ກອງປະຊຸມສະຫລຸບຕິລາຄາການຈັດຕັ້ງປະຕິບັດວຽກງານ ຂອງ ຄະນະເລຂາທິການ ສະພາປະຊາຊົນແຂວງ (ສພຂ) ອັດຕະປື ປະຈໍາປີ 2021, ໄດ້ຈັດຂື້ນ ໃນວັນທີ 18 ກຸມພາ ຜ່ານມານີ້. ທີ່ຫ້ອງປະຊຸມ ສພຂ, ໂດຍການເປັນປະທານຂອງທ່ານ ນາງ ແສງອາລຸນ ວົງສາທິການ ເລຂາທິການ ສພຂ, ໃຫ້ກຽດເຂົ້າຮ່ວມຂອງທ່ານ ນາງ ມີນາພອນ ໄຊສົມພູ ຮອງເລຂາພັກແຂວງ, ປະທານ ສພຂ, ມີບັນດາທ່ານ ຄະນະປະຈຳ, ຄະນະກຳມະການ, ຄະນະເລຂາທິການ, ສະມາຊິກສະພາປະຊາຊົນແຂວງ (ສສຂ), ຫົວໜ້າ-ຮອງຂະແໜງ ແລະ ພະນັກງານ-ວີຊາການ ພາຍໃນ ສພຂ ເຂົ້າຮ່ວມ.

ກອງປະຊຸມ ທ່ານ ແສງປະດິດ ສຸດນາມສຸລີນ ຄະນະເລຂາທິການ ໄດ້ຂື້ນຜ່ານບົດລາຍງານ ການເຄື່ອນໄຫວຈັດຕັ້ງປະຕິບັດວຽກງານ ປະຈໍາປີ 2021 ແລະ ທິດທາງແຜນການປະຈໍາປີ 2022 ຂອງຄະນະເລຂາທິການ ສພຂ, ເຊິ່ງໄດ້ຍົກໃຫ້ເຫັນຜົນງານດ້ານດີທີ່ພົ້ນເດັ່ນເປັນຕົ້ນ: ຖືເອົາວຽກງານການເມືອງ-ແນວຄິດ ເປັນວຽກສໍາຄັນ ແລະ ເອົາໃຈໃສ່ໃນສຶກສາອົບຮົມ ໃຫ້ແກ່ຖັນແຖວພະນັກງານ-ລັດຖະກອນ ຢ່າງປົກກະຕິຕໍ່ເນື່ອງດ້ວຍຫຼາຍຮູບການ ເຊັ່ນ: ຜ່ານກອງປະຊຸມປະຈໍາເດືອນ ຂອງຄະນະເລຂາທິການ, ກອງປະຊຸມບັນດາອົງການຈັດຕັ້ງມະຫາຊົນ, ປາຖະກະຖາວັນສໍາຄັນຕ່າງໆ ຂອງພັກ-ຂອງຊາດ, ເປັນເຈົ້າການຈັດຕັ້ງປະຕິບັດພາລະບົດບາດ, ສິດ ແລະ ໜ້າທີ່ຂອງຕົນໃນການເປັນເສນາທິການໃຫ້ສະພາປະຊາຊົນແຂວງ, ຄະນະປະຈໍາສະພາປະຊາຊົນແຂວງ ແລະ ຄະນະສະມາຊິກສະພາແຫ່ງຊາດປະຈໍາເຂດເລືອກຕັ້ງ ໃນການຄົ້ນຄ້ວາ-ສັງລວມເນື້ອໃນ; ຄຸ້ມຄອງວຽກງານບໍລິຫານ-ການເງີນ, ວຽກງານຈັດຕັ້ງ-ກວດກາ, ວຽກງານຂໍ້ມູນຂ່າວສານ ແລະ ວຽກງານອື່ນໆຕາມການມອບໝາຍຂອງຄະນະປະຈໍາ ສພຂ. ຈາກນັ້ນ, ກອງປະຊຸມຍັງໄດ້ຮັບຟັງບົດສະຫລຸບຕີລາຄາການກະກຽມ ແລະ ດຳເນີນກອງປະຊຸມສະໄໝສາມັນເທື່ອທີ 2 ຂອງສະພາປະຊາຊົນແຂວງ ຊຸດທີ II. ພ້ອມກັນນັ້ນ, ຜູ້ເຂົ້າຮ່ວມກອງປະຊຸມກໍ່ໄດ້ ແລກປ່ຽກປະກອບຄຳຄິດຄໍາເຫັນ ດ້ານຂໍ້ຄົງຄ້າງ ເພື່ອທີ່ຈະຕ້ອງໄດ້ແກ້ໄຂໃນຕໍ່ໜ້າ.

ຕອນທ້າຍ ທ່ານ ນາງ ມີນາພອນ ໄຊສົມພູ ໄດ້ມີຄຳເຫັນໂອ້ລົມວ່າ: ກ່ອນອື່ນສະແດງຄວາມຍ້ອງຍໍຊົມເຊີຍ ຄະນະເລຂາທິການ ທີ່ໄດ້ເອົາໃຈໃສ່ປະຕິບັດໜ້າທີ່ວຽກງານ ຕາມພາລະບົດບາດ ແລະ ສິດ, ໜ້າທີ່ຕາມທີ່ກຳນົດໄວ້ໃນກົດໝາຍ, ຊື່ງສາມາດຍາດໄດ້ຜົນສຳເລັດໃນຫຼາຍໆດ້ານ, ຄຽງຄູ່ກັບຜົນສໍາເລັດຍັງຈະຕ້ອງໄດ້ເອົາໃຈໃສ່ສືບຕໍ່ເພີ່ມທະວີ ວຽກງານບໍາລຸງຍົກລະດັບສ້າງ ແລະ ສຶກສາອົບຮົມນໍາພາການເມືອງ-ແນວຄິດ ໃຫ້ແກ່ສະມາ ຊິກພັກ, ພະນັກງານ-ລັດຖະກອນ ຂອງສະພາປະຊາຊົນແຂວງໃຫ້ຕໍ່ເນື່ອງ, ທົ່ວເຖິງ ແລະ ທັນການ; ປັບປຸງກົງຈັກການຈັດຕັ້ງ, ແບບແຜນວິທີເຮັດວຽກ, ມີການຕິດຕາມກວດກາ, ມີການປະເມີນຜົນ ງານຍ້ອງຍໍ້ ແລະ ເຮັດເປັນປົກກະຕິ, ເພື່ອສ້າງແຮງຈູງໃຈ ແລະ ຕີຖອຍແນວຄິດທໍ້ຖອຍ ໃນຖັນແຖວພະນັກ ງານ-ລັດຖະກອນ. ສາມາດຮັບປະກັນໃຫ້ ການປະຕິບັດວຽກງານທຸກດ້ານດໍາເນີນໄປຢ່າງຖືກຕ້ອງ, ໂປ່ງໃສ ແລະ ມີຜົນສໍາເລັດເປັນຢ່າງດີ; ສົ່ງເສີມຄວາມເປັນເຈົ້າການ ແລະ ມີຫົວຄິດປະດິດສ້າງຂອງສະມາຊິກພັກ, ພະນັກງານ-ລັດຖະ ກອນ, ເພື່ອປະກອບສ່ວນອັນສໍາຄັນ ໃນການເຕົ້າໂຮມຄວາມສາມັກຄີ, ເປັນເຈົ້າການເຂົ້າຮ່ວມທຸກກິດຈະກໍາ ແລະ ຂະບວນການຕ່າງໆຂອງສະພະປະຊາຊົນແຂວງ, ຄະນະສະມາຊິກສະພາແຫ່ງຊາດ ປະຈຳເຂດເລືອກຕັ້ງທີ 17 ໃນແຕ່ລະໄລຍະ; ປັບປຸງ ແລະ ຍົກລະດັບການເປັນເສນາທິການ ຂອງຄະນະເລຂາທິການສະພາປະຊາຊົນແຂວງ ຕາມພາລະບົດບາດ, ສິດ ແລະ ໜ້າທີ່ ທີ່ກົດໝາຍໄດ້ກຳນົດໄວ້. ພ້ອມທັງຮັບປະກັນຄຸນນະພາບ ຂອງສະມາຊິກພັກ ແລະ ຍົກສູງຄວາມສາມາດຂອງພະນັກງານ-ລັດຖະກອນ ໃນການປະຕິບັດພາລະບົດບາດ ເປັນເສນາທິການທີ່ດີ, ການປະສານງານທີ່ດີ, ບໍລິການຮັບໃຊ້ໃຫ້ດີ, ໃຫ້ເກັ່ງ ແລະ ມີວິໄນ; ພ້ອມທັງຫັນເປັນຊ່ຽວຊານ ແລະ ທັນສະໄໝ, ວ່ອງໄວຂື້ນເທື່ອລະກ້າວ.

(ພາບ-ຂ່າວ: ວິນັດ ສພຂ)