(ສພຊ) ວັນທີ 4 ຕຸລາ 2018 ທີ່ສະພາແຫ່ງຊາດ (ສພຊ), ທ່ານ ນາງ ປານີ ຢາທໍ່ຕູ້ ປະທານສະພາແຫ່ງຊາດ ໄດ້ຕ້ອນຮັບການເຂົ້າຢ້ຽມຂໍ່ານັບຂອງທ່ານ ເອັກ ນາດ ດາກາລ (Ek Nath Dhakal) ສະມາຊິກສະພາແຫ່ງຊາດ (ສສຊ) ເນປານ, ອະດີດລັດຖະມົນຕີສັນຕິພາບ ແລະ ການປອງດອງຊາດ ສະຫະພັນ ສາທາລະນະລັດ ປະຊາທິປະໄຕ ເນປານ ເພື່ອມອບຈົດໝາຍເຊື້ອເຊີນເຂົ້າຮ່ວມກອງປະຊຸມສຸດຍອດອາຊີ-ປາຊີຟິກ 2018 ເຊິ່ງຈະຈັດຂຶ້ນໃນວັນທີ 30 ພະຈິກ ຫາວັນທີ 3 ທັນວາ 2018 ຢູ່ນະຄອນຫລວງກັດມັນດຸ ເນປານ ຕາມການມອບໝາຍຂອງປະທານ ສພຊ ເນປານ.

ໂອກາດດັ່ງກ່າວ, ທ່ານ ນາງ ປານີ ຢາທໍ່ຕູ້ ໄດ້ສະແດງຄວາມຍິນດີຕ້ອນຮັບທ່ານ ເອັກ ນາດ ດາກາລ ດ້ວຍຄວາມຈິງໃຈ ແລະ ຕີລາຄາສູງຕໍ່ການເຊື້ອເຊີນເຂົ້າຮ່ວມກອງປະຊຸມສຸດຍອດອາຊີ-ປາຊີຟິກ ຕາມການເຊື້ອເຊີນຂອງປະທານ ສພຊ ເນປານ. ເຊິ່ງການເຊື້ອເຊີນດັ່ງກ່າວ, ໄດ້ສະແດງໃຫ້ເຫັນເຖິງການພົວພັນຮ່ວມມືລະຫວ່າງສອງ ສພຊ ລາວ ແລະ ເນປານ ເວົ້າລວມ, ເວົ້າສະເພາະ ກໍຄືການພົວພັນຮ່ວມມືລະຫວ່າງ ສປປລາວ ແລະ ສະຫະພັນ ສາທາລະນະລັັດ ປະຊາທິປະໄຕ ເນປານ ໃຫ້ມີຄວາມແໜ້ນແຟ້ນຍິ່ງໆຂຶ້ນ.

ໃນການຢ້ຽມຂໍ່ານັບ, ທ່ານ ເອັກ ນາດ ດາກາລ ໄດ້ສະແດງຄວາມຂອບໃຈຕໍ່ການຕ້ອນຮັບຂອງປະທານ ສພຊ ລາວ ແລະ ຫວັງຢ່າງຍິ່ງວ່າການພົວພັນຮ່ວມມື ລະຫວ່າງເນປານ ແລະ ສປປລາວ ຈະໄດ້ຮັບການພັດທະນາຍິ່ງໆຂຶ້ນ ແລະ ຫວັງວ່າປະທານ ສພຊ ລາວ ຈະໄດ້ເດີນທາງເຂົ້າຮ່ວມກອງປະຊຸມສຸດຍອດອາຊີ-ປາຊີຟິກ ຕາມການເຊື້ອເຊີນຂອງປະທານສະພາແຫ່ງຊາດເນປານທີ່ຈະຈັດຂຶ້ນໃນທ້າຍປີນີ້ດ້ວຍ.