີ: ເຄື່ອງກະຈາຍສຽງ(ປາກເລີ້)ຈໍານວນ 02 ປາກ, ລໍ້ຊ່ວຍຄົນພິການ 01 ອັນ, ຄອມພີວເຕີ 01 ຊຸດ ແລະ ເຄື່ອງນຸ່ງຮຸ່ມ 18 ແກັດ, ລວມເປັນມູນຄ່າທັງໝົດ 10,500,000 ກີບ.
ອຸປະກອນທີ່ນໍາໄປມອບໃນຄັ້ງນີ້ແມ່ນເພື່ອນຳໃຊ້ເຂົ້າໃນກະຈາຍສຽງ, ເຜີຍແຜ່ບັນດາຂໍ້ມູນ, ທາງດ້ານກົດໝາຍ, ນິຕິກຳໄຕ້ກົດໝາຍ, ແຈ້ງການຕ່າງໆຂອງແຂວງ, ເມືອງທີ່ປະກາດໃຊ້ເພື່ອໃຫ້ພໍ່ແມ່ປະຊາຊົນໄດ້ຮັບຮູ້, ເຂົ້າໃຈກົດໝາຍ, ລະບຽບການທີ່ຂັ້ນເທິງວາງອອກ ແລະ ພ້ອມພຽງກັນປະຕິບັດ, ນຳໃຊ້ອຸປະກອນຄອມພີວເຕີເຂົ້າໃນການຮຽນ-ການສອນ ໃຫ້ທັນກັບສະພາບການໃນສັງຄົມປະຈຸບັນ, ພ້ອມທັງຊ່ວຍເຫຼືອຄອບຄົວທີ່ບໍ່ສາມາດຊື້ອຸປະກອນໃຫ້ແກ່ຜູ້ເສຍອົງຄະ ແລະ ແຈກຢາຍເຄື່ອງນຸ່ງຮຸ່ມໃຫ້ແກ່ຜູ້ທີ່ຂາດເຂີນພາຍໃນເມືອງ.