ໃນລະຫວ່າງວັນທີ 14-17 ກຸມພາ 2022 ທີ່ຜານມານີ້ ທ່ານ ສາຍທອງ ໄຊຍະວົງ ຮອງເລຂາພັກແຂວງ ປະທານສະພາປະຊາຊົນແຂວງຈໍາປາສັກ ສົມທົບກັບ ທ່ານ ສົມຈິດ ແພງສະຫວັດ ຮອງເລຂາພັກເມືອງ, ປະທານອົງການກວດກາ ພັກ-ລັດ ສະມາຊິກສະພາປະຊາຊົນແຂວງ ພ້ອມຄະນະ ໄດ້ສໍາເລັດການລົງເຄື່ອນໄຫວພົບປະຜູ້ມີສິດເລືອກຕັ້ງ ຢູ່ເມືອງປະທຸມພອນ ແຂວງຈໍາປາສັກ ໂດຍປະກອບມີຫຼາຍຈຸດເຄື່ອນໄຫວຄື: ບ້ານຫ້ວຍຕ້ອນ, ບ້ານໜອງເອກ, ບ້ານມ່ວງ(ຄຸ້ມຕານປ່ຽວ), ບ້ານນໍ້າໃສ, ບ້ານຫ້ວຍໄຜ່, ບ້ານແຊງ, ບ້ານປາກຕວຍ ແລະ ສໍານັກງານມືອງປະທຸມພອນ ໂດຍມີຈຸດປະສົງເພື່ອຜົນສຳເລັດກອງປະຊຸມສະໄໝວິສາມັນເທື່ອທີ 1, ກອງປະຊຸມສະໄຫມສາມັນເທື່ອທີ 2 ຂອງສະພາແຫ່ງຊາດ ຊຸດທີ IX ແລະ ກອງປະຊຸມສະພາປະຊາຊົນແຂວງຈໍາປາສັກ ຊຸດທີ II ພ້ອມທັງຮັບຟັງຄໍາຄິດເຫັນຄໍາສະເໜີຂອງຜູ້ມີສິດເລືອກຕັ້ງ.

ການລົງເຄື່ອນໄຫວ ໄດ້ຮັບຟັງການລາຍງານສະພາບຈຸດພິດຂອງການນໍາພາຈັດຕັ້ງປະຕິບັດວຽກງານ ຈາກບັນດາຄະນະນໍາ ແລະ ອໍານາດການປົກຄອງ, ເຊິ່ງເຫັນໄດ້ຜົນງານດ້ານດີ ແລະ ຂໍ້ຄົງຄ້າງບາງດ້ານ ທີ່ຈະຕ້ອງໄດ້ສືບຕໍ່ຈັດຕັ້ງປະຕິບັດ.

ໂອກາດດັ່ງກ່າວ, ທ່ານ ສາຍທອງ ໄຊຍະວົງ ປະທານສະພາປະຊາຊົນແຂວງຈໍາປາສັກ ໄດ້ຕີລາຄາສູງຕໍ່ໝາກຜົນຜົນງານຂອງແຕ່ລະພາກສ່ວນຍາດມາໄດ້ ພ້ອມທັງມີຄໍາເຫັນໂອ້ລົມເຜີຍແຜ່ຜົນເນື້ອໃນສໍາເລັດກອງປະຊຸມສະໄໝວິສາມັນເທື່ອທີ1- ກອງປະຊຸມສະໄໝສາມັນເທື່ອທີ 2 ຂອງສະພາແຫ່ງຊາດ ຊຸດທີ IX ແລະ ຜົນສໍາເລັດກອງປະຊຸມສະໄໝສາມັນເທື່ອທີ 2 ຂອງສະພາປະຊາຊົນແຂວງຈໍາປາສັກ ຊຸດທີ II ທີ່ໄດ້ພິຈາລະນາຮັບຮອງເອົາຫຼາຍບັນຫາສໍາຄັນ ທີ່ເປັນພື້ນຖານຂອງຊາດ ແລະ ຂອງທ້ອງຖິ່ນ ອອກເປັນມະຕິກອງປະຊຸມຈໍານວນຫຼາຍມະຕິ ໂດຍສະເພາະເນື້ອໃນຂອງ 2 ວາລະແຫ່ງຊາດ ທີ່ລັດຖະບານ ແລະ ອົງການປົກຄອງທ້ອງຖິ່ນ ຈະໄດ້ສຸມໃສໃນການຈັດຕັ້ງປະຕິບັດ.

ຕິດພັນກັບການຢ້ຽມຢາມຖາມຂ່າວ, ຮັບຟັງຄໍາຄິດເຫັນ ແລະ ຄໍາສະເໜີ ເຊິ່ງພໍ່ແມ່ປະຊາຊົນ ທີ່ໄດ້ສະເໜີຫຼາຍຕໍ່ຜູ້ແທນຂອງຕົນ ເຊິ່ງລ້ວນແຕ່ເປັນບັນຫາທີ່ກ່ຽວພັນກັບວຽກງານການສ້າງສາພັດທະນາປະເທດຊາດ ກໍຄືທ້ອງຖິ່ນຂອງຕົນ, ການພັດທະນາທີ່ສົ່ງຜົນກະທົບຕໍ່ສິ່ງແວດລ້ອມ, ການຄຸ້ມຄອງລັດຄຸ້ມຄອງສັງຄົມ, ວຽກງານການສຶກສາທິການ, ວຽກງານການຈັດສັນເນື້ອທີດິນ ແລະ ອື່ນໆ. ຕໍ່ກັບຄໍາສະເໜີຂອງຜູ້ມີສິດເລືອກຕັ້ງ, ບັນດາທ່ານສະມາຊິກສະພາແຫ່ງຊາດ ແລະ ສະມາຊິກສະພາປະຊາຊົນແຂວງ ໄດ້ຜັດປ່ຽນກັນຊີ້ແຈ້ງອະທິບາຍຕໍ່ບາງຄໍາເໜີກັບທີ່ ພ້ອມທັງຮັບເອົາຄໍາສະເໜີທີ່ບໍ່ສາມາດຊີ້ແຈງໄດ້ ເພື່ອນໍາໄປຊຸກຍູ້ໃຫ້ພາກສ່ວນທີ່ກ່ຽວຂ້ອງຂັ້ນຕ່າງໆແກ້ໄຂໃນຕໍ່ໜ້າ.

(ພາບ-ຂ່າວ: ສົມວິຈິດ ໄຊມົນຕີ)