ໃນລະຫວ່າວັນທີ 17-18 ກຸມພາ 2022 ນີ້, ທ່ານ ຄໍາສິງ ໄຊສົມແພງ ຮອງປະທານກໍາມາທິການວຽກງານສະມາຊິກສະພາແຫ່ງຊາດ (ສສຊ) ພ້ອມຄະນະ ໄດ້ເຄື່ອນໄຫວຕິດຕາມກວດກາ ແລະ ຊຸກຍູ້ວຽກງານຢູ່ແຂວງ ເຊກອງ ໂດຍການຕ້ອນຮັບຂອງທ່ານ ດົງເພັດ ພະຍົນ ຮອງເລຂາພັກແຂວງ, ປະທານສະພາປະຊາຊົນແຂວງ, ປະທານຄະນະ ສສຊ ປະຈໍາເຂດເລືອກຕັ້ງທີ 16, ມີບັນດາທ່ານ ຄະນະປະຈໍາພັກແຂວງ, ກໍາມະການພັກແຂວງ, ສສຊ ປະຈໍາເຂດເລືອກຕັ້ງ, ສສຂ ເຊກອງ, ຄະນະເລຂາທິການ, ຄະນະກໍາມະການ, ພະແນກການທີ່ກ່ຽວຂ້ອງ, ຫົວໜ້າ-ຮອງຂະແໜງ ພ້ອມດ້ວຍພະນັກງານ-ລັດຖະກອນ ສພຂ ເຂົ້າຮ່ວມຕ້ອນຮັບຢູ່ສະໂມສອນ ສພຂ.

         ທ່ານ ປອ ແພງສີ ສີລາວີ ຮອງປະທານຄະນະສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 16 ແຂວງ ເຊກອງ ໄດ້ລາຍງານໂດຍຫຍໍ້ກ່ຽວກັບການຈັດຕັ້ງປະຕິບັດວຽກງານໃນໄລຍະຜ່ານມາ ເຊິ່ງເຫັນວ່າຄະນະ ສສຊ ປະຈໍາເຂດເລືອກຕັ້ງທີ 16 ແຂວງ ເຊກອງ ໄດ້ເຄື່ອນໄຫວວຽກງານຕົວຈິງໃນໄລຍະ 1 ປີຜ່ານມາ ຄະນະ ສສຊ ປະຈໍາເຂດເລືອກຕັ້ງ ແລະ ສະພາປະຊາຊົນແຂວງ ໄດ້ພ້ອມກັນເອົາໃຈໃສ່ປະຕິບັດໜ້າທີ່ວຽກງານຕາມ 3 ພາລະບົດບາດຂອງຕົນທີ່ໄດ້ກໍານົດໄວ້ໃນລັດຖະທໍາມະນູນ ແລະ ກົດໝາຍ ເຊິ່ງມັນສະແດງອອກການປະຕິບັດພາລະບົດບາດໃນການເປັນຕົວແທນແຫ່ງສິດ ແລະ ຜົນປະໂຫຍດຂອງປະຊາຊົນບັນດາເຜົ່າ ໂດຍໄດ້ເອົາໃຈໃສ່ໃນການລົງພົບປະ ແລະ ໂຄສະນາເຜີຍແຜ່ຜົນສໍາເລັດຂອງກອງປະຊຸມຄັ້ງປະຖົມມະລຶກຂອງ ສພຊ ຊຸດທີ IX ແລະ ສະພາປະຊາຊົນແຂວງ ຊຸດທີ II ຕິດພັນກັບຄໍາຄິດເຫັນຂອງປະຊາຊົນຜູ້ມີສິດເລືອກຕັ້ງ, ຕິດພັນກັບການເພີ່ມທະວີມາດຕະການສະກັດກັ້ນ, ຄວບຄຸມ ແລະ ກຽມພ້ອມຮອບດ້ານ ເພື່ອຕ້ານພະຍາດ ໂຄວິດ 19 ແລະ ຜົນກະທົບຕໍ່ຂົງເຂດເສດຖະກິດ ໂດຍເລັງໃສ່ເຂດຊົນນະບົດຫ່າງໄກສອກຫຼີກ ຢູ່ 4 ຕົວເມືອງ ເຊິ່ງສາມາດຈັດຕັ້ງປະຕິບັດໄດ້ ທັງໝົດ 36 ຈຸດ, ມີ 57 ເທື່ອບ້ານ, ມີຜູ້ເຂົ້າຮ່ວມ ທັງໝົດ 13,161 ເທື່ອຄົນ, ຍິງ 11,240 ເທື່ອຄົນ, ໄດ້ເຂົ້າຮ່ວມພິຈາລະນາ ແລະ ຮັບຮອງເອົາກົດໝາຍໃນກອງປະຊຸມສະໄໝສາມັນເທື່ອທີ 2 ຂອງ ສພຊ ຊຸດທີ IX ຈໍານວນ 11 ສະບັບ ໃນນັ້ນ, ກົດໝາຍສ້າງໃໝ່ 4 ສະບັບ. ນອກນີ້, ຍັງໄດ້ເອົາໃຈໃສ່ຍົກສູງຄວາມຮັບຜິດຊອບດ້ານການຕົກລົງບັນຫາສໍາຄັນຂອງທ້ອງຖິ່ນຢູ່ກອງປະຊຸມຄັ້ງປະຖົມມະລຶກ ແລະ ກອງປະຊຸມສະໄໝສາມັນ ເທື່ອທີ 2 ຂອງ ສພຂ ຊຸດທີ II ຮັບຮອງເອົາເປັນມະຕິ ທັງໝົດ 19 ສະບັບ, ໃນນັ້ນ ຮັບຮອງເອົາການສ້າງນິຕິກໍາໃຕ້ກົດໝາຍ 2 ສະບັບ ແລະ ຍັງໄດ້ເອົາໃຈໃສ່ດໍາເນີນກອງປະຊຸມຮ່ວມ ລະຫວ່າງ ຄະນະ ສສຊ ກັບ ຄະນະປະຈໍາ ສພຂ ເປັນປົກກະຕິ ເພື່ອປຶກສາຫາລື ແລະ ແກ້ໄຂວຽກງານທີ່ສໍາຄັນຂອງທ້ອງຖິ່ນໄດ້ທັງໝົດ 15 ຄັ້ງ ແລະ ຮັບຮອງອອກເປັນມະຕິຂອງຄະນະປະຈໍາສະພາປະຊາຊົນແຂວງ ທັງໝົດ 8 ສະບັບ. ຈາກນັ້ນ, ກໍໄດ້ມີການປຶກສາລື ແລະ ແລກປ່ຽນບົດຮຽນດ້ານວຽກງານຕ່າງໆ ກັບບັນດາພະແນກການທີ່ກ່ຽວຂ້ອງ ໂດຍສະເພາະແມ່ນໂຄງປະກອບກົງຈັກການຈັດຕັ້ງບຸກຄະລາກອນຂອງ ສພຂ ເພື່ອຍົກສູງບົດບາດ ແລະ ເຮັດໃຫ້ການເຄື່ອນໄຫວວຽກງານໃນຖານະເປັນຕົວແທນແຫ່ງສິດ ແລະ ຜົນປະໂຫຍດຂອງປະຊາຊົນ ຂອງຄະນະ ສສຊ ປະຈໍາເຂດເລືອກຕັ້ງທີ 16 ແລະ ສສຂ ເຊກອງ ໃຫ້ມີຄວາມເຂັ້ມແຂງ ແລະ ດີຂຶ້ນເປັນກ້າວໆ. ໂອກາດດັ່ງກ່າວ, ຍັງໄດ້ລົງຕິດຕາມ ແລະ ຊຸກຍູ້ການຈັດຕັ້ງປະຕິບັດວຽກງານໃນໄລຍະຜ່ານມາຂອງສະມາຊິກສະພາປະຊາຊົນແຂວງ ປະຈໍາໜ່ວຍເລືອກຕັ້ງເມືອງ ດາກຈຶງ ບັນດາຂໍ້ສະດວກ, ຂໍ້ຫຍຸ້ງຍາກ ພ້ອມທັງຮັບຟັງຄໍາສະເໜີຕ່າງໆທີ່ຈໍາເປັນ ຂອງໜ່ວຍເລືອກຕັ້ງ ເພື່ອນໍາໄປສະເໜີຕໍ່ຄະນະນໍາຂັ້ນເທິງ ກໍຄືຂະແໜງການທີ່ກ່ຽວຂ້ອງໄດ້ພິຈາລະນາແກ້ໄຂ.