(ສພຊ) ວັນທີ 15 ກຸມພາ ນີ້, ຢູ່ທີ່ສະພາປະຊາຊົນແຂວງ (ສພຂ) ສາລະວັນ, ທ່ານ ປະເດີມພອນ ສົນທະນີ ຮອງລັດຖະມົນຕີກະຊວງແຮງງານ ແລະ ສະຫວັດດີການ-ສັງຄົມ ທັງເປັນສະມາຊິກສະພາແຫ່ງຊາດ (ສພຊ) ປະຈຳເຂດເລືອກຕັ້ງທີ 14 ແຂວງສາລະວັນ ພ້ອມດ້ວຍຄະນະ ໄດ້ມອບເຄື່ອງອຸປະໂພກ ປະເພດເຄື່ອງນຸ່ງຮົ່ມ ຈຳນວນ 50 ແກັດ ແລະ ອຸປະກອນ ໂທລະໂຄງ ຈໍານວນ 4 ຊຸດ ລວມມູນຄ່າງທັງໝົດ 90 ລ້ານກວ່າກີບ ມອບໃຫ້ ສພຂ ສາລະວັນ, ໃນພິທີຮັບໂດຍທ່ານ ສີເຮັງ ຫອມສົມບັດ ຮອງເລຂາພັກແຂວງ ປະທານ ສພຂ ສາລະວັນ, ມີຄະນະປະຈໍາ ສພຂ, ພ້ອມດ້ວຍສະມາຊິກສະພາປະຊາຊົນແຂວງ (ສສຂ), ຄະນະເລຂາທິການ ເຂົ້າຮ່ວມເປັນສັກຂີພະຍານມອບ-ຮັບໃນຄັ້ງນີ້.

ເຄື່ອງຈຳນວນດັ່ງກ່າວ ສພຂ ສາລະວັນ ຈະນຳໄປມອບຕໍ່ໃຫ້ພໍ່ແມ່ປະຊາຊົນທີ່ທຸກຍາກຂາດເຂີນ ເຂດຫ່າງໄກສອກຫຼິ້ກ, ໂອກາດທີ່ ສະມາຊິກສະພາແຫ່ງຊາດ (ສສຊ), ສສຂ ທີ່ຈະເຄື່ອນໄຫວພົບປະປະຊາຊົນຜູ້ມີສິດເລືອກຕັ້ງຂອງຕົນ ແລະ ໂຄສະນາເຜີຍແຜ່ຜົນສຳເລັດຂອງກອງປະຊຸມສະໄໝສາມັນເທື່ອທີ 2 ຂອງ ສພຊ ຊຸດທີ IX ແລະ ສພຂ ສາລະວັນ ຊຸດທີ II ຢູ່ບັນດາບ້ານ ກໍ່ຄືຈຸດເຂດເລືອກຕັ້ງເມືອງຂອງຕົນ.

ພາບ ແລະ ຂ່າວ: ດີລຳພົນ ພົມມະຈັນ