(ສພຊ) ວັນທີ 15 ກຸມພາ 2022, ທ່ານ ປອ. ໄຊສົມພອນ ພົມວິຫານ ກໍາມະການກົມການເມືອງສູນກາງພັກ, ປະທານສະພາແຫ່ງຊາດ ພ້ອມດ້ວຍຄະນະ ໄດ້ເຄື່ອນໄຫວຢ້ຽມຢາມ ແລະ ເຮັດວຽກຢູ່ເມືອງໄຊຈຳພອນ ແຂວງບໍລິຄໍາໄຊ, ເຂົ້າຮ່ວມມີທ່ານ ປອ. ກອງແກ້ວ ໄຊສົງຄາມ ກໍາມະການສູນກາງພັກ, ເຈົ້າແຂວງໆບໍລິຄຳໄຊ, ທ່ານ ສຸວັນນີ ໄຊຊະນະ ປະທານສະພາປະຊາຊົນແຂວງ, ບັນດາທ່ານສະມາຊິກສະພາແຫ່ງຊາດ ແລະ ສະມາຊິກສະພາປະຊາຊົນແຂວງ, ເຈົ້າເມືອງ-ຮອງເຈົ້າເມືອງ, ບ້ານ, ພາກສ່ວນທີ່ກ່ຽວຂ້ອງ ຕະຫລອດຮອດພໍ່ແມ່ປະຊາຊົນພາຍໃນເມືອງ.

ໃນພິທີ, ທ່ານ ໂກ້ ໄຊສົມບັດ ເລຂາພັກເມືອງ, ເຈົ້າເມືອງໆໄຊຈຳພອນ ໄດ້ລາຍງານໂດຍຫຍໍ້ ກ່ຽວກັບສະພາບເສດຖະກິດ-ສັງຄົມຂອງເມືອງ ເຊິ່ງທ່ານໃຫ້ຮູ້ວ່າ: ເມືອງໄຊຈໍາພອນ ເປັນເມືອງທີ 7 ຂອງແຂວງບໍລິຄໍາໄຊ ເປັນເມືອງທຸກຍາກ ຕັ້ງຢູ່ພາກຕາເວັນອອກສ່ຽງເໜືອຂອງແຂວງ ເປັນເມືອງພູດອຍ, ເປັນເສັ້ນທາງເຄື່ອນໄຫວປະຕິວັດຂອງອະດີດການນຳລຸ້ນທຳອິດຂອງລາວ ໂດຍຜ່ານດິນແດນແຫ່ງນີ້ ໄປສູ່ເມືອງແອັ່ງເຊິນ ແຂວງເຫງະອານ ສສ.ຫວຽດນາມ  ແລະ ເຂດເມືອງວຽງທອງລົງສູ່ເຂດທົ່ງພຽງ, ທັງເປັນເຂດທີ່ໝັ້ນຂອງການປະຕິວັດຊາດ ປະຊາທິປະໄຕໃນເມື່ອກ່ອນ ເປັນບ້ານເກີດຂອງທ່ານ ສີສົມພອນ ລໍວັນໄຊ ອະດີດກໍາມະການກົມການເມືອງສູນກາງພັກ. ເມືອງດັ່ງກ່າວ ໄດ້ຮັບການສ້າງຕັ້ງຂຶ້ນຕາມດໍາລັດຂອງນາຍົກລັດຖະມົນຕີ ສະບັບເລກທີ 125/ນຍ, ລົງວັນທີ 11 ພຶດສະພາ 2009 ເຊິ່ງມີເນື້ອທີ່ທັງໝົດ 2.265 ກິໂລຕາແມັດ,  ປະກອບມີ 4 ກຸ່ມບ້ານ, ມີ 17ບ້ານ, 1.980 ຄອບຄົວ, ພົນລະເມືອງທັງໝົດ 12.067 ຄົນ ຍິງ 5.750 ຄົນ. ພ້ອມນັ້ນ, ຍັງໄດ້ໃຫ້ຮູ້ຜົນສໍາເລັດ, ຂໍ້ສະດວກ ແລະ ຂໍ້ຫຍຸ້ງຍາກ ທີ່ຈະຕ້ອງໄດ້ປັບປຸງແກ້ໄຂ ເປັນຕົ້ນ ການຮັບຮູ້ ແລະ ເຂົ້າໃຈຕໍ່ແນວທາງຂອງພັກ, ລະບຽບກົດໝາຍຂອງລັດຂອງພະນັກງານ-ສະມາຊິກພັກ ກໍຄືພໍ່ແມ່ປະຊາຊົນຈໍານວນໜຶ່ງຍັງບໍ່ສູງ; ເສັ້ນທາງຄົມມະນາຄົມໄປມາພົບຄວາມຫຍຸ້ງຍາກ ແລະ ຈໍາກັດທີ່ສຸດ; ການລຶບລ້າງຄວາມທຸກຍາກ ເຖິງວ່າເຮັດໄດ້ ແຕ່ກໍຍັງບໍ່ຮັບປະກັນຄວາມຍືນຍົງ, ການສ້າງບ້ານພົ້ນທຸກ ແລະ ບ້ານພັດທະນາ ຍັງບໍ່ທັນໄດ້ ຍັງເປັນເມືອງທຸກຍາກ; ຄຸນນະພາບການຮຽນ-ການສອນຂອງຄູອາຈານ ແລະ ຂອງນັກຮຽນຍັງບໍ່ທັນສູງ ເປັນຕົ້ນແມ່ນຂາດວັດຖຸອຸປະກອນ ແລະ ຄູອາຈານບໍ່ພຽງພໍ; ພ້ອມນັ້ນ, ກໍໄດ້ສະເໜີຂໍງົບປະມານໃນການສ້າງເສັ້ນທາງລະຫວ່າງເມືອງຫາເມືອງ ແລະ ເມືອງລົງຫາບ້ານ, ງົບປະມານການປັບປຸງເທສະບານຜັງເມືອງໃໝ່ນໍ້າອ້ອນ, ງົບປະມານໃນການເຮັດຊົນລະປະທານ ແລະ ງົບປະມານຊື້ທໍ່ຢາງດໍາ ເພື່ອເອົານໍ້າເຂົ້ານາໃຫ້ປະຊາຊົນ.

ໃນໂອກາດເຄື່ອນໄຫວຢ້ຽມຢາມ ແລະ ເຮັດວຽກຮ່ວມກັບ ຄະນະພັກ, ອໍານາດການປົກຄອງເມືອງໄຊຈໍາພອນ ໃນຄັ້ງນີ້, ທ່ານປະທານສະພາແຫ່ງຊາດ ໄດ້ມີບາງຄໍາເຫັນໂອ້ລົມວ່າ: ເພີ່ມທະວີການນໍາພາຊີ້ນໍາຈັດຕັ້ງປະຕິບັດ, ໂຄສະນາເຜີຍແຜ່ ວາລະແຫ່ງຊາດວ່າດ້ວຍການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ, ວາລະແຫ່ງຊາດວ່າດ້ວຍການສະກັດກັ້ນ ແລະ ແກ້ໄຂບັນຫາຢາເສບຕິດ ໃຫ້ໄດ້ຮັບຜົນສໍາເລັດ ແລະ ຖືເອົາການຈັດຕັ້ງປະຕິບັດວາລະແຫ່ງຊາດດັ່ງກ່າວ ເປັນໜ້າທີ່ການເມືອງຂອງທົ່ວປວງຊົນ ສະມາຊິກພັກ, ພະນັກງານ-ລັດຖະກອນ ກໍຄືພໍ່ແມ່ປະຊາຊົນບັນດາເຜົ່າ ຈະຕ້ອງໄດ້ຮ່ວມແຮງຮ່ວມໃຈກັນຈັດຕັ້ງປະຕິບັດ ແລະ ເປັນວິທີທາງດຽວທີ່ຈະນໍາພາປະເທດຊາດ ໃຫ້ຫລຸດພົ້ນຈາກສະພາບຄວາມຫຍຸ້ງຍາກທາງດ້ານເສດຖະກິດ-ການເງິນ; ສະເໜີໃຫ້ຄະນະພັກ, ສະມາຊິກສະພາປະຊາຊົນແຂວງ, ອົງການປົກຄອງເມືອງ ເພີ່ມທະວີການນໍາພາຮອບດ້ານ ຕໍ່ວຽກງານປ້ອງກັນຊາດ-ປ້ອງກັນຄວາມສະຫງົບ ໃຫ້ມີຄວາມໜັກແໜ້ນ, ຍົກສູງສະຕິລະວັງຕົວຕໍ່ການເຄື່ອນໄຫວມ້າງເພທໍາລາຍ ຂອງອິດທິກໍາລັງປໍລະປັກ, ປັບປຸງສອງກໍາລັງໃຫ້ມີຄວາມເຂັ້ມແຂງ, ມີຄວາມຈົງຮັກພັກດີຕໍ່ປະຊາຊົນ, ຕໍ່ລະບອບໃໝ່; ເອົາໃຈໃສ່ປົກປັກຮັກສາຄວາມສະຫງົບ, ຄວາມເປັນລະບຽບຮຽບຮ້ອຍ; ສະກັດກັ້ນບັນຫາຢາເສບຕິດ ເຮັດໃຫ້ສັງຄົມມີຄວາມສະຫງົບປອດໄພ, ເປັນພື້ນຖານໃຫ້ແກ່ການພັດທະນາເສດຖະກິດ-ສັງຄົມ; ສະເໜີໃຫ້ຄະນະພັກ, ອົງການປົກຄອງເມືອງ ເອົາໃຈໃສ່ຊຸກຍູ້ສົົ່ງເສີມ ແລະ ສ້າງເງື່ອນໄຂໃຫ້ປະຊາຊົນເອົາໃຈໃສ່ເຮັດການຜະລິດກະສິກໍາ, ການລ້ຽງສັດໃຫຍ່ ເປັນສິນຄ້າ, ມີມາດຕະຖານ ເພື່ອສະໜອງໃຫ້ແກ່ຕະຫລາດພາຍໃນ ແລະ ການສົ່ງອອກ; ພ້ອມກັນນັ້ນ, ໃນເງື່ອນໄຂທີ່ເມືອງໄຊຈໍາພອນ ມີຊາຍແດນຕິດກັບ ສສ.ຫວຽດນາມ ເຊິ່ງອົງການປົກຄອງຂັ້ນທ້ອງຖິ່ນຂອງສອງຝ່າຍ ກໍໄດ້ມີການປະສານສົມທົບວຽກງານຮ່ວມກັນເປັນປົກກະຕິ ຈຶ່ງເປັນທ່າແຮງໜຶ່ງຂອງການຜະລິດກະສິກໍາ, ການລ້ຽງສັດໃຫຍ່ເປັນສິນຄ້າ ເພື່ອສ້າງວຽກເຮັດງານທໍາ, ສ້າງອາຊີບຄົງທີ່ໃຫ້ແກ່ປະຊາຊົນບັນດາເຜົ່າ. ສະນັ້ນ, ສະເໜີໃຫ້ບັນດາສະຫາຍ ນໍາໃຊ້ທ່າແຮງດັ່ງກ່າວ ເຂົ້າໃນການສ້າງສາພັດທະນາເສດຖະກິດ-ສັງຄົມຂອງເມືອງໄຊຈໍາພອນ ໃຫ້ມີບາດກ້າວຫັນປ່ຽນທີ່ຕັ້ງໜ້າ, ເອົາໃຈໃສ່ສ້າງ ແລະ ຂະຫຍາຍຮູບແບບເສດຖະກິດລວມໝູ່ຂອງປະຊາຊົນ ໃຫ້ກາຍເປັນຖານເສດຖະກິດອັນໝັ້ນຄົງ ແລະ ໜັກແໜ້ນ, ຊຸກຍູ້ສົ່ງເສີມວິສາຫະກິດຂະໜາດນ້ອຍ ແລະ ກາງ ດ້ວຍການປະຕິບັດນະໂຍບາຍ ແລະ ກົນໄກທີ່ຈໍາເປັນໃນການເຂົ້າເຖິງແຫລ່ງທຶນ, ຕະຫລາດ ແລະ ນະໂຍບາຍອື່ນໆ ເຮັດໃຫ້ວິສາຫະກິດດັ່ງກ່າວ ມີຄວາມເຂັ້ມແຂງ; ເອົາໃຈໃສ່ການພັດທະນາຊັບພະຍາກອນມະນຸດ ໃຫ້ສອດຄ່ອງກັບຄວາມຮຽກຮ້ອງຕ້ອງການ ແລະ ສາມາດຕອບສະໜອງແກ່ການສ້າງສາພັດທະນາພາຍໃນເມືອງ ດ້ວຍການຊຸກຍູ້ສົ່ງເສີມໃຫ້ລູກຫລານເຫັນໄດ້ຄວາມສໍາຄັນຂອງການຮຽນວິຊາຊີບສາຂາຕ່າງໆ ທີ່ໃຊ້ເວລາການຮຽນສັ້ນ, ໃຊ້ທຶນຮອນໃນການຮຽນບໍ່ຫລາຍ, ສາມາດມີອາຊີບທໍາມາຫາກິນ ໂດຍສະເພາະການສ້າງນັກວິຊາການດ້ານການປູກຝັງ-ລ້ຽງສັດ ເພື່ອເຮັດໃຫ້ການຜະລິດກະສິກໍາພາຍໃນເມືອງຂະຫຍາຍຕົວ ແລະ ມີຄວາມເຂັ້ມແຂງ; ວຽກງານການສຶກສາມີຄວາມສໍາຄັນຫລາຍ ແລະ ຕິດພັນກັບການພັດທະນາວຽກງານຂອງຂະແໜງການອື່ນ ຈຶ່ງມີຄວາມຈໍາເປັນໃນການປັບປຸງຄຸນນະພາບການສຶກສາໃຫ້ສູງຂຶ້ນ ດ້ວຍການສະໜອງຄູສອນໃຫ້ໄດ້ມາດຕະຖານ, ເອົາໃຈໃສ່ການສ້າງ ແລະ ສ້ອມແປງໂຮງຮຽນ ເພື່ອອໍານວຍຄວາມສະດວກໃຫ້ແກ່ລູກຫລານໄດ້ເຂົ້າຮຽນ, ປະກອບປື້ມແບບຮຽນ, ອຸປະກອນການຮຽນ ພ້ອມທັງສ້າງເງື່ອນໄຂການເຂົ້າເຖິງການສຶກສາ ແລະ ຂະຫຍາຍຕາໜ່າງການສຶກສາໃຫ້ມີຄຸນນະພາບສູງຂຶ້ນ ແລະ ທົ່ວເຖິງຢູ່ເຂດຫ່າງໄກສອກຫລີກ; ເອົາໃຈໃສ່ປັບປຸງໂຮງໝໍຊຸມຊົນ ດ້ວຍການປະກອບອຸປະກອນ, ເຄື່ອງມືດ້ານການແພດ ທີ່ສາມາດຍົກສູງປະສິດທິພາບໃນການປິ່ນປົວໃຫ້ສູງຂຶ້ນ, ເຮັດໃຫ້ພໍ່ແມ່ປະຊາຊົນສາມາດເຂົ້າເຖິງການບໍລິການດ້ານສາທາລະນະສຸກສະດວກ, ວ່ອງໄວຂຶ້ນ ເພີ່ມຄວາມສາມາດໃນການເຝົ້າລະວັງຕິດຕາມ, ບົ່ງມະຕິ, ຊອກຄົ້ນຫາ ແລະ ໂຕ້ຕອບກໍລະນີພະຍາດລະບາດໃຫ້ໄດ້ໄວ ໂດຍສະເພາະພະຍາດໂຄວິດ-19; ເອົາໃຈໃສ່ວຽກງານພັດທະນາຊົນນະບົດ ແລະ ແກ້ໄຂຄວາມທຸກຍາກ ຂອງປະຊາຊົນໃຫ້ເຂົ້າສູ່ລວງເລິກ ແລະ ທົ່ວເຖິງ ຕາມທິດ 3 ສ້າງ ແລະ ພັດທະນາຊົນນະບົດດ້ວຍການສົ່ງເສີມການຜະລິດເປັນສິນຄ້າ ຄຽງຄູ່ກັບການຈັດສັນພູມລໍາເນົາ ແລະ ບ່ອນທໍາມາຫາກິນຖາວອນ; ສ້າງພື້ນຖານໂຄງລ່າງທີ່ຈໍາເປັນຮັບໃຊ້ການຜະລິດ ແລະ ປັບປຸງຊີວິດການເປັນຢູ່ຂອງປະຊາຊົນ; ປັບປຸງກົງຈັກການຈັດຕັ້ງຕາມທິດກະທັດຮັດ ສະກັດກັ້ນການນໍາໃຊ້ສິດ, ອໍານາດໃນທາງທີ່ບໍ່ຖືກກົດໝາຍ ຂອງພະນັກງານລັດ, ສ້າງເງື່ອນໄຂອໍານວຍຄວາມສະດວກໃຫ້ແກ່ປະຊາຊົນ ມີສ່ວນຮ່ວມເຂົ້າໃນວຽກງານບໍລິຫານລັດ ສາມາດເຂົ້າເຖິງຂະບວນການຍຸຕິທໍາ ເຮັດໃຫ້ຄວາມເຊື່ອໝັ້ນຂອງປະຊາຊົນ ຕໍ່ການນໍາພາຂອງພັກ-ລັດໃຫ້ສູງຂຶ້ນ; ເພີ່ມທະວີການຊີ້ນໍາ-ນໍາພາຂອງອົງຄະນະພັກເມືອງ ຕໍ່ການເຄື່ອນໄຫວວຽກງານຂອງສະມາຊິກສະພາປະຊາຊົນແຂວງ ທີ່ປະຈໍາຢູ່ເມືອງໄຊຈໍາພອນ ໃຫ້ສາມາດເຄື່ອນໄຫວປະຕິບັດໜ້າທີ່ເປັນຕົວແທນຂອງປະຊາຊົນຕາມກົດໝາຍກໍານົດ ດ້ວຍການຄົ້ນຄວ້າປະກອບບຸກຄະລາກອນຊ່ວຍວຽກ ລວມທັງສະຖານທີ່ເຮັດວຽກ, ການປະສານສົມທົບວຽກງານກັບຂະແໜງການອື່ນຂອງເມືອງ ແນໃສ່ເຮັດໃຫ້ການປະຕິບັດໜ້າທີ່ວຽກງານຂອງສະມາຊິກສະພາປະຊາຊົນແຂວງ ປະຈໍາຢູ່ເມືອງໄຊຈໍາພອນ ເຂົ້າສູ່ລະບົບ ແລະ ມີປະສິດທິຜົນນັບມື້ສູງຂຶ້ນ, ສາມາດຕ້ອນຮັບພໍ່ແມ່ປະຊາຊົນເຂົ້າມາສະເໜີບັນຫາຕ່າງໆ ຕໍ່ຕົວແທນຂອງຕົນ.

ໃນການມາຢ້ຽມຢາມ ແລະ ເຮັດວຽກຄັ້ງນີ້, ທ່ານ ປອ. ໄຊສົມພອນ ພົມວິຫານ ໄດ້ມອບເຄື່ອງອຸປະໂພກ, ບໍລິໂພກ, ອຸປະກອນການເແພດ, ອຸປະກອນການສຶກສາ ພ້ອມທັງເຂົ້າສານອາຫານແຫ້ງໃຫ້ແກ່ເມືອງໄຊຈຳພອນ ລວມມູນຄ່າ 30 ກວ່າລ້ານກີບ; ນອກນັ້ນຍັງໄດ້ໄປຢ້ຽມຊົມໂຄງການຕາຝັ່ງເຈື່ອນ,ຕະຫຼາດໃໝ່ເຂດເທດສະບານເມືອງປາກຊັນ ແລະໂຄງການກໍ່ສ້າງຂົວຂ້າມແມ່ນຳ້ຂອງ ມິດຕະພາບ ລາວ ໄທ ແຫ່ງທີ V ຕື່ມອີກ.